Sîrîrî Kaareta Wanî Innape Jesus Kuꞌnenan Judeuyamîꞌ Ton Pe 9:1-28
9 Pena eꞌmaiꞌ pe Paapaya etantoꞌ pîꞌ esenumenkanpaiꞌnîkon. Moisés nurîꞌtî pia itîrîꞌpîiya, îꞌ kaiꞌma tapurîtoꞌ ekaremeꞌnen pe. Mîrîrî ekaremekîꞌpîiya îꞌ kaiꞌma pemonkonyamîꞌya tapurîtoꞌpe Paapa koꞌmantoꞌ ton tînkonekaꞌpîkon ta siꞌma sîrîrî non po.
2 Ekaremekîꞌpîiya manniꞌ Paapa koꞌmantoꞌ bodeyamîꞌ piꞌpîrîꞌpî ke ikonekasaꞌ arakkitawon eꞌmaiꞌnon yuwaꞌtoꞌ wanîꞌpî tamîꞌnawîronkon ewontoꞌpe pra tîîse manniꞌkan teepîremasanon neken ewomî Paapa yapurîi. Mîrîrî morî ta awanîꞌpî apoꞌ, toꞌ kumaꞌtu, moropai moro rî awanîꞌpî trigo puusaꞌ toꞌ nîtîrîꞌpî Paapa tonpe itaponseꞌ po.
3 Mîrîrî tîpo itakon iteꞌkaron wanîꞌpî yuwaꞌsaꞌ pe anîꞌ ewomî namai. Iratai ta awanîꞌpî morî puꞌkuru Paapa koꞌmantoꞌ pataꞌseꞌ.
4 Mîrîrî ese winî awanîꞌpî ouro konekasaꞌ aꞌpusin toꞌ nîpoꞌtî yaponseꞌ. Moropai ita nîrî awanîꞌpî toꞌ esetatoꞌ Paapa nîkupîꞌpî yenseꞌ. Tamîꞌnawîrî ouro pe awanîꞌpî ita, iporo. Mîrîrî yaꞌ toꞌ yuu pe Paapa nîtîrîꞌpî yenseꞌ wanîꞌpî. Moropai mîrîrî yaꞌ Arão nurîꞌtî yenyawon rîꞌpî yei wanîꞌpî manniꞌ aretaꞌpî. Moropai asakîꞌne aweneꞌkon tîꞌ wanîꞌpî oꞌnon pata Paapa maimu eꞌmenukasaꞌ manniꞌ yaponseꞌ pîꞌ.
5 Mîrîrî Paapa maimu yenseꞌ po toꞌ wanîꞌpî asakîꞌne eseꞌ yenpata winî tîweꞌsanon ouro konekasaꞌkon inserîyamîꞌ pe, manniꞌkan Paapa pia puꞌkuru tîîkoꞌmansenon. Inkamoro yapîꞌsaꞌ yarappana îꞌ kaiꞌma pemonkonya teseru koneka Paapa yarakkîrî pataꞌseꞌ pe awanîꞌpî. Mîrîrî pata Paapaya tîîwanmîra imakuiꞌpî kupî pataꞌseꞌ pe awanîꞌpî. Tîîse tamîꞌnawîrî îꞌ moro tîweꞌsen ekaremekî eserîke pra awanî sîrîrîpe.
6 Tamîꞌnawîron Paapa yewîꞌ konekasaꞌ tîuyaꞌnîkon tîpo teepîremasanon ewomî piaꞌtîꞌpî wei kaisarî eꞌmaiꞌnon yuwaꞌtoꞌ morî ta neken. Toꞌ ewomî eꞌpîtîꞌpî mîrîrî tîntîrîkon yeserukon yawîrî mîrîrî kuꞌse.
7 Tîîse itakon iteꞌkaron yuwaꞌtoꞌ ta, teepîremasanon esanon yepotorî ewomî eꞌpîtîꞌpî tiwin iteꞌka tiwin konoꞌ tîîse. Mîîkîrî ewomî pîn mîn ton pra. Tîîse mîîkîrîya anîꞌrî wîîsaꞌ tîuya mînî yarî eꞌpîtîꞌpî Paapa pîꞌ ekaremeꞌse. Mîrîrî yarîiya imakuiꞌpî tînkupîꞌpî ton pe. Moropai tonpayamîꞌ nîkupîꞌpî imakuiꞌpî tînepuꞌtîkon pe pra ikuꞌsaꞌ toꞌya ton pe yarîꞌpîiya.
