Sîrîrî Kaareta Wanî Innape Jesus Kuꞌnenan Judeuyamîꞌ Ton Pe 7:1-28
7 Tarîpai eseurîma sîrîrî Melquisedeque yekare pîꞌ. Melquisedeque mîîkîrî Salém ponkon esaꞌ pe tîweꞌsen. Moropai pemonkonyamîꞌ tonpe teepîremasen pe awanîꞌpî. Inkamoro tonpe eeseurîmapîtîꞌpî Paapa yarakkîrî, tamîꞌnawîronkon yentainon puꞌkuru. Pena Abraão nurîꞌtî ennaꞌpo koꞌmannîpî tanne, pata esanon tîꞌka tîpo, mîîkîrî ponaya Melquisedeque wîtîꞌpî epose. Moropai mîîkîrî eporî tîuya pe, morî pe Abraão nurîꞌtî eꞌtoꞌpe taꞌpîiya Paapa pîꞌ.
2 Mîrîrîya Abraão nurîꞌtîya inkamoro tîntîꞌkaꞌsan yemanne pantakaꞌpî miaꞌ tamîꞌnawîrî yonpa kaisarî moropai tiwin itonpa tîrîꞌpîiya iipia, itonparîꞌpî yarakkîrî aweꞌnîmîꞌpî. Mîrîrî warantî itîrîꞌpîiya Melquisedeque pia. Mîîkîrî eseꞌ wanîꞌpî Melquisedeque pe, taatoꞌ yairon esaꞌ pe tîweꞌsen. Moropai tiaron iteseꞌ wanîꞌpî Salém ponkon esaꞌ pe aweꞌtoꞌ. Taatoꞌ wanî morî tîwanmîn esaꞌ pe tîweꞌsen. Mîrîrî warantî asakîꞌne iteseꞌ wanîꞌpî.
3 Mîîkîrî Melquisedeque wanîꞌpî oꞌnon pata pai esenpoꞌpî pe eesepuꞌtî pra. Itun moropai isan moropai tiaronkon itamorîꞌsan esepuꞌtî pra awanîꞌpî. Mîrîrî yeꞌnen eesenpoꞌpî esepuꞌtî pra awanî. Moropai aasaꞌmantaꞌpî esepuꞌtî pra nîrî. Tîîse mîîkîrî koꞌmantoꞌ wanî Paapa munmu warantî. Awanî teepîremasen pe ipatîkarî taataretîꞌkasen pe pra.
4 Maasa eraꞌmatî, îꞌ kaiꞌma kureꞌne Melquisedeque wanîꞌpî. Maasa pra pena utamokon Abraão nurîꞌtîya teyatonon tîꞌkasaꞌ tîuya yai, toꞌ yemanne moꞌkasaꞌ tîuya yonpa moꞌkaꞌpî iipia tîntîrî ton. Ipîkku pe Melquisedeque wanîꞌpî.
5 Aꞌkî, Moisés nurîꞌtî kaaretarîya taasaꞌ yawîrî, teepîremasanon, manniꞌkan toꞌ yemanne yonpa Levi payanîꞌsanya tonpakon winîpai yapisî eꞌpai awanî tiwin. Teuren toꞌ yonpayamîꞌ pe tîwanîkon yeꞌka pe Abraão nurîꞌtî payanîꞌsan pe siꞌma.
6 Tîîse mîîkîrî Melquisedeque wanîꞌpî Levi nurîꞌtî payanîꞌpî pe pra. Mîîwîni tîîse Abraão nurîꞌtîya teꞌmatoꞌpe esatîꞌpîiya manniꞌ inmoꞌkaꞌpî iteyatonon piapai yonpa ke. Moropai morî pe Abraão nurîꞌtî koꞌmantoꞌpe taꞌpîiya Paapa pîꞌ manniꞌ Abraão nurîꞌtî Paapa nîtîrîꞌpî yapisîtîponoꞌpî.
7 Aꞌkî, mîîkîrî tiaron pîremanen wanî pepîn inpîremaꞌpî maꞌre, tîîse itentainon pe awanî. Mîrîrî yeꞌnen ipîkku pe Melquisedeque wanîꞌpî Abraão nurîꞌtî yentai, morî pe aakoꞌmantoꞌpe taasaiꞌya yeꞌnen.
8 Moropai tiaron esenumenkantoꞌ wanî. Manniꞌkan Levi nurîꞌtî payanîꞌsan tonpakon winîpai toꞌ nîtîrî yapiꞌnenan wanî warayoꞌkon pe, tîîsaꞌmantasanon pe. Tîîse mîrîrî warantî pra Melquisedeque wanîꞌpî. Maasa pra Paapa maimu eꞌmenukasaꞌ yaꞌ eeseporî pepîn Melquisedeque saꞌmantatoꞌ pîꞌ teeseurîmasen.
