Jesus Cristo Yekare Lucas Nîmenukaꞌpî 11:1-54
11 Tiaron pensa Jesus epîremaꞌpî. Mîîkîrî ataretîꞌkasaꞌ tanne, tiwinan inenupaꞌpî yonpaya taꞌpî ipîꞌ: —Uyepotorî, anna yenupakî anna epîrematoꞌpe. Joãoya tînenupaꞌsan yenupaꞌpî warantî anna yenupakî —taꞌpîiya.
2 Mîîkîrî maimu yuukuꞌpî Jesusya: —Sîrîrî warantî epîrematî —taꞌpîiya.—“Paapa, kaꞌ pon,amîrî neken morî pe puꞌkuru wanî.Mîrîrî taa tamîꞌnawîronkonya yuꞌse wai apîꞌ.Amîrî wanî tamîꞌnawîronkon esaꞌ pe.Asiꞌkî anna pia anna esaꞌ pe awanîpa.
3 Anna yekkari ton antîîkî wei kaisarî îꞌ ton pra anna wanî namai, Paapa.
4 Moropai Paapa, anna nîkupîꞌpî imakuiꞌpî awinîkîi mîrîrî kuꞌkî aawanmîra.Mîrîrî warantî nîrî tamîꞌnawîronkon nîkupîꞌpî anna pîꞌ, mîrîrî kupî annaya anna wanmîra, Paapa.Moropai anna pîikaꞌtîkî imakuiꞌpî ena namai anna yentai”.
Mîrîrî warantî mepîrematîi —taꞌpî Jesusya.
5 Moropai Jesusya taꞌpî tînenupaꞌsan pîꞌ: —Maasa esenumenkatî. Attîkon ya, ayonpakon yewîꞌ ta anoinna yairî eseurîwîꞌne trigo puusaꞌ esaꞌse ipîꞌ. Moropai taayaꞌnîkon “Ikei esaꞌse yiꞌnî pîꞌ wai apîꞌ”, taaya.
6 “Maasa pra uyonpa tuutîsen erepannî pîꞌ man amen puꞌkuru. Eemiꞌnepansaꞌ ipîra, tîîse iipia untîrî ton pra man itaꞌreꞌ ton” taaya.
7 Esenumenkakî, îꞌ kaiꞌma ayonpaya amaimu yuuku wîttî ta siꞌma. “Upîꞌ tîîwoꞌmaꞌtai pra eꞌkî. Asapontîsaꞌ puꞌkuru sîrîrî. Unnaꞌta atarakkanmoka eserîke pra yeꞌseꞌtîsauꞌya wai. Moropai unmukuyamîꞌ weꞌnasaꞌ man uyena. Mîrîrî yeꞌnen eꞌmîꞌsaꞌka eserîke pra wai trigo puusaꞌ tîîse”, taiya.
8 Tauya sîrîrî apîꞌnîkon —taꞌpî Jesusya. —Aweꞌmîꞌsaꞌka pepîn ayonpa pe tîwanî yeꞌnen. Tîîse tetaꞌkai esatî pîꞌ aakoꞌmamî ya aweꞌmîꞌsaꞌka tuꞌka ituꞌse tonpa eꞌtoꞌ tîrîpa. Moropai tamîꞌnawîrî inesatîꞌpî tîrîiya iipia —taꞌpî Jesusya.
9 —Mîrîrî yeꞌnen tauya apîꞌnîkon. Paapa esatî pîꞌ akoꞌmantî teesetaꞌkai pra. Moropai yapisîyaꞌnîkon iwinîpai. Yuwa pîꞌ akoꞌmantî moropai eporîyaꞌnîkon. Manaꞌta paꞌtî pîꞌ akoꞌmantî moropai wîttî esaꞌya yarakkanmoka.
10 Maasa pra Paapa pîꞌ tamîꞌnawîronkon esaꞌnenanya tînesatîꞌpîkon yapisî. Moropai yuwanenanya tînuwakon eporî. Moropai manaꞌta paꞌtînenan pia manaꞌta atarakkanmoka —taꞌpîiya.
11 Moropai taꞌpîiya: —Amîrîꞌnîkon tînmuku kenankon. Anmukukonya tiyoꞌ ton esatî ya, îkîi tîrîyaꞌnîkon eꞌpainon? Kaane, itîrîyaꞌnîkon pepîn.
