Sîrîrî Kaareta Wanî Innape Jesus Kuꞌnenan Judeuyamîꞌ Ton Pe 6:1-20
6 Mîrîrî warantî arentan yuwapaiꞌnîkon man, more pepîn esenupasaꞌ epuꞌnen pe warantî, epuꞌnen pe eꞌnîtoꞌpeꞌnîkon. Eꞌmaiꞌ pe esenupanîꞌpî yaꞌ koꞌmannîpai pra man. Pena itekare etaꞌpî see warantî. Penaron imakuiꞌpî uyeserukon rumakatoꞌ moropai innape Paapa kuꞌtoꞌ etaꞌpî uurîꞌnîkonya.
2 Moropai etaꞌpî uurîꞌnîkonya, esenpatakonantoꞌ yekare etaꞌpî, moropai îꞌ kaiꞌma tiaron Paapa yapurînen pe tîweꞌsen pona miaꞌ tîîtoꞌ yekare etaꞌpî. Moropai saꞌmantan tîpo eꞌmîꞌsaꞌkantoꞌ yekare etaꞌpî. Moropai tiwinanoꞌpî wei yai, tuipî yai, Paapaya pemonkonyamîꞌ yenuntoꞌ ipatîkarî eꞌtarumaꞌtîntoꞌ yekare etaꞌpî uurîꞌnîkonya.
3 Mîrîrî etasaꞌ pata pai epuꞌtîꞌnîkon. Tarîpai inîꞌ panpîꞌ epuꞌtî eꞌpai man. Moriya mîrîrî pîꞌ esenupanpaiꞌnîkon man, Paapaya itîrî ya.
4 Tiaron pensa Paapaya tiaronkon esenupa tîrî pepîn. Maasa pra oꞌnon yeꞌka pe pena innape Paapa kupîtîponoꞌsan ennaꞌposaꞌ ya teꞌmaꞌpîkon pîꞌ, îꞌ kaiꞌma mîrîrî tînkupîꞌpîkon pîꞌ toꞌ enpenata eꞌpainon inîꞌrî? Toꞌ enpenata eserîke pra awanî. Maasa pra inkamoro wanîꞌpî Paapa epuꞌnenan pe. Moropai Paapa nîtîrîꞌpî kaꞌ poinon epuꞌtîꞌpî toꞌya. Moropai inkamoroya Morî Yekaton Wannî yapisîꞌpî.
5 Inkamoroya epuꞌtîꞌpî, Paapa maimu wanî morî pe. Moropai Paapa nîkupîꞌpî tîmeruntîri ke eraꞌmaꞌpî toꞌya, ikupîiya kupî warantî amenan pata yaꞌ.
6 Tîîse tamîꞌnawîrî mîrîrî epuꞌtî tîuyaꞌnîkon tîpo, inkamoroya innape ikuꞌtoꞌ tîuyaꞌnîkon rumaka ya, îꞌ kaiꞌma toꞌ enepî eꞌpainon inîꞌrî toꞌ enpenatatoꞌpe? Toꞌ enepî eserîke pra awanî. Maasa pra inkamoro yeꞌka wanî inîꞌrî itakon iteꞌka pe Cristo pokapîꞌnenan warantî. Moropai mîrîrî kupî toꞌya eraꞌma tîuyaꞌnîkon pîꞌ tiaronkon woꞌmaꞌta Cristo pîꞌ emapuꞌtî toꞌya tamîꞌnawîronkon rawîrî siꞌma. Mîrîrî warantî ikupî toꞌya ya, ipatîkarî tîweꞌtarumaꞌtîtoꞌ winîpai toꞌ epaꞌkatoꞌ ton pra awanî.
7 Maasa eraꞌmatî. Pemonkonyamîꞌ wanî non warantî. Konoꞌ rena tuꞌke iteꞌka amansaꞌ yai morî pe eena moropai îꞌ enaꞌpî pîmî mîrîrî aroꞌtasaꞌ epeta. Mîrîrî moꞌka mîrîrî umî esaꞌya tîwakîri pe. Mîrîrî warantî tîwakîri pe uurîꞌnîkon yapisî Paapaya, innape tîkupî pîꞌ koꞌmannî ya.
8 Tîîse eepeta pra awanî ya, moropai mîꞌnî yeꞌ aroꞌta, parîꞌ aroꞌta mararî pra, mîrîrî wanî pepîn morî pe. Moropai mîrîrî eraꞌma itesaꞌya îꞌ pe pra rî. Mîrîrî poꞌtî itesaꞌya mîrîrî. Mîrîrî warantî inkamoro pemonkonyamîꞌ tîrumakatîponkon yenumî Paapaya.
9 Tîîse uyonpayamîꞌ, mîrîrî warantî eseurîma tanne nariꞌ pîꞌ, mîrîrî warantî awanîkon kupîuya pra wai. Maasa pra morî ankupîꞌpîkon wenai, epuꞌtî pîꞌ wai îꞌ kaiꞌma morî pe Paapaya amîrîꞌnîkon kuꞌsaꞌ, apîikaꞌtîiyaꞌnîkon yeꞌnen.
10 Paapa wanî pepîn yairî tîweꞌsen pe pra. Mîrîrî yeꞌnen mîîkîrîya tîîwanmîra amîrîꞌnîkon esenyakaꞌmatoꞌ kupî pepîn. Moropai tiaronkon ipemonkonoyamîꞌ saꞌnamatoꞌyaꞌnîkon toꞌ pîikaꞌtîtoꞌyaꞌnîkon wenai, innape Paapa yapurîyaꞌnîkon esepuꞌtî. Moropai sîrîrî tîpose awanîyakonkon pîikaꞌtîtoꞌyaꞌnîkon kupîiya pepîn tîîwanmîra.