8 Mîrîrî Paapa yewîꞌ ta, toꞌ nîkupî wenai Morî Yekaton Wannîya uyenupakon aronne epuꞌtoꞌpe kaiꞌma. Manniꞌ itakon iteꞌkaron yuwaꞌtoꞌ, morî puꞌkuru Paapa koꞌmantoꞌ ta, anîꞌ ewomî pîn. Aatarakkanmoka eserîke pra aakoꞌmamî eꞌmaiꞌnon yuwaꞌtoꞌ ta neken teepîremasanonya teeserukon kupî tanne. Mîrîrî pîꞌ uyenupaꞌpîkon Morî Yekaton Wannîya, maasa Paapa pia ewonnîtoꞌ atarakkanmokasaꞌ pra tîîse.
9 Mîrîrîya ekaremekî sîrîrîpe uurîꞌnîkon pîꞌ, epuꞌtoꞌpe kaiꞌma. Pena Paapa pia toꞌ nîtîrîya moropai tekînkon poꞌtî toꞌya ya, morî pe eꞌtoꞌ yawîrî pemonkon yewan miakanma eserîke pra awanîꞌpî, manniꞌkan Paapa yapurînenan yewan. Paapa pia puꞌkuru toꞌ ewomî eserîke pra.
10 Tamîꞌnawîron toꞌ nîkupî yeseru wanîꞌpî yekkari wanî tonpe neken, moropai toꞌ wuku tonpe, moropai îꞌ kaiꞌma teserukon yaꞌ tenyakon rona toꞌya tonpe. Moropai tiaron toꞌ yeseru mîrîrî wanîꞌpî poroporo neken pemonkon eꞌronatoꞌ yeseru pe. Mîrîrî kupîꞌpî toꞌya, îꞌ pensa Paapaya amenan pe mîrîrîkon yeseru mîrîrî miakanma pîkîrî.
11 Tîîse mîrîrî tîpo Cristo iipîꞌpî teepîremasanon esanon yepotorî pe uurîꞌnîkon tonpe. Moropai amenan ewonnîtoꞌ yarakkanmokaꞌpîiya. Mîîkîrî ewomîꞌpî mîrîrî Paapa yewîꞌ ta, kaꞌ pon puꞌkuru. Miarî uurîꞌnîkon ton pe Paapa pîꞌ esatî pîꞌ aakoꞌmamî, manniꞌ morî eꞌtoꞌ yawîrî yapurîtoꞌ pataꞌseꞌ ta, pemonkon nîkonekaꞌpî pata pra. Uupiaꞌnîkon morî tîrî Paapaya emapuꞌtînen pe awanî, taasaiꞌya yawîrî.
12 Îꞌ pensa teewomî yai, Cristo ewomîꞌpî tiwin iteꞌka neken tamîꞌnawîronkon tonpe mîrîrî morî puꞌkuru Paapa koꞌmantoꞌ pataꞌseꞌ yaꞌ. Miarî yaꞌ teewomî yai bode mînî moropai paaka more mînî yaasaiꞌya pra man tiwin kin Paapa pîꞌ ekaremekîpa. Tîîse yarîꞌpîiya tîmînî tîniꞌkamoꞌpî puꞌkuru. Moropai mîrîrî ke uurîꞌnîkon yeꞌmaꞌpîiya ipatîkarî tîîpia koꞌmannîtoꞌpe.
13 Mîrîrî bodeyamîꞌ mînî, moropai paakayamîꞌ yuntonon mînî, moropai paaka tînre yenpotîpon pepînon tekînkon poꞌtîsaꞌ toꞌya ya, urunuꞌpîri wanî toꞌ nîkututuma pe pemonkonyamîꞌ poro. Mîrîrî kupî toꞌya yai, pemonkonyamîꞌ yarakkîrî nura pe toꞌ eꞌtoꞌ ronaiya tîîse poro po ituꞌna pra.
