Jesus Cristo Yekare Lucas Nîmenukaꞌpî 24:1-53
24 Moropai Judeuyamîꞌ erîꞌkaꞌtoꞌ weiyu sábado esuwaꞌkasaꞌ tîpo, domingo yai wîriꞌsanyamîꞌ wîtîꞌpî uuruwai pona penane puꞌkuru wei epaꞌka pra tîîse. Mîrîrî aꞌpusin yarîꞌpî toꞌya Jesus esaꞌrîꞌpî karapaimakonpa tînkonekaꞌpîkon yarîꞌpî toꞌya.
2 Miarî uuruwai pona teerepamîkon pe, inkamoro wîriꞌsanyamîꞌya tîꞌ uuruwai yettapuru pe toꞌ nîtîrîꞌpî eraꞌmaꞌpî imoꞌkasaꞌ pe.
3 Moropai inkamoro ewomîꞌpî uuruwai yaꞌ Jesus esaꞌrîꞌpî karapaimai. Tîîse Uyepotorîkon Jesus esaꞌrîꞌpî eporî toꞌya pra toꞌ wanîꞌpî.
4 Mîrîrî yeꞌnen îꞌ kupî tîuyaꞌnîkon epuꞌtî toꞌya pra toꞌ enaꞌpî. Mîrîrî pe rî kaꞌneꞌ pe asakîꞌnankon warayoꞌkon esenpoꞌpî toꞌ rawîrî. Inkamoro pon wanîꞌpî morî pe puꞌkuru inkeꞌ awanîꞌpî.
5 Moropai inkamoro wîriꞌsanyamîꞌ esiꞌnîpîꞌpî mararî pra. Mîrîrî yeꞌnen inkamoroya tenpatakon enuꞌtîꞌpî non ekaya toꞌ eꞌmuruikaꞌpî. Moropai inkamoro warayoꞌkonya taꞌpî toꞌ pîꞌ: —Îꞌ waniꞌ awanî yeꞌnen anîꞌ yuwayaꞌnîkon mîrîrî isaꞌmantaꞌsan koreꞌta aasaꞌmantasaꞌ pra tîîse? —taꞌpî toꞌya wîriꞌsanyamîꞌ pîꞌ.
6 —Mîîkîrî ton pra man tarî. Aweꞌmîꞌsaꞌka pîꞌ man. Awenpenatakon pra naatî îꞌ kaiꞌma apîꞌnîkon taꞌpîiya pîꞌ Galiléia pata po tîwanî yai? —taꞌpî toꞌya.
7 —“Uurî kaꞌ poi iipîꞌpî pemonkon pe rumaka toꞌya kupî sîrîrî imakuiꞌsan pemonkonyamîꞌ yenyaꞌ. Mîrîrî tîpo pakîꞌnan pona upokapîtî toꞌya. Moropai eꞌmîꞌsaꞌka iteseurînon wei yai”, taꞌpîiya —taꞌpî toꞌya.
8 Mîrîrî taa toꞌya yeꞌnen inkamoro wîriꞌsanyamîꞌ enpenataꞌpî îꞌ kaiꞌma Jesus eseurîmaꞌpî pîꞌ.
9 Moropai inkamoro ennaꞌpoꞌpî uuruwai poi. Moropai inkamoroya îꞌ tîneraꞌmaꞌpîkon uuruwai po ekaremekîꞌpî Jesus nenupaꞌsan pîꞌ 11 kaisaronkon pîꞌ moropai tiaronkon pemonkonyamîꞌ pîꞌ.
10 Inkamoro wîriꞌsanyamîꞌ wanîꞌpî itîꞌsan uuruwai pona see warantî: Maria Madalena, moropai Joana, moropai Maria Tiago yan, moropai tiaronkon wîriꞌsanyamîꞌ. Toꞌ pokonpe itîꞌsanya ekaremekîꞌpî Jesus naipontîꞌsan pîꞌ.
