Jesus Cristo Yekare Lucas Nîmenukaꞌpî 20:1-47
20 Tiaron wei yai Jesusya Paapa maimu ke pemonkonyamîꞌ yenupa tanne epîremantoꞌ yewîꞌ ta teepîremasanon esanon moropai Moisés nurîꞌtîya yenupantoꞌ pîꞌ yenupatonkon, moropai pemonkonyamîꞌ panamanenan iipîꞌpî Jesus pia.
2 Moropai inkamoroya Jesus yekaranmapoꞌpî. —Kaꞌkî anna pîꞌ epuꞌtoꞌpe annaya, anîꞌ maimu pe inkamoro tîweꞌrepasanon yenpaꞌkaꞌpîya mîrîrî moropai toꞌ yenupaya mîrîrî? Anîꞌya mîrîrî kupîpa taasaꞌ mîrîrî amîrî pîꞌ? —taꞌpî toꞌya.
3 Inkamoro maimu yuukuꞌpî Jesusya: —Uurî nîtîrî ayekaranmapouyaꞌnîkon sîrîrî tarîpai umaimu yuꞌtî —taꞌpîiya.
4 —Anîꞌya kin yenpatakonantoꞌpe João Batista nurîꞌtîya taꞌpî? Paapaya kaꞌrî, pemonkonyamîꞌya kaꞌrî? —taꞌpî Jesusya toꞌ pîꞌ.
5 Mîrîrî taa Jesusya yeꞌnen tîîwarîrîꞌnîkon toꞌ eseurîmaꞌpî tiaronkon pokonpe. —Îꞌ kaiꞌma see imaimu yuꞌtoꞌpeꞌnîkon? Maasa pra Paapa maimu pe taꞌnîkon ya, uurîꞌnîkon yekaranmapoiya eserîke wanî. “Moropai îꞌ waniꞌ awanî yeꞌnen João kupîyaꞌnîkon pra awanîkon innape”? taiya eserîke awanî upîꞌnîkon.
6 Moropai pemonkon maimu pe taasaꞌnîkon ya, arinîkon pemonkonyamîꞌya uurîꞌnîkon tarumaꞌtî. Saꞌmantan pîkîrî tîꞌ ke uurîꞌnîkon paꞌtîpîtî toꞌya eserîke awanî. Maasa pra inkamoroya innape puꞌkuru Paapa maimu ekaremeꞌnen pe João nurîꞌtî wanîꞌpî epuꞌtî kaiꞌma —taꞌpî toꞌya tîîwarîrîꞌnîkon.
7 Mîrîrî yeꞌnen Jesus maimu yuukuꞌpî toꞌya see warantî: —Epuꞌtî annaya pra man anîꞌ maimu pe Joãoya yenpatakonaꞌpî —taꞌpî toꞌya.
8 Mîrîrî pîꞌ Jesusya nîrî taꞌpî: —Uurî nîrî anîꞌ maimu pe inkamoro tîweꞌrepasanon epîremantoꞌ yewîꞌ ta siꞌma yenpaꞌkaꞌpîuya moropai toꞌ yenupauya anîꞌ maimu pe ekaremekîuya pepîn —taꞌpî Jesusya toꞌ pîꞌ.
Ipoitîrîtonon Imakuiꞌpî Pe Tîweꞌsanon
9 Moropai Jesusya toꞌ yeurîma piaꞌtîꞌpî panton pe: —Warayoꞌya tînmîri ton yaꞌtîꞌpî. Moropai uva yeꞌka pîmîꞌpîiya mararî pra tekkari yeꞌ ton. Mîrîrî tînmîri eraꞌmanenan tonkon eporîꞌpîiya itesaꞌ toꞌ eꞌtoꞌpe tuutî yeꞌnen. Moropai mîrîrî tîpo attî îꞌ tiaron pata pona ikoꞌmanse.