14 Maasa esenumenkatî, mîrîrî yentai Jesus mînî iniꞌkamoꞌpîya uurîꞌnîkon rona. Morî Yekaton Wannî meruntîri yai Paapa pia mîîkîrî eturumakaꞌpî tîîwarîrî tîîsaꞌmantapa. Morî pe eꞌtoꞌ yawîron imakuiꞌpî ton pîn eeturumakaꞌpî. Mîrîrî wenai imînîya imakuiꞌpî uyewankon yaꞌ tîîkoꞌmansen ronaiya. Manniꞌ neꞌneꞌ pe esenumenkantoꞌ kuꞌnen moꞌkaiya. Mîrîrî wenai yairî Paapa, manniꞌ ipatîkaron tîîkoꞌmansen yapurîtoꞌpe ikupîꞌpîiya. Mîrîrî warantî uurîꞌnîkon pîikaꞌtîiya.
15 Mîrîrî kuꞌsaꞌ tîuya wenai, Cristo wanî Paapa yarakkîrî pemonkon yarappana. Amenan esetantoꞌ tîîsaiꞌya wanî, morî pe pemonkon enatoꞌpe Paapa yarakkîrî. Mîrîrî yeꞌnen penaroꞌ yawîronkon nîkupîꞌpî imakuiꞌpî moꞌkapa kaiꞌma aasaꞌmantaꞌpî. Moropai inkamoro Paapa nannoꞌsanya ipatîkaron inekaremekîꞌpî yapiꞌtoꞌpe aasaꞌmantaꞌpî.
16 Epuꞌtîꞌnîkon enen anîꞌ wanî tîîse, itemanne rîꞌpî yapisî pepîn. Tîîse aasaꞌmanta tîpo neken, itonpa pe tîweꞌsenya mîîkîrî isaꞌmantaꞌpî yemanne rîꞌpî yapisî eꞌpai awanî. —Uusaꞌmantaꞌpî ya, uyonpa rîꞌpîya uyemanne rîꞌpî yapisî eꞌpai man —taasaiꞌya yeꞌnen.
17 Tîîse yapisîiya mîîkîrî saꞌmantaꞌpî pataꞌpî pe neken. Maasa, aasaꞌmanta pra tîîse, yapisîiya eserîke pra awanî maasa pra îꞌ pe pra awanî, enen aakoꞌmamî pîkîrî. Tîîse aasaꞌmanta ya, mîrîrî yai neken yapisî eꞌpai awanî.
18 Mîrîrî warantî nîrî pena imakuiꞌpî anîꞌ nîkupîꞌpî moꞌka Paapaya pepîn, tekîn wîîsaiꞌya pra tîîse. Itekîn mînî rîꞌpî wenai neken, Paapaya ikupî, taasaꞌ tîuya yawîrî.
19 Mîrîrî yeꞌnen eꞌmaiꞌ pe Moisés nurîꞌtîya toꞌ nîkupîton ekaremeꞌsaꞌ yai tamîꞌnawîronkon pemonkonyamîꞌ pîꞌ, tamîꞌnawîrî Paapa nekaremekîꞌpî, paaka more mînî yapiꞌsaꞌ tîuya moropai bode mînî yapiꞌsaꞌ tîuya yenseꞌ yapisîꞌpîiya. Mîrîrî yaiꞌmeꞌpîiya tuna yarakkîrî. Moropai mîrîrî ke mîrîrî kaareta tînmenukaꞌpî yaponseꞌ moropai tamîꞌnawîronkon pemonkonyamîꞌ kuyukuyumaꞌpîiya. Hissopo yare moropai carneiro siꞌpo suuyu ikîꞌpasaꞌ iꞌkaꞌ ke ikuyukuyumaꞌpîiya.
20 Mîrîrî kupî tîuya yeꞌka pe taꞌpîiya toꞌ pîꞌ:—Sîrîrî mîn wanî esetantoꞌ ton Paapa nîkupîꞌpî ekaremeꞌnen pe.Manniꞌ upîꞌ inekaremekîꞌpî ikupîkonpa
—taꞌpîiya.