11 Tîîse innape inkamoro wîriꞌsanyamîꞌ eseurîmatoꞌ kupî toꞌya pra Jesus nenupaꞌsan wanîꞌpî. Toꞌ woꞌmaꞌta kaiꞌma toꞌ wanîꞌpî innape ikupî toꞌya pra.
12 Tîîse tiwin toꞌ yonpa, Pedro eꞌmîꞌsaꞌkaꞌpî. Moropai eekaꞌtumîꞌpî kaꞌneꞌ pe uuruwai pona. Miarî teerepansaꞌ uuruwai yaꞌ eraꞌmai aweꞌmuruikaꞌpî tîîse kamisa neken Jesus yaꞌsantîꞌpî neken eraꞌmaꞌpîiya. Anîꞌ ton pra eraꞌmaꞌpîiya. Mîrîrî tîpo mîîkîrî ennaꞌpoꞌpî wîttî ta mararî pra teesenumenkai îꞌ kaiꞌma aweꞌkuꞌsaꞌ pîꞌ.
Emaús Wîtîtoꞌ Eꞌma Po Jesus Esenpo
13 Mîrîrî yai rî asakîꞌne Jesus nenupaꞌsan wîtîꞌpî pemonkonyamîꞌ koꞌmantoꞌ mîrikkî iteseꞌ Emaús pona. Mîrîrî wanîꞌpî aminke puꞌkuru pra tîweꞌsen pe Jerusalém pîꞌ 10 quilómetros kaisarî.
14 Inkamoro eseurîma yarî koꞌmannîpîꞌpî tuutîkon eꞌma taawîrî îꞌ kaiꞌma Jerusalém po eꞌkupîꞌpî pîꞌ.
15 Mîrîrî pîꞌ toꞌ eseurîmaꞌpî. Mîrîrî tanne Jesus iipîꞌpî toꞌ pîkîrî, moropai toꞌ pokonpe attîꞌpî eꞌma taawîrî.
16 Mîîkîrî tîpîkîrîꞌnîkon tuiꞌsen eraꞌmaꞌpî Jesus nenupaꞌsanya tîîse anîꞌ pe awanî epuꞌtoꞌ toꞌya eꞌtîrî pra awanîꞌpî.
17 Inkamoro ekaranmapoꞌpî Jesusya tuutî yeꞌka pe. —Îꞌ pîꞌ eeseurîmakon mîrîrî eꞌma taawîrî attîkon yeꞌka pe? —taꞌpîiya.
Moropai inkamoro emîꞌpamîꞌpî tuutîkon yeꞌka pe teesewankonoꞌmai.
18 Moropai tiaron iwanîyakon Cléopasya taꞌpî ipîꞌ: —Amîrî wanî Jerusalém po tîîkoꞌmansen pe puꞌkuru tîîse îꞌ eꞌkupîꞌpî miarî epuꞌtîya pra awanî, sîrîrî wei esuwaꞌka manniꞌ pîꞌ? —taꞌpîiya.
19 —Îꞌ kin eꞌkupîꞌpî? —taꞌpî Jesusya ipîꞌ.
—Manniꞌ Jesus Nazaré pon yarakkîrî aweꞌkupîꞌpî —taꞌpî toꞌya. —Mîîkîrî warayoꞌ wanîꞌpî Paapa maimu ekaremeꞌnen pe profeta pe. Moropai Paapa winîpainon pe tamîꞌnawîronkon pemonkonyamîꞌya epuꞌtîꞌpî Paapa meruntîri yarakkîrî awanî. Maasa pra îꞌ ikupî eserîkan pepîn kupîꞌpîiya tîmaimu ke.
20 Teepîremasanon esanonya moropai uyesanonkonya irumakaꞌpî iwîtoꞌpe toꞌya kaiꞌma. Moropai pakîꞌnan pona ipokapîꞌtoꞌpe toꞌya itîrîꞌpî toꞌya.
21 Mîîkîrîya uyeyatonon winîpai umoꞌkakon koꞌmannîpî kaiꞌma anna wanîꞌpî. Tîîse amenrî mîini koꞌmanpara neꞌrî îꞌ kupîꞌpî toꞌya yarakkîrî.
