Jesus Cristo Yekare Lucas Nîmenukaꞌpî 4:1-44
4 Morî Yekaton Wannî yarakkîrî Jesus ennaꞌpoꞌpî iren Jordão kapai. Itesaꞌ pe mîîkîrî Morî Yekaton Wannî wanîꞌpî. Mîrîrî yeꞌnen Jesus yarîꞌpîiya keren pona.
2 Miarî Jesusya imakuiꞌpî kupî yuꞌse Makui koꞌmamîꞌpî asakîꞌne pemonkon wei kaisarî. Mîrîrî yai îꞌ tonpai pra Jesus wanîꞌpî. Mîrîrî yeꞌnen emiꞌne awanîꞌpî.
3 Mîrîrî yai Makuiya taꞌpî ipîꞌ: —Innape Paapa munmu pe awanî. Mîrîrî yeꞌnen aawarîrî kaꞌkî tîꞌ pîꞌ eetinyakaꞌmatoꞌpe ayu pe —taꞌpîiya.
4 Mîîkîrî maimu yuukuꞌpî Jesusya. Taꞌpîiya: —Paapa maimu eꞌmenukasaꞌ man pena see warantî:“Tiyu pîꞌ neken pemonkon koꞌmamî pepîn”,
taasaiꞌya man —taꞌpî Jesusya.
5 Mîrîrî tîpo inîꞌrî Makuiya Jesus yonpaꞌpî. Moropai yarîꞌpîiya kawînan wîꞌ pona. Moropai tamîꞌnawîronkon pemonkonyamîꞌ koꞌmantoꞌkon patakon yenpoꞌpîiya tiwinarî.
6 Moropai taꞌpî Makuiya Jesus pîꞌ: —Tamîꞌnawîrî sîrîrî morî tîrîuya aapia ipîkku pe awanîpa, pemonkonyamîꞌ esaꞌ pe awanîpa. Mîrîrîya meruntî ke awanî amaimu yawîrî tamîꞌnawîronkon koꞌmamî. Tamîꞌnawîrî sîrîrî uupia itîîsaꞌ tîrîuya eꞌpainon, anîꞌ ituꞌse uurî eꞌtoꞌ pia.
7 Mîrîrî yeꞌnen tîrîuya aapia, aweꞌsekunka ya uyapurîi —taꞌpîiya Jesus pîꞌ.
8 Jesusya mîîkîrî maimu yuukuꞌpî: —Paapa maimu eꞌmenukasaꞌ man see warantî:“Ayepotorî Paapa yapurîkî. Mîîkîrî maimu yawîrî neken akoꞌmankî”,
taasaiꞌya man —taꞌpîiya.
9 Mîrîrî tîpo inîꞌrî Makuiya Jesus yarîꞌpî Jerusalém pona epîremantoꞌ yewîꞌ nekaꞌta pona, kawînan panpîꞌ pona yanuꞌnîpîꞌpîiya. Moropai taꞌpîiya Jesus pîꞌ: —Innape Paapa munmu pe awanî. Maasa arapunkî tarîpai non pona.
10 Maasa pra Paapa maimuya taasaꞌ man:“Paapaya tîpoitîrîtonon inserîyamîꞌ yarima pe man aapiaapîikaꞌtîtoꞌpe toꞌya.
11 Tenyakon ke ayapisî toꞌyatîꞌ pona aꞌpu paꞌtîya namai”,
taasaiꞌya man —taꞌpî Makuiya ipîꞌ. —Mîrîrî yeꞌnen arapunkî —taꞌpîiya Jesus pîꞌ.
12 Mîîkîrî maimu yuukuꞌpî Jesusya: —Tîîse Paapa maimu eꞌmenukasaꞌ man see warantî:“Ayepotorî Paapa tonpai pra eꞌkî”,
taasaiꞌya man —taꞌpîiya.
13 Tamîꞌnawîrî mîrîrî warantî Jesusya imakuiꞌpî kupî emapuꞌtî yonpaꞌpî Makuiya, tîîse ikupîiya pra awanîꞌpî. Imaimu yawîrî Jesus wanî pîn. Mîrîrî yeꞌnen Makuiya irumakaꞌpî mararî, moropai tîîkoꞌmanse puꞌkuru pra iipia tîwennaꞌpopa.
Jesus Esenyakaꞌma Piaꞌtî Galiléia Pata Po
14 Mîrîrî tîpo Jesus ennaꞌpoꞌpî Galiléia pata pona. Moropai Morî Yekaton Wannî meruntîri wanîꞌpî yarakkîrî. Moropai Jesus yekare etaꞌpî tamîꞌnawîronkon mîrîrî pata ponkonya.