10 Moropai aasîrî itekkari emîrî weiyu eseporîꞌpî. Mîrîrî yeꞌnen mîîkîrîya tiwin tîpoitîrî yarimaꞌpî tekkari yonpa eraꞌmai attîtoꞌpe kaiꞌma moropai attîꞌpî. Tîîse inkamoro inmîri esaꞌ tîweꞌsanonya mîîkîrî ipoitîrî paꞌtîpîtîꞌpî. Moropai mîîkîrî yarimaꞌpî toꞌya awennaꞌpotoꞌpe îꞌ ton pra.
11 Moropai inîꞌrî ikaraiwarîya tiaron tîpoitîrî yarimaꞌpî toꞌ pia attîtoꞌpe. Mîîkîrî nîrî paꞌtîpîtîꞌpî toꞌya ipîra imakuiꞌpî kupîꞌpî toꞌya yarakkîrî. Moropai mîîkîrî yarimaꞌpî toꞌya awennaꞌpotoꞌpe îꞌ ton pra.
12 Moropai inîꞌrî tîpoitîrîtonon teeseurîno yarimaꞌpîiya toꞌ pia attîtoꞌpe. Tîîse mîrîrî warantî nîrî ipaꞌtîpîtîꞌpî inkamoro umî eraꞌmanenanya moropai yenpaꞌkaꞌpî toꞌya attîtoꞌpe.
13 Tîpoitîrîtonon pîꞌ mîrîrî kuꞌsaꞌ toꞌya tîpo toꞌ karaiwarî esenumenkaꞌpî. “Îꞌ kupîuya eꞌpainon koꞌye. Kaane epuꞌtî pîꞌ wai”, taꞌpîiya. “Uwakîri puꞌkuru unmu yarimauya sîrîrî, mîserî yarimasauꞌya ya, îꞌ kupî toꞌya pepîn ipîꞌ maasa pra unmu pe awanî yeꞌnen. Inama toꞌya epuꞌtî pîꞌ wai” kaiꞌma eesenumenkaꞌpî.
14 Tîîse mîîkîrî umî esaꞌya tînmu yarimasaꞌ eraꞌma tîuyaꞌnîkon yeꞌnen inkamoro umî eraꞌmanenya taꞌpî: “Aꞌkî mîserî inmu wîîpaiꞌnîkon, maasa pra îꞌ pensa tîyun saꞌmanta yai mîserî ena umî esaꞌ. Uurîꞌnîkon pe aweꞌtoꞌpe iwîpaiꞌnîkon”, taꞌpî toꞌya.
15 Mîrîrî yeꞌnen inkamoroya mîîkîrî umî esaꞌ munmu yapisîꞌpî yenpaꞌkaꞌpî toꞌya umî yapai poro pona. Moropai iwîꞌpî toꞌya.
Mîrîrî ekaranmapoꞌpî Jesusya toꞌ pîꞌ: —Îꞌ kupî mîîkîrî umî esaꞌya kupî sîrîrî?
16 Tînmîri ya attî moropai inkamoro warayoꞌkon tînmu wîîtîponkon tîꞌkaiya moropai tiaronkon warayoꞌkon eporîiya eserîke awanî tînmîri eraꞌmanenan ton kon —taꞌpîiya.
Mîrîrî eta tîuyaꞌnîkon yeꞌnen taꞌpî toꞌya: —Paapaya mîrîrî warantî ikupî eꞌpai pra man —taꞌpî toꞌya.
17 Tîîse Jesusya inkamoro eraꞌmaꞌpî, moropai taꞌpîiya: —Mîrîrî yeꞌnen îꞌ taatoꞌpe Paapa maimu eꞌmenukasaꞌ awanî mîrîrî? Sîrîrî warantî Paapa eseurîmaꞌpî:Wîttî konekanenanya tîꞌ yenumîꞌpî morî pe pra seeniꞌ tîꞌ wanî taa tîuyaꞌnîkon yeꞌnen. Moropai yenumîꞌpî toꞌya.Tîîse mîrîrî tîꞌ toꞌ nenumîꞌpî wanî morî pe puꞌkuru toꞌ nîmenkaꞌpî yentai. Moropai wîttî koꞌmannîpîiya eesenumî namai
taꞌpî Paapaya pena.
