Sîrîrî Kaareta Judas Nîmenukaꞌpî 1:1-25
1 Uurî Judas Jesus Cristo poitîrî moropai Tiago yakon pe wanî. Sîrîrî kaareta menukauya manniꞌkan Paapa nannoꞌsan pia, isaꞌnamaꞌsan, moropai Jesus Cristo nîkoꞌmannîpîkon pia imenukauya.
2 Amîrîꞌnîkon pia inîꞌ panpîꞌ eꞌtînnîꞌmatoꞌkon moropai tîwanmîra aweꞌtoꞌkon ton moropai aweꞌsaꞌnamatoꞌkon tîrî Paapaya yuꞌse wai aapiaꞌnîkon.
Seruꞌyeꞌ Yenupatonkon Wanî Soosi Ta
3 Uyonpayamîꞌ uwakîrikon puꞌkuru, tamîꞌnawîrî îꞌ ankuꞌpai eꞌtoꞌ menukauya sîrîrî aapiaꞌnîkon, îꞌ kaiꞌma uurîꞌnîkon eꞌpîikaꞌtîsaꞌ pîꞌ. Mîrîrî pîꞌ eseurîmapai wanî tanne, epuꞌtîꞌpîuya tiaron pîꞌ eseurîma eꞌpai awanî. Tauya apîꞌnîkon, meruntî ke eꞌtî. Innape yairon yekare kupî pîꞌ akoꞌmantî, tiaron pe tînyakaꞌma pra. Manniꞌ Paapa nîtîrîꞌpî tamîꞌnawîronkon tîpemonkonoyamîꞌ pia tiwin iteꞌka toꞌ pîikaꞌtîtoꞌpe. Tiaronkon panamatî, tiaron pe mîrîrî yairon yekare kupî toꞌya namai.
4 Maasa pra tiaronkon warayoꞌkon Paapa epuꞌnenan pepîn erepansaꞌ man, toꞌ erepamî eraꞌmasaꞌ pra tîîse uyonpakon koreꞌta. Inkamoroya yairon Paapa maimu moꞌtanîꞌsaꞌ man tiaron pe. Inkamoroya taa see warantî: —Imakuiꞌpî unkupîkon kupî Paapaya tîîwanmîra. Mîrîrî yeꞌnen îꞌ rî imakuiꞌpî kupî ya, îꞌ waniꞌ pra awanî —taa toꞌya. Mîrîrî kupî inkamoroya maasa pra imakuiꞌpî tînkupîꞌpîkon eseraꞌma namai tîwapukon. Moropai inkamoroya Jesus Cristo tiwinan uyenupanenkon Uyepotorîkon yewanmîrî, mîrîrî toꞌ eꞌwapuꞌtîtoꞌ wenai. Pena Paapa maimu eꞌmenukasaꞌya taasaꞌ man îꞌ kaiꞌma toꞌ tarumaꞌtî tîuya eꞌtarumaꞌtîntoꞌ yaꞌ.
5 Amîrîꞌnîkon anenpenatanîꞌpai wai tamîꞌnawîrî epuꞌtîyaꞌnîkon tanne, teuren Paapaya tîpemonkonoyamîꞌ pîikaꞌtîꞌpî Egito pata poi toꞌ moꞌka tîuya yai. Tîîse mîrîrî tîpo, manniꞌkan innape tîmaimu kupîtîponoꞌsan pepîn tîꞌkaꞌpî Paapaya tamîꞌnawîrî.
6 Maasa enpenatatî inserîyamîꞌ Paapa nîkupîꞌsan inkamoro wanî pra awanîꞌpî, tîpataꞌseꞌkon pe Paapa nîtîrîꞌpî yaꞌ. Maasa pra toꞌ atarimaꞌpî mîrîrî tîpataꞌseꞌkon yapai. Tarîpai inkamoro yewaꞌtîpîꞌsaꞌ Paapaya saꞌman ferrokon ke ipatîkarî inkamoro koꞌmamî tuꞌnakan ewaron pe tîweꞌsen yaꞌ. Îꞌ pensa tamîꞌnawîronkon tarumaꞌtî Paapaya weiyu erepamî pîkîrî toꞌ koꞌmamî.
