Jesus Cristo Yekare Lucas Nîmenukaꞌpî 3:1-38
3 Reiyamîꞌ esaꞌ pe tîweꞌsen Tibério wanîꞌpî Roma pata esaꞌ pe. Miaꞌ tamîꞌnawîrî tîîse, miaꞌtaikin kaisarî ipona konoꞌ (15) kaisarî awanîꞌpî pata esaꞌ pe. Mîrîrî yai Pôncio Pilatos wanîꞌpî Judéia pata esaꞌ pe. Herodes wanîꞌpî mîrîrî yai Galiléia pata esaꞌ pe. Moropai Herodes yakon Filipe wanîꞌpî Ituréia pata esaꞌ pe, moropai Traconites pata esaꞌ pe. Moropai Lisânias wanîꞌpî Abilene pata esaꞌ pe.
2 Anás moropai Caifás wanîꞌpî teepîremasanon esanon pe. Mîrîrî yai Paapa eseurîmaꞌpî Zacarias munmu, João yarakkîrî keren po.
3 Moropai Joãoya itekare ekaremekî pinunpaꞌpî. Tamîꞌnawîrî Jordão iren ratai poro tîîkoꞌmansenon pîꞌ. Taapîtîꞌpîiya see warantî: —Morî Paapa yeseru yapiꞌtî, imakuiꞌpî ankupîꞌpîkon tîrumakai tamîꞌnawîrî, Paapaya tîîwanmîra ikuꞌtoꞌpe. Moropai esenpatakonaꞌtî —taꞌpîiya.
4 Mîrîrî warantî ekaremeꞌpîtîꞌpî Joãoya penaron profeta Isaías nurîꞌtîya imenukaꞌpî tîkaaretarî po yawîrî. Aweꞌmenukasaꞌ wanîꞌpî see warantî:Keren po pemonkon man tîwentaimepîtî pîꞌ. See warantî taapîtîiya:“Uyepotorîkon erepantoꞌ ton konekatî.Morî pe toꞌsarî iteꞌmarî ton konekatî, eerepantoꞌpe.
5 Tamîꞌnawîron wîꞌkon yarappana pîꞌ tîweꞌsenkon ena kupî sîrîrî yettapusaꞌ pe.Moropai inonkon wîꞌkon wanî kupî sîrîrî seꞌ kaisarî aweꞌtoꞌpe.Moropai wayai wayai pe tîweꞌsen eꞌmakon wanî kupî sîrîrî toꞌsaron pemoropai eꞌmakon sakîsakîpankon ena kupî sîrîrî seꞌ kaisarî.
6 Mîrîrî yai tamîꞌnawîronkon pemonkonyamîꞌya pîikaꞌtîntoꞌpePaapa nîtîrîꞌpî epuꞌtî kupî sîrîrî,” taiya
kaiꞌma Isaías nîmenukaꞌpî. Mîrîrî yawîrî ikupîꞌpî Joãoya.
7 Mîrîrî yai arinîkon pemonkonyamîꞌ wîtîꞌpî esenpatakonai João pia. Tîîse Joãoya taapîtîꞌpî toꞌ pîꞌ: —Îkîiyamîꞌ amîrîꞌnîkon. Anîꞌya ekaremeꞌsaꞌ apîꞌnîkon, Paapa ekoreꞌmatoꞌ yapai aweꞌpîikaꞌtîkon kaiꞌma, amakuyikon rumakayaꞌnîkon pra tîîse? Paapaya atarumatîkon kupî sîrîrî.
8 Mîrîrî yeꞌnen ayeserukon imakuiꞌpî kuꞌtoꞌyaꞌnîkon rumakatî. Moropai amenan morî ayeserukon ton yapiꞌtî tamîꞌnawîronkonya ayeserurîꞌpîkon rumakasaꞌyaꞌnîkon epuꞌtoꞌpe. Tîîse aawarîrîꞌnîkon rî kîkatî: “Paapa yapurînenan anna maasa pra Abraão payannîꞌsan pe anna wanî yeꞌnen,” kîkatî. Mîrîrî taayaꞌnîkonya ya îꞌ pe pra rî awanî, aweꞌpîikaꞌtîkon pepîn. Tîîse tauya sîrîrî, ayentakon Abraão payannîꞌsan pe tiaronkon kupî Paapaya eꞌpainon seeniꞌ tîꞌkon ke.
