Jesus Cristo Yekare Lucas Nîmenukaꞌpî 2:1-52
2 Mîrîrî yai reiyamîꞌ esaꞌ tîweꞌsen Augustoya tamîꞌnawîronkonya teseꞌkon menuka meꞌpoꞌpî. Maasa pra tamîꞌnawîronkon tîîkoꞌmansenon anepuꞌpai awanîꞌpî mîîtoꞌpe.
2 Mîrîrî wanîꞌpî eꞌmaiꞌnon teseꞌkon menukatoꞌ toꞌya. Mîrîrî yai Quirino wanî Síria pata koꞌmannîꞌnen pe.
3 Mîrîrî yeꞌnen tamîꞌnawîronkon ennaꞌpoꞌpî tîpataꞌseꞌkon teesenpoꞌpîkon yaꞌ teseꞌkon menukai.
4 Mîrîrî warantî José wîtîꞌpî Galiléia pata pon Nazaré poi Judéia pata pon Belém pona, Davi nurîꞌtî esenpoꞌpî yaꞌ. Miarî ya José wîtîꞌpî maasa pra Davi paarîꞌpî pe awanîꞌpî.
5 Attîꞌpî tawasirî Maria yarakkîrî teseꞌkon menukai. Mîîkîrî Maria wanîꞌpî more yan pe.
6 Mîrîrî yai mîîkîrî Mariaya tînre yenpotoꞌ weiyu eseporîꞌpî miarî Belém po.
7 Mîîkîrîya eꞌmaiꞌnon tînre yenpoꞌpî warayoꞌ pe. Mîîkîrî more yaꞌsantîꞌpîiya moropai itîrîꞌpîiya paakayamîꞌ yaꞌreꞌ yenseꞌ yaꞌ. Maasa pra paakayamîꞌ yewîꞌ ta toꞌ wanîꞌpî toꞌ pataꞌseꞌ ton pra awanîꞌpî wîttî ta.
Carneiroyamîꞌ Eraꞌmanenan Pia Inserîyamîꞌ Esenpo
8 Miarî mîrîrî pata po tekînkon carneiroyamîꞌ eraꞌmanenan wanîꞌpî. Keren po siꞌma tekînkon koꞌmannîpîꞌpî toꞌya.
9 Mîrîrî tanne, Uyepotorîkon narimaꞌpî inserî esenpoꞌpî toꞌ pia. Moropai Uyepotorîkon yaꞌkaruya inkamoro weiyuꞌmaꞌpî. Mîrîrî pîꞌ toꞌ esiꞌnîpîꞌpî mararî pra.
10 Tîîse inserîya taꞌpî toꞌ pîꞌ: —Eranneꞌ pe pra eꞌtî. Kesiꞌnîꞌtî. Maasa pra morî itekare ekaremeꞌse yiꞌnî pîꞌ wai kureꞌne aatausinpakonpa. Amîrîꞌnîkon moropai tamîꞌnawîronkon pemonkonyamîꞌ atausinpatoꞌpe itekare ekaremekîuya sîrîrî.
11 Maasa pra sîrîrîpe Davi nurîꞌtî esenpoꞌpî pata po, pîikaꞌtîton esenposaꞌ man amîrîꞌnîkon ton pe. Mîîkîrî wanî Cristo, Paapa nîmenkaꞌpî pe, Uyepotorîkon pe —taꞌpîiya.
12 —Sîrîrî warantî eporîyaꞌnîkon yairî puꞌkuru awanî epuꞌtîkonpa. More eporîyaꞌnîkon kupî sîrîrî kamisa ke yaꞌsantîsaꞌ pe awanî, paakayamîꞌ yaꞌreꞌ yenseꞌ yaꞌ —taꞌpîiya toꞌ pîꞌ.
13 Mîrîrî pe rî inserî pokonpe tuꞌkankon inserîyamîꞌ esenpoꞌpî, Paapa poitîrîtonon. Inkamoroya Paapa yapurîꞌpî. Taꞌpî toꞌya:
14 —Paapa yapurî eꞌpai awanî ipata yaꞌ kaꞌ po.Maasa pra tarî non po tîîwanmîn tîîsaꞌ Paapaya man pemonkonyamîꞌ pia,Paapa wakîrikon pia.