7 Enpenatatî inîꞌrî îꞌ kaiꞌma Sodoma po moropai Gomorra po moropai tamîꞌnawîrî iwoi tîîkoꞌmansenon kupîꞌpî Paapaya pîꞌ. Inkamoro inserîyamîꞌya imakuiꞌpî kupîꞌpî warantî ikupî toꞌya. Seꞌ tapairî wîriꞌsanyamîꞌ yarakkîrî moropai warayoꞌkon yarakkîrî toꞌ wanîꞌpî. Mîrîrî wenai ipoꞌtîꞌpî Paapaya apoꞌ ke. Mîrîrî yai aweꞌkupîꞌpî warantî aweꞌkupî kupî ekaremeꞌnen pe awanî sîrîrî tamîꞌnawîronkon pîꞌ aronne.
8 Mîîwîni tîîse insamoro pemonkonyamîꞌ koꞌmamî Sodoma ponkon moropai Gomorra ponkon koꞌmamîꞌpî warantî. Inkamoro weꞌneꞌpîtî tîwetunkon yaꞌ îꞌ kaiꞌma inîꞌ panpîꞌ imakuiꞌpî kupî toꞌya. Mîrîrî wenai tewankon kîꞌpa toꞌya nura ke mîrîrî kupî tîuyaꞌnîkon yai. Inkamoroya ipîkku pe Paapa eꞌtoꞌ yewanmîrî, innape ikupî toꞌya pepîn. Moropai inkamoro eseurîma imakuiꞌpî pe inserîyamîꞌ winîkîi, tîweppeꞌse pra.
9 Mîrîrî yeꞌka kupî inserîyamîꞌ yepotorî Miguelya pepîn eꞌpainon. Tiwin iteꞌka Miguel esiyuꞌpîtîꞌpî Makui yarakkîrî, epuꞌtîkonpa kaiꞌma anîꞌ eꞌnîmî Moisés piꞌpîrîꞌpî yarakkîrî. Tîîse mîrîrî yai Miguelya taa pra awanîꞌpî Makui pîꞌ imakuiꞌpî pe. Tîîse taꞌpîiya: —Paapaya amîrî yuwatî —taꞌpîiya.
10 Tîîse insamoro pemonkonyamîꞌ eseurîma koꞌmannîpî tînepuꞌtîkon pepîn pîꞌ. Tînkupîkon teserukon kupî koꞌmannîpî îꞌ pîꞌ teesenumenkai pra, manniꞌkan oꞌmaꞌkonya ikupî koꞌmannîpî warantî. Mîrîrî wenai inkamoro eꞌtarumaꞌtî koꞌmannîpî, tîweꞌtîꞌkakon pîkîrî.
11 Aka saꞌne inkamoro. Inkamoro koꞌmamî îꞌ kaiꞌma Caim nurîꞌtî koꞌmamîꞌpî warantî. Inkamoro eturumaka tîniru yuꞌse tîwanîkon yeꞌnen, îꞌ kaiꞌma Balaão nurîꞌtî eturumakaꞌpî yairî pra tîniru yuꞌse tîwanî yeꞌnen warantî. Moropai Coré nurîꞌtî wanîꞌpî tîpanamatoꞌ yawîrî eꞌpai pra. Mîrîrî yeꞌnen mîîkîrî wîꞌpî Paapaya mîrîrî wenai. Mîrîrî warantî inkamoro wanî nîrî. Tîpanamatoꞌkon yawîrî eꞌpai pra toꞌ wanî. Mîrîrî yeꞌnen inkamoro tîꞌka Paapaya.
