Jesus Cristo Yekare Lucas Nîmenukaꞌpî 18:1-43
18 Jesusya panton ekaremekîꞌpî tînenupaꞌsan yenupapa kaiꞌma tîwîrî teepîremakon toꞌ koꞌmantoꞌpe tîrumakai pra.
2 Taꞌpîiya toꞌ pîꞌ: —Cidade po awanîꞌpî warayoꞌ juiz ipîkku pe tîweꞌsen. Mîîkîrî wanîꞌpî Paapa namanen pepîn tîîwarîrî ituꞌse tîweꞌtoꞌ yawîrî tîîkoꞌmansen, moropai tiaronkon pemonkonyamîꞌ namanen pepîn.
3 Moro rî mîrîrî cidade po wîriꞌ wanîꞌpî inyo isaꞌmantaꞌpî. Tiaronya mîîkîrî tarumaꞌtîꞌpî. Yairî pra mîîkîrî wanîꞌpî iwinîkîi. Mîrîrî yeꞌnen mîîkîrî ipîkku pe tîweꞌsen juiz pia attîpîtî eꞌpîtîꞌpî tîpîikaꞌtîtoꞌpeiya kaiꞌma mîrîrî pîꞌ. Taꞌpîiya: “Upîikaꞌtîkî mîîkîrî upîꞌ tîwoꞌmaꞌtasen pîꞌ kaꞌkî inîꞌrî aawoꞌmaꞌta namai. Tamîꞌnawîrî ikonekakî”, taꞌpîiya.
4 Tîîse mîîkîrî saꞌne inyo isaꞌmantaꞌpî pîinamaiya pra awanîꞌpî. Aakoꞌmamîꞌpî mararî pra wei kaisarî tîîse ikoꞌnoro esatî pîꞌ mîîkîrî wîriꞌ koꞌmamîꞌpî. Moropai mîrîrî pîꞌ taꞌpîiya, teesenumenkai: “Inna seruꞌ pepîn. Paapa namanen pepîn uurî moropai tiaronkon pemonkonyamîꞌ pîinamanen pepîn uurî ipîkku wanî yeꞌnen.
5 Tîîse mîserî wîriꞌya yetaꞌka koꞌmannîpî yeꞌnen iteseru konekauya sîrîrî. Maasa pra iteseru konekauya pra awanî ya mararî pra epuꞌtîuya yentai uyakaꞌmaiya inîꞌ îꞌ epuꞌtî ton pe pra”, taꞌpî mîîkîrî juizya. Mîrîrî yeꞌnen ipîikaꞌtî tuꞌkaꞌpîiya —taꞌpî Jesusya.
6 Mîrîrî pîꞌ Uyepotorîkonya taꞌpî tînenupaꞌsan pîꞌ: —Esenumenkatî îꞌ kaiꞌma manniꞌ juiz yairon pepîn eseurîmatoꞌ pîꞌ. Imakuiꞌpî pe tîwanî tîîse imaimu yuuku tuꞌkaꞌpîiya.
7 Mîrîrî warantî pra Paapa wanî, tîîse morî pe awanî. Mîrîrî yeꞌnen morî kupîiya tîmenkaꞌsan tîpemonkonoyamîꞌ ton pe, manniꞌkan tîweꞌpîikaꞌtîtoꞌkon esatî pîꞌ tîweꞌsanon wei kaisarî moropai ewaron kaisarî. Toꞌ pîikaꞌtîpa Paapa koꞌmamî kaꞌrî? Kaane, ikupîiya kupî tîuya taasaꞌ tîuya yawîrî.
8 Tauya sîrîrî apîꞌnîkon. Ikupî Paapaya tîpemonkonoyamîꞌ ton pe. Mîrîrî kupîiya kaꞌneꞌ pe tîîkoꞌmanse pra. Tîîse uurî kaꞌ poi iipîꞌpî erepantoꞌ weiyu yai sîrîrî non pona, innape Paapaya teepîrematoꞌkon yuuku epuꞌnenan eporîuya, toꞌ eꞌtarumaꞌtî tîîse? —taꞌpî Jesusya.
Fariseu Moropai Tîniru Yapisî Pîꞌ Teesenyakaꞌmasen Epîrema
9 Tiaronkon yairî tîwanîkon kaiꞌma tîweꞌkuꞌsanon moropai tiaronkon yentai tîweꞌkuꞌsanon pîꞌ sîrîrî panton ekaremekîꞌpî Jesusya.
10 Taꞌpîiya: —Asakîꞌnankon warayoꞌkon wîtîꞌpî epîremantoꞌ yewîꞌ ta epîremai. Tiaron wanîꞌpî fariseu pe. Tiaron wanîꞌpî tesanonkon pia toꞌ nîtîrî tîniru yapisî pîꞌ teesenyakaꞌmasen pe.
