Jesus Cristo Yekare Lucas Nîmenukaꞌpî 14:1-35
14 Tiwin wei sábado yai Jesus etaꞌpî fariseuyamîꞌ esanon yonpaya tewîꞌ ta entamoꞌkai attîtoꞌpe kaiꞌma. Jesus wîtîꞌpî moropai mîîkîrî pîꞌ toꞌ esenumenkaꞌpî kureꞌne, sábado yai îꞌ rî kupîiya aneraꞌmapai tîwanîkon yeꞌnen, yairî pra iteseru wanî ekaremekîkonpa kaiꞌma.
2 Miarî Jesus rawîrî tiwin warayoꞌ wanîꞌpî priꞌyawon pepîn. Mîîkîrî wanîꞌpî iꞌsi moropai itemekon awoipîꞌpî pe.
3 Mîîkîrî eraꞌma tîuya yeꞌnen Jesusya Moisés nurîꞌtîya yenupantoꞌ pîꞌ yenupatonkon moropai fariseuyamîꞌ ekaranmapoꞌpî. Taꞌpîiya toꞌ pîꞌ: —Moisés nurîꞌtîya yenupantoꞌ yawîrî priꞌyawon pepîn yepiꞌtîuya erîꞌkaꞌnîtoꞌ weiyu yai morî pe awanî, kaane kaꞌrî? Îꞌ kaiꞌma taasaiꞌya nai? —taꞌpîiya.
4 Tîîse îꞌ kaiꞌma Jesus maimu yuuku toꞌya pra toꞌ wanîꞌpî. Mîrîrî yeꞌnen mîîkîrî priꞌyawon pepîn warayoꞌ yapisîꞌpî Jesusya. Moropai yepiꞌtîꞌpîiya. Moropai attîtoꞌpe taꞌpîiya ipîꞌ.
5 Moropai inkamoro pîꞌ taꞌpî Jesusya: —Amîrîꞌnîkon koreꞌta tînmu kenan wanî ya, mîîkîrî munmu itekîn enasaꞌ ya, ituꞌnakan yaꞌ sábado yai, sábado pe awanî yeꞌnen imoꞌkai attî pepîn eꞌpainon kaꞌneꞌ pe?
6 Mîrîrî yuuku toꞌya eserîke pra awanîꞌpî.
Tiaronkon Maꞌre Eꞌnîtoꞌ Pîꞌ Jesus Eseurîma
7 Mîrîrî taa tîpo entamoꞌkantoꞌ pîꞌ etasaꞌkon yakoꞌmenkaꞌpî Jesusya. Maasa pra yaponseꞌ wanî ereutantoꞌkon menkaꞌpî toꞌya mesa pia. Morîkon ponarî toꞌ ereutaꞌpî ipona ipîkku pe tiaronkon yentai toꞌ eꞌtoꞌpe. Mîrîrî eraꞌma tîuya yeꞌnen, Jesusya sîrîrî panton ekaremekîꞌpî toꞌ pîꞌ.
8 Taꞌpîiya toꞌ pîꞌ: —Aꞌkî, anîꞌya amîrîꞌnîkon etasaꞌ ya tîînoꞌpîtasen festarî pîꞌ tauya sîrîrî kereutatî morî ereutantoꞌ pona. Maasa pra ipîkku pe tîweꞌsen ayentaiꞌnîkon etasaꞌ wîttî esaꞌya yai pra.
9 Moropai taiya apîꞌnîkon: “Anîꞌya amîrî etaꞌpî tarîniꞌ ereutapa?” taiya eꞌpainon. Moropai taiya apîꞌ: “Atarimakî mîseniꞌ ipîkku ereutatoꞌpe”, taiya apîꞌ. Mîrîrî yai aweppepî kureꞌne. Tiaronkon rawîrî aponoꞌ morî maꞌre tîweꞌsen pona eereuta.