15 Mîîkîrîya pemonkonyamîꞌ yenupaꞌpî toꞌ epereꞌtoꞌkon yewîꞌkon ta pîꞌ. Moropai mîîkîrî yapurîpîtîꞌpî tamîꞌnawîronkonya miarî.
Nazaré Po Jesus Wanî
16 Mîrîrî yai Jesus wîtîꞌpî Nazaré cidaderî pona. Mîrîrî cidade wanîꞌpî aarentaꞌpî pataꞌpî pe. Miarî teseru warantî rî sábado yai attîꞌpî Judeuyamîꞌ epereꞌtoꞌ yewîꞌ ta. Moropai miarî mîîkîrî eꞌmîꞌsaꞌkaꞌpî Paapa maimu eꞌmenukasaꞌ erenkai.
17 Moropai tiwin warayoꞌya penaroꞌ Paapa maimu ekaremeꞌnen profeta Isaías nurîꞌtî kaaretarî tîrîꞌpî iipia. Mîîkîrîya kaareta arakkanmokaꞌpî, moropai mîrîrî kaareta po aweꞌmenukasaꞌ eporîꞌpî see warantî:
18 —Uyepotorî yekaton man uupia.Mîrîrî yeꞌnen mîîkîrîya umoꞌkaꞌpî tekare ekaremeꞌtoꞌpeuya kaiꞌmamanniꞌkan saꞌne îꞌ ton pînon pîꞌ.Moropai manniꞌkan toꞌ eꞌpîikaꞌtî eserîkankon pepîn,teeyatonon newaꞌtîꞌsan inkamoro rumakatoꞌpeuya umoꞌkaꞌpîiya.Moropai enkaruꞌnankon saꞌne yenu yenponkatoꞌpeuya inîꞌrî eraꞌmatoꞌpe toꞌya.Moropai tîweꞌtarumaꞌtîi tîîkoꞌmansenon eꞌtarumaꞌtî namaitoꞌ pîikaꞌtîtoꞌpeuya umoꞌkaꞌpîiya.
19 Moropai tîpemonkonoyamîꞌ pia uyarimaꞌpîiyaîꞌ pensa toꞌ pîikaꞌtî Uyepotorîkonya ekaremeꞌtoꞌpeuya
—taꞌpîiya.
20 Mîrîrî erenkasaꞌ tîuya tîpo, Jesusya mîrîrî kaareta yettapurîꞌpî. Mîrîrî tîrîꞌpîiya mîîkîrî warayoꞌ itîrîtîpon pia. Moropai eereutaꞌpî. Mîîkîrî yenu pîkîrî tamîꞌnawîronkon pemonkonyamîꞌ wanîꞌpî mîrîrî epereꞌtoꞌ yewîꞌ ta.
21 Mîrîrî yai eeseurîma piaꞌtîꞌpî: —Innape see mîrîrî Paapa maimuya taasaꞌ yawîrî aweꞌkuꞌsaꞌ man sîrîrîpe, mîrîrî etayaꞌnîkon manniꞌ. Manniꞌ pemonkon yarima tîuya taasaꞌ Paapaya manniꞌ uurî —taꞌpîiya.
22 Mîrîrî yai tamîꞌnawîronkon pemonkonyamîꞌ eseurîmaꞌpî morî pe Jesus maimu pîꞌ. Mararî pra teesenumenkai toꞌ wanîꞌpî, morî imaimuya îꞌ taasaꞌ pîꞌ. Tîîse taꞌpî toꞌya tîîwarîrîꞌnîkon: —José munmu pepîn kin mîîkîrî? —taꞌpî toꞌya.
23 Moropai Jesusya taꞌpî toꞌ pîꞌ: —Epuꞌtî pîꞌ wai, sîrîrî taatoꞌ ankapai awanîkon upîꞌ. “Priꞌyawonkon pepîn yepiꞌtînen amîrî. Mîrîrî yeꞌnen aawarîrî esepiꞌtîkî, eraꞌmatoꞌpe annaya”, taayaꞌnîkon. Moropai taayaꞌnîkon kupî sîrîrî: “Cafarnaum po pemonkonyamîꞌ priꞌyawonkon pepîn yepiꞌtîꞌpîya yekare etaꞌpî annaya. Mîrîrî yeꞌnen mîrîrî warantî ikuꞌkî tarî apata yaꞌ”, taayaꞌnîkon kupî sîrîrî upîꞌ —taꞌpîiya.
