Jesus Cristo Yekare Lucas Nîmenukaꞌpî 1:1-80
1 Uyonpa Teófilo, tuꞌkankon pemonkonyamîꞌya sîrîrî Jesus yekare menukaꞌpî ukoreꞌtaꞌnîkon eꞌkupîꞌpî ekaremeꞌnen pe.
2 Jesusya toꞌ yenupa piaꞌtîꞌpî pata pai tamîꞌnawîrî inkupîꞌpî eraꞌmatîponkon winîpai etaꞌpî uurîꞌnîkonya, maasa pra mîrîrî itekare ekaremeꞌpîtîꞌpî toꞌya.
3 Mîrîrî yeꞌnen mîrîrî pîꞌ esenupaꞌpî tamîꞌnawîrî morî pe epuꞌtoꞌpeuya kaiꞌma. Eesippiaꞌtîꞌpî pata pai sîrîrî tîpo see îꞌ eꞌkupîꞌpî pîꞌ esenupaꞌpî. Moropai esenumenkaꞌpî tamîꞌnawîrî morî pe imenukauya pîꞌ, amîrîya epuꞌtîtoꞌpe. Mîrîrî yeꞌnen Teófilo, uwanîyakon, aapia imenukauya sîrîrî.
4 Yairî eesenupaꞌpî wanî epuꞌtîpa kaiꞌma imenukauya sîrîrî.
João Batista Esenpotoꞌ Ekaremekî Inserîya
5 Pena Judéia pata esaꞌ pe tîweꞌsen pe Herodes wanî yai, teepîremasen wanîꞌpî iteseꞌ Zacarias. Mîîkîrî wanîꞌpî teepîremasanon Abias ponkon yonpa pe. Mîîkîrî noꞌpî wanîꞌpî iteseꞌ Isabel. Mîîkîrî nîrî wanîꞌpî teepîremasen yonpa pe. Arão nurîꞌtî, teepîremasanon yepotorî, parîꞌpî pe awanîꞌpî.
6 Mîîkîrî koꞌmanpîtîꞌpî tînoꞌpî yarakkîrî morî pe, imakuiꞌpî ton pra. Paapa rawîrî yairî toꞌ koꞌmantoꞌ wanîꞌpî. Tamîꞌnawîrî inekaremekîꞌpî yawîrî ikupîꞌpî toꞌya.
7 Tîîse mîîkîrî wanîꞌpî inmu ton pra. Maasa pra inoꞌpî wanîꞌpî more yenponen pe pra. Moropai aꞌyekeꞌton pe inyo wanîꞌpî. Inoꞌpî wanîꞌpî noꞌsanton pe.
8 1:8,9 Tiwin wei teepîremasen Zacarias pokonpankon esenyakaꞌma yai epîremantoꞌ yewîꞌ ta, mîîkîrî Zacarias menkaꞌpî toꞌya eewontoꞌpe aꞌpusin poꞌtîi Paapa yapurî pe. Mîîkîrî menkaꞌpî toꞌya teserukon yawîrî, tîꞌ yenumî pîꞌ. Mîrîrî tîꞌ enaꞌpî Zacarias pia. Mîrîrî yeꞌnen aꞌpusin poꞌtîtoꞌ weiyu eseporî yai Zacarias ewomîꞌpî epîremantoꞌ yewîꞌ ta.
9 Eraꞌmakî 1:8
10 Mîrîrî aꞌpusin aramî tanne, poro po Paapa yapurîi eperepîꞌsan pemonkonyamîꞌ epîremaꞌpî.
11 Mîrîrî yai Uyepotorîkon narimaꞌpî inserî esenpoꞌpî Zacarias pia. Inpoꞌtî yaponseꞌ winî, meruntî winîkîi satippe, oꞌnon pata aꞌpusin aramî manniꞌ pataꞌseꞌ yaꞌ eesenpoꞌpî.
12 Mîîkîrî eraꞌma tîuya pe, eesiꞌnîpîꞌpî mararî pra.
13 Tîîse mîîkîrî pîꞌ taꞌpî inserîya:
—Eranneꞌ pe pra eꞌkî, Zacarias! Paapaya eepîrematoꞌ etasaꞌ man, moropai amaimu yuukuiya pe man —taꞌpîiya. —Anoꞌpîya tînre yenpo pe man, warayoꞌ pe. Mîîkîrî more eseꞌtîya eꞌpai man João kaiꞌma —taꞌpîiya.