12 Tiyoꞌ ton kariwana pîmoi esatî anmukukonya ya, yekiꞌkaton mariꞌtî tîrîyaꞌnîkon eꞌpainon? Kaane, itîrîyaꞌnîkon pepîn.
13 Amîrîꞌnîkon wanî imakuiꞌpî kuꞌnenan pe teuren, tîîse imakuiꞌpî tîrîyaꞌnîkon pepîn anmukukon pia. Morî tîrîyaꞌnîkon. Mîrîrî yentai Paapa kaꞌ ponya morî tîrî aapiaꞌnîkon. Ayesaꞌkon pe aakoꞌmantoꞌpe Morî Yekaton Wannî tîrîiya anîꞌya esatî ya —taꞌpî Jesusya.
Belzebuya Tîmeruntîri Tîîsaꞌ Jesus Pia Taa Toꞌya
14 Mîrîrî tîpo arinîkon pemonkonyamîꞌ koreꞌta tîwanî yeꞌka pe Jesusya oꞌmaꞌ yenpaꞌkaꞌpî tiwinan warayoꞌ yapai. Mîîkîrî oꞌmaꞌya warayoꞌ eseurîma tîrî pra aweꞌpîtîꞌpî. Tîîse Jesusya yenpaꞌkasaꞌ pe ipataꞌpî yaꞌ warayoꞌ eseurîmaꞌpî. Mîrîrî kupî Jesusya eraꞌmasaꞌ tîuyaꞌnîkon pe mararî pra teesenumenkai arinîkon pemonkonyamîꞌ wanîꞌpî ipîꞌ.
15 Tîîse tiaronkonya taꞌpî: —Maawariyamîꞌ yepotorî Belzebu meruntîri ke maawariyamîꞌ yenpaꞌkaiya mîrîrî —taꞌpî toꞌya. Makui mîîkîrî Belzebu.
16 Moropai tiaronkon wanîꞌpî ipîꞌ tîwoꞌmaꞌtasanon pe. Taꞌpî toꞌya: —Anna neraꞌma ton kuꞌkî. Kaꞌ poinon Paapa meruntîri ke ikuꞌkî, innape akuꞌtoꞌpe annaya —taꞌpî toꞌya tîîwoꞌmaꞌtai.
17 Tîîse îꞌ kaiꞌma toꞌ esenumenkatoꞌ epuꞌtîꞌpî Jesusya. Mîrîrî yeꞌnen taꞌpîiya: —Aꞌkî, tiwinan pata yaꞌ tîîkoꞌmansenon eseyaꞌnama ya, toꞌ eꞌtîꞌka eꞌpainon tamîꞌnawîrî. Moropai tonpakon pokonpe tîmurukun pe tîîkoꞌmansenon wanî ya, inkamoro koꞌmamî teesiyuꞌpîꞌse morî pe pra. Moropai toꞌ ekoreꞌma, toꞌ eꞌtîꞌka tamîꞌnawîrî eꞌpainon.
18 Mîrîrî warantî Makui koꞌmamî ya tîpemonkonoyamîꞌ pokonpe teesiyuꞌpîtî pîꞌ, meruntî ke awanî pepîn. Mîrîrî tauya sîrîrî maasa pra Belzebuya tîmeruntîri tîîsaꞌ oꞌmaꞌkon yenpaꞌkapa, taayaꞌnîkon upîꞌ —taꞌpîiya.
19 —Tîîse mîrîrî warantî awanî ya, anîꞌya meruntî tîrî eꞌpainon anenupaꞌsan pia, oꞌmaꞌkon yenpaꞌkatoꞌpe toꞌya? Inkamoroya taa eꞌpainon apîꞌnîkon: “Esenkuꞌtîꞌsan pe awanîkon” taa toꞌya.
20 Tîîse Paapa meruntîri ke oꞌmaꞌkon yenpaꞌkauya ya, Paapa iiꞌsaꞌ man akoreꞌtaꞌnîkon tamîꞌnawîronkon esaꞌ pe epuꞌtîyaꞌnîkon.
21 Meruntî warayoꞌ tîyurupai kenanya tewîꞌ eraꞌma ya, anîꞌya itemanne yamaꞌrunpa eserîke pra awanî, meruntî ke awanî yeꞌnen.
22 Tîîse itentainon moro awanî ya, mîîkîrî iipî. Iturupai moꞌkaiya, mîrîrî meruntî ke tîwanî emapuꞌtînen. Moropai itemanne yamaꞌrunpaiya, yarîiya. Moropai mîrîrî pantakaiya tonpayamîꞌ pia —taꞌpîiya.
