Sîrîrî Kaareta Wanî Innape Jesus Kuꞌnenan Judeuyamîꞌ Ton Pe 4:1-16
4 Pena îꞌ tîrî tîuya taꞌpî Paapaya warantî, sîrîrîpe tîpemonkonoyamîꞌ pia tîrî tîuya taa pîꞌ aakoꞌmamî. Tînkonekaꞌpî, toꞌ erîꞌkaꞌtoꞌkon ton eporî toꞌya yuꞌse Paapa wanî. Mîrîrî yeꞌnen aka, tîwarî eꞌtî, tamîꞌnawîrî Paapa nîtîrî yapisîkonpa, tiwinanya yapisî pra awanî namai.
2 Maasa pra penaronkonya sîrîrî itekare etaꞌpî warantî, uurîꞌnîkonya eꞌpîikaꞌtîntoꞌ yekare etasaꞌ man. Pena inkamoroya itekare eta yai, etaꞌpî toꞌya, îꞌ pe pra rî awanîꞌpî toꞌ pia. Maasa pra eta pe neken etaꞌpî toꞌya. Mîrîrî yeꞌnen teerîꞌkaꞌtoꞌkon ton eporî toꞌya pra awanîꞌpî, innape ikupî toꞌya pra awanî yeꞌnen.
3 Tîîse inkamoro warantî pra uurîꞌnîkon wanî maasa pra innape ikupîꞌnîkon wenai. Mîrîrî yeꞌnen eporî pe man Paapa pia erîꞌkaꞌnîtoꞌ ton, taasaiꞌya manniꞌ yawîrî. Maasa pra Paapa maimu eꞌmenukasaꞌya taasaꞌ:Îꞌ pensa umaimu manaꞌpokauya pepîn,teekoreꞌmai eseurîmaꞌpî:Innape ukupî toꞌya pra awanî yeꞌnen,tiwin kin uupia teerîꞌkaꞌtoꞌkoneporî toꞌya pepîn
taasaꞌ Paapaya man.
Mîrîrî taꞌpîiya tamîꞌnawîrî erîꞌkaꞌnîtoꞌ ton, tîntîrî koneka yaretîꞌkasaꞌ tîuya tîîse. Maasa pra pena, pata koneka tîuya patapai, mîrîrî antîîpai Paapa wanîꞌpî innape ikuꞌnenan pia.
4 Mîrîrî epuꞌtîꞌnîkon maasa pra Paapa maimu eꞌmenukasaꞌ po tiaron pata aweꞌmenukasaꞌ man. Teeseurîmasen asakîꞌne miaꞌ ponaꞌno wei pîꞌ.Asakîꞌne miaꞌ ponaꞌno wei yai Paapa erîꞌkapîꞌpî tamîꞌnawîron teesenyakaꞌmatoꞌ konekasaꞌ tîuya tîpo
kaiꞌma aweꞌmenukasaꞌ wanîꞌpî.
5 Moropai mîrîrî pîꞌ rî eeseurîmaꞌpî: —Inkamoroya untîrî teerîꞌkaꞌtoꞌkon ton eporî pepîn tiwin kin —taꞌpîiya.
6 Manniꞌkan eꞌmaiꞌ pe etaꞌtîponoꞌsanya itekare etaꞌpî tîîse innape ikupî toꞌya pra awanîꞌpî. Mîrîrî wenai eporî toꞌya pra awanîꞌpî. Mîîwîni tîîse tiaronkonya eporî pe man, iipia teerîꞌkaꞌtoꞌkon.
7 Mîrîrî epuꞌtîꞌnîkon maasa pra pena mîrîrî esuwaꞌkasaꞌ tîpo, Paapaya wei moꞌkaꞌpî sîrîrîpan weiyu pe aweꞌtoꞌpe. Sîrîrî pîꞌ eeseurîmaꞌpî pena tuꞌke konoꞌ tîpo mîrîrî menukatoꞌpe Davi nurîꞌtîya. Taꞌpîiya oꞌnon pata eeseurîmasaꞌ manniꞌ pata:Sîrîrîpe Paapa maimu etayaꞌnîkon ya,innape ankuꞌpai pra keꞌtî.Imaimu yawîrî pra keꞌtî
taꞌpîiya.
8 Josué nurîꞌtîya pemonkonyamîꞌ yarîꞌpî pena toꞌ erîꞌkaꞌtoꞌ pataꞌseꞌ Canaã pona. Tîîse mîrîrî toꞌ erîꞌkaꞌtoꞌ pîꞌ neken Paapa eseurîmasaꞌ pra man, tîîse tiaron erîꞌkaꞌnîtoꞌ pîꞌ eeseurîmaꞌpî, maasa uurîꞌnîkon erîꞌkaꞌtoꞌ weiyu pîꞌ.