14 —Mîîkîrî esenposaꞌ pîꞌ aatausinpa kureꞌne. Moropai tuꞌkankon pemonkonyamîꞌ ena taatausinpai, mîîkîrî esenposaꞌ pîꞌ.
15 Maasa pra kureꞌne mîîkîrî warayoꞌ wanî pe man Paapa pia. Mîîkîrîya maiꞌ enîrî eꞌpai pra awanî. Tîîse eesenpo pata pai Morî Yekaton Wannî koꞌmamî yarakkîrî itesaꞌ pe.
16 Mîrîrî yeꞌnen mîîkîrîya tuꞌke Judeuyamîꞌ enpenata emapuꞌtî kupî, Paapa tepotorîkon epuꞌtoꞌpe toꞌya.
17 Mîîkîrî wanî pe man meruntî ke, moropai Morî Yekaton Wannî naipontîton pe, penaroꞌ Paapa maimu ekaremeꞌnen Elias nurîꞌtî wanîꞌpî warantî. Mîîkîrîya morî pe pemonkonyamîꞌ ena emapuꞌtî kupî sîrîrî, tîyunkon moropai tînmukukon pokonpe. Mîrîrî warantî Paapa maimu yawîrî pra tîweꞌsanon ennaꞌpo emapuꞌtîiya kupî sîrîrî yairî toꞌ eꞌtoꞌpe Paapa rawîrî. Mîrîrî warantî pemonkonyamîꞌ Judeuyamîꞌ ena yairî emapuꞌtîiya kupî sîrîrî Uyepotorîkon erepamî yaino ton pe —taꞌpî inserîya Zacarias pîꞌ.
18 Mîrîrî yeꞌnen Zacariasya inserî ekaranmapoꞌpî. Taꞌpîiya:
—Oꞌnon yeꞌka pe see innape sîrîrî kupîuya eꞌpainon? Maasa pra uurî wanî aꞌyekeꞌton pe saꞌne, moropai unoꞌpî saꞌne wanî noꞌsanton pe nîrî —taꞌpîiya.
19 Moropai mîîkîrî inserîya Zacarias maimu yuukuꞌpî: —Tîîse uurî Gabriel, Paapa poitîrî, iipia tîîkoꞌmansen. Mîîkîrî Paapaya uyarimasaꞌ sîrîrî ayarakkîrî eseurîmai sîrîrî morî yekare pîꞌ —taꞌpîiya.
20 —Innape îꞌ tauya manniꞌ kupîya pra awanî mîrîrî. Tîîse aweꞌkupî kupî sîrîrî, mîrîrî weiyu eseporî ya. Innape ikuꞌsaꞌya pra awanî yeꞌnen, imaimu pra eena kupî sîrîrî, mîîkîrî anmu esenpotoꞌ weiyu eseporî pîkîrî —taꞌpî inserîya ipîꞌ.
21 Mîrîrî tanne pemonkonyamîꞌya Zacarias nîmîkîꞌpî poro po. Îꞌ waniꞌ awanî yeꞌnen aakoꞌmamî epîremantoꞌ yewîꞌ ta epuꞌtî toꞌya pra awanîꞌpî.
22 Epîremantoꞌ yewîꞌ tapai teepaꞌka pe, eeseurîma pra awanîꞌpî. Mîrîrî yeꞌnen epuꞌtî yonpaꞌpî toꞌya îꞌ rî eꞌkuꞌsaꞌ epîremantoꞌ yewîꞌ ta, maasa pra eeseurîma pra awanîꞌpî. Tîîse tenya ke taapîtîꞌpîiya. Mîrîrî wenai epuꞌtîꞌpî toꞌya weꞌneꞌpîꞌnîtoꞌ warainon eꞌkuꞌsaꞌ yarakkîrî. (Paapa nenpotoꞌ eraꞌmaꞌpîiya.)
23 Moropai teesenyakaꞌmatoꞌ aretîꞌkasaꞌ Zacariasya tîpo epîremantoꞌ yewîꞌ tapai awennaꞌpoꞌpî tewîꞌ ta.
24 Mîrîrî tîpo mararî tîîkoꞌmamî tîpo inoꞌpî Isabel enaꞌpî more yan pe. Mîîkîrî asarî pra awanîꞌpî miaꞌtaikin kapoi kaisarî.