23 —Mîrîrî yeꞌnen —taꞌpî Jesusya, —Anîꞌya innape ukupî pra awanî ya, uyeyaton awanî mîrîrî. Moropai anîꞌ esenyakaꞌma pra awanî ya, uurî ton pe uurî esenyakaꞌmatoꞌ tarumaꞌtîiya mîrîrî —taꞌpî Jesusya.
Oꞌmaꞌkon Pîꞌ Jesus Eseurîma
24 Mîrîrî pîꞌ Jesus eseurîma koꞌmannîpîꞌpî: —Pemonkon yapai teepaꞌka tîpo oꞌmaꞌ asarî koꞌmannîpî tuna ton pîn ya pîꞌ tîpataꞌseꞌ ton yuwa pîꞌ teerîꞌkapîpa. Tîîse eporî tîuya pra tîwanî ya taiya: “Kaane ennaꞌpoi waꞌta uyewîꞌ ta, yapai epaꞌka neꞌtîkini yaꞌ”, taiya.
25 Moropai mîîkîrî oꞌmaꞌ ennaꞌpo inîꞌrî mîîkîrî pemonkon yaꞌ. Mîîkîrî yeporîiya yawon pra, morî yekaꞌmaiya pra tîîse.
26 Moropai mîîkîrî oꞌmaꞌ wîtî iipiapai tiaronkon oꞌmaꞌkon yetai tarakkîrî toꞌ koꞌmantoꞌpe kaiꞌma. Toꞌ enepîiya asakîꞌne miaꞌ pona tîîmoꞌtai kaisarî inîꞌ panpîꞌ imakuiꞌsan enepîiya mîrîrî mîîkîrî warayoꞌ yaꞌ. Moropai tamîꞌnawîrî inkamoro koꞌmamî mîîkîrî yaꞌ. Inkamoroya mîîkîrî tarumaꞌtî mararî pra, pena eꞌmaiꞌ pe imakuiꞌpî pe tîwanîꞌpî yentai, mîîkîrî warayoꞌ yeseru wanî inkamoro wanî yeꞌnen yaꞌ —taꞌpî Jesusya.
Atausinpantoꞌ Pîꞌ Jesus Eseurîma
27 Mîrîrî pîꞌ Jesus tanne, tiwin wîriꞌ arinîkon pemonkonyamîꞌ koreꞌtawon eseurîmaꞌpî aronne. Moropai taꞌpîiya: —Paapaya morî tîîsaꞌ wîriꞌ pia, manniꞌ amîrî yenpotîpon pia, tîmannîtî ke awoꞌpatîpon pia —taꞌpî wîriꞌya.
28 Mîîkîrî maimu yuukuꞌpî Jesusya: —Mîîkîrî yentai tîweꞌsanon manniꞌkan Paapa maimu etanenan. Moropai yawîrî tîîkoꞌmansenon. Inkamoro wanî morî pe puꞌkuru —taꞌpî Jesusya.
Tîneraꞌmatonkon Yuꞌse Toꞌ Wanî
29 Arinîkon pemonkonyamîꞌ tîîse tîîpia tîwoi Jesus eseurîma piaꞌtîꞌpî. Taꞌpîiya see warantî: —Sîrîrî pankon pemonkonyamîꞌ wanî sîrîrî imakuiꞌpî pe puꞌkuru. Aneraꞌmakon ton esatîyaꞌnîkon innape Paapa kupî yeꞌka pe pra. Tîîse ikupîuya pepîn aneraꞌmakon ton. Tîîse tiwin neken Jonas yarakkîrî eꞌkupîꞌpî ekaremekîuya aneraꞌmakon ton.
30 Paapa maimu ekaremeꞌnen profeta Jonas nurîꞌtî eraꞌmaꞌpî Nínive cidaderî ponkonya enen, aasaꞌmantasaꞌ kaiꞌma toꞌ eꞌsaꞌ tanne. Mîrîrî wenai Paapa meruntîri yai aweꞌmîꞌsaꞌkasaꞌ epuꞌtîꞌpî toꞌya. Mîrîrî warantî uurî kaꞌ poi esenpoꞌpî iiꞌsaꞌ sîrîrî amîrîꞌnîkon koreꞌta, aneraꞌmakon ton pe —taꞌpî Jesusya.
