Jesus Cristo Yekare Lucas Nîmenukaꞌpî 19:1-48
19 Moropai mîrîrî tîpo Jesus ewomîꞌpî Jericó cidaderî poro attîꞌpî.
2 Mîrîrî cidade po awanîꞌpî warayoꞌ ipîkku pe tîweꞌsen iteseꞌ Zaqueu. Mîîkîrî wanîꞌpî tesanonkon pia toꞌ nîtîrî tîniru yapiꞌnenan yepuru pe tîweꞌsen pe.
3 Mîîkîrî wanîꞌpî anîꞌ pe Jesus wanî anepuꞌpai. Tîîse eraꞌmaiya eserîke pra awanîꞌpî maasa pra arinîke pemonkonyamîꞌ wanî yeꞌnen. Moropai nonpairî tîwanî yeꞌnen eraꞌmaiya pîn.
4 Mîrîrî yeꞌnen mîîkîrî ekaꞌtumîꞌpî inkamoro arinîkon pemonkonyamîꞌ rawîrî. Moropai mîîkîrî enukuꞌpî yei pona Jesus eraꞌmapa kaiꞌma. Maasa pra mîrîrî poro Jesus wîtîtoꞌ wanîꞌpî mîîtoꞌpe.
5 Mîrîrî yei yoꞌkoi teerepamî pe kakîsiya Jesusya eraꞌmaꞌpî. Moropai taꞌpîiya Zaqueu pîꞌ: —Zaqueu, kaꞌneꞌ pe autîkî maasa pra sîrîrîpe ayewîꞌ ta uutî eꞌpai awanî —taꞌpîiya.
6 Mîrîrî taiya yeꞌnen, Zaqueu autîꞌpî kaꞌneꞌ pe, moropai Jesus yapisîꞌpîiya tîwakîri pe taatausinpai tewîꞌ ta.
7 Mîrîrî eraꞌmaꞌpî tamîꞌnawîronkon pemonkonyamîꞌya. Mîrîrî yeꞌnen inkamoro eseurîma piaꞌtîꞌpî, ipîꞌ tîwoꞌmaꞌtakon yeꞌnen. Taꞌpî toꞌya: —Aꞌkî, îꞌ ton pe see imakuiꞌpî mîserî warayoꞌ yewîꞌ ta Jesus ewomî mîrîrî? —taꞌpî toꞌya.
8 Moropai Zaqueu eꞌmîꞌsaꞌkaꞌpî eseurîmai. Moropai taꞌpîiya Uyepotorîkon pîꞌ: —Aꞌkî, sîrîrî patapai ipîkku uweꞌtoꞌ yemanne yonpa tîrîuya arakkita pairî pemonkonyamîꞌ saꞌne îꞌ ton pînon tîweꞌtarumaꞌtîsanon pia. Moropai tauya îꞌ rî yamaꞌrunpasauꞌya ya, manniꞌkan pemonkonyamîꞌ unamaꞌrunpaꞌsan pia innaꞌpouya toꞌ yemanne moꞌkaꞌpîuya yentai, saakîrîrî iteꞌka toꞌ pia innaꞌpouya —taꞌpîiya.
9 Mîrîrî yai mîîkîrî pîꞌ taꞌpî Jesusya: —Sîrîrîpe mîserî warayoꞌ yewîꞌ tawonkon pîikaꞌtî Paapaya sîrîrî, imakuiꞌpî toꞌ nîkupîꞌpî kuꞌsaiꞌya man tîîwanmîra. Mîserî warayoꞌ wanî Abraão paarîꞌpî pe puꞌkuru. Moropai Abraão nurîꞌtîya innape Paapa kupîꞌpî warantî, innape ukupîiya. Mîrîrî wenai aweꞌpîikaꞌtîsaꞌ man —taꞌpîiya.
10 —Maasa pra kaꞌ poi uurî iipîꞌpî insanan pemonkonyamîꞌ warainokon, atakaꞌmaꞌsan yuwai. Moropai Paapa pia toꞌ ennaꞌpotoꞌpe toꞌ pîikaꞌtîi iipîꞌpî uurî —taꞌpî Jesusya.
Miaꞌ Tamîꞌnawîron Prata Enaꞌpî Pîꞌ Jesus Eseurîma
11 Moropai Jesusya inkamoro teeseurîma etatîponoꞌsan nepuꞌtî ton pe panton ekaremekîꞌpî. Maasa pra aminke pra toꞌ erepamî koꞌmannîpî Jerusalém pona. Teerepamî pe tamîꞌnawîronkon esaꞌ pe Paapa iipî kaꞌneꞌ pe kaiꞌma toꞌ esenumenka epuꞌtîꞌpîiya mîîtoꞌpe. Mîrîrî yeꞌnen îꞌ kaiꞌma awanî pe man epuꞌtoꞌpe toꞌya, ekaremekîꞌpîiya.