25 Moropai Isabelya taꞌpî:
—Uyepotorîkonya upîikaꞌtî tuꞌka pîꞌ man. Mîrîrî yeꞌnen anîꞌya umuꞌtunpa eserîke pra awanî inîꞌrî. “Tînre yenponen pepîn mîserî,” taa toꞌya pepîn tarîpai —taꞌpîiya.
Jesus Esenpotoꞌ Ekaremekî Inserîya
26 Tiwin miaꞌ pona tîîmoꞌtai kapoi kaisarî more yan pe Isabel tîîse, Paapaya inserî Gabriel yarimaꞌpî Nazaré cidaderî pona Galiléia pata pona.
27 Miarî inserîya itekare yarîꞌpî maasaron wîriꞌ pia, warayoꞌ yarakkîrî siꞌpî pepîn. Mîîkîrî niyotasen warayoꞌ iteseꞌ José yarakkîrî. Mîîkîrî warayoꞌ wanîꞌpî penaron rei Davi nurîꞌtî parîꞌpî pe. Mîîkîrî wîriꞌ wanîꞌpî iteseꞌ Maria.
28 Mîrîrîya Maria pia mîîkîrî inserî erepamîꞌpî. Moropai taꞌpîiya: —Morî pe koꞌmannî pîꞌ nan, Maria? Taatausinpai eꞌkî. Maasa pra tîwakîri pe Paapaya akupî pîꞌ man. Mîîkîrî Uyepotorîkon koꞌmamî aapia —taꞌpîiya.
29 Mîrîrî yeꞌnen îꞌ taa tîuya epuꞌtîiya pra Maria wanîꞌpî mîrîrî îꞌ taꞌpî inserîya pîꞌ. Teesewankonoꞌmai eesenumenkaꞌpî îꞌ taa yuꞌse inserî wanî epuꞌtî yuꞌse.
30 Tîîse inserîya taꞌpî:—Eranneꞌ pe pra eꞌkî, Maria.Maasa pra Paapa atausinpasaꞌ man kureꞌne amîrî pîꞌ —taꞌpîiya.
31 —Mîrîrî yeꞌnen more yan pe eena pe nai.Anre ton yenpoya pe nai warayoꞌ pe.Moropai Mîîkîrî esatîya pe nai Jesus pe iteseꞌ.
32 Mîîkîrî wanî pe man kureꞌne.Mîîkîrî esatî Paapa tamîꞌnawîronkon yentainonya tînmu pe.Mîîkîrî Paapaya ikupî kupî sîrîrî tamîꞌnawîronkon esaꞌ pepata esaꞌ itamo Davi nurîꞌtî pataꞌpî yaꞌ taasaꞌ tîuya yawîrî —taꞌpîiya.
33 —Mîîkîrî koꞌmamî tamîꞌnawîronkon Jacó payanîꞌsan esaꞌ peipatîkarî aataretîꞌka ton pe pra —taꞌpî inserîya Maria pîꞌ.
34 Mîrîrî pîꞌ taꞌpî Mariaya inserî pîꞌ: —Îꞌ kaiꞌma see mîrîrî wanî mîrîrî warayoꞌ yarakkîrî pra uurî tîîse? —taꞌpîiya.
35 Tîîse inserîya imaimu yuukuꞌpî. Taꞌpîiya: —Morî Yekaton Wannî iipî pe man aapia. Moropai Paapa tamîꞌnawîron yentainon meruntîri wanî pe man aapia —taꞌpîiya ipîꞌ. —Mîrîrî wenai mîîkîrî more, imakuiꞌpî ton pîn teesenposen wanî pe man Paapa munmu pe —taꞌpîiya.
36 —Enpenatakî maasa ayonpa Isabel pîꞌ. Pena taapîtîꞌpî toꞌya tînre ton yenponen pepîn, taapîtîꞌpî toꞌya ipîꞌ. Tîîse sîrîrî more yan pe eenasaꞌ man. Tiwin miaꞌ pona tîîmoꞌtai kapoi kaisarî ikapoi wanî, noꞌsanton pe tîîse —taꞌpîiya.
37 —Maasa pra Paapa pia saꞌman ton pra man. Îꞌ inkupî pepîn ton pra man Paapa pia. Tamîꞌnawîrî ikonekaiya —taꞌpîiya.