11 Moropai fariseu eꞌmîꞌsaꞌkaꞌpî satippe epîremai. Moropai eepîremaꞌpî tîpona see warantî. Taꞌpîiya: “Paapa, ayapurî pîꞌ wai kureꞌne. Maasa pra uurî wanî pepîn tiaronkon pemonkonyamîꞌ warantî. Tuꞌke îꞌ yuꞌse tîweꞌsen pepîn uurî. Moropai seruꞌyeꞌ pe uurî wanî pepîn. Moropai imakuiꞌpî kuꞌnen pepîn. Uurî seꞌ tapairî wîriꞌsanyamîꞌ yarakkîrî tîweꞌsen pepîn tiaronkon warayoꞌkon warantî. Paapa ayapurî pîꞌ wai nîrî maasa pra mîseniꞌ warayoꞌ tîniru yapisî pîꞌ teesenyakaꞌmasen warainon pepîn uurî imakuiꞌpî pe.
12 Epîremakoi uurî asakîꞌne iteꞌka tiwin semana tîîse uyekkari tonpai pra. Moropai aapia untîrî tîînen uurî esuwaꞌkakoi pepîn, tamîꞌnawîrî uneꞌma uyemanne yonpa tîînen uurî”, taꞌpîiya teepîrema yeꞌka pe.
13 Tîîse tesanonkon pia toꞌ nîtîrî tîniru yapisî pîꞌ teesenyakaꞌmasen wanîꞌpî aminke. Moropai kureꞌne aweppeꞌsaꞌ wanîꞌpî. Mîrîrî yeꞌnen tenu yanumîiya pra awanîꞌpî kaꞌ ekaya. Tîîse tîmannîtî mun paꞌtîꞌpîiya kureꞌne teesewankonoꞌmai. Moropai taꞌpîiya Paapa pîꞌ: “Paapa, aꞌnokoꞌpî pe saꞌne uyeraꞌmakî. Maasa pra kureꞌne imakuiꞌpî kupîtîpon uurî,” kaiꞌma eepîremaꞌpî —taꞌpî Jesusya.
14 —Mîrîrî yeꞌnen apîꞌnîkon tauya sîrîrî. Mîîkîrî warayoꞌ teetîꞌnokoꞌmasen maimu etaꞌpî Paapaya. Moropai mîîkîrî pîikaꞌtîꞌpîiya. Teetîꞌnokoꞌmasen warayoꞌ ennaꞌpoꞌpî tewîꞌ ta morî pe tîîwanmîra Paapa yarakkîrî. Tîîse tiaron eꞌmaiꞌ pe epîremaꞌpî pîikaꞌtîiya pra awanîꞌpî. Maasa pra anîꞌ atapurî ya tîîwarîrî tiaron yentai mîîkîrî eppepî kupî sîrîrî imakuiꞌpî kupî tîuya pîꞌ. Tîîse anîꞌ wanî ya tîweppeꞌse imakuiꞌpî pe tîwanî wenai, mîîkîrî wanî kupî sîrîrî taatausinpai. Maasa pra Paapaya yapurî kupî sîrîrî —taꞌpî Jesusya.
Moreyamîꞌ Yanno Jesusya
15 Mîrîrî tîpo tiaronya moreyamîꞌ yarîꞌpî Jesus pia toꞌ pîrematoꞌpeiya kaiꞌma. Tîîse Jesus nenupaꞌsanya mîrîrî eraꞌma tîuyaꞌnîkon pe taꞌpî toꞌ pîꞌ: —Îꞌ ton pe mîrîrî warantî ikupîyaꞌnîkon, îꞌ ton kon moreyamîꞌ enepîyaꞌnîkon Jesus pia —taꞌpî toꞌya.
16 Tîîse Jesusya inkamoro moreyamîꞌ yannoꞌpî tîîpia toꞌ iiꞌtoꞌpe. Moropai taꞌpîiya: —Tîwî inkamoro moreyamîꞌ naiipîi uupia. Toꞌ tîmaꞌnîpai pra eꞌtî. Maasa pra Paapa pemonkonoyamîꞌ wanî insamoro moreyamîꞌ warantî. Paapa, tesaꞌkon winîpai morî eporî toꞌya.
17 Inna pîꞌ rî tauya apîꞌnîkon. Anîꞌ wanî Paapa pemonkono pe eꞌpai, mîî pe pra insanan moreyamîꞌ warantî eꞌpai awanî, innape Paapa kupîiꞌma. Moropai itenyaꞌ eeturumaka eꞌpai awanî tesaꞌ pe aweꞌtoꞌpe —taꞌpî Jesusya.