9 Mîrîrî yeꞌnen mîrîrî erîꞌkaꞌnîtoꞌ weiyu koꞌmamî Paapa pemonkonoyamîꞌ erîꞌkaꞌtoꞌ tonpe, îꞌ kaiꞌma teesenyakaꞌma tîpo Paapa erîꞌkapîꞌpî warantî, asakîꞌne miaꞌ ponaꞌno wei yai eerîꞌkapîꞌpî warantî.
10 Maasa pra anîꞌya Paapa pia teerîꞌkaꞌtoꞌ ton eposaꞌ ya, mîîkîrî esekaꞌnunka pepîn, teerîꞌkaꞌtoꞌ ton eporîpa. Tîîse eerîꞌkapî, Paapa erîꞌkapîꞌpî warantî, tamîꞌnawîron konekasaꞌ tîuya tîpo.
11 Mîrîrî yeꞌnen tîwarî eꞌnîpaiꞌnîkon Paapa pia erîꞌkaꞌnîtoꞌ yuwaꞌka namai. Aka, Paapa maimu yuꞌse pra eꞌnîpai pra man, manniꞌkan penaronkonya Paapa maimu yuwaꞌkaꞌpî warantî pra. Moropai mîrîrî wenai teerîꞌkaꞌtoꞌkon ton eporî toꞌya pra awanîꞌpî Paapa pia.
12 Maasa pra Paapa maimuya enen koꞌmannîtoꞌ ton enepî uupiaꞌnîkon. Meruntî ke awanî, moropai kasupara ipokasaꞌ seꞌ yataimîrî ikeꞌ yentai awanî. Mîrîrî kasuparaya uyesaꞌkon yaꞌtî eꞌpainon ituꞌna, uyeꞌpîkon yawon ukaseꞌkon pîkîrî. Tîîse mîrîrî yentai Paapa maimu wanî yasoꞌkaton pe, ituꞌnawon esenumenkantoꞌ moropai uyekatonkon mîrîrî eseporî emapuꞌtîiya saꞌnîrî. Moropai uyeserukon eraꞌmaiya yairon kuꞌsaꞌ eraꞌmaiya moropai yairon pepîn kuꞌsaꞌ eraꞌmaiya, uyewankon yaꞌ tîîkoꞌmansen.
13 Mîrîrî yeꞌnen inaponkasaꞌ pe awanî tamîꞌnawîrî Paapa yenu yaꞌ. Îꞌ yenomî eserîke pra awanî Paapa yenu kaisarî. Tamîꞌnawîron tînkonekaꞌpî eraꞌma Paapaya. Tamîꞌnawîron wanî aꞌta ke itenu kaisarî îꞌ yenomî pataꞌseꞌ ton pra. Mîrîrî yeꞌnen enpenatanpaiꞌnîkon mîîkîrî pîꞌ, tamîꞌnawîron uurîꞌnîkon nîkupîꞌpî ekaremekî pe man, yairî eꞌnî yairî pra eꞌnî, manniꞌ Paapa pîꞌ enpenatanpaiꞌnîkon. Maasa pra uurîꞌnîkon nîkupîꞌpî yenpoiya kupî sîrîrî.
Jesus Wanî Kureꞌne Teepîremasen
Uurîꞌnîkon Ton Pe
14 Mîrîrî yeꞌnen innape ikupî pîꞌ koꞌmannîpaiꞌnîkon, yairî maꞌre teenai pra. Maasa pra moro man kureꞌnan uurîꞌnîkon ton pe teepîremasanon esanon yepotorî. Manniꞌ toꞌsarî eewomîꞌpî Paapa pia, Jesus mîîkîrî Paapa munmu.
15 Mîîkîrî teepîremasanon esanon yepotorî uurîꞌnîkon ton pe koꞌmamî tîꞌnokoꞌpîkon pe uyeraꞌmakon pîꞌ, maasa pra aꞌtuꞌmîra eꞌnîtoꞌ wenai. Maasa pra pena mîîkîrî yonpaꞌpî Makuiya tuꞌke teseru ton tuwai, sîrîrîpe uurîꞌnîkon yonpa pîꞌ aakoꞌmamî manniꞌ warantî. Tîîse mîîkîrî wanîꞌpî imakuiꞌpî kuꞌnen pe pra.
16 Mîrîrî yeꞌnen erepannîpaiꞌnîkon man iipia eranneꞌ pe pra Paapa nîtîrî yapiꞌse. Maasa pra uurîꞌnîkon eraꞌmaiya tîꞌnokoꞌpî pe. Morî pe tîweꞌtoꞌ wenai uurîꞌnîkon pîikaꞌtîiya. Mîîkîrî yarakkîrî eseurîmanpaiꞌnîkon. Tîwîrî mîîkîrî winîpai upîikaꞌtîtoꞌkon yapisî pîꞌ koꞌmannî, ituꞌse eꞌnîtoꞌ pîkîrî.