38 Mîîkîrî maimu yuukuꞌpî Mariaya: —Uurî wanî Paapa poitîrîpaꞌ pe. Mîrîrî yeꞌnen îꞌ rî eꞌkupî ya uyarakkîrî, Uyepotorîya taꞌpî yawîrî, îꞌ taaya manniꞌ îꞌ waniꞌ pra man —taꞌpîiya.
Mîrîrî tîpo inserî wîtîꞌpî iipiapai.
Isabel Eraꞌmapîꞌse Maria Wîtî
39 Mîrîrî tîpo Maria ekonekaꞌpî wîꞌ pona tuutîpa, Judéia pata pona tonpa Isabel pia.
40 Miarî teerepansaꞌ pe Zacarias yewîꞌ ta eewomîꞌpî. Moropai inoꞌpî Isabel yarakkîrî toꞌ atapisîꞌpî tîwakîri pe puꞌkuru.
41 Maria maimu eta Isabelya pe more iroꞌta yaꞌ tîweꞌsen eraikkaꞌpî taatausinpai. Mîrîrî yai itesaꞌ pe Morî Yekaton Wannî iipîꞌpî, imeruntîri ton tîrîꞌpîiya.
42 Moropai Isabel eseurîmaꞌpî meruntî ke. Taꞌpîiya:—Morî pe amîrî yapurîꞌpî Paapayatamîꞌnawîronkon wîriꞌsanyamîꞌ yapurî tîuya yentai.Moropai mîîkîrî more yenpoya kupîmanniꞌ nîrî yapurî Paapaya —taꞌpîiya.
43 —Anîꞌ kin uurî Uyepotorî yan iiꞌtoꞌpe uyeraꞌmapîꞌse, ipîkku pe pra saꞌne wanî tanne.
44 Uupia eerepamî pe, uyarakkîrî eeseurîma yai, uroꞌta yawon unre eraikkan pîꞌ man kureꞌne, taatausinpai —taꞌpîiya.
45 —Amîrîya morî yapisî kupî taatausinpai, maasa pra innape îꞌ eꞌkupî taꞌpî Paapaya kupîya yeꞌnen —taꞌpî Isabelya Maria pîꞌ.
Maria Eserenka Paapa Yapurî Pîꞌ
46 Moropai Mariaya taꞌpî Paapa yapurî tîuya pe:—Uyewan wanî kureꞌne taatausinpai Uyepotorî pîꞌ.
47 Moropai uyekaton atausinpasaꞌ kureꞌnemîîkîrî upîikaꞌtînen Paapa pîꞌ.
48 Maasa pra uurî saꞌne tîpoitîrîpaꞌ pîꞌ awenpenatasaꞌ yeꞌnen.Tarîpai sîrîrî patapai tamîꞌnawîronkon pemonkonyamîꞌya taa upîꞌ:“Mîîkîrî Maria yapurîꞌpî Paapaya” taa toꞌya.
49 Mîrîrî warantî taa toꞌyamaasa pra mîîkîrî meruntî Paapaya kureꞌne îꞌ kuꞌsaꞌ uurî ton pe.Mîîkîrî Paapa wanî morî pe puꞌkuru imakuiꞌpî ton pra, tamîꞌnawîronkon yentai.Maasa pra iteseꞌ taatoꞌ wanî teken morî.
50 Mîîkîrî Paapa wanî tamîꞌnawîronkon pemonkonyamîꞌ iꞌnokoꞌmanen pe,manniꞌkan innape tînamanenan iꞌnokoꞌmaiya.Moropai manniꞌkan penaronkon tamokonmoropai toꞌ payanîꞌsan nîrî iꞌnokoꞌmaiya.
51 Moropai tîmeruntîri kemanniꞌkan pemonkonyamîꞌ mîîpankon esenumenkatoꞌ imakuiꞌpî tîweꞌsen yaretîꞌkaꞌpîiya tiwinarî,tiaronkon maꞌre toꞌ kupîꞌpîiya.
52 Moropai ipîkkukon reiyamîꞌ eꞌtoꞌ ipîkku pe yaretîꞌkaꞌpîiya.Ipîkku pe pra toꞌ enaꞌpî.Tîîse manniꞌkan morîkon mîîpankon pepîn pîikaꞌtîꞌpîiya,tiaronkon esaꞌ pe toꞌ eꞌtoꞌpe, ipîkku pe.
