Jesus Cristo Yekare Lucas Nîmenukaꞌpî 10:1-42
10 Mîrîrî tîpo Uyepotorîkonya tiaronkon 72 kaisarî warayoꞌkon menkaꞌpî tînaipontîtonkon. Moropai inkamoro yaipontîꞌpîiya asakîꞌneꞌne patakon kaisarî. Cidadekon poro toꞌ wîtîtoꞌpe tîrawîrî oꞌnon poro tuutîtoꞌ yairî.
2 Moropai inkamoro yaipontîꞌpîiya. Toꞌ yaipontî pe taꞌpîiya: —Tuꞌke toꞌ man umaimu anetapainokon, tîîse umaimu ekaremeꞌnenan wanî tuꞌke pra mararî pra umî yawon emîsaꞌ warantî, tîîse ipîꞌ teesenyakaꞌmasanon man mararî, imoꞌka toꞌya eserîke pra. Mîrîrî yeꞌnen esaꞌtî mîîkîrî umî esaꞌ Paapa pîꞌ tiaronkon teesenyakaꞌmasanontonkon yarimatoꞌpeiya —taꞌpîiya.
3 Inkamoro pîꞌ taꞌpîiya: —Atîtî see, uurîya ayarimakon sîrîrî. Ayarimauyaꞌnîkon sîrîrî nariꞌkon koreꞌta. Carneiro munkîyamîꞌ yekaꞌma warantî kaikusiyamîꞌ koreꞌta ayarimauyaꞌnîkon sîrîrî.
4 Attîkon pe kanan îꞌ rî kîsatî. Ayetteꞌkon yenseꞌ asakunikon kîsatî. Moropai aꞌsaꞌsakon kîsatî. Moropai anîꞌrî eposaꞌyaꞌnîkon ya eꞌma ta, mîîkîrî yarakkîrî kureꞌne kîseurîmatî. Tîîse teesemiꞌtapai matîtîi.
5 Miarî ya eerepansaꞌkon ya wîttî ta eewomîkon pe makatîi eꞌmaiꞌ pe: “Paapaya tîwanmîn tîrî yuꞌse wai sîrîrî wîttî ta”, makatîi —taꞌpîiya toꞌ pîꞌ.
6 —Morî pe puꞌkuru mîrîrî wîttî tawon warayoꞌ wanî ya, tîwanmîn yapisîiya Paapa winîpai. Tîîse morî pe pra mîîkîrî warayoꞌ wanî ya, yapisîiya pepîn. Tîîse amîrîꞌnîkonya yapisî.
7 Morî pe aakoꞌmamîkon ya mîrîrî wîttî ta. Tîîse moro makoꞌmantîi ayaꞌreꞌkon monpatîi moro, awukukon menîꞌtîi moro, îꞌ rî tîrî toꞌya ya aapiaꞌnîkon. Maasa pra teesenyakaꞌmasenya teesenyakaꞌmaꞌpî yepeꞌpî yapisî eꞌpai awanî. Mîrîrî yeꞌnen moro makoꞌmantîi tiwinan wîttî ta tiaron ta tîmoꞌtapîꞌse pra.
8 Cidade pona eewomîkon ya, miarî morî pe ayapisîkon toꞌya ya, moro ayaꞌreꞌkon monpatîi toꞌ koreꞌta, îꞌ rî tîrî toꞌya.
9 Moropai miarî cidade po priꞌyawonkon pepîn mepiꞌtîtîi. Moropai makatîi miarî ronkon pemonkonyamîꞌ pîꞌ: “Aapiaꞌnîkon Paapa nîtîrî erepannî pîꞌ man. Ayesaꞌkon pe Paapa koꞌmantoꞌpe eturumakatî itenyaꞌ,” makatîi toꞌ pîꞌ —taꞌpîiya.
