Sîrîrî Kaareta Wanî Innape Jesus Kuꞌnenan Judeuyamîꞌ Ton Pe 5:1-14
5 Aꞌkî, insamoro teepîremasanon esanon yepotorîkon pîꞌ esenumenkanpaiꞌnîkon. Inkamoro wanî tonpayamîꞌ warantî pemonkon pe. Moropai Paapaya inkamoro menka tiaronkon koreꞌtapai. Moropai toꞌ esenyakaꞌmatoꞌ ton tîrîiya, tapurîtoꞌpe toꞌya kaiꞌma, yarakkîrî teeseurîmasen pe toꞌ wanî, tonpayamîꞌ ton pe. Moropai inkamoroya tîîpiaꞌnîkon tiaronkon nenepîꞌpî poꞌtî, toꞌ nîkupîꞌpî imakuiꞌpî ton pe.
2 Morî pe inkamoro wanî tonpayamîꞌ yarakkîrî. Maasa pra toꞌ warantî rî aꞌtuꞌmîra tîweꞌsanon pe inkamoro wanî. Mîrîrî yeꞌnen tiaronkon pakkokon pîꞌ toꞌ ekoreꞌma pepîn imakuiꞌpî kuꞌnenan pîꞌ. Tîîse tîꞌnokoꞌpîkon pe toꞌ eraꞌma toꞌya.
3 Maasa pra aꞌtuꞌmîra tîwanîkon wenai inkamoroya nîrî imakuiꞌpî tînkupîꞌpîkon ton pe ipoꞌtî eꞌpai awanî, tonpayamîꞌ neken imakuiꞌpî kupîtîponoꞌsan nîkupîꞌpî ton pe pra.
4 Anîꞌya taa eserîke pra awanî tîîwarîrî: —Teepîremasen pe eꞌpai wai ipîkku pe —taiya eserîke pra awanî. Tîîse Paapaya neken imenkasaꞌ yai, ituꞌse tîwanî yawîrî, mîîkîrî wanî kureꞌnan teepîremasen pe. Îꞌ kaiꞌma Arão nurîꞌtî yannoꞌpî Paapaya warantî toꞌ menkaiya.
5 Mîrîrî warantî nîrî Cristoya taasaꞌ pra man: —Teepîremasanon esanon yepotorî pe eꞌpai wai —taasaiꞌya pra man. Tîîse Paapaya neken imenkaꞌpî teepîremasanon esaꞌ pe aweꞌtoꞌpe. Taꞌpî Paapaya ipîꞌ see warantî:Unmu pe puꞌkuru awanî sîrîrî,moropai sîrîrîpe tamîꞌnawîronkon pîꞌekaremekîuya,ayun pe uurî wanî
taꞌpîiya.
6 Moropai inîꞌrî tîmaimu eꞌmenukasaꞌ po tiaron pata yaꞌ:Teepîremasen pe awanî ipatîkaron pe,imoꞌkauya pata pe pra.Manniꞌ teepîremasen Melquisedequewanîꞌpî warantî awanî
taꞌpîiya.
7 Pena tarî non po tîîkoꞌmamî yai Jesus epîremaꞌpî. Meruntî ke, moropai tîkarau yeꞌka pe Paapa pîꞌ esatîꞌpîiya tîîsaꞌmantatoꞌ winîpai tîpîikaꞌtîtoꞌpeiya. Moropai Paapaya mîîkîrî maimu etaꞌpî maasa pra tîîpia eeturumakasaꞌ epuꞌtî tîuya yeꞌnen.
8 Teuren Paapa munmu pe siꞌma tîweꞌtarumaꞌtîtoꞌ epuꞌtîꞌpîiya. Mîrîrî wenai îꞌ kaiꞌma Paapa maimu yawîrî tîwanî pîꞌ eesenupaꞌpî.
9 Moropai teekonekasaꞌ yai, tamîꞌnawîrî tîyun maimu yawîrî teenasaꞌ yai, mîîkîrî enaꞌpî ipatîkaron eꞌpîikaꞌtîntoꞌ esaꞌ pe, tamîꞌnawîrî manniꞌkan morî Paapa maimu yawîrî tîweꞌsanon pîikaꞌtînen pe aweꞌtoꞌpe.
10 Moropai Paapaya mîîkîrî Jesus kupîꞌpî teepîremasanon esanon yepotorî ton pe, pemonkonyamîꞌ pîikaꞌtîtoꞌpe, manniꞌ teepîremasanon esanon yepotorî Melquisedeque wanîꞌpî warantî ikupîꞌpîiya.
Innape Ikuꞌtoꞌ Kupî Ya Tîwî, Nariꞌ Pe Awanî
11 Tuꞌke man Melquisedeque yekare pîꞌ ayenupatoꞌkon tîîse îꞌ kaiꞌma ekaremekî eserîke pra man. Maasa pra saꞌman pe awanî, moropai enyaꞌne pe awanîkon. Eesenupapai pra aakoꞌmamîkon sîrîrî tîpose.
12 Teuren pena pata pai eta pîꞌ aakoꞌmansaꞌkon naatîi. Aasîrî yenupaton pe awanîkon eꞌpainon teuren. Tîîse îꞌ kaiꞌma inîꞌ panpîꞌ ayenupanenkon ton yuꞌse awanîkon. Saꞌman pepîn Paapa maimu pîꞌ ayenupakon yuꞌse awanîkon. Mîrîrî yeꞌnen moreyamîꞌ warantî awanîkon, sararu pîꞌ awentamoꞌkakon eserîke pra naatîi tîîse amîrîꞌnîkon man manaꞌ pîꞌ tîweꞌsen more warantî.
13 Mîrîrî tauya sîrîrî maasa pra saꞌman pepîn Cristo yekare pîꞌ eesenupaꞌpîkon neken. Inîꞌ panpîꞌ yuꞌse pra awanîkon. Mîrîrî yeꞌnen pakkokon moreyamîꞌ warantî awanîkon, îꞌ wanî yairon pe, îꞌ wanî imakuiꞌpî pe epuꞌtîyaꞌnîkon pra naatîi. Mîrîrî pîꞌ eesenupakon pra awanîkon yeꞌnen.
14 Tîîse tiyoꞌ ton yuꞌse more pe pra tîweꞌsen wanî warantî, mîîkîrî Paapa maimu pîꞌ teesenupasen wanî. Saꞌme panpîꞌ Paapa yeseru pîꞌ eesenupasaꞌ awanî. Mîrîrî yeꞌnen morî epuꞌtîiya moropai îꞌ wanî imakuiꞌpî pe epuꞌtîiya, mîrîrî pîꞌ teesenupasaꞌ yeꞌnen.