11 Mîrîrî yeꞌnen kureꞌne anna esenumenka tiwin pîꞌ awanîkon tanne, akaisarîꞌnîkon. Yairî maꞌre teenai pra ikupî pîꞌ akoꞌmantî aasaꞌmantakon pîkîrî, Paapa winîpainon morî puꞌkuru annîmîkîkon yapisîkonpa.
12 Mîrîrî yeꞌnen enyaꞌne pe awanîkon eꞌpai pra man. Innape ikuꞌnenan nîkupî ankuꞌpai pra keꞌtî. Tîîse eꞌtî manniꞌkan innape ikupî pîꞌ tîîkoꞌmansenon warantî, moropai teesetaꞌkai pra inîmîꞌnenan warantî. Mîrîrî kupî pîꞌ aakoꞌmamîkon ya, îꞌ tîntîrî pe Paapa nekaremekîꞌpî yapisîyaꞌnîkon puꞌkuru.
Îꞌ Taꞌpî Tîuya Kuꞌnen Paapa Wanî
13 Epuꞌtîꞌnîkon, seruꞌyeꞌ pe pra îꞌ kupî taa ya, uurîꞌnîkonya taa uyentainon ipîkku pe tîweꞌsenya eta tanne. Mîrîrî wenai innape umaimukon wanî eesepuꞌtî. Mîrîrî warantî pena Paapaya taꞌpî Abraão nurîꞌtî pîꞌ îꞌ kupî tîuya. Moropai tîmaimu tîrîꞌpîiya iipia, tînenaꞌpoka ton pe pra tînkupî tonpe.
14 Tîîse etatoꞌpeiya tentainon ton pra awanî yeꞌnen, Paapaya taꞌpî tîmaimu manaꞌpoka tîuya pe pra:—Paapa uurî. Uyentainon ton pra man.Mîrîrî yeꞌnen tauya apîꞌmorî pe apîremauya seruꞌ pepîn.Moropai mararî pra anmukuyamîꞌapayanyamîꞌ epamî kupî sîrîrî
—taꞌpîiya Abraão nurîꞌtî pîꞌ.
15 Mîrîrî taasaꞌ Paapaya yeꞌnen pena pata pai Abraão nurîꞌtîya inîmîkî koꞌmannîpîꞌpî teesetaꞌkai pra. Moropai mîrîrî taꞌpî Paapaya yawîrî Paapa winîpainon yapisîꞌpî Abraão nurîꞌtîya.
16 Mîrîrî warantî tiaronya —Ikupîuya —taa ya, ipîkku pe tîweꞌsen itentainonya eta tanne, innape awanî epuꞌtî, —Ikupîiya pepîn naka —tîkai pra. Mîrîrî yeꞌnen anîꞌ esiyuꞌpîtî pepîn imaimu pîꞌ.
17 Mîrîrî warantî nîrî tîpemonkonoyamîꞌ pîꞌ Paapaya tîmaimu ekaremekîꞌpî aronne epuꞌtî toꞌya yuꞌse tîwanî yeꞌnen. Îꞌ kupî tîuya taasaꞌ tîuya manniꞌ yapiꞌnenanya yapiꞌtoꞌpe. Moropai tîwîrîrî teeseurîmaꞌpî moꞌtanîpîiya pepîn. Mîrîrî yeꞌnen eeseurîmaꞌpî. —Paapa uurî, uyentainon ton pra man innape ikupîuya —taꞌpîiya. Ikupî tîuya taꞌpîiya moropai îꞌ pensa tîmaimu manaꞌpokaiya pepîn.
18 Mîrîrî yeꞌnen asakîꞌne man. Îꞌ taꞌpî Paapaya, inîꞌrî inyakanmaiya eserîke pra. Maasa pra îꞌ pensa Paapa wanî pepîn seruꞌ pe. Moropai mîrîrî wenai uurîꞌnîkon, iipia eturumakaꞌsanya upîikaꞌtîiyaꞌnîkon epuꞌtî, “yai pra itîrîiya” tîkai pra. Mîrîrî yeꞌnen inîmîkî pîꞌ koꞌmannî teesetaꞌkai pra.
19 Manniꞌ apoꞌyen yeꞌseꞌ pe toꞌ nîtîrî warantî, mîrîrî innape ikuꞌtoꞌ wanî saꞌman pe. Uyapîtanîꞌnenkon pe awanî uyewankon yaꞌ. Mîrîrî wenai Paapa pia puꞌkuru erepannî nîmîkî pîꞌ koꞌmannî, sîrîrî innape ikuꞌtoꞌ rumaka pepîn tiwin kin.
20 Maasa pra aasîrî pemonkon ewonsaꞌ man Paapa pia puꞌkuru urawîrîꞌnîkon, mîîkîrî Jesus. Teepîremasanon esanon yepotorî pe eenasaꞌ man. Uurîꞌnîkon ton pe eeseurîma sîrîrî moropai ipatîkarî aakoꞌmamî upîikaꞌtîkon pîꞌ, pena teepîremasanon esanon yepotorî Melquisedeque eꞌpîtîꞌpî warantî eenaꞌpî.