24 Jesus eseurîma koꞌmannîpîꞌpî: —Innape tauya apîꞌnîkon, Paapa maimu ekaremeꞌnen yapisî toꞌya pepîn, itonpayamîꞌya morî pe, maasa pra innape ikupî toꞌya pra awanî yeꞌnen —taꞌpîiya.
25 —Yairon pîꞌ eseurîma etatî. Pena Paapa maimu ekaremeꞌnen Elias nurîꞌtî wanî yai, konoꞌ rena pra awanîꞌpî seurîwîꞌne konoꞌ arakkita pairî kaisarî. Mîrîrî yeꞌnen kureꞌne iwan wanîꞌpî miarî Israel po. Moro toꞌ wanîꞌpî tuꞌke puꞌkuru wîriꞌsanyamîꞌ inyo isaꞌmantaꞌsan, Elias pata yaꞌ.
26 Tîîse inkamoro pia Elias yarimasaꞌ Paapaya pra man toꞌ pîikaꞌtîtoꞌpeiya, iwan pe toꞌ wanî tanne. Maasa pra innape ikupî toꞌya pra awanî yeꞌnen. Tîîse tiaron pata pona Sidom pata pon Sarepta iteseꞌ yarimaꞌpî Paapaya, wîriꞌ inyo isaꞌmantaꞌpî pia ipîikaꞌtîtoꞌpeiya.
27 Mîrîrî warantî awanîꞌpî nîrî pena Eliseu nurîꞌtî koꞌmamî yai. Tuꞌke priꞌyawonkon pepîn ereꞌ pokonkon wanîꞌpî, paran iteseꞌ leprosia. Tîîse inkamoro Judeuyamîꞌ yepiꞌtî Eliseuya pra awanîꞌpî, innape ikupî toꞌya pra awanî yeꞌnen. Tiwinan neken esepiꞌtîꞌpî tiaron pata pon, Síria pata pon, Judeu pepîn Naamã iteseꞌ esepiꞌtîꞌpî —taꞌpî Jesusya.
28 Mîrîrî taiya eta tîuyaꞌnîkon yai, tamîꞌnawîronkon mîrîrî epereꞌtoꞌ yewîꞌ tawonkon pemonkonyamîꞌ ekoreꞌmaꞌpî mararî pra ipîꞌ. Maasa pra epuꞌtîꞌpî toꞌya, toꞌ pîꞌ Jesus eseurîmasaꞌ yeꞌnen.
29 Mîrîrî yeꞌnen Jesus yapiꞌse toꞌ eꞌmîꞌsaꞌkaꞌpî. Yapisîꞌpî toꞌya moropai iworokaꞌpî toꞌya poro pona. Moropai cidade poi yarîꞌpî toꞌya. Mîrîrî kawînan wîꞌ ipo cidade eꞌtoꞌ pona yarîꞌpî toꞌya, mîîkîrî yenumîkonpa kaiꞌma miarî poi non pona.
30 Tîîse mîîkîrî epaꞌkaꞌpî arinîkon pemonkonyamîꞌ emurukuntîꞌsan koreꞌtapai. Moropai attîꞌpî.
Oꞌmaꞌ Yarakkîrî Tîweꞌsen Warayoꞌ Yapai
Yenpaꞌka Jesusya
31 Mîrîrî tîpo Jesus wîtîꞌpî Cafarnaum cidaderî pona, Galiléia pata pon. Miarî toꞌ epereꞌtoꞌ yewîꞌ ta pemonkonyamîꞌ yenupaꞌpîiya erîꞌkaꞌnîtoꞌ weiyu yai.
32 Mîîkîrî maimu pîꞌ mararî pra pemonkonyamîꞌ esenumenkaꞌpî miarî. Maasa pra eeseurîmatoꞌ wanîꞌpî meruntî ke puꞌkuru, Paapa maimu pe awanîꞌpî.
33 Moro toꞌ epereꞌtoꞌ yewîꞌ ta, oꞌmaꞌ yarakkîrî tîweꞌsen warayoꞌ wanîꞌpî. Jesus eseurîma eta tîuya pe, mîîkîrî oꞌmaꞌ entaimeꞌpî meruntî ke puꞌkuru.