10 Tauya apîꞌnîkon, etasaꞌ pe aponoꞌ morî maꞌre tîweꞌsen pona ereutatî. Moropai mîîkîrî ayetatîponkonya ayeraꞌmakon. Moropai taiya apîꞌnîkon: “Uwanîyakon, tarîwaya ereutataneꞌkî. Sîrîrî ereutantoꞌ morî pona”, taiya. Mîrîrî warantî kureꞌne ayapurî toꞌya eseraꞌma tamîꞌnawîronkon ipîkkukon etasaꞌkon rawîrî —taꞌpî Jesusya.
11 —Maasa pra anîꞌ eꞌkuꞌsaꞌ ya ipîkku pe moropai mîî pe, mîîkîrî ena kupî sîrîrî tiaronkon maꞌre. Aweppepî kupî sîrîrî. Tîîse anîꞌ eꞌsaꞌ ya ipîkku pe pra, moropai mîî pe pra, mîîkîrî yapurî toꞌya, ipîkku pe eena —taꞌpî Jesusya.
12 Moropai taꞌpî Jesusya tetatîponoꞌpî pîꞌ: —Îꞌ pensa entamoꞌkantoꞌ konekaya yai, manniꞌkan neken ayetatîponkon ayonpakon moropai ayakonkon moropai ayakontarikon ipîkku pe tîweꞌsanon neken ketai. Maasa pra inkamoroya mîrîrî yeꞌka kupî tîuyaꞌnîkon ya amîrî yeta awentamoꞌkai attîpa kaiꞌma. Mîrîrî warantî ankupîꞌpî yeꞌma inkamoroya.
13 Tîîse îꞌ pensa mîrîrî yeꞌka konekaya yai, manniꞌkan saꞌne îꞌ ton pînon moropai maꞌtîkîꞌpankon, enkaruꞌnankon, moropai asakoiꞌkon pepînon saꞌne etakî toꞌ iiꞌtoꞌpe entamoꞌkantoꞌ pîꞌ.
14 Mîrîrî warantî ikupîya ya, morî yapisîiya Paapa winîpai. Maasa pra inkamoroya saꞌne mîrîrî ankupîꞌpî yeꞌma pepîn, yeꞌmatoꞌ ton pra tîwanîkon yeꞌnen. Tîîse Paapaya aapia yeꞌma, îꞌ pensa morî yairon pe tîweꞌsanon eꞌmîꞌsaꞌka weiyu yai ayeꞌmaiya —taꞌpî Jesusya.
Kureꞌnan Entamoꞌkantoꞌ
15 Mîrîrî taa Jesusya eta tîuya pe, mesa pia ipokonpe tîweꞌsen warayoꞌ eseurîmaꞌpî. Taꞌpîiya: —Paapa, tamîꞌnawîronkon esaꞌ pia entamoꞌkantoꞌ pîꞌ teewonsen wanî kupî sîrîrî taatausinpai —taꞌpîiya.
16 Mîrîrî yeꞌnen Jesusya tiaron panton ekaremekîꞌpî. Taꞌpîiya: —Tiwin warayoꞌya pemonkonyamîꞌ etaꞌpî arinîke toꞌ iiꞌtoꞌpe tewîꞌ ta, maasa pra kureꞌnan entamoꞌkantoꞌ tîrî tîuya yeꞌnen.
17 Moropai iweiyu eseporîꞌpî entamoꞌkantoꞌ weiyu. Mîrîrî yeꞌnen tîpoitîrî yaipontîꞌpîiya attîtoꞌpe pemonkonyamîꞌ yannoi. Taatoꞌpeiya kaꞌneꞌ pe asiꞌtî entamoꞌkataneꞌtî entamoꞌkantoꞌ esenposaꞌ man aasîrî taatoꞌpeiya kaiꞌma etasaꞌkon pemonkonyamîꞌ pîꞌ.