9 Moropai taa eꞌpainon Abraão nurîꞌtîya yeꞌmaꞌpî temanne yonpa ke. Moropai Levi nurîꞌtîya nîrî yeꞌmaꞌpî mîrîrî yai. Teuren ipayanyamîꞌ rîꞌsanya teꞌmatoꞌkon yapisî.
10 Maasa pra pena Levi nurîꞌtî esenposaꞌ pra tîîse Abraão nurîꞌtîya yeꞌmaꞌpî. Mîrîrî yeꞌnen taaꞌnîkon eꞌpainon Abraão nurîꞌtî yarakkîrî Levi nurîꞌtî wanîꞌpî Melquisedeque yarakkîrî eeseporî yai. Mîrîrî yai Levi nurîꞌtîya nîrî yeꞌmaꞌpî.
11 Moisés nurîꞌtî nîmenukaꞌpî wanîꞌpî Levi nurîꞌtî payanîꞌsan yonpa wanî pe man teepîremasen pe taatoꞌ. Maasa pra inkamoro wanîꞌpî Arão nurîꞌtî payanîꞌpî pe mîîtoꞌpe. Tîîse inkamoro esenyakaꞌmatoꞌ wenai pemonkonyamîꞌ eꞌpîikaꞌtîsaꞌ ya, inîꞌrî tiaron teepîremasen ton iipîꞌpî pepîn eꞌpainon. Tîîse mîrîrî pîkînsaꞌ aaipî eꞌpai awanîꞌpî, manniꞌ Melquisedeque wanîꞌpî warainon, Arão nurîꞌtî wanîꞌpî warainon pepîn.
12 Mîrîrî yeꞌnen mîîkîrî erepamîꞌpî pata pai, Moisés nurîꞌtî maimu rîꞌpî, îꞌ kaiꞌma Paapa yapurî pîꞌ teeseurîmasen, etinyakaꞌma eꞌpai awanî maasa pra teepîremasen etinyakaꞌma yeꞌnen.
13 Mîîkîrî Uyepotorîkon Jesus pîꞌ eseurîma sîrîrî. Mîîkîrî eꞌsaꞌ pra man Levi nurîꞌtî parîꞌpî pe tîîse tiaron paarîꞌpî pe awanîꞌpî. Moropai inkamoro yonpa esenyakaꞌmasaꞌ pra man teepîremasanon warantî toꞌ nîpoꞌtî poꞌtî pîꞌ.
14 Mîîkîrî esenpoꞌpî Judá nurîꞌtî paarîꞌpî pe. Moropai îꞌ pensa inkamoro Judá nurîꞌtî payannîꞌsan pîꞌ Moisés nurîꞌtî eseurîmasaꞌ pra man, pena teepîremasanon ton pîꞌ teeseurîma yai.
Tiaron Teepîremasen Melquisedeque Warainon
15 Moropai esepuꞌtî aronne, amenan pe itîrîꞌpî Paapaya îꞌ kaiꞌma pemonkonyamîꞌ wîtî tîîpia. Maasa pra tiaron teepîremasen iiꞌsaꞌ man, Melquisedeque warantî, Levi payanîꞌsan warantî pra.
16 Mîîkîrî enasaꞌ pra man teepîremasen pe Levi nurîꞌtî paarîꞌpî pe tîwanî yeꞌnen. Moropai pemonkonyamîꞌ maimu pe eenasaꞌ pra man. Tîîse tîîsaꞌmantatoꞌ yentai tîîkoꞌmantoꞌ wanî yeꞌnen, mîîkîrî enaꞌpî teepîremasen pe. Mîrîrî yeꞌnen tîîsaꞌmantasen pe pra awanî.
17 Maasa pra Paapa maimu eꞌmenukasaꞌya taasaꞌ man:Amîrî wanî pe man teepîremasen pe ipatîkarîmanniꞌ Melquisedeque wanîꞌpî warantî
taasaiꞌya man.
18 Mîrîrî yeꞌnen mîrîrî mai penaroꞌ yawîrî toꞌ eꞌtoꞌ mîrîrî eꞌtîꞌkaꞌpî, maasa pra upîikaꞌtîiyaꞌnîkon eserîke pra awanî yeꞌnen.
19 Maasa pra Moisés nurîꞌtî pîꞌ Paapa nekaremekîꞌpî unkupîkon ton eꞌsaꞌ pra awanîꞌpî yairon pe pemonkon kuꞌnen pe. Morî pe anîꞌ kupîiya pepîn. Tîîse mîrîrî yentai tiaron esenpoꞌpî morî moropai mîîkîrîya uurîꞌnîkon yarî Paapa pia puꞌkuru.
20 Moropai tiaron esenumenkantoꞌ wanî teepîremasen Jesus pîꞌ. Mîrîrî tîîse Paapaya taꞌpî tînenaꞌpoka tonpe pra Jesus pîꞌ, teepîremasen pe aweꞌtoꞌpe ipatîkarî. Mîrîrî warantî taasaiꞌya pra awanîꞌpî tiaronkon Levi nurîꞌtî payannîꞌsan pîꞌ.