22 Tîîse anna yonpayamîꞌ wîriꞌsanyamîꞌya anna esenumenka emapuꞌtî pîꞌ man. Maasa pra inkamoro wîtîn pîꞌ man erenmapî yaꞌ uuruwai pona.
23 Moropai inkamoroya Jesus esaꞌrîꞌpî eporî pra man miarî uuruwai yaꞌ. Tîîse tîwennaꞌpoi inkamoroya inserîyamîꞌ neken eraꞌma tîuyaꞌnîkon ekaremekî pîꞌ man. Moropai inkamoro inserîyamîꞌya taasaꞌ man toꞌ pîꞌ. “Enen mîîkîrî wanî”, taasaꞌ toꞌya man.
24 Moropai tiaronkon anna yonpayamîꞌ wîtîn pîꞌ man innape awanî eraꞌmai uuruwai pona. Moropai innape eraꞌma pîꞌ toꞌ, wîriꞌsanyamîꞌya ekaremekî warantî. Tîîse Jesus eraꞌma toꞌya pra man —taꞌpî Cléopasya.
25 Mîrîrî pîꞌ taꞌpî Jesusya toꞌ pîꞌ: —Îꞌ kaiꞌma see epuꞌtîyaꞌnîkon pra aakoꞌmamîkon mîrîrî? Innape ikuꞌsaꞌyaꞌnîkon pepîn mîrîrî. Îꞌ kaiꞌma Paapa maimu ekaremeꞌnenan penaronkon profetayamîꞌ eseurîmaꞌpî epuꞌtîyaꞌnîkon pra awanîkon?
26 Maasa pra mîrîrî warantî Paapa narimaꞌpî iwinîpainonya tîmoron epuꞌtî eꞌpai awanîꞌpî. Mîrîrî tîpo neken tîweꞌtarumaꞌtî tîpo Paapa pia eereuta eꞌpai awanî kaꞌ po ipîkku pe, Paapa yaꞌkaru ta —taꞌpîiya.
27 Moropai tamîꞌnawîrî îꞌ kaiꞌma Paapa maimu eꞌmenukasaꞌ tîpîꞌ ekaremekî piaꞌtîꞌpîiya. Eꞌmaiꞌnon Moisés kaaretarî patapai moropai tamîꞌnawîronkon Paapa maimu ekaremeꞌnenan profetayamîꞌ nîmenukaꞌpî pîkîrî.
28 Mîrîrî pemonkonyamîꞌ koꞌmantoꞌ pona teerepamîkon tanne Jesusya tuutî koꞌmannîpî warantî ikupîꞌpî.
29 Moropai inkamoroya yekaꞌnunkaꞌpî mîrîrî pata yaꞌ aakoꞌmantoꞌpe tîpokon peꞌnîkon. Taꞌpî toꞌya: —Anna pokonpe eꞌnîpai man. Maasa pra pata koꞌmannî pîꞌ man. Ewaron erepannî pîꞌ man —taꞌpî toꞌya. Mîrîrî yeꞌnen Jesus ewomîꞌpî toꞌ pokonpe. Moropai aakoꞌmamîꞌpî asakîꞌnankon tînenupaꞌsan pokonpe.
30 Mîîkîrî ereutaꞌpî mesa pia toꞌ pokonpe entamoꞌkai. Moropai mîîkîrîya trigo puusaꞌ yapisîꞌpî. Moropai eepîremaꞌpî. —Paapa morî pe man anna yuu ton tîrî pîꞌ nai —taꞌpîiya. Moropai mîrîrî trigo puusaꞌ pîrikkaꞌpîiya moropai inkamoro asakîꞌnankon pia itîrîꞌpîiya.