9 Aꞌkî, waꞌka moro man yei yaꞌtîtoꞌpe ikara yawîrî teeperu tîînen pepîn. Mîrîrî yenumî toꞌya apoꞌ yaꞌ aarantoꞌpe. Mîrîrî warantî Paapaya ikupî kupî sîrîrî inkamoro imakuiꞌpî teserukon rumakatîponkon pepîn pîꞌ.
10 Mîrîrî ekaranmapoꞌpî pemonkonyamîꞌya João pîꞌ: —Moriya îꞌ kin kupî annaya eꞌpainon? —taꞌpî toꞌya.
11 Inkamoro maimu yuukuꞌpî Joãoya: —Anîꞌ wanî ya asakîꞌne ipon mîîkîrîya itakon tîrî eꞌpai awanî îꞌ ton pîn pia. Moropai anîꞌ wanî ya tekkari ke tiaron yentai, mîîkîrîya irataika eꞌpai awanî îꞌ ton pîn pia —taꞌpîiya.
12 Mîrîrî yai João pia tiaronkon tesaꞌkon ton pe tîniru yapisî pîꞌ teesenyakaꞌmasanon erepamîꞌpî esenpatakonakai. Moropai João ekaranmapoꞌpî toꞌya. Taꞌpî toꞌya: —Anna yenupanen, îꞌ kupî annaya eꞌpainon? —taꞌpî toꞌya ipîꞌ.
13 Moropai toꞌ maimu yuukuꞌpî Joãoya: —Tîniru tîînenan winîpai kureꞌne tîniru yapisîyaꞌnîkon kaiꞌma keꞌtî. Yapiꞌtoꞌpe taꞌpî yentai yapisîyaꞌnîkon kaiꞌma keꞌtî —taꞌpîiya.
14 Moropai tiaronkon surarayamîꞌya nîrî João ekaranmapoꞌpî. Taꞌpî toꞌya: —Anna kanan, îꞌ kupî annaya eꞌpainon?
Taꞌpî Joãoya: —Anîꞌrî tarumaꞌtîyaꞌnîkon eꞌpai pra man, tîniru yuꞌse awanîkon wenai, seruꞌyeꞌ pe, îꞌ inkupîꞌpî ton pra tîîse. Tîîse tauya taatausinpai eꞌtî ayepeꞌpîkon anapisîkon pîꞌ inîꞌ panpîꞌ ituꞌse tîweꞌse pra —taꞌpîiya.
15 Mîrîrî yai pemonkonyamîꞌ esenumenkaꞌpî pîikaꞌtîton pe João yarimasaꞌ Paapaya kaiꞌma. Maasa pra Paapa nîmenkaꞌpî Cristo nîmîkî pîꞌ toꞌ wanîꞌpî. —Yai pra Cristo mîîkîrî, Paapa nîmenkaꞌpî pe awanî —taapîtîꞌpî toꞌya João pîꞌ.
16 Mîrîrî epuꞌtî tîuya yeꞌnen Joãoya taꞌpî tamîꞌnawîronkon pîꞌ:
—Uurîya ayenpatakonakon tuna ke neken. Tîîse tiaron yiꞌnî pîꞌ man uyeꞌmaꞌpî pîꞌ, ipîkku pe tîweꞌsen uyentainon. Mîrîrî yeꞌnen uurîya mîîkîrî pisaꞌsaꞌ yewa yeuka eserîke pra awanî, itarumaiꞌpî pe wanî yeꞌnen. Mîîkîrîya amîrîꞌnîkon imakuiꞌpî rumakatîponkon yenpatakona kupî sîrîrî Morî Yekaton Wannî enatoꞌpe ayesaꞌkon pe. Moropai apoꞌ ke eesenpatakonakon kupî sîrîrî. Mîrîrî warantî ikupîiya tamîꞌnawîrî imakuiꞌpî moꞌkapa kaiꞌma.