31 —Aꞌkî, tiwinanoꞌpî wei yai Sabá pata esaꞌ pe tîweꞌsen nurîꞌtî eꞌmîꞌsaꞌka kupî sîrîrî. Moropai mîîkîrîya taa kupî sîrîrî apîꞌnîkon: “Îꞌ ton pe innape ikupîyaꞌnîkon pra awanîkon?” Maasa pra pena mîîkîrî wîriꞌ iiꞌpîtîꞌpî aminke pai epuꞌnen pe tîweꞌsen Salomão nurîꞌtîya tenupatoꞌpe kaiꞌma etai. Moropai innape ikupîꞌpîiya. Tîîse tauya sîrîrî apîꞌnîkon. Uurî akoreꞌtaꞌnîkon manniꞌ uurî wanî mîîkîrî epuꞌnen pe siꞌpî Salomão yentai. Tîîse innape ukupîyaꞌnîkon pra awanîkon —taꞌpî Jesusya.
32 —Tiwinanoꞌpî wei yai Nínive ponkon nurîꞌtî nîrî eꞌmîꞌsaꞌka kupî sîrîrî. Moropai inkamoroya taa kupî sîrîrî apîꞌnîkon: “Îꞌ waniꞌ awanî yeꞌnen amakuyikon rumakayaꞌnîkon pra awanîkon?” taa toꞌya. Maasa pra inkamoroya tîmakuyikon rumakaꞌpî pena, Jonas nurîꞌtîya Paapa maimu ekaremekî yai Nínive po. Mîrîrî yeꞌnen tauya sîrîrî apîꞌnîkon. Uurî wanî akoreꞌtaꞌnîkon mîîkîrî Jonas yentai. Mîîwîni tîîse amakuyikon rumakayaꞌnîkon pra awanîkon —taꞌpî Jesusya.
Ayesaꞌkon Weiyuꞌpanen Pîꞌ Jesus Eseurîma
33 Jesus eseurîma koꞌmannîpîꞌpî: —Aꞌkî, anîꞌya tîꞌkumaꞌtu yawittanîpî pepîn eꞌpainon îꞌ rî yoꞌkoi itîrîpa. Tîîse itîrîiya eꞌpainon itaponseꞌ pona, maasa pra tamîꞌnawîronkon pemonkonyamîꞌya eraꞌmatoꞌpe kaiꞌma, morî pe aꞌka pe awanî yeꞌnen.
34 Jesusya taꞌpî: —Aꞌkî, ayenukon wanî ayesaꞌkon weiyuꞌmanen pe morî pe tamîꞌnawîron ayeserukon eraꞌmakonpa. Tîîse imakuiꞌpî pe ayenukon wanî ya, îꞌ eraꞌmayaꞌnîkon pepîn, îꞌ kupîyaꞌnîkon epuꞌtîyaꞌnîkon pepîn. Ewaron ta tîweꞌsen warantî awanîkon, aꞌka ta pra. Mîrîrî warantî ayewankon wanî. Morî pe Paapa maimu pîꞌ eesenumenkakon ya, ayewankon yaꞌ, tamîꞌnawîrî aakoꞌmantoꞌkon wanî morî pe. Tîîse imakuiꞌpî pe eesenumenkakon ya ayewankon yaꞌ imakuiꞌpî pe nîrî aakoꞌmantoꞌkon wanî.
35 Mîrîrî yeꞌnen tîwarî eꞌtî eesenumenkatoꞌkon ya imakuiꞌpî ewomî namai, morî pe aꞌka pe aakoꞌmamîkon tanne, aamaꞌtanîpîiyaꞌnîkon namai. Mîrîrî warantî ikupîyaꞌnîkon ya ewaron ta awanîkon pepîn.
36 Mîrîrî yeꞌnen tamîꞌnawîrî ayesaꞌkon wanî mîrîrî aꞌka pe. Maasa pra yairon pîꞌ puꞌkuru eesenumenkakon yeꞌnen. Ewaron ta tîweꞌsen warantî pra awanîkon. Aꞌka ta tîîkoꞌmansen pe awanîkon morî pe —taꞌpîiya.
Fariseu Yewîꞌ Ta Jesus Wîtî
37 Jesus eseurîma ataretîꞌka pe tiwinan fariseuya Jesus etaꞌpî tewîꞌ ta entamoꞌkai attîtoꞌpe. Moropai Jesus wîtîꞌpî, mîîkîrî ereutaꞌpî imesarî pia.