31 Mîrîrî kupîiya wenai inkamoroya Jesus pe awanî epuꞌtîꞌpî. Epuꞌtoꞌ toꞌya erepamîꞌpî mîrîrî yai. Tîîse inîꞌrî eraꞌma toꞌya pra toꞌ enaꞌpî. Toꞌ yenu yapai eesenomîꞌpî kaꞌneꞌ pe.
32 Moropai tîîwarîrîꞌnîkon toꞌ eseurîmaꞌpî. Tiaronya taꞌpî: —Aꞌkî, mîîkîrî pe awanî yeꞌnen eeseurîmatoꞌya uyewankon yeurîma neꞌtîkini uyeurîmaiyaꞌnîkon tanne eꞌma taawîrî. Moropai Paapa maimu pîꞌ uurîꞌnîkon yeurîmaꞌpîiya aronne.
33 Moropai inkamoro eꞌmîꞌsaꞌkaꞌpî kaꞌneꞌ pe, moropai toꞌ wîtîꞌpî Jerusalém pona. Miarî teerepamîkon pe inkamoro Jesus nenupaꞌsan 11 kaisaronkon emurukuntîsaꞌ eporîꞌpî toꞌya tiaronkon pokonpe.
34 Moropai inkamoro tiaronya ekaremekîꞌpî toꞌ pîꞌ: —Innape Uyepotorîkon eꞌmîꞌsaꞌkaꞌpî man. Tîîse Simãoya Uyepotorîkon eraꞌma pîꞌ man —taꞌpî toꞌya.
35 Mîrîrî tîpo inkamoro asakîꞌnankonya îꞌ eꞌkuꞌsaꞌ eꞌma taawîrî tarakkîrîꞌnîkon ekaremekîꞌpî nîrî toꞌ pîꞌ. Moropai îꞌ kaiꞌma Uyepotorîkon pe awanî epuꞌtî tîuyaꞌnîkon ekaremekîꞌpî toꞌya. Maasa pra trigo puusaꞌ pîrikkaiya wenai epuꞌtîꞌpî toꞌya.
Tînenupaꞌsan Pia Jesus Esenpo
36 Mîrîrî tîneraꞌmaꞌpîkon ekaremekî toꞌya tanne Jesus esenpoꞌpî toꞌ koreꞌta kaꞌneꞌ pe. Mîîkîrîya taꞌpî toꞌ pîꞌ: —Tîîwanmîra eꞌtî teesewankonoꞌmai pra —taꞌpîiya.
37 Mîrîrî pîꞌ toꞌ wanîꞌpî teesiꞌnîꞌse. Teesiꞌnîꞌsaꞌkon yeꞌka pe toꞌ esenumenkaꞌpî ipîꞌ woroꞌyan kaiꞌma.
38 Tîîse mîîkîrîya taꞌpî toꞌ pîꞌ: —Îꞌ waniꞌ awanî yeꞌnen eesiꞌnîꞌsaꞌkon mîrîrî? Îꞌ waniꞌ awanî yeꞌnen innape ukupîyaꞌnîkon pra aakoꞌmamîkon sîrîrî tîpose?
39 Aꞌkî, eraꞌmatî maasa uyenya wanî aꞌta ke prego yettaꞌpî. Moropai uꞌpu eraꞌmatî. Moropai uurî eraꞌmatî, uurî mîîkîrî manniꞌrî uurî. Maasa uyapîtî innape ukupîkonpa woroꞌyan pe pra wanî epuꞌtîkonpa. Maasa pra woroꞌyan wanî pepîn tîpun ke, moropai teꞌpî ke, uurî eraꞌmayaꞌnîkon manniꞌ warantî.
40 Mîrîrî taa tîuya yeꞌka pe, tenya moropai tîꞌpu yenpoꞌpîiya eraꞌmatoꞌpe toꞌya kaiꞌma.
41 Tîîse inkamoroya maasa innape wanî kupî pra awanîꞌpî. Maasa pra kureꞌne taatausinpai toꞌ wanîꞌpî mararî pra teesenumenkakon yeꞌka pe Jesus esenposaꞌ pîꞌ. Inkamoro ekaranmapoꞌpî Jesusya: —Ayekkarikon rî moro nai annapîkon? —taꞌpîiya.