21 Tîîse teepîremasen pe Jesus kupî tîuya yai, Paapaya taꞌpî tînenaꞌpoka tonpe pra. Pena Paapa maimu eꞌmenukasaꞌya taasaꞌ see warantî:Paapaya taꞌpî îꞌ pensa innaꞌpoka tîuya pata pe pra:—Amîrî wanî pe manteepîremasen pe ipatîkarî
—taꞌpîiya ipîꞌ.
22 Mîrîrî warantî eeseurîmasaꞌ yeꞌnen, epuꞌtîꞌnîkon Jesus koꞌmamî iipia ipatîkarî, uurîꞌnîkon pîikaꞌtînen pe. Paapaya taasaꞌ yawîrî ikupîꞌpîiya. Mîrîrî wanî Paapa yarakkîrî wanî morî pe eꞌnî emapuꞌtînen pe. Amenan esetantoꞌ pe awanî, morî pe panpîꞌ manniꞌ unkupîkon ton pe inekaremekî Moisés nurîꞌtî pîꞌ yentai.
23 Moropai tiaron esenumenkantoꞌ wanî teepîremasen Jesus pîꞌ. Inkamoro teepîremasanon wanîꞌpî tuꞌke. Maasa pra tîîsaꞌmantasen pe toꞌ wanî yeꞌnen. Eꞌmaiꞌ pe teepîremasen pe tîweꞌsen koꞌmamî eserîke pra awanîꞌpî ipatîkarî.
24 Tîîse mîrîrî warantî pra Jesus wanî ipatîkarî teepîremasen pe aakoꞌmamî. Mîrîrî yeꞌnen aasaꞌmantaꞌpî pataꞌpî yaꞌ tiaron ena teepîremasen pe taa eserîke pra awanî.
25 Mîîkîrî koꞌmantoꞌ wanî sîrîrîpe moropai ipatîkarî. Mîrîrî yeꞌnen manniꞌkan Paapa pia itîîpainokon pîikaꞌtî pîꞌ aakoꞌmamî. Mîîkîrîya pemonkonyamîꞌ ton pe esatî koꞌmannîpî Paapa pîꞌ, maasa pra teepîremasen pe ipatîkarî tîîkoꞌmamî yeꞌnen ikîꞌpî ton pra.
26 Mîrîrî yeꞌnen Jesus wanî ipîkku pe, teepîremasanon esanon yepotorî pe ituꞌse eꞌnîtoꞌpeꞌnîkon. Mîîkîrî wanî morî pe puꞌkuru. Îꞌ nura ton pra iipia. Moropai îꞌ pensa imakuiꞌpî kupîtîpon pe pra awanî. Mîîkîrî koꞌmamîꞌpî pena imakuiꞌpî kuꞌnenan koreꞌta tîîse mîîkîrî nîkupîꞌpî imakuiꞌpî ton pra awanîꞌpî. Moropai mîîkîrî yarîꞌpî Paapaya kaꞌ pona ipîkku pe aakoꞌmantoꞌpe miarî.
27 Mîîkîrî eꞌsaꞌ pra man pena teepîremasanon esanon yepotorîkon eꞌmaiꞌnokon wanîꞌpî warantî. Maasa pra wei kaisarî îꞌ poꞌtî toꞌya yuꞌse awanîꞌpî tînkupîꞌpîkon imakuiꞌpî ton pe. Moropai mîrîrî tîpo tonpayamîꞌ nîkupîꞌpî ton pe ipoꞌtîꞌpî toꞌya. Inkamoro warantî pra awanîꞌpî, imakuiꞌpî tînkupîꞌpî ton pe îꞌ poꞌtîiya yuꞌse pra awanîꞌpî. Tîîse mîîkîrî Jesusya ikupîꞌpî tiwin iteꞌka tamîꞌnawîronkon tonpe. Eeturumakaꞌpî tiaronkonya tîwîtoꞌpe kaiꞌma tamîꞌnawîronkon nîkupîꞌpî imakuiꞌpî yeꞌmapa.
28 Pena Moisés nurîꞌtî maimuya taasaꞌ yawîrî teepîremasanon esanon yepotorîkon ton menkaꞌpî toꞌya, warayoꞌkon. Pemonkon pe tîwanîkon yeꞌnen eꞌtoꞌ yawîronkon pepîn, aꞌtuꞌmînan pe toꞌ wanî. Tîîse mîrîrî tîpo Paapaya tîmaimu tînenaꞌpoka ton pepîn wenai tînmu menkaꞌpî teepîremasen pe aweꞌtoꞌpe. Morî, eꞌtoꞌ yawîron tînmu menkaꞌpîiya, tiaronkon teepîremasanon yentainon. Mîrîrî yeꞌnen mîîkîrî koꞌmamî sîrîrîpe teepîremasanon esanon yepotorî pe ipatîkarî, îꞌ pensa aataretîꞌka tonpe pra.