53 Moropai itaꞌreꞌ pînon saꞌne yaꞌreꞌ ton tîrîꞌpîiyaemiꞌne toꞌ wanî namai.Tîîse ipîkku pe tîweꞌsanon pia îꞌ tîrîiya pepîn.
54 Mîîkîrî Paapaya pena îꞌ taꞌpî tîuya yawîrî ikupîꞌpî penaronkon pokonpe.Moropai tîpemonkonoyamîꞌ, Israel ponkon pîikaꞌtîꞌpîiyatoꞌ pîikaꞌtîuya taasaꞌ tîuya yawîrî.
55 Penaron Abraão nurîꞌtî pîꞌ awenpenataꞌpî.Morî kupîꞌpîiya Abraão ton pe.Moropai tamîꞌnawîronkon ipayanîꞌsan ton ikupîiya ipatîkarî
—taꞌpî Mariaya, Paapa yapurî yeꞌka pe.
56 Mîrîrî tîpo Maria koꞌmamîꞌpî eseurîwîꞌne kapoi tonpa Isabel yarakkîrî. Moropai awennaꞌpoꞌpî tewîꞌ ta.
João Batista Esenpo
57 Moropai Isabelya tînre yenpotoꞌ weiyu eseporîꞌpî. Tînre yenpoꞌpîiya warayoꞌ pe.
58 Mîrîrî pîꞌ toꞌ atausinpaꞌpî. Moropai itonpayamîꞌ moropai iwoi tîîkoꞌmansenon atausinpaꞌpî nîrî ipokonpe. Maasa pra morî pe Uyepotorîkon eꞌtoꞌ eraꞌmaꞌpî toꞌya Isabel yarakkîrî.
59 Mîrîrî tîpo tiwin semana tîîkoꞌmamî tîpo more yarîꞌpî toꞌya imere piꞌpî pottî yaꞌtîi teserukon yawîrî. Mîrîrî yai mîîkîrî eseꞌ ton antîîpai toꞌ wanîꞌpî itun eseꞌ ya Zacarias kaiꞌma.
60 Tîîse isanya taꞌpî:
—Kaane, iteseꞌ wanî pe man João kaiꞌma —taꞌpîiya.
61 Tîîse taꞌpî itonpayamîꞌya ipîꞌ: —Tîîse ayonpa ton pra man mîrîrî yeꞌka iteseꞌ —taꞌpî toꞌya ipîꞌ.
62 Mîrîrî yai iyun ekaranmapoꞌpî toꞌya, eraꞌmatoꞌpeiya ikupîꞌpî toꞌya, mîîkîrî more eseꞌ ton kupî yeꞌka pe.
63 Mîrîrî taa toꞌya yeꞌnen, Zacariasya tabua esatîꞌpî ipona imenukapa kaiꞌma. Mîîkîrîya iteseꞌ ton menukaꞌpî João kaiꞌma. Mîrîrî pîꞌ tamîꞌnawîronkon esenumenkasaꞌ wanîꞌpî mararî pra.
64 Mîrîrî pe rî Zacarias eseurîma piaꞌtîꞌpî Paapa yapurî yeꞌka pe.
65 Mîrîrî etasaꞌ tîuyaꞌnîkon yai, eranneꞌ pe inkamoro iwoi tîîkoꞌmansenon wanîꞌpî. Moropai mîrîrî yekare etaꞌpî tamîꞌnawîrî Judéia pata poronkonya, wîꞌ poronkon tîîkoꞌmansenonkonya. Moropai mîrîrî pîꞌ toꞌ eseurîmapîtî koꞌmannîpîꞌpî.
66 Tamîꞌnawîronkon etatîponoꞌsan esenumenkaꞌpî mîrîrî pîꞌ. Ekaranmapoꞌpî toꞌya: —Anîꞌ pe see mîserî more wanî kupî sîrîrî? —taꞌpî toꞌya.
Mîrîrî warantî toꞌ eseurîmaꞌpî maasa pra Uyepotorîkon meruntîri wanî yeꞌnen mîîkîrî yarakkîrî.