Ipîkku Pe Tîweꞌsenya Jesus Ekaranmapo
18 Judeuyamîꞌ esaꞌ pe tîweꞌsenya Jesus ekaranmapoꞌpî. —Uyenupanen, morî puꞌkuru amîrî, —taꞌpîiya Jesus pîꞌ. Moropai taꞌpîiya: —Îꞌ kupîuya eꞌpainon ipatîkarî enen uukoꞌmantoꞌ ton epotoꞌpeuya Paapa pia? —taꞌpîiya.
19 Jesusya taꞌpî ipîꞌ: —Îꞌ waniꞌ awanî yeꞌnen “Morî amîrî”, taaya mîrîrî upîꞌ? Tiwinan morî moro man, mîîkîrî Paapa, tiaron ton pra man. Mîîkîrî neken morî —taꞌpîiya.
20 Moropai Jesusya yuukuꞌpî. Taꞌpîiya: —Paapa nekaremekîꞌpî unkupîkon ton epuꞌnen amîrî.Seꞌ tapairî wîriꞌsanyamîꞌ yarakkîrî tîweꞌse pra, moropai pemonkon kîꞌwîi. Moropai amaꞌyeꞌ pe tiaronkon kîsamaꞌrunpai moropai seruꞌyeꞌ pe teeseurîmai pra eꞌkî. Moropai ayun, asan maimu yawîrî eꞌkî
—taꞌpîiya.
21 Moropai mîîkîrî warayoꞌya taꞌpî: —More pe wanîꞌpî patapai sîrîrî tîpose mîrîrî kuꞌnen uurî tamîꞌnawîrî —taꞌpîiya.
22 Mîrîrî taiya eta tîuya pe taꞌpî Jesusya: —Inna seruꞌ pepîn tîîse tiwinanoꞌpî ankupî ton moro man. Tamîꞌnawîrî ayemanne ke eꞌrepata moropai itepeꞌpî mîtîrîi manniꞌkan saꞌne tîweꞌtarumaꞌtîsanon pia. Mîrîrî warantî ikupîya ya, inîꞌ panpîꞌ ayemanne ton eporîya mîrîrî kaꞌ po. Moropai mîrîrî tîpo maaipîi uwenairî —taꞌpî Jesusya ipîꞌ.
23 Mîrîrî taa Jesusya yeꞌnen, mîîkîrî warayoꞌ esewankonoꞌmaꞌpî mararî pra, ipîkku pe puꞌkuru tîwanî yeꞌnen. Mîrîrî ankuꞌpai pra awanîꞌpî.
24 Mîîkîrî esewankonoꞌmasaꞌ eraꞌma tîuya yeꞌnen Jesusya taꞌpî: —Aꞌkî, saꞌme puꞌkuru see awanî Paapa yenyaꞌ ipîkku pe tîweꞌsen eturumaka tesaꞌ pe aweꞌtoꞌpe.
25 Mîrîrî wanî kameru ewomî warantî akkusa yeutta yai, saꞌme awanî. Tîîse itentai awanî mîîkîrî ipîkku ewontoꞌpe Paapa pia, itesaꞌ pe aweꞌtoꞌpe, maasa pra kureꞌne tewan yapiꞌsaiꞌya yeꞌnen temanne pîꞌ.
26 Mîrîrî taiya etatîponkonya ekaranmapoꞌpî. Taꞌpî toꞌya: —Moriya anîꞌ kin eꞌpîikaꞌtî eꞌpainon?
27 Jesusya yuukuꞌpî: —Îꞌ saꞌme tîweꞌsen pemonkon pia saꞌme puꞌkuru, ikupîiya yentai. Tîîse mîîkîrî Paapa pia saꞌme pra awanî. Mîrîrî yeꞌnen ikupîiya —taꞌpî Jesusya.
28 Moropai Pedroya taꞌpî Jesus pîꞌ: —Aꞌkî, tamîꞌnawîron anna koꞌmantoꞌ rumakasaꞌ annaya sîrîrî, awenairî anna iiꞌtoꞌpe kaiꞌma —taꞌpîiya.
29 —Inna seruꞌ pepîn —taꞌpî Jesusya. —Moropai apîꞌnîkon yairî tauya. Tesaꞌ pe Paapa wanî yeꞌnen tewîꞌ nîmîꞌnen, moropai tînoꞌpî nîmîꞌnen, moropai takon nîmîꞌnen, moropai tonpayamîꞌ nîmîꞌnen, moropai tînmuku nîmîꞌnen, Paapaya tannosaꞌ wenai,
30 mîîkîrîya eporî kupî sîrîrî tîîkoꞌmantoꞌ ton inîꞌ panpîꞌ, tîîkoꞌmantoꞌ ton tarî tamîꞌnawîrî tînnîmîꞌpî yentai. Moropai tiwinanoꞌpî weiyu yai, ipatîkarî tîîkoꞌmantoꞌ ton eporîiya —taꞌpî Jesusya.