18 Tîîse mîîkîrîya tetakon tanne tiwin pîꞌ siꞌma taꞌpî toꞌya: “Uutî eserîke pra wai.” Eꞌmaiꞌnon pemonkonya taꞌpî ipîꞌ: “Umîri ton yennasauꞌya sîrîrî. Mîrîrî yeꞌnen eraꞌmai uutîtoꞌ man. Mîrîrî uutî eserîke pra wai, mîrîrî tauya manniꞌ kuꞌkî tîwî” taꞌpîiya.
19 Moropai tiaronya taꞌpî: “Uutî eserîke pra wai maasa pra miaꞌ tamîꞌnawîrî uyekînnon ton paakayamîꞌ yennasauꞌya wai. Inkamoro eraꞌmai uutîtoꞌ man. Maasa pra morî pe toꞌ esenyakaꞌma aneraꞌmapai wai. Mîrîrî yeꞌnen uutî eserîke pra wanî sîrîrî. Tîîse mîrîrî kuꞌkî tîwî”, taꞌpîiya ipîꞌ.
20 Moropai tiaronya taꞌpî ipîꞌ: “Uurî, uutî eserîke pra wai. Maasa pra amen puꞌkuru inoꞌpîtasen pe wanî sîrîrî. Mîrîrî yeꞌnen uutî pepîn”, taꞌpîiya.
21 Mîrîrî tîpo tîkaraiwarî pia ipoitîrî ennaꞌpoꞌpî. Moropai tamîꞌnawîrî ekaremekîꞌpîiya tîkaraiwarî pîꞌ. Mîrîrî pîꞌ ikaraiwarî ekoreꞌmaꞌpî mararî pra. Moropai taꞌpîiya inîꞌrî: “Kaꞌneꞌ pe atîkî tiaronkon etata inîꞌrî, rua taawîrî cidade poro tîweꞌsanon etata. Moropai tamîꞌnawîrî toꞌ metai toꞌ menepîi manniꞌkan îꞌ ton pînon, moropai maꞌtîkîꞌpankon moropai enkaruꞌnankon, moropai asakoiꞌkon pepînon inkamoro menepîi”, taꞌpîiya.
22 Tîîkoꞌmanse mararî ipoitîrîya taꞌpî tîkaraiwarî pîꞌ: “Tamîꞌnawîrî taꞌpîya yawîrî ikuꞌsauꞌya sîrîrî. Tîîse tuꞌke toꞌ pataꞌseꞌ ton moro man”, taꞌpîiya.
23 Mîîkîrî maimu yuukuꞌpî ikaraiwarîya. “Moriya, atîkî, aminke eꞌma taawîrî toꞌ etata, toꞌ iiꞌtoꞌpe toꞌ mekaꞌnunkai. Maasa pra uyewîꞌ yannîꞌsaꞌ toꞌya aneraꞌmapai wanî sîrîrî.
24 Tauya sîrîrî inkamoro eꞌmaiꞌ pe etasaꞌkonya sîrîrî entamoꞌkantoꞌ yonpa eserîke pra awanî. Maasa pra tetakon tanne yuꞌsaꞌ toꞌya pra awanî yeꞌnen”, taꞌpîiya —taꞌpî Jesusya.
Anîꞌ Wanî Jesus Wanîyakon Pe
25 Mîrîrî taa tîpo Jesus wîtî tanne arinîkon pemonkonyamîꞌya Jesus wenaimaꞌpî. Inkamoro yeurîmai eeraꞌtîꞌpî moropai taꞌpîiya toꞌ pîꞌ:
26 —Aꞌkî, manniꞌ uyapurînen wanî ya mararî, mîîkîrî wanî eserîke pra awanî upemonkono pe, uwanîyakon pe. Maasa pra tîyun moropai tîsan pînînmaiya ya, moropai tînoꞌpî, moropai tînmukuyamîꞌ, moropai tonpayamîꞌ pînînmaiya ya, moropai kureꞌne tîîwarîrî eetîꞌnînma, uurî pînînma tîuya yentai, mîrîrî yeꞌnen uurî wanîyakon pe eserîke pra awanî —taꞌpîiya.