Paapa Yapurî Zacariasya
67 Zacarias esaꞌ pe Morî Yekaton Wannî iipîꞌpî. Mîrîrî yeꞌnen eeseurîma piaꞌtîꞌpî îꞌ aweꞌkupî ton pîꞌ. Taꞌpîiya:
68 —Uyepotorîkon Paapa yapurîpaiꞌnîkonmaasa pra tîpemonkonoyamîꞌ Judeuyamîꞌ koꞌmannîpîꞌpîiya.Moropai mîîkîrîya toꞌ pîikaꞌtîꞌpî,toꞌ eꞌtarumaꞌtîtoꞌ yapai toꞌ moꞌkaꞌpîiya.
69 Paapaya upîikaꞌtînenkon ton esenpo emapuꞌtîꞌpîtîpoitîrî Davi nurîꞌtî paarîꞌpî yai.
70 (Pena pata pai Paapa eseurîmaꞌpî sîrîrî pîꞌpenaronkon tîmaimu ekaremeꞌnenan profetayamîꞌ winîpai.Sîrîrî pîꞌ toꞌ eseurîmaꞌpî pena.)
71 Mîîkîrî Paapaya upîikaꞌtîkon tîuya taꞌpîuyeyatonkon winîpai.Moropai tamîꞌnawîronkon manniꞌkan uurîꞌnîkon pîꞌ tîwoꞌmaꞌtasanon winîpaiupîikaꞌtîiyaꞌnîkon taꞌpîiya.
72 Tîꞌnokoꞌpî pe utamokon nurîꞌsan eraꞌma tîuya taꞌpîiya.Moropai tîpemonkonoyamîꞌ yarakkîrî teesetatoꞌ pîꞌ tîwenpenatai pramîîkîrî wanî pîn.
73 1:73,74 “Ayeyatonkon winîpai apîikaꞌtî tîuyaꞌnîkontîîwanmîra uyapurîkonpa umaimu yawîrî, eranneꞌ pe pra”taꞌpîiya utamokon Abraão nurîꞌtî pîꞌ.Mîrîrî tîmaimu tîrîꞌpîiyatînenaꞌpoka tonpe pra tînkupî tonpe.
74 Eraꞌmakî 1:73
75 Mîrîrî kupîiya, morî pe puꞌkuru,imakuiꞌpî ton pra eꞌnîtoꞌpeꞌnîkon kaiꞌma iipia.Imakuiꞌpî kupî pîꞌ koꞌmannî namai saꞌmantan pîkîrî —taꞌpî Zacariasya.
76 —Amîrî unmu, tamîꞌnawîronkon yentainon Paapa maimu ekaremeꞌnen pe awanî kupî sîrîrî,uyepotorîkon iipî yekare ekaremekîya pe nai.Uyepotorîkon iipî rawîrî eꞌma konekaya,Uyepotorîkon yeꞌmarî ton.Tamîꞌnawîrî konekaya morî pe Uyepotorîkon erepantoꞌpe
77 Maasa pra itekare ekaremekîya pe naipemonkonyamîꞌ pîꞌ, eꞌpîikaꞌtîntoꞌ yekare.Mîrîrî itekare wenai imakuiꞌpî pe tîweꞌtoꞌkon rumaka toꞌya kupî sîrîrî.Moropai mîrîrî kupî Paapaya tîîwanmîra.
78 Maasa pra Paapa wanî Uyepotorîkon pe puꞌkuru uurîꞌnîkon iꞌnokoꞌmanen pe.Erenmapî ya, wei epaꞌka warantî,mîîkîrîya upîikaꞌtînenkon ton yarima pe man uupiaꞌnîkon.
79 Mîîkîrî narimaya ewaron ta tîîkoꞌmansenon pemonkonyamîꞌ weiyuꞌma.Inkamoro pîikaꞌtîiya toꞌ saꞌmantatoꞌ winîpai.Moropai morî tîrîiya uurîꞌnîkon pia,morî pe asanîtoꞌpe tîîwanmîra, teesewankonoꞌmai pra
—taꞌpî Zacariasya.
80 Mîrîrî tîpo mîîkîrî Zacarias munmu arentaꞌpî. Kureꞌne aarentaꞌpî. Moropai meruntî ke itewan enaꞌpî, itesaꞌ pe Morî Yekaton Wannî wanî yeꞌnen. Moropai aakoꞌmanpîtîꞌpî keren po. Israel ponkon pîꞌ teesenpo pîkîrî aakoꞌmamîꞌpî keren po.