17 Mîîkîrî yenya trigo sururukatoꞌ wanî. Mîrîrî ke isururukaiya. Ipiꞌpî koreꞌtapai yaimenkaiya. Morîkon konekaiya itenseꞌ yaꞌ. Mîrîrî piꞌpîrîꞌpî poꞌtîiya apoꞌ yaꞌ eesiꞌnîpî neporîton pe pra —taꞌpî Joãoya.
18 Mîrîrî warantî itekare ekaremekî tîuya yai, pemonkonyamîꞌ panamapîtîꞌpîiya tuꞌke teeseurîmatoꞌ ke. Maasa pra imakuiꞌpî teserukon rumaka toꞌya yuꞌse awanîꞌpî kureꞌne.
19 Mîrîrî yai pata koꞌmannîꞌnen Herodes panamapîtîꞌpîiya kureꞌne imakuiꞌpî kuꞌsaiꞌya wenai. Tîîse Herodes ekoreꞌmaꞌpî ipîꞌ. Maasa pra takon noꞌpî Herodias yarakkîrî awanî pîꞌ eeseurîmasaꞌ wenai.
20 Mîrîrî yeꞌnen inîꞌ panpîꞌ imakuiꞌpî kupîꞌpîiya. João yarakkamo meꞌpoꞌpîiya atarakkannîtoꞌ ta inîꞌ itekare ekaremekîiya namai.
Jesus Yenpatakonaꞌpî Joãoya
21 Tîîse mîrîrî rawîrî pemonkonyamîꞌ yenpatakonasaiꞌya yai Jesus nîrî yenpatakonaꞌpî Joãoya. Mîrîrî yai Jesus epîrema tanne, kaꞌ esettapurukaꞌpî.
22 Moropai Morî Yekaton Wannî autîꞌpî ipona wakuꞌkaimî pe. Moropai mai kaꞌ poinon eseurîmaꞌpî taawon see warantî: —Amîrî unmu, uwakîri puꞌkuru amîrî. Kureꞌne apîꞌ atausinpa sîrîrî —taꞌpî Paapaya.
Jesus Tamorîꞌsan
23 Mîrîrî yai teesenyakaꞌmatoꞌ piaꞌtî Jesusya yai, ikono po wanîꞌpî 30 konoꞌ kaisarî. Mîîkîrî pîꞌ toꞌ esenumenkapîtîꞌpî José munmu pe awanî kaiꞌma.Mîîkîrî José wanîꞌpî Heli nurîꞌtî munmu pe.
24 Heli wanîꞌpî Matã nurîꞌtî munmu pe.Matã wanîꞌpî Levi nurîꞌtî munmu pe.Levi wanîꞌpî Melqui nurîꞌtî munmu pe.Melqui wanîꞌpî Janai nurîꞌtî munmu pe.Janai wanîꞌpî José nurîꞌtî munmu pe.
25 José wanîꞌpî Matatias nurîꞌtî munmu pe.Matatias wanîꞌpî Amós nurîꞌtî munmu pe.Amós wanîꞌpî Naum munmu pe.Naum wanîꞌpî Esli nurîꞌtî munmu pe.Esli wanîꞌpî Nagaí nurîꞌtî munmu pe.
26 Nagaí wanîꞌpî Máate nurîꞌtî munmu pe.Máate wanîꞌpî Matatias nurîꞌtî munmu pe.Matatias wanîꞌpî Semei nurîꞌtî munmu pe.Semei wanîꞌpî Joseque nurîꞌtî munmu pe.Joseque wanîꞌpî Jodá nurîꞌtî munmu pe.
27 Jodá wanîꞌpî Joanã nurîꞌtî munmu pe.Joanã wanîꞌpî Resá nurîꞌtî munmu pe.Resá wanîꞌpî Zorobabel nurîꞌtî munmu pe.Zorobabel wanîꞌpî Salatiel nurîꞌtî munmu pe.Salatiel wanîꞌpî Neri nurîꞌtî munmu pe.