27 —Anîꞌ wanî ya uwenai eꞌtarumaꞌtîpai pra, mîrîrî yeꞌnen uyapurîiya pepîn yapîtanîpîiya pra tîwanî yeꞌnen. Ituꞌse tîweꞌtoꞌ yawîrî ikoꞌmanpai awanî. Mîîkîrî wanî pepîn uwanîyakon pe.
28 Aꞌkî, anîꞌ esenumenka ya kawînan ton koneka pîꞌ eꞌmaiꞌ pe îꞌ warapo kaisarî tîtînirurî wanî eraꞌmaiya eꞌpai awanî. Yaretîꞌka eserîke awanî epuꞌtîuya ikonekaiya. Mîrîrî epuꞌse eesenumenka eꞌpai awanî.
29 Tîîse mîrîrî tepuꞌse pra mîrîrî kawînan ton koneka tîuya pîꞌ teesenyakaꞌmatoꞌ asaraꞌtîsaiꞌya ya, moropai itînirurî eꞌtîꞌka eesenyakaꞌmatoꞌ ataretîꞌka pra tîîse. Mîrîrî eraꞌma tîuyaꞌnîkon pîꞌ tamîꞌnawîronkon atakoꞌmenka ipîꞌ.
30 “Aꞌkî see yaretîꞌkaiya pra awanî eraꞌmatî”, taa toꞌya.
31 Moropai taꞌpîiya inîꞌrî: —Aꞌkî, ipîkku pata esaꞌ pe tîweꞌsen rei eseyaꞌnama ya tiaron winîkîi, eesenumenka eꞌpai awanî teeseyaꞌnama rawîrî. Iipia awanî 10.000 kaisaronkon surarayamîꞌ. Tîîse iteyaton pia toꞌ wanî 20.000. Mîîkîrî ereuta eꞌpai awanî esenumenkai toꞌ eseyaꞌnama eserîke awanî epuꞌse, meruntî ke toꞌ wanî epuꞌse.
32 Meruntî ke pra toꞌ wanî ya, attî pepîn epîi. Tîîse mîîkîrî tiaron rei pîꞌ kai tîmaimu yarimaiya namai epîn pe pra man kai, morî pe eꞌnîpai man kai —taꞌpî Jesusya.
33 —Mîrîrî warantî teesenumenkai pra amîrîꞌnîkon wanî eserîke pra awanî upemonkono pe, tamîꞌnawîrî ayeserukon, ayemannekon rumakayaꞌnîkon pra awanîkon ya —taꞌpî Jesusya.
Pan Inîꞌmîra Tîweꞌsen pîꞌ Jesus Eseurîma
34 Tiaron ekaremekîꞌpî Jesusya toꞌ nepuꞌtî ton. Taꞌpîiya: —Pan wanî morî pe, aweꞌtoꞌ yawîrî wanî ya. Tîîse aweꞌtoꞌ yawîrî pra awanî ya, morî pe awanî pepîn. Inîꞌmîra awanî ipoꞌmîra.
35 Morî pe awanî pepîn yapurîtoꞌpe. Îꞌ ton pe rî yapurî eserîke pra awanî. Îꞌ yeꞌrî pînsaꞌ wîꞌnîꞌpannîpîiya eserîke pra awanî. Mîrîrî yeꞌnen ipapo.
Sîrîrî etayaꞌnîkon pîꞌ esenumenkatî anetaꞌpîkon pîꞌ —taꞌpî Jesusya. —Mîrîrî warantî awanîkon pe man, tamîꞌnawîrî ayewankon ke uyapurîyaꞌnîkon pra awanîkon ya, —taꞌpîiya tîpemonkonoyamîꞌ pîꞌ, inîꞌmîra pan wanî warantî toꞌ yeseru wanî namai.