12 Taꞌpî Jesusya: —Aꞌkî, warayoꞌ wanîꞌpî tîpemonkonoyamîꞌ kenan, moropai ipîkku pe tîweꞌsen. Mîîkîrî wîtîꞌpî tiaron pata pona aminke, pata esaꞌ pe teenapa kaiꞌma, moropai mîrîrî tîpo tîwennaꞌpopa rei pe.
13 Tîîse maasa tuutî rawîrî tîpoitîrîtonon miaꞌ tamîꞌnawîronkon warayoꞌkon yannoꞌpîiya tîîpia. Moropai inkamoro pia toꞌ kaisarî tiwin pîꞌ pîrata enaꞌpî tîrîꞌpîiya. Moropai taꞌpîiya toꞌ pîꞌ: “Aꞌkî, sîrîrî pîrata ke puwana konekatî inîꞌ panpîꞌ eporîkonpa. Mîrîrî kupî pîꞌ akoꞌmantî ennaꞌpo pîkîrî”, taꞌpîiya. Moropai attîꞌpî.
14 Tîîse mîrîrî patayawonkon pemonkonyamîꞌya yewanmîrîꞌpî. Pata esaꞌ pe eena yuꞌse pra toꞌ wanîꞌpî. Mîrîrî yeꞌnen pemonkonyamîꞌ yarimaꞌpî toꞌya iteꞌmaꞌpî pîꞌ kai toꞌ wîtîtoꞌpe ipîꞌ: “Pata esaꞌ pe amîrî ena yuꞌse anna wanî pra man, apemonkonoyamîꞌ pe anna wanî pepîn”, taatoꞌpe toꞌya kaiꞌma ipîꞌ.
15 Tîîse mîîkîrî warayoꞌ enaꞌpî pata esaꞌ pe, rei pe, toꞌ maimu yentai. Moropai mîîkîrî ennaꞌpoꞌpî tewîꞌ ta. Moropai mîîkîrîya inkamoro tîpoitîrîtonon toꞌ pia pîrata enaꞌpî tîntîrîꞌsan yannoꞌpî toꞌ iiꞌtoꞌpe. Îꞌ warapo mîrîrî pîrata ke eposaꞌ toꞌya anepuꞌpai awanîꞌpî.
16 Eꞌmaiꞌnon erepamîꞌpî iipia moropai taꞌpîiya: “Ukaraiwarî, manniꞌ pîrata enaꞌpî itîrîya neꞌtîkini uupia mîrîrî ke inîꞌ panpîꞌ eporîꞌpîuya miaꞌ tamîꞌnawîrî kaisaron”, taꞌpîiya.
17 Mîîkîrî pîꞌ taꞌpî ikaraiwarîya: “Morî pe man. Atausinpan pîꞌ wai. Innape teesenyakaꞌmasen pe awanî epuꞌtîuya sîrîrî. Maasa pra yairî mîrîrî mararon kuꞌsaꞌya. Mîrîrî yeꞌnen miaꞌ tamîꞌnawîron cidadekon esaꞌ pe akupîuya”, taꞌpîiya ipîꞌ.
18 Moropai tiaron ipoitîrî iipîꞌpî moropai taꞌpîiya: “Ukaraiwarî, manniꞌ pîrata enaꞌpî uupia itîrî neꞌtîkini ke inîꞌ panpîꞌ eporîꞌpîuya miaꞌtaikinan kaisaron”, taꞌpîiya.
19 Mîrîrî pîꞌ ikaraiwarî atausinpaꞌpî. “Morî pe man. Mîrîrî yeꞌnen miaꞌtaikin cidadekon esaꞌ pe akupîuya”, taꞌpî ikaraiwarîya ipîꞌ.
20 Moropai tiaron ipoitîrî iipîꞌpî. Taꞌpîiya ipîꞌ: “Ukaraiwarî, manniꞌ uupia itîrîya neꞌtîkini pîrata enaꞌpî seeniꞌ iwontîsauꞌya kamisa yaꞌ. Enonsauꞌya sîrîrî itîpannîpîuya namai.
21 Maasa pra amîrî wanî teesenyakaꞌmai pra tuꞌke îꞌ eponen pe. Moropai îꞌ tîpînse pra mararî pra moꞌkanen amîrî. Mîrîrî yeꞌnen eranneꞌ pe wanîꞌpî apîꞌ”.