15 Mîrîrî taa tîpo, inserîyamîꞌ ennaꞌpoꞌpî kaꞌ pona. Mîrîrî tîpo inkamoro tekînkon eraꞌmanenan eseurîmaꞌpî tîîwarîrîꞌnîkon. Inkamoroya taꞌpî: —Aaseꞌnîkon, wîtîꞌnîkon Belém pona, îꞌ eꞌkuꞌsaꞌ eraꞌmai Uyepotorîkon nekaremekîꞌpî —taꞌpî toꞌya.
16 Moropai inkamoro wîtîꞌpî kaꞌneꞌ pe teesemiꞌtapai. Teerepansaꞌkon yai eporîꞌpî toꞌya, Maria moropai José. Moropai more eraꞌmaꞌpî toꞌya paakayamîꞌ yaꞌreꞌ yenseꞌ yaꞌ.
17 Mîîkîrî more eraꞌma tîuyaꞌnîkon tîpo inkamoro wîtîꞌpî, îꞌ taꞌpî inserîya toꞌ pîꞌ ekaremeꞌse.
18 Mîrîrî ekaremekî toꞌya pîꞌ tamîꞌnawîronkon esenumenkaꞌpî kureꞌne teesewankonoꞌmai.
19 Tîîse tamîꞌnawîrî mîrîrî pîꞌ Maria esenumenkaꞌpî kureꞌne. Moropai mîrîrî konekaꞌpîiya tewan yaꞌ, tîwîrî teesenumenkapa.
20 Mîrîrî tîpo inkamoro tekînkon eraꞌmanenan ennaꞌpoꞌpî Paapa yapurî yeꞌka pe tînetaꞌpîkon pîꞌ moropai tîneraꞌmaꞌpîkon pîꞌ. Tamîꞌnawîrî inserîya ekaremekîꞌpî yawîrî awanîꞌpî.
More Eseꞌtî Toꞌya Jesus Pe
21 Asakîꞌne miaꞌ pona tîîmoꞌtai wei tîpo, teserukon yawîrî more mere piꞌpî pottî yaꞌtîsaꞌ toꞌya yai, iteseꞌ ton tîrîꞌpî toꞌya Jesus kaiꞌma, manniꞌ inserî nîtîrîꞌpî maasa Maria roꞌta yaꞌ aweꞌkupî pra tîîse.
Jesus Yarî Toꞌya Epîremantoꞌ Yewîꞌ Ta
22 Moropai toꞌ koꞌmamîꞌpî Maria ekoneka pîkîrî teserukon yawîrî. Maasa pra Moisés kaaretarîya taasaꞌ wanîꞌpî aakoꞌmantoꞌpe asakîꞌne pemonkonyamîꞌ (40) wei kaisarî. Mîrîrî tîpo José moropai Mariaya more yarîꞌpî Jerusalém pona Uyepotorîkon pîꞌ ekaremekîkonpa kaiꞌma.
23 Maasa pra mîrîrî warantî aweꞌmenukasaꞌ Uyepotorîkon maimu pe,Eꞌmaiꞌne esenpoꞌpî warayoꞌ pe tînmukukon moꞌkatoꞌpe toꞌya Uyepotorîkon ton pe.
24 Moropai Uyepotorîkon pia tîntîrîkon tîîtoꞌpe tîuyaꞌnîkon, asakîꞌne wakuꞌkaimîyamîꞌ yarîꞌpî toꞌya, Paapa maimuya taasaꞌ yawîrî. Mîrîrî ton pra awanî ya, asakîꞌne wîrîwoꞌyamîꞌ tîîtoꞌpe toꞌya, tînre yenpotîponoꞌpîkon ekonekatoꞌpe morî pe, taasaiꞌya. Mîrîrî warantî ikupîꞌpî toꞌya.
25 Mîrîrî yai tîîkoꞌmansen wanîꞌpî Jerusalém po Simeão iteseꞌ. Yairî puꞌkuru iteseru eꞌpîtîꞌpî moropai Paapa yapurînen pe aweꞌpîtîꞌpî. Moropai pena pata pai mîîkîrîya Judeuyamîꞌ eꞌtarumaꞌtîtoꞌ winîpai toꞌ pîikaꞌtînen iipî nîmîkîꞌpî. Kureꞌne aneraꞌmapai awanîꞌpî. Moropai Morî Yekaton Wannî wanîꞌpî iipia itesaꞌ pe.
26 Maasa pra Morî Yekaton Wannîya taasaꞌ wanîꞌpî ipîꞌ: —Aasaꞌmanta rawîrî mîîkîrî pîikaꞌtîton tînmenkaꞌpî yarimasaꞌ Uyepotorîkonya eraꞌmaya pe nai —taꞌpîiya. Mîrîrî yeꞌnen inîmîkîꞌpîiya.