38 Tîîse mîîkîrî pîꞌ fariseu esenumenkaꞌpî. Maasa pra teserukon yawîrî aweꞌrona pra awanî yeꞌnen tîwentamoꞌka rawîrî.
39 Mîrîrî epuꞌtî tîuya yeꞌnen, taꞌpî Uyepotorîkonya fariseu pîꞌ: —Amîrîꞌnîkon fariseuyamîꞌya apisaukon moropai aparaturikon ronapîtî ikoꞌnoro tîîse iporo neken. Aweꞌronakon morî pe eeseraꞌmatoꞌpe, tîîse ituꞌna ayewankon yaꞌ nura pe awanîkon tanne. Mîrîrî taꞌpîiya toꞌ yeseru ekaremekîpa kaiꞌma. Toꞌ yewan yaꞌ toꞌ esenumenkatoꞌkon wanî imakuiꞌpî pe, nura pe awanî, mararî pra.
40 Moropai taꞌpîiya: —Pakkokon epuꞌnenan pepîn amîrîꞌnîkon. Anîꞌya kin mîrîrî pisa kupîꞌpî poroporo. Mîîkîrî poroporo ikupîtîponoꞌpîya ita ikupîꞌpî nîrî? Moropai ayesaꞌkon neken pra kuꞌsaꞌ Paapaya pra, tîîse ayewankon nîrî kupîꞌpîiya. Mîrîrî saꞌnîrî nura pe pra yuꞌse Paapa wanî epuꞌtîyaꞌnîkon pra naatî?
41 Mîrîrî yeꞌnen morî pe aakoꞌmantoꞌpe yuwatî. Tîweꞌtarumaꞌtîsanon pîikaꞌtîtî. Toꞌ pia antîrîkon yonpa tîîtî toꞌ yemanne ton pe. Mîrîrî tîrîyaꞌnîkon ya, morî pe puꞌkuru awanîkon, nura pe pra —taꞌpî Jesusya toꞌ pîꞌ.
42 —Aka tîwarî eꞌtî amîrîꞌnîkon, fariseuyamîꞌ. Maasa pra aweꞌtarumaꞌtîkon pe naatîi. Eꞌtoꞌ yawîrî Paapa yapurîyaꞌnîkon kaiꞌma, antîrîkon ayoꞌkon wosi yonpa ke Paapa repayaꞌnîkon. Tîîse morî panpîꞌ antîrîkon pe taꞌpî tîrîyaꞌnîkon pra awanîkon. Tiaronkon winîkîi yairî pra awanîkon yeꞌnen moropai Paapa saꞌnamayaꞌnîkon pra awanîkon yeꞌnen. Mîrîrî kupîyaꞌnîkon eꞌpai awanîꞌpî saꞌnîrî. Paapa pia antîrîkon tîrîyaꞌnîkon moropai tiaronkon saꞌnamayaꞌnîkon eꞌpai awanîꞌpî.
43 Aka tîwarî eꞌtî fariseuyamîꞌ maasa pra aweꞌtarumaꞌtîkon pe naatîi. Maasa pra tiaronkon yentai awanîkon kaiꞌma eesenumenkakon yeꞌnen. Morî pe teekonekai eereutakon epereꞌnîtoꞌ yewîꞌ ta. Moropai arinîkon pemonkonyamîꞌ emurukuntîsaꞌ koreꞌta awanîkon yai, tiaronkonya ayapurîkon yuꞌse awanîkon. Mîî pe awanîkon yeꞌnen aweꞌtarumaꞌtîkon pe naatîi.
44 Aka, tîwarî eꞌtî. Maasa pra amîrîꞌnîkon wanî penaroꞌ uuruwai eesepuꞌtî pra enaꞌpî warantî. Epuꞌtî tîuyaꞌnîkon pra nura koreꞌta pemonkonyamîꞌ asarî iporo —taꞌpî Jesusya.
45 Mîrîrî taa Jesusya yeꞌnen, tiwin Moisés nurîꞌtîya yenupantoꞌ pîꞌ yenupatonya taꞌpî Jesus pîꞌ: —Uyenupanen, mîrîrî warantî anna pîꞌ nîrî eeseurîma epuꞌtî pîꞌ anna man. Anna yeseru winîkîi eseurîman pîꞌ nai —taꞌpîiya.