10 —Tîîse morî pe ayapisîkon toꞌya pra awanî ya, miarî cidade po, moriya mepaꞌkatîi eꞌma ta. Moropai makatîi:
11 “Itekare anetapai pra awanîkon yeꞌnen, anna epaꞌka sîrîrî apatakon piapai. Aꞌkî, anna puu pîꞌ atapisîꞌpî non apatakon yawon paꞌtî annaya sîrîrî. Sîrîrî kupî annaya itekare yuꞌse pra awanîkon ekaremeꞌnen pe. Tîîse sîrîrî epuꞌtî, Paapaya atarumaꞌtîkon kupî sîrîrî. Maasa pra aminke pra tamîꞌnawîronkon esaꞌ pe Paapa iiꞌtoꞌ eseporî kupî sîrîrî. Tîpemonkonoyamîꞌ pîikaꞌtîiya kupî sîrîrî” makatîi toꞌ pîꞌ —taꞌpîiya.
12 Moropai inîꞌrî taꞌpî Jesusya: —Ayenkuꞌtîuyaꞌnîkon pepîn. Tiwinanoꞌpî wei yai, tamîꞌnawîronkon yenumî Paapaya yai, mîrîrî cidade ponkon tarumaꞌtîiya kupî sîrîrî kureꞌne manniꞌkan penaronkon Sodoma ponkon tarumaꞌtîꞌpî tîuya yentai.
Cidade Ponkon Pemonkonyamîꞌya Jesus Yapisî Pîn
13 Jesus eseurîma koꞌmannîpîꞌpî: —Aka saꞌne Corazim cidaderî ponkon pemonkonyamîꞌ. Aka saꞌne Betsaida cidaderî ponkon, innape ukupîyaꞌnîkon pra awanîkon sîrîrî tîpose. Teuren kureꞌne îꞌ ikupî eserîkan pepîn eꞌkupîꞌpî apatakon yaꞌ. Tîîse innape ukupîyaꞌnîkon pra aweꞌsaꞌkon. Sîrîrî mîrîrî yeꞌka eꞌkuꞌsaꞌ ya Tiro cidaderî po, moropai Sidom cidaderî po, miarî ronkon pemonkonyamîꞌya tîmakuyikon rumakaꞌpî eꞌpainon pena. Mararî pra tîmakuyikon pîꞌ toꞌ esewankonoꞌma eꞌpainon, saaku yaꞌ teepontîi moropai runuꞌpî ke teekîꞌpai —taꞌpî Jesusya.
14 —Tamîꞌnawîronkon yenumî Paapaya weiyu yai eesewankonoꞌmakon kupî sîrîrî mararî pra. Tiro cidaderî ponkon pemonkonyamîꞌ esewankonoꞌmaꞌpî yentai. Moropai Sidom ponkon eꞌtarumaꞌtîꞌpî yentai amîrîꞌnîkon eꞌtarumaꞌtî kupî sîrîrî. Maasa pra innape imaimu kuꞌsaꞌyaꞌnîkon pra awanî yeꞌnen.
15 Aka saꞌne Cafarnaum ponkon pemonkonyamîꞌ kaꞌ pona attîkon kaiꞌma eesenumenkakon, tîîse attîkon pe pra naatîi amakuyikon wenai. Mîrîrî wenai apoꞌ yaꞌ Paapaya ayenumîkon kupî sîrîrî —taꞌpîiya toꞌ pîꞌ.
16 Moropai taꞌpî Jesusya tînenupaꞌsan 72 kaisaronkon pîꞌ: —Anîꞌkanya amaimukon eta ya, morî pe umaimu eta toꞌya mîrîrî. Tîîse anîꞌkanya ayewanmîrîkon ya, inkamoroya uyewanmîrî nîrî mîrîrî. Moropai uyewanmîrînenanya nîrî Paapa uyarimatîpon yewanmîrî mîrîrî —taꞌpî Jesusya.
