Sîrîrî Kaareta Wanî Innape Jesus Kuꞌnenan Judeuyamîꞌ Ton Pe 3:1-19
3 Mîrîrî yeꞌnen uyonpayamîꞌ, tîmîrî pe amoꞌkaꞌpîiyaꞌnîkon. Moropai tîntîrî yapisîkonpa amenkaꞌpîiyaꞌnîkon. Mîrîrî wenai Jesus pîꞌ esenumenkatî kureꞌne. Mîîkîrî wanî Paapa narimaꞌpî pe teepîremasanon esanon yepotorî pe aweꞌtoꞌpe uurîꞌnîkon ton pe. Mîîkîrî rî kupî uurîꞌnîkonya innape.
2 Mîîkîrî wanîꞌpî Paapa naipontîꞌpî pe, imaimu yawîrî tîîkoꞌmansen pe, pena Paapa pemonkonoyamîꞌ esaꞌ pe tîwanî yai Moisés nurîꞌtî koꞌmamîꞌpî warantî.
3 Tîîse Jesus wanî tîpoitîrî Moisés nurîꞌtî yentai tîweꞌsen pe. Epuꞌtîꞌnîkon maasa pra manniꞌ pata esaꞌ yapurî kureꞌne ipoitîrî yapurî yentai. Mîrîrî warantî Jesus, pata esaꞌ munmu yapurî eꞌpai awanî, Moisés, Paapa poitîrî yapurî yentai.
4 Inna seruꞌ pepîn tamîꞌnawîron pata wanî tesaꞌkon ke, tiwin pîꞌ kaisarî. Tîîse Paapa wanî tamîꞌnawîron esaꞌ pe.
5 Moropai Moisés nurîꞌtî wanîꞌpî pena teesenyakaꞌmatoꞌ pîꞌ. Yairî puꞌkuru awanîꞌpî. Paapa maimu yawîrî ikupîꞌpîiya Paapa pemonkonoyamîꞌ esaꞌ pe. Îꞌ kaiꞌma Paapa yapurî toꞌya ekaremekîꞌpîiya. Tamîꞌnawîrî inekaremekîꞌpî wanîꞌpî maasa aweꞌkupîton pîꞌ ekaremeꞌnen pe.
6 Mîrîrî warantî nîrî Cristo wanî, Paapa maimu yawîrî. Tîîse Paapa poitîrî neken pepîn Cristo wanî, Paapa munmu pe puꞌkuru awanî, moropai tamîꞌnawîronkon tîpemonkonoyamîꞌ esaꞌ pe awanî. Uurîꞌnîkon wanî ipemonkono pe, innape ikupî pîꞌ koꞌmannî ya, tîrumakai pra. Moropai Paapa winîpainon morî yapiꞌse nîmîkî pîꞌ koꞌmannî ya, ipemonkono pe eꞌnî.
Paapa Pemonkonoyamîꞌ Erîꞌkaꞌtoꞌ
7 Mîrîrî yeꞌnen etatî îꞌ kaiꞌma Morî Yekaton Wannîya taꞌpî mîrîrî innape ikupî rumakatoꞌ pîꞌ. Taꞌpîiya:Sîrîrîpe Paapa maimu etayaꞌnîkon ya yai,
8 anetapai pra keꞌtî, penaatamokon wanîꞌpî anetapai pra warantî.Tesaꞌkon pe Paapa yuꞌse pra toꞌ wanîꞌpî.Moropai Paapa yonpa pîꞌ toꞌ koꞌmamîꞌpî keren po siꞌma.
9 Miarî îꞌ ituꞌse tîweꞌtoꞌkon tîrîuyaanepuꞌpai toꞌ wanîꞌpî.Innape ukupî toꞌya pra awanîꞌpî.Teuren asakîꞌne pemonkon konoꞌ kaisarî,îꞌ rî kupîuya toꞌ pîikaꞌtîtoꞌpe eraꞌmatîpoꞌnîkon.