18 Moropai taꞌpî Jesusya: —Anîꞌ atareꞌmo ya, sîrîrî tîꞌ pona mîîkîrî maꞌta mîrîrî. Tîîse sîrîrî tîꞌ ena ya ipona, mîîkîrî yankaiya tamîꞌnawîrî.
Uyesaꞌkon Yeꞌmatoꞌ Pîꞌ Jesus Eseurîma
19 Mîrîrî tîpo Moisés nurîꞌtîya yenupantoꞌ pîꞌ yenupatonkon moropai teepîremasanon esanonya tîwinîkîiꞌnîkon Jesus eseurîma pe awanî epuꞌtîꞌpî. Mîrîrî yeꞌnen anapiꞌpai toꞌ wanîꞌpî teuren tîîse arinîkon pemonkonyamîꞌ namaꞌpî toꞌya.
20 Jesus anarainamapai toꞌ wanî yeꞌnen îꞌ kupîiya eraꞌma tonkon warayoꞌkon yeꞌmaꞌpî toꞌya. Moropai inkamoro yaipontîꞌpî toꞌya Jesus yekaranmapoꞌpîꞌse toꞌ wîtîtoꞌpe. Yairî tîwanîkon kaiꞌma Jesus yekaranmapoꞌpî toꞌya. Tîîse yairî pra Jesus yeseru aneraꞌmapai toꞌ wanîꞌpî kinî, mîîkîrî rumakakonpa pata esaꞌ yenyaꞌ.
21 Mîrîrî yeꞌnen inkamoroya ekaranmapoꞌpî: —Anna yenupanen, manniꞌ eeseurîmatoꞌ wanî epuꞌtî pîꞌ anna man yairî puꞌkuru awanî. Moropai epuꞌtî pîꞌ anna man nîrî eꞌsentai pra tiaronkon panamaya tîîse seꞌ kaisarî toꞌ panamaya yairon pe puꞌkuru ituꞌse Paapa eꞌtoꞌ yawîrî warayoꞌkon panamaya.
22 Moropai taꞌpî toꞌya Jesus pîꞌ: —Oꞌnon yeꞌka pe awanî eꞌpainon uyesaꞌkon pe tîweꞌsen César romanoyamîꞌ esaꞌ yeꞌma annaya ya kaꞌkî anna pîꞌ. Morî pe awanî, kaane, kaꞌrî? Uyeserukon yawîrî, Moisés nurîꞌtîya yenupantoꞌ yawîrî awanî, kaane kaꞌrî?
23 Tîîse Jesusya îꞌ ankuꞌpai toꞌ wanî tarakkîrî epuꞌtîꞌpî. Mîrîrî yeꞌnen taꞌpîiya toꞌ pîꞌ:
24 —Mîrîrî pîrata enaꞌpî eneꞌtî uupia —taꞌpîiya. —Anîꞌ eseꞌ sîrîrî ipokon, anîꞌ yekaton sîrîrî ipokon? —taꞌpîiya. Moropai yuukuꞌpî toꞌya:
25 —César yekaton mîrîrî —taꞌpî toꞌya. Moropai Jesusya taꞌpî toꞌ pîꞌ: —Mîrîrî wanî imîrî pe. Moriya morî kuꞌtî unkupîkon ton pe mîîkîrî César nekaremekîꞌpî kuꞌtî. Moropai morî kuꞌtî unkupîkon ton pe Paapa nekaremekîꞌpî kuꞌtî —taꞌpîiya.
