Jesus Cristo Yekare Lucas Nîmenukaꞌpî 21:1-38
21 Mîrîrî tîpo Jesusya pemonkonyamîꞌ yakoꞌmenkaꞌpî epîremantoꞌ yewîꞌ ta. Moropai ipîkkukonya tîniru tîrî itenseꞌ yaꞌ eraꞌmaꞌpîiya.
2 Moropai tiwinan wîriꞌ inyo isaꞌmantaꞌpîya nîrî itîrî eraꞌmaꞌpîiya. Mîîkîrî saꞌne wanîꞌpî îꞌ ton pra tîweꞌsen. Tîîse asakîꞌne pîrata enaꞌpî mîrikkî tîrîꞌpîiya tekkari yennatoꞌpan tîrîꞌpîiya tamîꞌnawîrî.
3 Mîrîrî pîꞌ Jesusya taꞌpî: —Tauya sîrîrî apîꞌnîkon, aꞌkî mîserî saꞌne wîriꞌ inyo ton pîn teuren tîîse pîrata enaꞌpî tîrî pîꞌ man tamîꞌnawîronkonya itîrî manniꞌ yentai.
4 Maasa pra inkamoro ipîkkukonya itîrî pîꞌ man itonpa pe neken tamîꞌnawîrî pra. Tîîse mîserî saꞌne wîriꞌya tekkari yennatoꞌ tîuya pan tîrî pîꞌ man tamîꞌnawîrî —taꞌpî Jesusya toꞌ pîꞌ.
Epîremantoꞌ Yewîꞌ Eꞌtîꞌka Kupî Pîꞌ Jesus Eseurîma
5 Mîrîrî tîpo tiaronkon pemonkonyamîꞌ eseurîmaꞌpî epîremantoꞌ yewîꞌ pîꞌ. Morî pe awanî pîꞌ toꞌ eseurîmaꞌpî. Tîꞌkon ikonekasaꞌ wanîꞌpî morî pe puꞌkuru. Morî pe toꞌ nîtîrîꞌpî eraꞌmaꞌpî toꞌya. Mîrîrî pîꞌ toꞌ eseurîma yeꞌnen Jesusya taꞌpî toꞌ pîꞌ:
6 —Aꞌkî, seeniꞌ wîttî yaranka toꞌya weiyu erepamî kupî sîrîrî tamîꞌnawîrî seeniꞌ eraꞌmayaꞌnîkon manniꞌ. Yaranka toꞌya yai mararî tîꞌ eꞌnîmî pepîn tiaron tîꞌ pona, tîîse tamîꞌnawîrî yenumî toꞌya —taꞌpîiya.
Eꞌtarumaꞌtîntoꞌ Pîꞌ Jesus Eseurîma
7 Mîrîrî pîꞌ inenupaꞌsanya ekaranmapoꞌpî: —Îꞌ pensa sîrîrî yaranka toꞌya? —taꞌpî toꞌya. —Oꞌnon yeꞌka pe awanî kupî sîrîrî mîrîrî eꞌkupî kupî ya? —taꞌpî toꞌya.
8 Jesusya yuukuꞌpî: —Tîwarî panpîꞌ eꞌtî anîꞌya ayenkuꞌtîkon namai. Maasa pra tuꞌke toꞌ asarî kupî sîrîrî uyeseꞌ pîꞌ teeseurîmasanon. Moropai taa toꞌya: “Uurî Paapa narimaꞌpî imenkasaꞌ uurî”, taa toꞌya. “Mîîkîrî erepansaꞌ sîrîrî”, taa toꞌya. Tîîse inkamoro yeꞌkakon maimu yawîrî pra eꞌtî.
9 Moropai teesiꞌnîꞌse pra eꞌtî, teepîsanon yekare etayaꞌnîkon ya yai tesanonkon yarakkîrî moropai teeyatonon yarakkîrî. Maasa pra eꞌmaiꞌ pe mîrîrî yeꞌka eꞌkupî eꞌpai awanî mîrîrî. Tîîse mîrîrî neken ikîꞌpî taa eserîke pra man.