10 Mîrîrî yeꞌnen mararî pra ekoreꞌmaꞌpîinkamoro upemonkonoyamîꞌ winîkîi.Moropai taꞌpîuya, insamoro wanî sîrîrî, teesenumenkatoꞌkon yawîrî.Moropai îꞌ pensa umaimu yawîrî pra toꞌ koꞌmamî.Uyeseru anepuꞌpai pra toꞌ wanî.
11 Mîrîrî yeꞌnen toꞌ winîkîi ekoreꞌmaꞌpî.Moropai taꞌpîuya, tiwin kin insamoro ewomî pepîn manniꞌ pata yaꞌ, untîrîꞌpî yaꞌ.Teerîꞌkaꞌtoꞌkon eporî toꞌya pepîn uupia.
Mîrîrî taꞌpîiya tînenaꞌpoka ton pe pra. Mîrîrî warantî Morî Yekaton Wannîya taꞌpî manniꞌkan utamokon pîꞌ.
12 Aka uyonpayamîꞌ, mîrîrî warantî pra eꞌtî. Imakuiꞌpî pe teesenumenkai innape ikupîyaꞌnîkon pra keꞌtî. Paapa, ipatîkarî tîîkoꞌmansen piapai aatarimakon namai, tîwarî eꞌtî.
13 Tîîse amîrîꞌnîkon koreꞌta tiaronkon yausinpayaꞌnîkon yuwatî, innape ikupî pîꞌ toꞌ koꞌmantoꞌpe. Sîrîrîpe, penanan wei tînîmîꞌse pra, toꞌ meruntîtannîꞌtî, imakuiꞌpîya toꞌ yenkuꞌtî namai. Toꞌ yewan yaꞌ eewonsaꞌ ya anpîinamapai pra toꞌ wanî namai.
14 Maasa pra innape ikupî pîꞌ koꞌmannî ya, Cristo yapisîꞌpî pata pai ataretîꞌkan pîkîrî, mîrîrî yai iwanîyakon pe puꞌkuru eꞌnî. Tamîꞌnawîrî îꞌ tîrîiya yapisî, imîrî pe eꞌnî yeꞌnen.
15 Enpenatatî, Paapa maimu eꞌmenukasaꞌya taasaꞌ pîꞌ. Taꞌpîiya:Sîrîrîpe imaimu etayaꞌnîkon ya, anetapai pra keꞌtî.Penaron atamokon wanîꞌpî warantî pra eꞌtî.Eta tîuyaꞌnîkon yai toꞌ ekoreꞌmaꞌpî,tesaꞌkon pe Paapa yuꞌse pra toꞌ wanîꞌpî.Mîrîrî warantî pra eꞌtî
taasaiꞌya man.
16 Anîꞌkan inkamoro Paapa maimu etatîponoꞌsan moropai yawîrî pra esiꞌsan? Tamîꞌnawîronkon manniꞌkan Moisés nurîꞌtî nîmoꞌkaꞌsan Egito pata poi.
17 Anîꞌkan yarakkîrî Paapa ekoreꞌmaꞌpî asakîꞌne pemonkon (40) konoꞌ kaisarî? Manniꞌkan imakuiꞌpî kuꞌse ennaꞌpoꞌsan moropai imakuiꞌpî yaꞌ enaꞌsan manniꞌkan eꞌtîꞌkaꞌsan keren po, inkamoro yarakkîrî Paapa ekoreꞌmaꞌpî.
18 Anîꞌkan yarakkîrî Paapa eseurîmaꞌpî moropai taꞌpîiya tîmaimu tînenaꞌpoka ton pepîn. —Tiwin kin uupia eerîꞌkaꞌtoꞌkon eporîyaꞌnîkon pepîn —taꞌpîiya. Eeseurîmaꞌpî manniꞌkan tîmaimu yawîrî tîweꞌsanon pepîn pîꞌ.
19 Mîrîrî yeꞌnen epuꞌtîꞌnîkon, inkamoroya Paapa nekaremekîꞌpî teerîꞌkaꞌtoꞌkon eposaꞌ pra awanîꞌpî, maasa pra innape ikuꞌsaꞌ toꞌya pra awanî wenai.