72 Kaisaronkon Warayoꞌkon Ennaꞌpo Jesus Pia
17 Moropai inkamoro 72 kaisaronkon warayoꞌkon itîꞌsan ennaꞌpoꞌpî Jesus pia kureꞌne puꞌkuru taatausinpai. Moropai inkamoroya ekaremekîꞌpî Jesus pîꞌ. —Oꞌmaꞌkon wanîꞌpî anna maimu yawîrî. Maasa pra “Jesus maimu pe epaꞌkatî pemonkonyamîꞌ yapai”, taꞌpî annaya. Mîrîrî yeꞌnen toꞌ epaꞌkaꞌpî —taꞌpî toꞌya.
18 Mîrîrî yuukuꞌpî Jesusya: —Inna, mîrîrî warantî awanî maasa pra kaꞌneꞌ pe waraꞌnapi eꞌsisiuka warantî, kaꞌ poi Makui enasaꞌ eraꞌmaꞌpîuya, imeruntîri yentai Paapa wanî yeꞌnen —taꞌpîiya.
19 —Maasa pra Uurîya puꞌkuru meruntî tîrîꞌpî aapiaꞌnîkon, yeꞌkaton îkîi yakiꞌtapakonpa kaiꞌma, umaimu pe, moropai yekiꞌkaton mariꞌtî yakiꞌtapakonpa. Moropai tamîꞌnawîron imakuiꞌpî kuꞌnenan awinîkîiꞌnîkon yentai puꞌkuru awanîkonpa umaimu pe. Amoronkon epuꞌtîyaꞌnîkon namai meruntî tîrîꞌpîuya.
20 Tîîse mîrîrî pîꞌ taatausinpai pra eꞌtî. Amaimukon pe oꞌmaꞌkon epaꞌka pîꞌ katausinpatî. Tîîse tauya apîꞌnîkon, kaꞌ po ayeseꞌkon menukasaꞌ Paapaya man morî pe aakoꞌmamîkonpa, mîrîrî pîꞌ atausinpatî —taꞌpî Jesusya toꞌ pîꞌ.
Jesus Atausinpa
21 Mîrîrî tîpo Morî Yekaton Wannî meruntîri yarakkîrî Jesus wanîꞌpî kureꞌne taatausinpai. Mîrîrî yeꞌnen taꞌpîiya: —Uyepotorî Paapa, uyun, amîrî kaꞌ esaꞌ tîweꞌsen. Moropai non esaꞌ pe tîweꞌsen. Morî pe man tauya apîꞌ. Maasa pra epuꞌnen aweꞌtoꞌ anonamîꞌpî yenposaꞌya epuꞌnenan pepînya epuꞌtoꞌpe. Epuꞌnen pe tîweꞌsanon piapai imoꞌkaꞌpîya itîrîpa pakko pe tîweꞌsanon pia, moreyamîꞌ warainokon pia. Mîrîrî pîꞌ morî pe man tauya, Paapa. Mîrîrî warantî imenkaꞌpîya moropai mîrîrî kupîꞌpîya. Maasa pra mîrîrî kuꞌsaꞌya ituꞌse awanî yeꞌnen —taꞌpî Jesusya.
22 Inîꞌrî taꞌpî Jesusya: —Uyunya tamîꞌnawîron tîîsaꞌ man uupia. Moropai anîꞌya anîꞌ pe wanî epuꞌtî pra man. Tîîse Uyunya neken epuꞌtî. Moropai anîꞌya uyun epuꞌtî pra man. Tîîse uurîya neken epuꞌtî. Moropai anîꞌ pe uyun wanî ekaremekîuya manniꞌkan epuꞌtî toꞌya yuꞌse uurî eꞌtoꞌkon pîꞌ —taꞌpî Jesusya.
23 Mîrîrî taa tîpo, tînenupaꞌsan eraꞌmaꞌpî Jesusya. Moropai taꞌpîiya teken neken toꞌ, tîîse arinîkon koreꞌta pra. —Amîrîꞌnîkon neraꞌma eraꞌmanenan wanî taatausinpai puꞌkuru.