22 Mîîkîrî maimu yuukuꞌpî ikaraiwarîya. “Imakuiꞌpî pe amîrî wanî, enyaꞌne pe. Puwana pîꞌ awanîpa taasaꞌ tanne, ikonekasaꞌya pra awanî. Mîrîrî yeꞌnen mîrîrî amaimu wenai ayuꞌse pra wai. Epuꞌtîꞌpîya saꞌman pe puꞌkuru uurî wanî teesenyakaꞌmai pra tuꞌke îꞌ eponen uurî, moropai îꞌ tîpînse pra mararî pra moꞌkanen uurî.
23 Tîîse îꞌ waniꞌ awanî yeꞌnen mîrîrî untîrîꞌpî pîrata enaꞌpî utînirurî tîrîya pra awanîꞌpî itewîꞌ ta itaponseꞌ pona? Sîrîrî itîîsaꞌya ya, inîꞌ panpîꞌ eepansaꞌ tanne eporîuya eꞌpainon”.
24 Moropai taꞌpîiya moro tîîpia tîweꞌsanon pîꞌ: “Mîîkîrî pia manniꞌ pîrata enaꞌpî moꞌkatî iipiapai. Moropai itîîtî mîîkîrî miaꞌ tamîꞌnawîron yapisîtîpon pia”.
25 Tîîse taꞌpî toꞌya: “Anna karaiwarî, tîîse mîîkîrî pia man miaꞌ tamîꞌnawîron pîrata enaꞌpî”, taꞌpî toꞌya.
26 Inkamoro maimu yuukuꞌpî toꞌ karaiwarîya. “Tîîse tauya apîꞌnîkon, manniꞌ tuꞌke panpîꞌ eporîtîponya yapisî eꞌpai awanî inîꞌ panpîꞌ tuꞌke. Tîîse anîꞌ wanî ya tuꞌkan pepîn yarakkîrî mîrîrî konekasaiꞌya pra awanî yeꞌnen, mîrîrî moꞌka eꞌpai awanî iipiapai, îꞌ ton pra aweꞌtoꞌpe”, taꞌpîiya.
27 Moropai taꞌpîiya: “Tarîpai inkamoro uyeyatonon eneꞌtî tesaꞌkon pe uurî wanî yuꞌse pra siꞌsan, inkamoro tîꞌkatî tamîꞌnawîrî eraꞌmauya tanne”, taꞌpî toꞌ karaiwarîya —taꞌpî Jesusya.
Jerusalém Pona Jesus Erepamî
28 Toꞌ yeurîma tîpo Jesus wîtîꞌpî toꞌ rawîrî Jerusalém pona.
29 Inkamoro erepamîꞌpî Oliveira yeꞌka wîꞌ pona. Mîrîrî wanîꞌpî aminke pra Betfagé moropai Betânia pîꞌ. Miarî pai Jesusya asakîꞌne tînenupaꞌsan yaipontîꞌpî tîrawîrî toꞌ wîtîtoꞌpe.
30 Tîmaimu tîrîꞌpîiya toꞌ pîꞌ see warantî. —Atîtî eꞌmaiꞌ pe mîrîrî vila pona, miarî eerepamîkon pe jumenta more mîrikkî eporîyaꞌnîkon ewaꞌtîsaꞌ pe. Anîꞌ enukuꞌpî pepîn. Mîîkîrî meukatîi moropai meneꞌtîi.
31 Anîꞌya amîrîꞌnîkon yekaranmapo ya: “Îꞌ ton pe mîîkîrî yeukayaꞌnîkon”, taa toꞌya ya apîꞌnîkon: “Uyesaꞌkon man ituꞌse”, makatîi —taꞌpî Jesusya.
32 Mîrîrî yeꞌnen inkamoro Jesus naipontîꞌsan wîtîꞌpî. Moropai tamîꞌnawîrî Jesusya taꞌpî yawîrî jumenta more yewaꞌtîsaꞌ toꞌya eporîꞌpî toꞌya.
33 Mîîkîrî yeuka toꞌya tanne itesanonya toꞌ ekaranmapoꞌpî: —Îꞌ ton pe mîîkîrî yeukayaꞌnîkon mîrîrî? —taꞌpî toꞌya toꞌ pîꞌ.
34 Inkamoroya taꞌpî: —Uyenupanenkon man ituꞌse. Mîrîrî yeꞌnen yarî annaya sîrîrî —taꞌpî toꞌya. Mîrîrî yeꞌnen yaatoꞌpe toꞌya, irumakaꞌpî toꞌya.
35 Mîrîrî jumenta more yarîꞌpî toꞌya Jesus pia. Moropai inkamoroya tîponkon moꞌkaꞌpî moropai itîrîꞌpî toꞌya jumenta more pona. Moropai Jesus enuku tanne ipîikaꞌtîꞌpî toꞌya.