21 Toꞌ pona ikupîꞌpî tîuya warantî, Moisés nurîꞌtîya mîn kuyukuyumaꞌpî mîrîrî Paapa yewîꞌ poro, moropai ita tîweꞌsen tamîꞌnawîron toꞌ napurîkon poro.
22 Innape man. Moisés nurîꞌtîya yenupantoꞌ yawîrî tamîꞌnawîronkon wanî ironasaꞌ pe mîrîrî mîn ke. Moropai toꞌ makui, toꞌ nîkupîꞌpî kupîꞌpî Paapaya tîîwanmîrî mîrîrî wenai. Maasa pra anîꞌ wîîsaꞌ pra awanî ya, umakuyikon ronaiya eserîke pra awanî. Tîîse mîn itiꞌkamoꞌpî wenai neken eꞌronan esepuꞌtî.
Cristo Niꞌkamoꞌpî Imînîya Neken
Umakuyikon Rona
23 Inna seruꞌ pepîn tarî Paapa koꞌmantoꞌ kupîꞌpî toꞌya morî pe tekînon mînî ke. Tîîse mîrîrî wanîꞌpî kaꞌ po tîweꞌsen patakanen pe neken. Morî pe ironapîtîꞌpî toꞌya Paapa yapurîkonpa mîrîrî warantî. Tîîse toꞌ yekînnon mînî yentai morî pe ronaton yuꞌse kaꞌ pon wanî, manniꞌ pata pemonkon yarakkîrî Paapa esepotoꞌ.
24 Maasa pra Cristo ewonsaꞌ pra man morî puꞌkuru Paapa pataꞌseꞌ ya pemonkon nîkonekaꞌpî yaꞌ pra, mîrîrî kaꞌ po tîweꞌsen patakasaꞌ yaꞌ pra. Tîîse mîîkîrî ewomîꞌpî kaꞌ po tîweꞌsen yaꞌ puꞌkuru. Moropai sîrîrîpe Paapa pia aakoꞌmamî uurîꞌnîkon tonpe teeseurîma pîꞌ, upîikaꞌtîiyaꞌnîkon.
25 Mîrîrî warantî pra pena teepîremasanon esanon yepotorî ewonpîtîꞌpî. Konoꞌ kaisarî eewonpîtîꞌpî mîrîrî morî puꞌkuru Paapa pataꞌseꞌ yaꞌ, tîmînî yaase pra tîîse paaka more mînî yaapîtîꞌpîiya. Tîîse mîrîrî warantî Cristo ewonsaꞌ pra man tuꞌke iteꞌka.
26 Mîrîrî warantî ewonpîꞌsaꞌ ya, konoꞌ kaisarî moriya tuꞌke iteꞌka Cristoya tîmoron epuꞌtî eꞌpai awanî eꞌpainon pata ekonekaꞌpî pata pai. Tîîse mîîkîrî ewomîꞌpî tiwin iteꞌka neken tamîꞌnawîronkon tonpe. Sîrîrî yai tamîꞌnawîron ataretîꞌka kupî yai eesenpoꞌpî imakuiꞌpî pe tamîꞌnawîronkon eꞌtoꞌ moꞌkapa kaiꞌma. Tîîwarîrî tiwin iteꞌka tîîsaꞌmantapa eeturumakaꞌpî.
27 Tamîꞌnawîronkon uurîꞌnîkon saꞌmanta eꞌpai awanî tiwin iteꞌka neken. Moropai mîrîrî tîpo Paapaya uurîꞌnîkon yenuntoꞌ wanî.
28 Mîrîrî warantî nîrî Cristo eturumakaꞌpî tîîwarîrî tiwin iteꞌka tîîsaꞌmantapa. Moropai pemonkonyamîꞌ nîkupîꞌpî imakuiꞌpî moꞌkaꞌpîiya tîpona. Mîrîrî tîpo mîîkîrî esenpo itakon iteꞌka pe tarîpai imakuiꞌpî moꞌkai pra, tîîse tînîmîkî pîꞌ tîîkoꞌmansenon pîikaꞌtîi aaipî.