24 Maasa pra tauya sîrîrî apîꞌnîkon. Tuꞌkankon Paapa maimu ekaremeꞌnenan profetayamîꞌ nurîꞌtîya, moropai ipîkkukon pata esanon reiyamîꞌya, mîrîrî aneraꞌmaꞌpîkon aneraꞌmapai toꞌ wanîꞌpî teuren, tîîse eraꞌma toꞌya eserîke pra awanîꞌpî. Moropai mîrîrî anetaꞌpîkon anetapai toꞌ wanîꞌpî teuren, tîîse eta toꞌya pra toꞌ wanîꞌpî —taꞌpî Jesusya tînenupaꞌsan pîꞌ.
Morî Warayoꞌ Samaria Poinon
25 Tiaron pensa warayoꞌ Moisés yeserurîꞌpî pîꞌ yenupaton eꞌmîꞌsaꞌkaꞌpî moropai Jesus ekaranmapoꞌpîiya maasa pra epuꞌnen pe awanî anepuꞌpai awanîꞌpî. Mîrîrî yeꞌnen taꞌpîiya: —Uyenupanen, Oꞌnon yeꞌka pe see ipatîkarî enen uukoꞌmantoꞌ ton eporîuya eꞌpainon?
26 Mîîkîrî maimu yuukuꞌpî Jesusya: —Îꞌ kaiꞌma see Paapa maimu eꞌmenukasaꞌ mîrîrî epuꞌtî pîꞌ nan? Îꞌ kaiꞌma see ekaremeꞌnen amîrî? —taꞌpî Jesusya ipîꞌ.
27 Mîîkîrîya taꞌpî: —Taiya see warantî:Ayepotorî Paapa yapurîkî ayewan ke, moropai tamîꞌnawîrî eesenumenkatoꞌ ke. Moropai ameruntîri ke yapurîkî. Moropai tamîꞌnawîrî epuꞌtoꞌya ke yapurîkî,Ayonpa saꞌnamakî aweꞌsaꞌnama manniꞌ warantî,
taiya —taꞌpîiya.
28 Mîîkîrî pîꞌ taꞌpî Jesusya: —Inna, yairî taa pîꞌ nai. Moriya mîrîrî kuꞌkî. Mîrîrî kupîya ya, yairî enen aakoꞌmantoꞌ ton eporîya —taꞌpî Jesusya.
29 Moropai warayoꞌya Jesus ekaranmapoꞌpî maasa pra taꞌpî tîuya manniꞌ yawîrî pra tîwanî epuꞌtî tîuya yeꞌnen. Taꞌpîiya: —Anîꞌ kin mîîkîrî uyonpa, isaꞌnamatoꞌpeuya? —taꞌpîiya.
30 Mîîkîrîya epuꞌtoꞌpe Jesusya panton ekaremekîꞌpî see warantî. —Aꞌkî, warayoꞌ wîtîꞌpî Jerusalém poi Jericó pona. Eꞌma taawîrî tuutî pe amaꞌyeꞌkon eporîꞌpîiya. Inkamoroya ipaꞌtîpîtîꞌpî, iponkaꞌpî toꞌya moropai iwî yonpasaꞌ toꞌya wanîꞌpî. Moropai inkamoro wîtîꞌpî.
31 Mîrîrî tîpo teepîremasen iipîꞌpî inîmîkîiya pra tîîse eꞌma taawîrî. Moropai mîîkîrî eraꞌmaꞌpî teepîremasenya. Tîîse eraꞌma tîuya yai tiaron eꞌma winî iwaꞌkaꞌpîiya, iipia tuutî namai.
32 Moropai mîrîrî tîpo tiaron iipîꞌpî Levi paarîꞌpî, toꞌ epîrematoꞌ yewîꞌ ta teesenyakaꞌmasen. Mîîkîrîya eraꞌmaꞌpî nîrî, moropai mîîkîrîya iwaꞌkaꞌpî mîrîrî warantî.
33 Mîrîrî tîpo tiaron warayoꞌ iipîꞌpî Samariapon, Judeuyamîꞌ yeyaton. Eporî tîuya pe mîîkîrîya eraꞌmaꞌpî moropai eemîꞌpamîꞌpî iipia.