12 Inkamoro wanî ya, akoreꞌtaꞌnîkon ayekkarikon yonpayaꞌnîkon ya yai, tîmurukun pe siꞌma, ayeppeꞌnîꞌnenkon pe toꞌ wanî nura teserukon wenai. Tîpîꞌnîkon neken inkamoro esenumenka, tiaronkon pîꞌ teesenumenkai pra. Inkamoro wanî manniꞌ aꞌsitun narî, katupuru warantî tîweꞌsanon pe. Katupuru iipî ya, konoꞌ rena kaiꞌma esenumenkan teuren, tîîse aarena pepîn, aꞌsitunya yarî yeꞌnen. Moropai inkamoro wanî manniꞌ yei teperu tîînen pepîn warantî. Teperu tîîtoiꞌya yai, itîînen pepîn warantî toꞌ wanî. Moropai inkamoro wanî yei yarokasaꞌ moropai mîrîrî yenunsaꞌ aꞌpiꞌtasaꞌ warantî toꞌ wanî isaꞌmantaꞌsan pe.
13 Moropai inkamoro wanî nura warantî, tuna apasaꞌ ya, nura eseraꞌma. Mîrîrî warantî toꞌ nîkupî nura eseraꞌma. Moropai inkamoro wanî nîrî manniꞌ kaiwanoꞌyamîꞌ tîpataꞌseꞌkon yapai teepaꞌkasenon warantî. Mîrîrî yeꞌnen Paapaya toꞌ pataꞌseꞌ ton konekaꞌpî ipatîkarî toꞌ koꞌmantoꞌpe tuꞌnakan pe tîweꞌsen yaꞌ ewaron puꞌkuru ta. Mîrîrî warantî inkamoro koꞌmamî pe awanî.
14 Pena Enoque eseurîmaꞌpî inkamoro eꞌtarumaꞌtî kupî pîꞌ. Manniꞌ Enoque wanîꞌpî Adão nurîꞌtî payanîꞌpî pe. Asakîꞌne miaꞌ pona tîîmoꞌtaiꞌnon ipayanyamîꞌ esenpoꞌpî tîpo, Enoque esenpoꞌpî. Mîîkîrî eseurîmaꞌpî manniꞌkan imakuiꞌsan pîꞌ. Taꞌpîiya: —Uyepotorîkon iipî kupî sîrîrî tuꞌkankon inserîyamîꞌ yarakkîrî.
15 Mîîkîrîya tamîꞌnawîronkon nîkupîꞌpî yakoꞌmenkaiya. Moropai imakuiꞌsan yenumî kupî sîrîrî eꞌtarumaꞌtîntoꞌ yaꞌ imakuiꞌpî pe toꞌ yeseru wanî yeꞌnen moropai imakuiꞌpî pe Paapa winîkîi toꞌ eseurîma yeꞌnen, toꞌ yenumîiya kupî sîrîrî —taꞌpîiya.
16 Insamoro pemonkonyamîꞌ wanî tîwîrî teekoreꞌmakon pîꞌ, moropai taa pîꞌ toꞌ koꞌmamî tiaronkon pîꞌ amîrî puꞌkuru mîîtoꞌpe. Mîrîrî taa inkamoroya maasa pra ituꞌse tîwanîkon pîkîrî taa pîꞌ toꞌ koꞌmamî. Toꞌ eseurîma koꞌmannîpî mîî pe siꞌma tiaronkon yentai tîwanîkon pîꞌ moropai tiaronkon yapurî toꞌya tîwakîrikon pe tîkuꞌtoꞌpeꞌnîkon toꞌya. Maasa pra toꞌ yausinpa toꞌya teeseurîmatoꞌkon ke tîwakîrikon pe toꞌ kupî tîuyaꞌnîkon pe tîweꞌkuꞌse.
Tiaron Uyeserukon Ton Pîꞌ Panamantoꞌ
17 Tîîse uyonpayamîꞌ, awenpenatakon yuꞌse wai îꞌ kaiꞌma itekare ekaremeꞌnenan Uyepotorîkon Jesus Cristo naipontîꞌsan nekaremekîꞌpî pîꞌ.