10 Jesus eseurîma koꞌmannîpîꞌpî. Taꞌpîiya: —Pataponkon eseyaꞌnama kupî sîrîrî tiaronkon pataponkon yarakkîrî. Tiaronkonya tiaron pataponkon wîî —taꞌpîiya.
11 —Moropai tiaronkon pata po non eserentîkîꞌma kupî sîrîrî mararî pra. Moropai emiꞌnan, iwan wanî kupî sîrîrî mararî pra. Moropai paran wanî kupî sîrîrî pata po. Mîrîrî yeꞌka nariꞌ wanî moropai kureꞌnan esewankonoꞌmantoꞌ ton esenpo kupî sîrîrî kaꞌ pîꞌ teraꞌmasen pepîn.
12 Tîîse maasa mîrîrî yeꞌka tamîꞌnawîron eꞌkupî rawîrî amîrîꞌnîkon yarî toꞌya kupî sîrîrî uyeseꞌ wenai. Atarumaꞌtîkon toꞌya kupî sîrîrî. Amîrîꞌnîkon yarî toꞌya toꞌ epereꞌtoꞌkon yewîꞌ ta apîꞌnîkon teeseurîmakonpa. Moropai mîrîrî tîpo atarakkannîtoꞌ yewîꞌ ta ayarîkon toꞌya. Uyeseꞌ wenai amîrîꞌnîkon yarî toꞌya ipîkkukon pata esanon pia, moropai pata esanon reiyamîꞌ pia.
13 Mîrîrî yai uyeseꞌ pîꞌ eeseurîmakon kupî sîrîrî. Paapa maimu ekaremekîyaꞌnîkon inkamoro ipîkkukon pîꞌ —taꞌpî Jesusya.
14 —Mîrîrî yeꞌnen sîrîrî pata pai teesenumenkai pra eꞌtî, îꞌ kaiꞌma inkamoro yeꞌka maimu yuukukonpa, imaimu pra eesuwaꞌkakon namai. Îꞌ kaiꞌma eseurîmakonpa pîꞌ kîsenumenkatî.
15 Maasa pra uurîya amaimukon ton tîrî. Moropai uurîya epuꞌnen pe aweꞌtoꞌkon ton tîrî. Inkamoro ayeyatonkonya yapîtanîpî yentai moropai amaimukon waꞌka toꞌya yentai mîrîrî kupîuya.
16 Amîrîꞌnîkon wanî atarakkannîtoꞌ yewîꞌ ta tiaronkon pepîn rî ayunkon moropai aruinankon moropai ayonpakonya rî amîrîꞌnîkon yekaꞌma. Inkamoroya rî tiaronkon ayonpakon wîî kupî sîrîrî.
17 Uyeseꞌ wenai tamîꞌnawîronkonya amuꞌtunpakon kupî sîrîrî. Ayewanmîrîkon toꞌya.
18 21:18,19 Mîrîrî yeꞌnen innape ukupî pîꞌ akoꞌmantî tîrumakai pra. Mîrîrî warantî ikupîyaꞌnîkonya ya, aweꞌpîikaꞌtîkon tamîꞌnawîrî, tiwin kin aamaꞌtakon pepîn —taꞌpî Jesusya.
19 Eraꞌmakî 21:18
Jerusalém Cidaderî Eꞌtîꞌka Kupî Sîrîrî
20 Inîꞌrî Jesus eseurîmaꞌpî. Taꞌpîiya: —Îꞌ pensa Jerusalém cidade woimaꞌtîsaꞌ surarayamîꞌya yai mîrîrî epuꞌtîyaꞌnîkon. Tiwinarî tamîꞌnawîronkon pemonkonyamîꞌ tîꞌka toꞌya kupî pe tiwinarî tiwinan tînîmîi pra.
