Jesus Cristo Yekare Lucas Nîmenukaꞌpî 15:1-32
15 Tuꞌkankon tesanonkon pia toꞌ nîtîrî tîniru yapisî pîꞌ teesenyakaꞌmasanon iipîꞌpî Jesus pia eeseurîma etakonpa. Moropai imakuiꞌsan pemonkonyamîꞌ iipîꞌpî.
2 Fariseuyamîꞌ moropai Moisés nurîꞌtîya yenupantoꞌ pîꞌ yenupatonkon nîrî wanîꞌpî. Inkamoro woꞌmaꞌtaꞌpî Jesus winîkîi. Taꞌpî toꞌya: —Imakuiꞌpî kuꞌnenan pemonkonyamîꞌ pokonpe tîweꞌsen mîserî warayoꞌ. Moropai toꞌ pokonpe taꞌreꞌ yonpanen —taꞌpî toꞌya ipîꞌ.
3 Mîrîrî yeꞌnen toꞌ nepuꞌtî ton ekaremekîꞌpî Jesusya panton pe.
4 Taꞌpîiya: —Amîrîꞌnîkon tiwin pîꞌ siꞌma ayekînnan carneiroyamîꞌ esaꞌ pe awanî ya, 100 kaisarî. Tiwin aatakaꞌmaꞌpî ya, yuwai attî eꞌpainon. Innape nai? —taꞌpîiya. —Inkamoro 99 kaisaronkon nîmîya eꞌpainon keren po. Moropai attî mîîkîrî atakaꞌmaꞌpî yuwai eporîya pîkîrî.
5 Mîîkîrî eposaꞌya ya, kureꞌne taatausinpai awanî eposaꞌya yeꞌnen. Moropai mîîkîrî manaꞌpoya amota pona tanunse.
6 Ayewîꞌ ta eerepansaꞌ pe, ayonpayamîꞌ awoinonkon etaya. Moropai taaya ayonpayamîꞌ pîꞌ: “Atausinpanpaiꞌnîkon upokon pe. Maasa pra uyekîn atakaꞌmaꞌpî eposauꞌya yeꞌnen”, taayaꞌnîkon eꞌpainon tiwin pîꞌ siꞌma.
7 Tauya mîrîrî warantî nîrî Paapa atausinpantoꞌ wanî kupî sîrîrî kaꞌ po. Pemonkon imakuiꞌpî pe tîweꞌsen enpenatasaꞌ yai tînkupîꞌpî imakuiꞌpî rumaka tîuya pîꞌ. Ipîꞌ Paapa atausinpa manniꞌkan 99 kaisaronkon, yairon pe tîweꞌsanon pîꞌ taatausinpa yentai —taꞌpî Jesusya.
Prata Enaꞌpî Esenumîꞌpî
8 Jesus eseurîma koꞌmannîpîꞌpî: —Tiwin wîriꞌ wanîꞌpî miaꞌ tamîꞌnawîrî prata enaꞌpî esaꞌ pe. Tîîse tiwin esenumî ya mîrîrî yuwaiya eꞌpainon, innape nai? Mîrîrî eporîpa wîriꞌya tîꞌkumaꞌtu yawittanîpî, moropai tewîꞌ kuimaiya. Morî pe yuwaiꞌma tînîn eporî tîuya pîkîrî yuwaiya.
9 Moropai eposaꞌ tîuya yai tonpayamîꞌ tîwoinokon etaiya. Moropai taiya toꞌ pîꞌ: “Atausinpanpaiꞌnîkon man upokonpe. Maasa pra upîratari esenumîꞌpî eposauꞌya yeꞌnen”, taiya.
10 Mîrîrî warantî nîrî Paapa poitîrîtonon inserîyamîꞌ atausinpa kureꞌne, tiwinan pemonkon imakuiꞌpî kuꞌnen enpenata yai imakuiꞌpî pe tîweꞌtoꞌ rumaka tîuya pîꞌ —taꞌpî Jesusya.