18 Taꞌpî toꞌya pena: —îꞌ pensa tiwinanoꞌpî wei erepamî rawîrî tuꞌke warayoꞌkon esenpo kupî sîrîrî amîrîꞌnîkon koreꞌta. Paapa epuꞌnenan pepîn, manniꞌkan warayoꞌkon ituꞌse tîwanîkon yawîrî tîweꞌsanonya Paapa muꞌtunpa pe man —taꞌpî toꞌya.
19 Inkamoroya amîrîꞌnîkon pîraiꞌpîka pe man. Maasa pra inkamoro nîkupî yeseru wanî toꞌ yentai puꞌkuru tarîron pîꞌ neken toꞌ esenumenka. Inkamoro esenumenka pepîn tiwin kin Paapa winîpainon pîꞌ. Mîrîrî yeꞌnen Morî Yekaton Wannî koꞌmamî pepîn toꞌ pia.
20 Tîîse amîrîꞌnîkon uyonpayamîꞌ, akoꞌmantî inîꞌ panpîꞌ innape ikuꞌtoꞌyaꞌnîkon kupî pîꞌ. Moropai eepîremakon pîꞌ akoꞌmantî Morî Yekaton Wannî meruntîri yai.
21 Moropai akoꞌmantî eꞌsaꞌnamantoꞌ Paapa winîpainon kupî pîꞌ. Moropai Uyepotorîkon Jesus Cristo nîtîrî nîmîꞌtî. Aꞌnokoꞌma tîuyaꞌnîkon yeꞌnen, ipatîkarî enen koꞌmannîtoꞌ tîrîiya nîmîꞌtî.
22 Moropai manniꞌkan innape ankuꞌpai siꞌma innape ikuꞌnenan pepîn tîweꞌnamasanon, inkamoro yeꞌka eraꞌmatî aꞌnokoꞌpîkon pe.
23 Inkamoro yeꞌkakon pemonkonyamîꞌ moꞌkatî eꞌtarumaꞌtîntoꞌ pataꞌseꞌ yaꞌ toꞌ wîtî namai. Moropai inkamoro saꞌnamatî, moropai tiaronkon nîrî saꞌnamatî. Tîîse imakuiꞌpî toꞌ nîkupî tînamai eꞌtî maasa pra ikuꞌsaꞌ toꞌya ituꞌse tîwanîkon yawîrî. Mîrîrî yeꞌka namatî. Mîrîrî toꞌ nîkupî ankuꞌpai tîweꞌse pra yewanmîrîtî.
Epîremanpaiꞌnîkon Paapa Yapurî Pe
24 1:24,25 Mîîkîrî tiwinan Paapa, Upîikaꞌtînenkon yapurîpaiꞌnîkon man, Uyepotorîkon Jesus Cristo wenai. Mîîkîrîya neken amîrîꞌnîkon koꞌmannîpî imakuiꞌpî yaꞌ eenakon namai. Moropai Paapaya neken amîrîꞌnîkon kupî morî pe awanîkonpa, imakuiꞌpî ton pra. Moropai mîîkîrî Paapaya amîrîꞌnîkon yausinpa, morî pe puꞌkuru tarakkîrî awanîkonpa kaꞌ po. Manniꞌ Paapa aꞌka pe puꞌkuru tîweꞌsen, moropai kureꞌnan ipîkku pe tîweꞌsen, moropai meruntî puꞌkuru, moropai ipîkku pe tîwanî wenai, tamîꞌnawîronkon esaꞌ pe tîweꞌsen. Pena, pata ekoneka pra tîîse, aakoꞌmamîꞌpî meruntî ke. Sîrîrîpe mîrîrî warantî aakoꞌmamî ipatîkarî. Mîrîrî warantî mîîkîrî yapurîpaiꞌnîkon man.
25 Eraꞌmakî 1:24