21 Mîrîrî yeꞌnen anîꞌ wanî ya Judéia pata po, kaꞌneꞌ pe eepe eꞌpai awanî wîꞌ pona. Moropai anîꞌ wanî ya cidade po, kaꞌneꞌ pe eepaꞌka eꞌpai awanî. Moropai anîꞌ wanî ya keren po, awennaꞌpo eꞌpai pra awanî cidade pona.
22 Maasa pra mîrîrî wei yai kureꞌnan eꞌtarumaꞌtîntoꞌ wanî pe man. Mîrîrî eꞌkupî maasa pra Paapa maimuya taasaꞌ manniꞌ yawîrî.
23 Aka saꞌne manniꞌkan wîriꞌsanyamîꞌ more yankon pia îri pe awanî. Maasa pra toꞌ epe eserîke pra awanî yeꞌnen. Moropai manniꞌkan simonkokon toꞌ munkîyamîꞌ manaꞌpokonkon inkamoro pia îri awanî. Inkamoro eꞌtarumaꞌtî kupî sîrîrî mîrîrî yai. Mîrîrî yai eꞌtarumaꞌtîntoꞌ wanî kureꞌnan sîrîrî non po. Sîrîrî warantî tîpemonkonoyamîꞌ Judeuyamîꞌ tarumaꞌtî Paapaya kupî sîrîrî.
24 Moropai mîrîrî yai inkamoro wîî toꞌya kupî sîrîrî kasupara ke. Moropai tiaronkon yarî toꞌya atarakkannîtoꞌ yewîꞌ ta patakon poro. Moropai Judeuyamîꞌ pepînya Jerusalém ponkon tîꞌka kupî sîrîrî tamîꞌnawîrî yaretîꞌka toꞌya, ikuꞌneꞌtî weiyu esuwaꞌka pîkîrî —taꞌpî Jesusya.
Kaꞌ Poi Iipîꞌpî Jesus Iiꞌtoꞌ Weiyu
25 Moropai inîꞌrî Jesus eseurîma koꞌmannîpîꞌpî. Taꞌpîiya: —Eraꞌma ton eꞌkupî kupî sîrîrî wei pîꞌ moropai kapoi pîꞌ moropai sirikkîyamîꞌ pîꞌ, moropai non po, moropai tamîꞌnawîron pata ponkon ena kupî sîrîrî kureꞌne teesewankonoꞌmai, eranneꞌ pe, nariꞌ pe eena kupî sîrîrî. Mararon pepîn sipa sipa pe tuna wanî etun warainon eta tîuyaꞌnîkonya yai toꞌ esiꞌnîpî.
26 Mîrîrî yai tamîꞌnawîronkon warayoꞌkon wîtîpîtî kupî sîrîrî yai mararî pra mîrîrî yeꞌka eꞌkupî eraꞌma tîuyaꞌnîkon yai. Maasa pra tamîꞌnawîron kaꞌ pîꞌ tîweꞌsanon eꞌsoroka mîrîrî yai mîîtoꞌpe.
27 Mîrîrî yai uurî kaꞌ poi iipîꞌpî pemonkon pe iipî eraꞌma toꞌya kupî sîrîrî katupuru po. Meruntî ke puꞌkuru wanî mîrîrî yai. Moropai kureꞌnan morî puꞌkuru Paapa yaꞌkaru ta wanî eraꞌma toꞌya.
28 Tauya sîrîrî mîrîrî yeꞌka eꞌkupî eraꞌmayaꞌnîkon ya innape uyapurîtî meruntî ke aꞌtuꞌmîra teenai pra. Moropai enpen eꞌtî unîmîkî pîꞌ. Maasa pra mîrîrî warantî aweꞌkupî ya, aweꞌpîikaꞌtîkon kupî sîrîrî —taꞌpî Jesusya.