Inîꞌrî Tîîsaꞌmanta Pîꞌ Jesus Eseurîma
31 Moropai mîrîrî tîpo Jesusya tînenupaꞌsan yarîꞌpî tiaron winîkîi moropai taꞌpîiya toꞌ pîꞌ: —Aꞌkî, wîtîꞌnîkon sîrîrî Jerusalém pona. Miarî tamîꞌnawîrî profetayamîꞌ nurîꞌsan nîmenukaꞌpî yawîrî aweꞌkupî pe man, uurî, pemonkon pe kaꞌ poi iipîꞌpî winîkîi.
32 Miarî uurî rumaka toꞌya pe man pemonkonyamîꞌ Judeuyamîꞌ pepînon yenyaꞌ. Moropai inkamoroya umuꞌtunpa kureꞌne moropai uyewanmarî toꞌya. Moropai tetakukon yenumî toꞌya upona.
33 Moropai uꞌpoꞌpîtî toꞌya. Moropai uwî toꞌya. Tîîse uwîsaꞌ toꞌya tîpo iteseurîno wei yai eꞌmîꞌsaꞌka kupî sîrîrî —taꞌpîiya.
34 Mîrîrî taiya epuꞌtî toꞌya pra inenupaꞌsan wanîꞌpî. Maasa pra Jesus eseurîmatoꞌ wanîꞌpî aronne pra epuꞌtî toꞌya yentai. Mîrîrî yeꞌnen îꞌ taa yuꞌse Jesus wanî epuꞌtî toꞌya pra inenupaꞌsan wanîꞌpî.
Enkaruꞌnan Yepiꞌtî Jesusya
35 Mîrîrî tîpo Jesus erepamî koꞌmannîpî tanne Jericó cidaderî pona, tiwin pemonkon enkaruꞌnan saꞌne ereutasaꞌ wanîꞌpî eꞌma ena pona. Mîîkîrî saꞌne wanîꞌpî tîniru esatî pîꞌ tîmîrî ton, teesenyakaꞌma eserîke pra awanî yeꞌnen.
36 Mîîkîrî saꞌne moro tîîse arinîkon pemonkonyamîꞌ wîtî mîrîrî eꞌma taawîrî etaꞌpîiya. Moropai ekaranmapoꞌpîiya: —Îꞌ see mîrîrî? —taꞌpîiya.
37 Moropai taꞌpî toꞌya ipîꞌ: —Manniꞌ Jesus Nazaré poinon wîtî sîrîrî —taꞌpî toꞌya.
38 Mîrîrî taa toꞌya yeꞌnen mîîkîrî saꞌne enkaruꞌnan entaimepîtî piaꞌtîꞌpî. Taꞌpîiya: —Jesus amîrî rei Davi nurîꞌtî parîꞌpî pîikaꞌtîton, aꞌnokoꞌpî pe saꞌne uyeraꞌmakî —taꞌpî enkaruꞌnanya.
39 Mîîkîrî entaimepîtî yeꞌnen eꞌmaiꞌ pe tuutîsanonya taꞌpî ipîꞌ: —Moo eꞌkî, îꞌ pîꞌ awentaimepîtî —taꞌpî toꞌya. Tîîse yuukuiya pra inîꞌ panpîꞌ meruntî ke awentaimepîtîꞌpî. —Aꞌnokoꞌpî pe uyeraꞌmakî —taꞌpîiya.
40 Moropai tuutî yeꞌka pe Jesus emîꞌpamîꞌpî. Moropai —Eneꞌtî uupia —taꞌpî Jesusya. Tîîpia erepannîpîꞌpî toꞌya pe Jesusya ekaranmapoꞌpî.
41 —Îꞌ kupîuya yuꞌse awanî ayarakkîrî? —taꞌpî Jesusya ipîꞌ. —Uyepotorî, inîꞌrî aneraꞌmapai wai —taꞌpî warayoꞌya.
42 Mîîkîrî pîꞌ taꞌpî Jesusya: —Eraꞌmaya, innape ukupîya yeꞌnen eesepiꞌtîsaꞌ sîrîrî —taꞌpî Jesusya ipîꞌ.
43 Moropai mîrîrî pe rî mîîkîrî warayoꞌ enkaruꞌnanya eraꞌmaꞌpî. Mîrîrî yeꞌnen Jesus wenairî attîꞌpî Paapa yapurî yeꞌka pe. Mîrîrî Jesus nîkupîꞌpî eraꞌma tîuyaꞌnîkon yeꞌnen, tamîꞌnawîronkon pemonkonyamîꞌya Paapa yapurîꞌpî nîrî.