27 Mîrîrî ya Simeão ewomîꞌpî epîremantoꞌ yewîꞌ ta Morî Yekaton Wannî maimu pe. Mîrîrî yai itunya moropai isanya mîîkîrî Jesus yaasaꞌ wanîꞌpî epîremantoꞌ yewîꞌ ta, Moisés nurîꞌtîya yenupantoꞌya taasaꞌ yawîrî.
28 Eraꞌma tîuya pe Simeãoya mîîkîrî more yanumîꞌpî temekon pona. Moropai Paapa yapurîꞌpîiya. Mîîkîrîya taꞌpî:
29 2:29-32 —Paapa, morî pe puꞌkuru nai.Amaimu yawîrî ikuꞌsaꞌya nai.Pîikaꞌtîton anarimaꞌpî eraꞌma pîꞌ wai uyenu ke puꞌkuru.Mîîkîrî pîikaꞌtîton yarimasaꞌya Judeuyamîꞌ pia neken pratîîse tamîꞌnawîronkon pemonkonyamîꞌ pia, tîpîikaꞌtînenkon ton yarimasaꞌyaaꞌka pe aweꞌtoꞌpe,îꞌ kaiꞌma tîîkoꞌmantoꞌkon wanî epuꞌtoꞌpe toꞌya.Moropai mîîkîrî pîikaꞌtîton wenai apemonkonoyamîꞌ Judeuyamîꞌ yapurî toꞌya.Tarîpai uusaꞌmanta pe wai tîîwanmîramaasa pra pîikaꞌtîton eraꞌmasauꞌya yeꞌnen—taꞌpî Simeãoya.
30 Eraꞌmakî 2:29
31 Eraꞌmakî 2:29
32 Eraꞌmakî 2:29
33 Mîrîrî warantî more pîꞌ Simeão eseurîmasaꞌ pîꞌ itun moropai isan wanîꞌpî kureꞌne teesenumenkai.
34 Simeãoya taꞌpî inkamoro pîꞌ: —Paapaya morî tîrî pîꞌ man aapiaꞌnîkon —taꞌpîiya. Moropai Maria Jesus yan pîꞌ taꞌpîiya: —Aꞌkî, mîserî more wanî sîrîrî Paapa nîmenkaꞌpî pe, tuꞌkankon Judeuyamîꞌ pîikaꞌtîton pe moropai tuꞌkankon newanmîrî tonpe. Paapaya imenkaꞌpî îꞌ kaiꞌma morî pe tîwanî ekaremeꞌtoꞌpeiya. Mîrîrî eraꞌma tîuyaꞌnîkon wenai tuꞌkankon eseurîma imakuiꞌpî pe iwinîkîi.
35 Mîrîrî taa tîuyaꞌnîkon wenai imakuiꞌpî pe tewankon wanî ekaremekî toꞌya eseraꞌma. Mîrîrî warantî eesewankonoꞌmatoꞌ wanî kupî sîrîrî, Maria. Kureꞌne neꞌneꞌ pe epuꞌtîya, tauraya ayewan yaꞌtî warantî —taꞌpî Simeãoya Maria pîꞌ.
36 Moro awanîꞌpî itekare ekaremeꞌnen noꞌsanton profetisa inyo isaꞌmantaꞌpî iteseꞌ Ana. Mîîkîrî wanîꞌpî Aser nurîꞌtî paarîꞌpî pe, Fanuel yensi pe. Asakîꞌne miaꞌ pona tîîmoꞌtai (7) konoꞌ tînoꞌpîta tîpo inyo saꞌmantaꞌpî.
37 Tarîpai mîîkîrî wanîꞌpî 84 kaisarî ikono po. Aakoꞌmanpîtîꞌpî epîremantoꞌ yewîꞌ ta. Mîîkîrîya Paapa yapurîpîtîꞌpî wei, ewaron kaisarî tekkari tonpai pra eepîremapîtîꞌpî.
38 Mîîkîrî Ana iipîꞌpî inkamoro pia Simeãoya taasaꞌ tanne. Mîrîrî yai Paapa yapurîꞌpîiya mîîkîrî more yarimasaiꞌya yeꞌnen. —Morî pe man, Paapa —taꞌpîiya. Moropai tamîꞌnawîronkon pîꞌ ekaremekîꞌpîiya mîîkîrî more yekare inkamoro Jerusalém ponkon pîikaꞌtînen nîmîꞌnenan pîꞌ.