46 Jesusya imaimu yuukuꞌpî: —Amîrîꞌnîkon nîrî tîwarî eꞌtî, Moisés nurîꞌtîya yenupantoꞌ pîꞌ yenupatonkon. Maasa pra aweꞌtarumaꞌtîkon kupî sîrîrî. Maasa pra yairî pra tiaronkon yenupa pîꞌ aakoꞌmamîkon wenai. Tamîꞌnawîrî saꞌme ayeserukon kupî tiaronya yuꞌse awanîkon. Tîîse amîrîꞌnîkonya mîrîrî kupîyaꞌnîkon pra awanîkon nem mararî.
47 Tîwarî eꞌtî. Maasa pra aweꞌtarumaꞌtîkon kupî sîrîrî. Amîrîꞌnîkonya pena Paapa maimu ekaremeꞌnenan profetayamîꞌ nurîꞌtî uruwasi ton konekaꞌpî morî pe.
48 Mîrîrî yeꞌnen “Inna toꞌ wîîpai man”, taꞌpîyaꞌnîkon. Atamokon nurîꞌsanya inkamoro wîîsaꞌ moropai inkamoro uruwasi ton konekaꞌpîyaꞌnîkon. Mîrîrî wenai aweꞌtarumaꞌtîkon kupî sîrîrî.
49 Mîrîrî yeꞌnen Paapaya taꞌpî epuꞌnen pe tîwanî yeꞌnen: “Umaimu ekaremeꞌnenan yarimauya kupî sîrîrî toꞌ koreꞌta profetayamîꞌ. Tîîse inkamoro yonpayamîꞌ wîî toꞌya kupî sîrîrî. Moropai toꞌ yonparîꞌsan tarumaꞌtî toꞌya umaimu wenai”, taꞌpî Paapaya —taꞌpî Jesusya.
50 —Mîrîrî kupîꞌpî penaronkonya umaimu ekaremeꞌnenan tîꞌkaꞌpî toꞌya. Mîrîrî wenai sîrîrîpe enen tîweꞌsanon pemonkonyamîꞌ tarumaꞌtî Paapaya kupî sîrîrî.
51 Penaroꞌ Abel nurîꞌtî wîꞌpî irui Caimya patapai. Moropai profeta Zacarias nurîꞌtî wîꞌpî toꞌya pîkîrî. Manniꞌ anwîꞌpîkon Paapa ton pe toꞌ nîpoꞌtî yaponseꞌ yarappana Paapa yewîꞌ ta teepîremasanon neken wîtîtoꞌ pata iwîꞌpî toꞌya. Tamîꞌnawîronkon wîꞌpî kuꞌsaꞌ toꞌya wenai tamîꞌnawîronkon sîrîrîpankon pemonkonyamîꞌ tarumaꞌtî Paapaya kupî sîrîrî —taꞌpî Jesusya.
52 —Aka tîwarî eꞌtî amîrîꞌnîkon Moisés nurîꞌtîya yenupantoꞌ pîꞌ yenupatonkon. Maasa pra pemonkonyamîꞌ anenupakonya yairon epuꞌtî eserîke pra awanî. Maasa morî yairon tekaremeꞌse pra yenomîꞌpîyaꞌnîkon ayeserukon neken ekaremekîkonpa kaiꞌma. Mîrîrî wenai toꞌ eꞌpîikaꞌtî eserîke pra. Amîrîꞌnîkon eꞌpîikaꞌtî pepîn moropai inkamoro eꞌpîikaꞌtî namai toꞌ maꞌnîpa pîꞌ aakoꞌmamîkon —taꞌpî Jesusya toꞌ pîꞌ.
53 11:53,54 Mîrîrî taa tîpo Jesus epaꞌkaꞌpî mîîkîrî fariseu yewîꞌ tapai. Mîîkîrî eseurîmasaꞌ pîꞌ fariseuyamîꞌ moropai inkamoro Moisés nurîꞌtîya yenupantoꞌ pîꞌ yenupatonkon ekoreꞌmaꞌpî mararî pra. Mîrîrî yeꞌnen mîîkîrî yekaranmapopîtîꞌpî toꞌya. Maasa pra yairî pra Jesus eseurîma yuꞌse toꞌ wanîꞌpî imakuiꞌpî kupîkonpa kaiꞌma iwinîkîi.
54 Eraꞌmakî 11:53