Warayoꞌ Tîyun Pia Pai Atakaꞌmaꞌpî
11 Moropai Jesus eseurîma koꞌmannîpîꞌpî. Taꞌpîiya: —Warayoꞌ wanîꞌpî asakîꞌnankon inmukuyamîꞌ.
12 Tiaron pensa inmu yakon maasaron panpîꞌya taꞌpî tîyun pîꞌ: “Paapa, ayemanne rataikakî uyemanne ton tîrîpa, mîrîrî uurî pia antîrî ton aasaꞌmanta yai. Maasa pra sîrîrî ituꞌse wai”, taꞌpîiya. Moropai itunya temanne rataikaꞌpî irui yemanne yarakkîrî.
13 Kureꞌne puꞌkuru pra wei tîîkoꞌmamî tîpo temanne yannukuꞌpî mîîkîrî warayoꞌ maasaronya tamîꞌnawîrî. Moropai attîꞌpî tamîꞌnawîrî temanne yarakkîrî tiaron pata pona aminke. Miarî itesaꞌ pe tîweꞌtoꞌ temanne yaretîꞌkaꞌpîiya. Festa pîꞌ tîwanî ke, tîsuꞌmin ke imakuiꞌpî kupîꞌpîiya.
14 Moropai tamîꞌnawîrî yaretîꞌkaꞌpîiya tanne, mîrîrî pata yaꞌ emiꞌnan wanîꞌpî mararî pra. Moropai mîîkîrîya tîmoron epuꞌtî piaꞌtîꞌpî miarî.
15 Mîrîrî yeꞌnen teesenyakaꞌmatoꞌ ton yuwaꞌpîiya mîrîrî pata yaꞌ tîweꞌsen pîꞌ mîrîrî warantî tîweꞌpîikaꞌtîpa kaiꞌma. Mîîkîrîya mîîkîrî yarimaꞌpî tîfazendarî pona tekînon porcoyamîꞌ koꞌmannîꞌse attîtoꞌpe kaiꞌma, taꞌpîiya.
16 Tîîse miarî mîîkîrî wanîꞌpî emiꞌne itaꞌreꞌ ton pra awanîꞌpî. Porcoyamîꞌ yaꞌreꞌ annaꞌpai awanîꞌpî tîîse anîꞌya porcoyamîꞌ yaꞌreꞌ yonpa tîrî pra awanîꞌpî. Îꞌ tîrî toꞌya pra awanîꞌpî.
17 Mîîkîrî esenumenka piaꞌtîꞌpî tîîwarîrî. Taꞌpîiya: “Îꞌ waraponkon uyun poitîrîtonon teesenyakaꞌmasanon uyun pia tîîse toꞌ yaꞌreꞌ mararon pepîn eꞌtîꞌkakoi pepîn. Tîîse îꞌ pîꞌ uurî saꞌmanta sîrîrî tarî emiꞌnan pîꞌ.
18 Ennaꞌpo paapa yewîꞌ ta. Moropai tauya paapa pîꞌ: ‘Paapa, imakuiꞌpî kupîꞌpîuya Paapa kaꞌ pon winîkîi, moropai awinîkîi’, tauya paapa pîꞌ”, taꞌpîiya.
19 “Mîrîrî yeꞌnen ‘Anmu pe wanî pepîn sîrîrî, tîîse apoitîrîtonon warantî ukuꞌkî’, tauya paapa pîꞌ”, taꞌpî mîîkîrî warayoꞌya.
20 Moropai aataponkaꞌpî miarîpai moropai awennaꞌpoꞌpî tîyun yewîꞌ ta.
Mîîkîrî iipî koꞌmannî pe eꞌma taawîrî aminke eraꞌmasaꞌ itunya wanîꞌpî. Moropai tîꞌnokoꞌpî pe eraꞌmaꞌpîiya mararî pra. Mîîkîrî tînmu ponaya eekaꞌtumîꞌpî yapiꞌse. Yapisîꞌpîiya tîwakîri pe moropai yuꞌnaꞌpîiya.
21 Moropai mîîkîrîya taꞌpî tun pîꞌ: “Paapa, imakuiꞌpî kupîꞌpîuya Paapa kaꞌ pon winîkîi moropai awinîkîi”, taꞌpîiya. “Mîrîrî yeꞌnen anmu pe wanî pepîn sîrîrî tîîse apoitîrîtonon warantî ukuꞌkî”, taꞌpîiya.