Panton Pe Yei Pîꞌ Jesus Eseurîma
29 Mîrîrî tîpo inîꞌrî toꞌ nepuꞌtî ton panton ekaremekîꞌpî Jesusya. Taꞌpîiya: —Arawen yeꞌ yeseru epuꞌnenan amîrîꞌnîkon moropai tiaron yei yeseru.
30 Mîrîrî eraꞌmayaꞌnîkon see warantî. Arawen yeꞌ ariꞌkuta ya, mîrîrî epuꞌtîyaꞌnîkon mîrîrî aminke pra konoꞌpîtî wanî, mîrîrî areta yeꞌnen.
31 Mîrîrî warantî nîrî mîrîrî teraꞌmasen ton eꞌkupî eraꞌmayaꞌnîkon ya, epuꞌtîyaꞌnîkon aminke pra tamîꞌnawîronkon esaꞌ pe Paapa iiꞌtoꞌ weiyu eseporî kupî sîrîrî epuꞌtîyaꞌnîkon. Mîrîrî yai tesaꞌkon pe Paapa wanî tamîꞌnawîronkonya epuꞌtî.
32 Mîrîrî yeꞌnen enpenatatî sîrîrî itekare pîꞌ. Mîrîrî eꞌkupî kupî sîrîrî maasa tamîꞌnawîronkon saꞌmanta pra tîîse. Inkamoro enen toꞌ wanî mannan saꞌmanta pepîn mîrîrî eꞌkupî rawîrî eraꞌma toꞌya kupî sîrîrî.
33 Tamîꞌnawîron ataretîꞌka kaꞌ moropai non ataretîꞌka inîꞌ eeseraꞌma pepîn, tîîse umaimu ataretîꞌka pepîn. Ipatîkarî aakoꞌmamî —taꞌpî Jesusya.
Tîwarî Akoꞌmantî
34 Mîrîrî yeꞌnen taꞌpî Jesusya: —Tîwarî panpîꞌ akoꞌmantî enpen. Sîrîrî non po ankonekakon pîꞌ teesenumenkai pra moropai kureꞌne festa pîꞌ tîweꞌse pra. Moropai kureꞌne maiꞌ pe tîweꞌsen tenîꞌse pra akoꞌmantî. Kureꞌne tarî aakoꞌmantoꞌkon yuꞌse pra. Awanmîraꞌnîkon mîrîrî weiyu erepamî namai inîmîkîyaꞌnîkon pra tîîse. Mîrîrî weiyu yai wanî manniꞌ kamo yeꞌmarî ta iwîtoꞌ ton tîîsaꞌ warantî. Inîmîkîiya pra tîîse kamo iipî teꞌmarî taawîrî moropai iwîiya.
35 Mîrîrî warantî tamîꞌnawîronkon eꞌtarumaꞌtîtoꞌ wanî kupî sîrîrî tamîꞌnawîrî sîrîrî pata po.
36 Mîrîrî yeꞌnen tîwarî enpen eꞌtî. Moropai epîrematî tamîꞌnawîron mîrîrî aweꞌkupî manniꞌ eꞌtarumaꞌtîntoꞌ yapîtanîpîkonpa. Moropai innape uurî kaꞌ poi iipîꞌpî pemonkon pe kupî pîꞌ akoꞌmantî, uuipî yai yairî awanîkonpa —taꞌpî Jesusya. Mîrîrî warantî pemonkonyamîꞌ yenupaꞌpî Jesusya.
37 Moropai wei kaisarî Jesusya toꞌ yenupaꞌpî epîremantoꞌ yewîꞌ ta. Tîîse ewaron ya eepaꞌkapîtîꞌpî. Moropai mîîkîrî koꞌmanpîtîꞌpî pata erenmapî pîkîrî oliveira yeꞌka wîꞌ po.
38 Moropai tamîꞌnawîronkon pemonkonyamîꞌ wîtîpîtîꞌpî pata erenmapî pra tîîse epîremantoꞌ yewîꞌ ta eeseurîma etai. Mîrîrî warantî Jesusya toꞌ yenupaꞌpî.