42 Moropai inkamoroya moroꞌ puusaꞌ piaꞌpî tîrîꞌpî iipia.
43 Mîîkîrîya yapisîꞌpî moropai awentamoꞌkaꞌpî eraꞌma toꞌya tanne.
44 Mîrîrî tîpo taꞌpîiya toꞌ pîꞌ: —Pena akoreꞌtaꞌnîkon wanî yai eseurîmaꞌpî apîꞌnîkon ekaremekîꞌpîuya îꞌ kaiꞌma uyarakkîrî aweꞌkupî ton pîꞌ. Moisés kaaretarî eseurîmaꞌpî upîꞌ. Moropai penaronkon Paapa maimu ekaremeꞌnenan profetayamîꞌ nîmenukaꞌpî eseurîmaꞌpî upîꞌ. Moropai Salmos kaaretarî eseurîmaꞌpî upîꞌ. Tamîꞌnawîrî mîrîrî taꞌpî Paapa maimu yawîrî aweꞌkupî eꞌpai awanîꞌpî uyarakkîrî taꞌpî saꞌrî —taꞌpîiya.
45 Moropai Jesusya Paapa maimu epuꞌtî toꞌya emapuꞌtîꞌpî.
46 Moropai taꞌpîiya: —Mîrîrî aweꞌmenukasaꞌ manniꞌya taa mîîkîrî Paapa nîmenkaꞌpî, inarimaꞌpî eꞌtarumaꞌtî pe man aasaꞌmanta pe man. Moropai iteseurînon wei yai aweꞌmîꞌsaꞌka kupî sîrîrî —taꞌpîiya. Tîpîꞌrî eeseurîmaꞌpî.
47 —Moropai inîꞌrî aweꞌmenukasaꞌ mîrîrî, itekare esekaremekî pata kaisarî. Îꞌ kaiꞌma imakuiꞌpî tînkupîꞌpîkon rumaka pemonkonyamîꞌya ya, Paapaya tîîwanmîra toꞌ makui kupî. Tamîꞌnawîronkon pîꞌ itekare ekaremekî eꞌpai awanî. Eꞌmaiꞌ pe isaraꞌtî eꞌpai awanî Jerusalém cidaderî po.
48 Amîrîꞌnîkon wanî mîrîrî ekaremeꞌnenan pe maasa pra eraꞌmasaꞌyaꞌnîkon yeꞌnen aasîrî.
49 Moropai uurîya Paapa winîpainon yarima kupî sîrîrî. Yarima tîuya taꞌpî Paapaya mîîkîrî yarimauya aapiaꞌnîkon. Tîîse maasa inîmîꞌtî tarî cidade po siꞌma meruntî iipî nîmîꞌtî ayesaꞌkon pe aakoꞌmantoꞌpe —taꞌpî Jesusya.
Kaꞌ pona Jesus Yanuꞌnîpîꞌpî Paapaya
50 Mîrîrî tîpo Jesusya toꞌ yarîꞌpî cidade poi tiaron pemonkonyamîꞌ koꞌmantoꞌ Betânia iteseꞌ pona. Miarî teerepansaꞌkon pe Jesusya tenya kainumîꞌpî kakîsiya, moropai —Morî pe akoꞌmantî —taꞌpîiya toꞌ pîꞌ.
51 Inkamoro yarakkîrî teeseurîma yeꞌka perî Jesus atarimaꞌpî toꞌ piapai. Moropai Paapaya yanuꞌnîpîꞌpî kaꞌ pona.
52 Inkamoroya yapurîꞌpî miarî siꞌma. Moropai toꞌ ennaꞌpoꞌpî Jerusalém pona mararî pra taatausinpai.
53 Inkamoro koꞌmamîꞌpî mîrîrî tîpo epîremantoꞌ yewîꞌ ta tîîkoꞌman pe. Miarî siꞌma Paapa yapurîꞌpî toꞌya.