34 Moropai mîîkîrî pîꞌ taꞌpîiya: “Aka, saꞌne”. Mîîkîrî pîikaꞌtîꞌpîiya iteyaton pe awanîꞌpî tîîse, ipaꞌtîpîꞌtoꞌ toꞌya ronaꞌpîiya. Moropai iteꞌnatî yaikaꞌpîiya óleo ke, vinho ke. Moropai yanumîꞌpîiya tekîn pona moropai yarîꞌpîiya. Eerepamîꞌpî entamoꞌkantoꞌ ke tîweꞌrepasen yewîꞌ ta. Moro aakoꞌmamîꞌpî ipîikaꞌtî pîꞌ.
35 Tiaron wei yai mîîkîrîya taꞌpî mîrîrî wîttî esaꞌ pîꞌ: “Aꞌkî, mîserî konekaya yuꞌse wai” taꞌpîiya. “Ipîꞌ eesenyakaꞌma yuꞌse wanî sîrîrî”. Mîrîrî pîrata enaꞌpî tîrîꞌpîiya asakîꞌne. Mîîkîrîya taꞌpî: “Tamîꞌnawîrî antîꞌkaꞌpî yeꞌmauya sîrîrî poro uuipî ya”, taꞌpîiya. Mîrîrî kupîꞌpî mîîkîrîya warayoꞌ priꞌyawon pepîn pîꞌ —taꞌpî Jesusya.
36 Mîrîrî ekaranmapoꞌpî Jesusya: —Anîꞌ wanî inkamoro eseurîwîꞌnankon warayoꞌkon koreꞌta ipaꞌtîpîꞌsaꞌ yonpa pe?
37 Mîrîrî yuukuꞌpî warayoꞌya: —Manniꞌ ipîikaꞌtîtîpon.
—Moriya mîrîrî warantî ikuꞌkî —taꞌpî Jesusya ipîꞌ.
Marta Moropai Itakon Maria Pia Jesus Wîtî
38 Jesus moropai inenupaꞌsan wîtîꞌpî eꞌma taawîrî. Moropai toꞌ erepamîꞌpî pemonkonyamîꞌ koꞌmantoꞌ pata pona. Miarî toꞌ erepamîꞌpî. Moropai tiwinan wîriꞌ iteseꞌ Martaya tewîꞌ ta toꞌ pataꞌseꞌ ton tîrîꞌpî.
39 Mîîkîrî yakon wanîꞌpî Maria iteseꞌ. Mîîkîrî ereutaꞌpî Uyepotorîkon pia. Moropai Jesus eseurîma tanne eta pîꞌ Maria koꞌmamîꞌpî Jesusya yenupantoꞌ.
40 Mîrîrî tanne Marta wanîꞌpî mararî pra teesenyakaꞌma pîꞌ tamîꞌnawîrî tînkoneka pîꞌ. Mîrîrî yai Marta iipîꞌpî Jesus pia moropai taꞌpîiya: —Uyepotorî tiwinsarî siꞌma esenyakaꞌma eraꞌma pîꞌ nai. Uyakonya tiwinsarî unîmîsaꞌ tamîꞌnawîron konekatoꞌpeuya. Upîikaꞌtîi uyakon iiꞌtoꞌpe kaꞌkî.
41 Mîîkîrî maimu yuukuꞌpî Uyepotorîkonya. Taꞌpîiya: —Marta, eesenyakaꞌmatoꞌ pîꞌ neken awanî mîrîrî. Eesenyakaꞌmatoꞌya ayakinpa mîrîrî.
42 Tîîse morî, mîrîrî yentainon moro man. Ayakon Mariaya kureꞌne ituꞌse tîweꞌtoꞌ moꞌkasaꞌ sîrîrî. Morî menkasaiꞌya sîrîrî. Anîꞌya sîrîrî moꞌka eserîke pra man Maria piapai —taꞌpî Jesusya.