Nazaré Pona Toꞌ Ennaꞌpo
39 Mîrîrî tîpo tamîꞌnawîron Paapa maimuya taasaꞌ yawîrî ikupî tîpoꞌnîkon, José moropai Maria ennaꞌpoꞌpî Galiléia pata pona, tîpata Nazaré cidaderî pona.
40 Miarî mîîkîrî more arentaꞌpî moropai meruntî ke eenaꞌpî. Epuꞌnen pe awanîꞌpî moropai Paapa wanîꞌpî iipia, ikoꞌmannîpîꞌpîiya morî pe.
Judeuyamîꞌ Yenupanenan Yenupa Jesusya Maasaron Pe Siꞌma
41 Konoꞌ kaisarî Jesus yuntonon wîtîpîtîꞌpî Jerusalém pona Páscoa Judeuyamîꞌ festarî pîꞌ.
42 Mîrîrî warantî toꞌ wîtîꞌpî festa pîꞌ asakîꞌne puꞌ pona tîîmoꞌtai (12) Jesus kono po tîîse teserukon ta.
43 Tamîꞌnawîrî festa ataretîꞌkasaꞌ tîpo toꞌ ennaꞌpo piaꞌtîꞌpî tewîꞌkon ta. Tîîse Jesus eꞌnîmîꞌpî Jerusalém po tuntononya epuꞌtî pra tîîse.
44 Itun esenumenkaꞌpî tonpayamîꞌ pokonpe attî kaiꞌma awanîꞌpî. Mîrîrî yeꞌnen toꞌ eseꞌmaꞌtîꞌpî. Toꞌ wîtîꞌpî tiwin wei kaisarî tîîse toꞌ enpenataꞌpî ipîꞌ. Inkamoroya yuwaꞌpî itonpayamîꞌ koreꞌta pîꞌ.
45 Tîîse eporî toꞌya pîn. Mîrîrî yeꞌnen toꞌ ennaꞌpoꞌpî Jerusalém pona yuwai.
46 Eseurîwîꞌne wei kaisarî tîîkoꞌmamîkon tîpo, eporîꞌpî toꞌya epîremantoꞌ yewîꞌ ta. Judeuyamîꞌ yenupanenan koreꞌta toꞌ eseurîma eta pîꞌ awanîꞌpî moropai toꞌ yekaranmapoꞌpîtîꞌpîiya.
47 Tamîꞌnawîronkon mîîkîrî eseurîma etatîponkon esenumenkaꞌpî kureꞌne teesewankonoꞌmai. Maasa pra epuꞌnen pe aweꞌtoꞌ pîꞌ moropai toꞌ maimu yuꞌtoiꞌya pîꞌ toꞌ esenumenkaꞌpî kureꞌne epuꞌtî tîuyaꞌnîkon yentai.
48 Mîîkîrî eraꞌma tîuyaꞌnîkon yai, ituntonon esewankonoꞌmaꞌpî. Mîrîrî yai isanya taꞌpî ipîꞌ: —Unre, îꞌ waniꞌ awanî yeꞌnen mîrîrî warantî awanî? Ayunya moropai uurîya anna esewankonoꞌma kureꞌne ayuwa pîꞌ —taꞌpîiya.
49 Jesusya toꞌ maimu yuukuꞌpî: —Îꞌ ton pe see uyuwayaꞌnîkon mîrîrî? Epuꞌtîyaꞌnîkon pra naatî uyun yewîꞌ ta uurî wanî eꞌpai awanî? —taꞌpîiya.
50 Tîîse inkamoroya îꞌ taa Jesusya epuꞌtî toꞌya pra awanîꞌpî.
51 Mîrîrî tîpo Jesus ennaꞌpoꞌpî tuntonon pokonpe Nazaré pona moropai aakoꞌmamîꞌpî. Tuntonon maimu yawîrî awanîꞌpî. Tamîꞌnawîrî mîrîrî iteseru tîneraꞌmaꞌpî pîꞌ isan enpenatapîtîꞌpî.
52 Mîrîrî yai Jesus arentaꞌpî, kureꞌne eenaꞌpî. Moropai epuꞌnen pe aweꞌtoꞌ nîrî enaꞌpî kureꞌne. Paapa wakîri pe awanîꞌpî moropai pemonkonyamîꞌ nîrî wakîri pe awanîꞌpî.