22 Tîîse itunya taꞌpî tîpoitîrîtonon pîꞌ: “Kaꞌneꞌ pe ipon morî eneꞌtî, moropai yekaꞌmatî itenya pokon nîrî eneꞌtî, yekaꞌmatî itenya pîꞌ. Moropai iꞌsaꞌsaꞌ eneꞌtî yekaꞌmatî iꞌpu pîꞌ!
23 Moropai kaiwan manniꞌ paaka more eneꞌtî. Moropai iwîtî. Moropai atausinpanpaiꞌnîkon man mîserî unmu pokonpe entamoꞌkantoꞌ pîꞌ.
24 Maasa pra mîserî unmu saꞌmantaꞌpî kaiꞌma wanîꞌpî teuren tîîse awanî sîrîrî. Atakaꞌmaꞌpî pe awanîꞌpî, tarîpai eeseposaꞌ sîrîrî”, taꞌpî mîîkîrî warayoꞌ yunya. Mîrîrî yeꞌnen toꞌ atausinpaꞌpî entamoꞌkantoꞌ pîꞌ.
25 Mîrîrî eꞌkupîꞌpî tiaron inmu irui tîîse tînmîri yaꞌ. Mîîkîrî ennaꞌposaꞌ iipî tanne, aminke pra wîttî pîꞌ etaꞌpîiya eserenkantoꞌ. Mararî pra awanîꞌpî toꞌ mananu esetasaꞌ.
26 Mîîkîrîya tîyun poitîrî yannoꞌpî. Moropai ekaranmapoꞌpîiya. “Îꞌ see mîrîrî?” taꞌpîiya.
27 Mîîkîrî toꞌ poitîrîya yuukuꞌpî: “Ayakon ennaꞌposaꞌ erepannî pîꞌ man wîttî ta enen, priꞌya. Mîrîrî yeꞌnen ayunya kaiwan paaka more wîî meꞌpo pîꞌ man”, taꞌpîiya.
28 Mîrîrî yekare eta tîuya yeꞌnen, mîîkîrî inmu irui ekoreꞌmaꞌpî. Moropai ewonpai pra awanîꞌpî wîttî ta. Mîrîrî itun epaꞌkaꞌpî poro pona iipia. Moropai eewontoꞌpe taa pîꞌ itun koꞌmamîꞌpî ipîꞌ.
29 Tîîse tîyun maimu yuukuꞌpîiya. Taꞌpîiya: “Îꞌ warapo konoꞌ kaisarî uukoꞌmansaꞌ sîrîrî aapia esenyakaꞌma pîꞌ apoitîrî warantî. Amaimu tîyuꞌpîꞌse pra îꞌ taatoꞌya kuꞌsauꞌya amaimu yawîrî. Mîrîrî tanne tiwin mîrikkî carneiro more tîîsaꞌya pra nai uupia uyonpayamîꞌ pokonpe festa tîkonekai atausinpatoꞌ ton”, taꞌpîiya.
30 “Tîîse mîîkîrî anmu, ayemanne tîîsaꞌya tîꞌkaꞌtîpon, imakuiꞌpî kupî ke wîriꞌsanyamîꞌ atakaꞌmaꞌsan yarakkîrî tîwanî ke. Moropai mîîkîrî ennaꞌposaꞌ yoꞌ ton paaka kaiwan wîî meꞌposaꞌya”, taꞌpîiya.
31 Mîîkîrî maimu yuukuꞌpî iyunya. Taꞌpîiya: “Unmu, amîrî uupia tîîkoꞌmansen. Mîrîrî yeꞌnen tamîꞌnawîron uyemanne wanî sîrîrî ayemanne pe”, taꞌpîiya.
32 “Tîîse sîrîrî entamoꞌkantoꞌ koneka meꞌpouya emapuꞌtîsaꞌ sîrîrî atausinpantoꞌ eseraꞌmatoꞌpe kaiꞌma. Maasa pra mîserî ayakon saꞌmantaꞌpî kaiꞌma eꞌsaꞌ tanne enen eerepansaꞌ man. Atakaꞌmaꞌpî pe awanîꞌpî tarîpai eeseposaꞌ man”, taꞌpîiya —taꞌpî Jesusya.