28 Neri wanîꞌpî Melqui nurîꞌtî munmu pe.Melqui wanîꞌpî Adi nurîꞌtî munmu pe.Adi wanîꞌpî Cosã nurîꞌtî munmu pe.Cosã wanîꞌpî Elmadã nurîꞌtî munmu pe.Elmadã wanîꞌpî Er nurîꞌtî munmu pe.
29 Er wanîꞌpî Josué nurîꞌtî munmu pe.Josué wanîꞌpî Eliézer nurîꞌtî munmu pe.Eliézer wanîꞌpî Jorim nurîꞌtî munmu pe.Jorim wanîꞌpî Matate nurîꞌtî munmu pe.Matate wanîꞌpî Levi nurîꞌtî munmu pe.
30 Levi wanîꞌpî Simeão nurîꞌtî munmu pe.Simeão wanîꞌpî Judá munmu pe.Judá wanîꞌpî José nurîꞌtî munmu pe.José wanîꞌpî Jonã nurîꞌtî munmu pe.Jonã wanîꞌpî Eliaquim nurîꞌtî munmu pe.
31 Eliaquim wanîꞌpî Meleá nurîꞌtî munmu pe.Meleá wanîꞌpî Mená nurîꞌtî munmu pe.Mená wanîꞌpî Matatá nurîꞌtî munmu pe.Matatá wanîꞌpî Natã nurîꞌtî munmu pe.Natã wanîꞌpî Davi nurîꞌtî munmu pe.
32 Davi wanîꞌpî Jessé nurîꞌtî munmu pe.Jessé wanîꞌpî Obede nurîꞌtî munmu pe.Obede wanîꞌpî Boaz nurîꞌtî munmu pe.Boaz wanîꞌpî Salmom nurîꞌtî munmu pe.Salmom wanîꞌpî Nassom nurîꞌtî munmu pe.
33 Nassom wanîꞌpî Aminadabe nurîꞌtî munmu pe.Aminadabe wanîꞌpî Admim nurîꞌtî munmu pe.Admim wanîꞌpî Arni nurîꞌtî munmu pe.Arni wanîꞌpî Esrom nurîꞌtî munmu pe.Esrom wanîꞌpî Farés nurîꞌtî munmu pe.Farés wanîꞌpî Judá nurîꞌtî munmu pe.Judá wanîꞌpî Jacó nurîꞌtî munmu pe.
34 Jacó wanîꞌpî Isaque nurîꞌtî munmu pe.Isaque wanîꞌpî Abraão nurîꞌtî munmu pe.Abraão wanîꞌpî Terá nurîꞌtî munmu pe.Terá wanîꞌpî Nacor nurîꞌtî munmu pe.
35 Nacor wanîꞌpî Serugue nurîꞌtî munmu pe.Serugue wanîꞌpî Ragaú nurîꞌtî munmu pe.Ragaú wanîꞌpî Faleque nurîꞌtî munmu pe.Faleque wanîꞌpî Éber nurîꞌtî munmu pe.Éber wanîꞌpî Salá nurîꞌtî munmu pe.
36 Salá wanîꞌpî Cainã nurîꞌtî munmu pe.Cainã wanîꞌpî Arfaxade nurîꞌtî munmu pe.Arfaxade wanîꞌpî Sem nurîꞌtî munmu pe.Sem wanîꞌpî Noé nurîꞌtî munmu pe.Noé wanîꞌpî Lameque nurîꞌtî munmu pe.
37 Lameque wanîꞌpî Matusalém nurîꞌtî munmu pe.Matusalém wanîꞌpî Enoque nurîꞌtî munmu pe.Enoque wanîꞌpî Jarete nurîꞌtî munmu pe.Jarete wanîꞌpî Maleleel nurîꞌtî munmu pe.Maleleel wanîꞌpî Cainã nurîꞌtî munmu pe.
38 Cainã wanîꞌpî Enos nurîꞌtî munmu pe.Enos wanîꞌpî Sete nurîꞌtî munmu pe.Sete wanîꞌpî Adão nurîꞌtî munmu pe.Adão wanîꞌpî Paapa nîkupîꞌpî pe.