26 Mîrîrî warantî yairî Jesus wanî yeꞌnen, oꞌnon yeꞌka pe yapisî toꞌya eserîke pra toꞌ wanîꞌpî, pemonkonyamîꞌ rawîrî siꞌma. Mîrîrî yeꞌnen inkamoro atîꞌnapamîꞌpî inîꞌrî toꞌ eseurîma pra. Kureꞌne teesenumenkai toꞌ wanîꞌpî ipîꞌ. Maasa pra yairî toꞌ maimu yuukuiya yeꞌnen, epuꞌnen pe Jesus wanî yeꞌnen.
Eꞌmîꞌsaꞌkantoꞌ Pîꞌ Jesus Ekaranmapo Toꞌya
27 Moropai mîrîrî tîpo saduceuyamîꞌ manniꞌkan innape isaꞌmantaꞌsan eꞌmîꞌsaꞌka kuꞌnenan pepîn erepamîꞌpî Jesus pia.
28 Moropai inkamoroya taꞌpî Jesus pîꞌ: —Anna yenupanen, pena Moisésya unkupîkon ton menukaꞌpî see warantî anna nîkupî ton. Warayoꞌ inmuku pîn saꞌmanta ya, itakonoꞌpî wanî eꞌpai awanî inoꞌpîrîꞌpî yarakkîrî inmu ton epotoꞌpeiya.
29 Moro awanîꞌpî asakîꞌne miaꞌ pona tîîmoꞌtai kaisarî itonpayamîꞌ. Inkamoro ruinankon aꞌyekeꞌton panpîꞌ noꞌpîtaꞌpî. Teuren tîîse aasaꞌmantaꞌpî tînmu ton pra tîîse.
30 Moropai itakonoꞌpî wanîꞌpî inoꞌpîrîꞌpî yarakkîrî tîîse aasaꞌmantaꞌpî mîrîrî warantî inmu pra siꞌma.
31 Moropai toꞌ eseurînoꞌpî wanîꞌpî mîîkîrî yarakkîrî tîîse mîrîrî warantî awanîꞌpî inkamoro asakîꞌne miaꞌ pona tîîmoꞌtaiꞌnîkon yarakkîrî aweꞌkupîꞌpî tamîꞌnawîrî toꞌ saꞌmantaꞌpî inmu pra siꞌma.
32 Mîrîrî tîpo toꞌ noꞌpîrîꞌpî nîrî saꞌmantaꞌpî.
33 Tarîpai inkamoro eꞌmîꞌsaꞌka yai, oꞌnon yeꞌka noꞌpî pe awanî kupî sîrîrî. Maasa pra tamîꞌnawîronkon eꞌsaꞌ yarakkîrî —taꞌpî Saduceuyamîꞌya Jesus pîꞌ.
34 Inkamoro maimu yuukuꞌpî Jesusya. Taꞌpîiya: —Sîrîrî pata po warayoꞌkon noꞌpîta moropai wîriꞌsanyamîꞌ niyota.
35 Tîîse manniꞌ wei yai Paapaya isaꞌmantaꞌsan, manniꞌkan tîîpia morîkon pîmîꞌsaꞌka yai inîꞌrî toꞌ noꞌpîta pepîn.
36 Moropai ipatîkarî enen toꞌ koꞌmamî. Inîꞌrî toꞌ saꞌmanta pepîn. Maasa pra inserîyamîꞌ warantî toꞌ wanî. Paapa munkî pe toꞌ wanî maasa pra toꞌ pîmîꞌsaꞌkasaiꞌya yeꞌnen.
37 Sîrîrî pîꞌ pena Moisésya eseurîmapîtîꞌpî aronne, isaꞌmantaꞌsan eꞌmîꞌsaꞌka kupî pe man, taapîtîꞌpîiya. Enenan pe toꞌ wanî ekaremekîiya maasa pra pena manniꞌ yai apoꞌ taaransen yaꞌ yarakkîrî Paapa eseurîma yai. Mîrîrî menukaꞌpîiya:Paapa wanî Abraão nurîꞌtî yepotorî pe moropai Isaque nurîꞌtî yepotorî pe, moropai Jacó nurîꞌtî yepotorî pe awanî
ekaremekîꞌpîiya.