36 Mîîkîrî po Jesus wîtî tanne pemonkonyamîꞌya tîponkon moꞌkapîtîꞌpî moropai eꞌma taawîrî yarenkaꞌpî toꞌya iporo Jesus wîtîtoꞌpe yapurî tîuyaꞌnîkon yeꞌnen.
37 Mîrîrî Oliveira yeꞌka wîꞌ poi tawautîkon pe, arinîkon pemonkonyamîꞌ inenupaꞌsan atausinpa piaꞌtîꞌpî. Moropai Paapa yapurîꞌpî toꞌya aronne tîwentaimepîꞌse, tamîꞌnawîron Jesus nîkupîꞌpî ikupî eserîkan pepîn eraꞌmasaꞌ tîuyaꞌnîkon yeꞌnen.
38 Inkamoroya taapîtîꞌpî mararî pra:—Morî pe puꞌkuru man.Paapaya uyesaꞌkon pe yarimasaꞌ sîrîrî.Morî pe Uyepotorîkon maimu pe aaipî mîrîrî.Morî pe puꞌkuru Paapa,kaꞌ pon man tîîwanmîra uurîꞌnîkon yarakkîrî.Paapa yapurîpaiꞌnîkon man
—taꞌpî toꞌya.
39 Mîrîrî taa toꞌya yeꞌnen, tiaronkon fariseuyamîꞌ toꞌ koreꞌta tîweꞌsanonya taꞌpî Jesus pîꞌ: —Anna yenupanen inkamoro ayapurî pîꞌ toꞌ wanî mannan tîꞌnapantoꞌpe panpîꞌ kaꞌkî toꞌ pîꞌ —taꞌpî toꞌya.
40 Inkamoro maimu yuukuꞌpî Jesusya: —Tauya sîrîrî apîꞌnîkon, mîrîrî warantî inkamoroya uyapurî eꞌpai awanî. Toꞌ atîꞌnapamî ya, tîꞌ inta ton pîn entaimepîtî kupî sîrîrî. Eseurîmakoi pepîn eseurîma kupî sîrîrî uyapurî pîꞌ —taꞌpî Jesusya toꞌ pîꞌ.
Jesus Karau
41 Miarî teerepamî pe Jerusalém cidaderî eraꞌmaꞌpî Jesusya. Eraꞌma tîuya yai ikaruwaꞌpî.
42 Moropai taꞌpîiya: —Sîrîrîpe anîꞌya tîwamîn enepî epuꞌtîyaꞌnîkon ya, epuꞌtîyaꞌnîkon eꞌpainon. Tîîse ituꞌse pra awanîkon. Tarîpai epuꞌtîyaꞌnîkon eserîke pra naatîi —taꞌpîiya Jerusalém ponkon winîkîi.
43 —Tarîpai wei erepamî kupî sîrîrî ayeyatonkonya ayuwatîkon kupî sîrîrî. Awoimaꞌtîkon toꞌya eepekon eserîke pra.
44 Inkamoroya tamîꞌnawîrî amîrîꞌnîkon tîîkoꞌmansenonkon tîꞌka kupî sîrîrî. Mararî îꞌ eꞌnîmî pepîn kupî sîrîrî apatakon yaꞌ. Maasa pra apîikaꞌtîiꞌnîkon Paapa narimaꞌpî epuꞌtîyaꞌnîkon pra awanîkon yeꞌnen —taꞌpî Jesusya.
Epîremantoꞌ Yewîꞌ Ta Jesus Ewomî
45 Moropai Jesus ewomîꞌpî epîremantoꞌ yewîꞌ ta moropai mîîkîrîya pemonkonyamîꞌ tîweꞌrepasanon yenpaꞌkaꞌpîiya epîremantoꞌ yewîꞌ tapai.
46 Taꞌpîiya: —Paapa maimu eꞌmenukasaꞌ man see warantî:Paapaya taꞌpî: “Uyewîꞌ wanî mîrîrî epîremantoꞌ yewîꞌ pe”,
taꞌpî Paapaya pena. Tîîse amîrîꞌnîkonya ikuꞌsaꞌ mîrîrî amaꞌyeꞌkon yewîꞌ pe —taꞌpî Jesusya.
47 Mîrîrî tîpo Jesusya toꞌ yenupaꞌpî epîremantoꞌ yewîꞌ ta wei kaisarî. Mîrîrî wenai teepîremasanon esanon moropai Moisés nurîꞌtîya yenupantoꞌ pîꞌ yenupatonkon moropai pemonkonyamîꞌ esanon wanîꞌpî anwîpai.
48 Tîîse mîrîrî kupî toꞌya eserîke pra awanîꞌpî. Maasa pra tamîꞌnawîronkon pemonkonyamîꞌya tamîꞌnawîrî siꞌma eeseurîmatoꞌ etaꞌpî mararî pra tîtîꞌnapanse.