38 Mîrîrî ekaremekîꞌpîiya enenankon yepotorî pe Paapa wanî ekaremekîpa kaiꞌma. Tîîse isaꞌmantaꞌsan yepotorî pe Paapa wanî pepîn. Maasa pra Paapaya epuꞌtî enen tamîꞌnawîronkon inmukuyamîꞌ wanî.
39 Mîrîrî pîꞌ tiaronkon Moisés nurîꞌtîya yenupantoꞌ pîꞌ yenupatonkonya taꞌpî Jesus pîꞌ: —Morî pe eseurîman pîꞌ nai, anna yepotorî —taꞌpî toꞌya.
40 Tîîse inîꞌ panpîꞌ Jesus ekaranmapo toꞌya pra toꞌ wanîꞌpî. Maasa pra eranneꞌ pe toꞌ wanîꞌpî.
Paapa Naipontîꞌpî Pîꞌ Jesus Ekaranmapo Toꞌya
41 Moropai mîrîrî pe rî Jesusya toꞌ ekaranmapoꞌpî: —Oꞌnon yeꞌka pe Paapa nîmenkaꞌpî wanî mîrîrî Davi nurîꞌtî paarîꞌpî pe taayaꞌnîkon?
42 Tîîse mîîkîrî Davi nurîꞌtîya taꞌpî Salmo kaaretarî yaꞌ see warantî:Uyepotorîya taꞌpî Uyepotorî pîꞌ:“Ereutakî umeruntîri winîkîi.
43 Aꞌpu yoꞌkoi ayeyatonon tîrîuya pîkîrî”,
taꞌpîiya.
44 Mîrîrî warantî Davi nurîꞌtîya esatîꞌpî tepotorî pe, tentai awanî yeꞌnen. Mîrîrî yeꞌnen oꞌnon yeꞌka pe iparîꞌpî pe neken awanî eꞌpainon? —taꞌpî Jesusya toꞌ pîꞌ.
Moisés Nurîꞌtîya Yenupantoꞌ Pîꞌ Yenupatonkon Pîꞌ Jesus Eseurîma
45 Mîrîrî pîꞌ Jesus eseurîma eta pîꞌ pemonkonyamîꞌ wanî tanne, taꞌpîiya tînenupaꞌsan pîꞌ:
46 —Aka! Tîwarî eꞌtî inkamoro Moisés nurîꞌtîya yenupantoꞌ pîꞌ yenupatonkon pîꞌ. Maasa pra morî pe teepontîi toꞌ asarî, morî pe tamîꞌnawîronkon pemonkonyamîꞌya teraꞌmatonkon pe kaiꞌma. Inkamoro yapurî toꞌya praꞌca poro. Mîrîrî warantî ipîkku eꞌpai toꞌ wanî. Moropai morî ereutantoꞌ pona toꞌ ereuta epereꞌnîtoꞌ yewîꞌkon ta pîꞌ tiaronkon yentai. Moropai taponseꞌkon ton menka toꞌya tîwentamoꞌkatoꞌkon weiyu yai ipîkku pe tîwanîkon yeꞌnen.
47 Mîrîrî kupî toꞌya inyo isaꞌmantaꞌsan yenkuꞌtî tîuyaꞌnîkon tîîse, moropai toꞌ yemanne yamaꞌrunpa toꞌya. Mîrîrî kupî tîuyaꞌnîkon yeꞌka pe toꞌ epîrema mararî pra tîkoꞌman pe, morî pe tîwanîkon eraꞌmatoꞌpe tiaronkonya kaiꞌma. Tîîse mîrîrî wenai toꞌ tarumaꞌtî Paapaya kupî sîrîrî kureꞌne puꞌkuru —taꞌpî Jesusya.