34 Taꞌpîiya Jesus pîꞌ: —Jesus amîrî, Nazaré pon, îꞌ kuꞌse aaiꞌsaꞌ sîrîrî anna pîꞌ? Anna tîꞌkai kaꞌrî aaiꞌsaꞌ? —taꞌpîiya. —Morî pe ayepuꞌnen uurî, amîrî wanî morî pe puꞌkuru. Paapa narimaꞌpî pe awanî —taꞌpîiya Jesus pîꞌ.
35 Tîîse Jesusya taꞌpî oꞌmaꞌ pîꞌ: —Moo eꞌkî, kîseurîmai —taꞌpî Jesusya. Moropai taꞌpîiya: —Mîîkîrî warayoꞌ yapai epaꞌkakî. Moropai oꞌmaꞌya mîîkîrî warayoꞌ yenumîꞌpî non pona, tamîꞌnawîronkonya eraꞌma tanne. Moropai eepaꞌkaꞌpî warayoꞌ yapai tîpaꞌtîi pra.
36 Mîrîrî pîꞌ tamîꞌnawîronkon esenumenkasaꞌ wanîꞌpî mararî pra. Moropai inkamoroya taꞌpî tîîwarîrîꞌnîkon: —Îꞌ yeꞌka see mîserî? Meruntî imaimu —taꞌpî toꞌya. —Mîserî warayoꞌ wanî meruntî ke puꞌkuru. Maasa pra oꞌmaꞌkon pîꞌ taiya: “Epaꞌkatî”, taiya moropai toꞌ epaꞌka. Imaimu yawîrî toꞌ wîtî —taꞌpî toꞌya.
37 Mîrîrî tîpo mîrîrî Jesus nîkupîꞌpî yekare esekaremekîꞌpî mîrîrî pata poro.
Mararonkon Pepîn
Priꞌyawonkon Pepîn Yepiꞌtî Jesusya
38 Mîrîrî tîpo Jesus epaꞌkaꞌpî toꞌ epereꞌtoꞌ yewîꞌ tapai. Moropai attîꞌpî Simão yewîꞌ ta. Miarî priꞌyawon pepîn Simão yawoꞌpî wanîꞌpî. Eekomiꞌmasaꞌ mararî pra. Mîrîrî yeꞌnen Jesusya ipîikaꞌtîtoꞌpe esatîꞌpî toꞌya.
39 Mîrîrî yeꞌnen mîîkîrî camarî pia Jesus eꞌrennukuꞌpî. Moropai taꞌpîiya paran pîꞌ: —Atîꞌnapankî —taꞌpîiya. Moropai eekomiꞌmakapîꞌpî kaꞌneꞌ pe. Moropai mîîkîrî eꞌmîꞌsaꞌkaꞌpî. Moropai toꞌ yaꞌreꞌ ton koneka piaꞌtîꞌpîiya.
40 Moropai pata ewaronpamî pe tamîꞌnawîron priꞌyawonkon pepîn tuꞌkan paran pîꞌ tîweꞌsanon yarîꞌpî toꞌ yonpayamîꞌya Jesus pia. Moropai tenya tîrîꞌpîiya toꞌ pona tiwin pîꞌ tîîse. Moropai inkamoro yepiꞌtîꞌpîiya.
41 Moropai oꞌmaꞌkon yenpaꞌkaꞌpîiya tuꞌkankon pemonkonyamîꞌ yapai. Oꞌmaꞌkon entaimepîtîꞌpî teepaꞌkakon pe. Taapîtîꞌpî toꞌya ipîꞌ: —Amîrî wanî Paapa munmu pe puꞌkuru —taꞌpî toꞌya. Paapa nîmenkaꞌpî pe Jesus wanî epuꞌtîꞌpî toꞌya. Mîrîrî yeꞌnen tîpîꞌ toꞌ eseurîma tîrî Jesusya pra awanîꞌpî.
Jesusya Itekare Ekaremekî
42 Pata erenmaꞌsaꞌ pe, Jesus epaꞌkaꞌpî mîrîrî cidade poi. Moropai attîꞌpî keren pona. Mîîkîrî yuwa piaꞌtîꞌpî arinîkon pemonkonyamîꞌya. Mîîkîrî eposaꞌ tîuyaꞌnîkon pe tîîpiapaiꞌnîkon attî yuꞌse pra toꞌ wanîꞌpî mîrîrî pata poro.
43 Tîîse Jesusya taꞌpî toꞌ pîꞌ: —Tiaron cidadekon po sîrîrî morî itekare ekaremekîuya eꞌpai man Paapa pemonkono pe toꞌ eꞌtoꞌpe. Îꞌ kaiꞌma Paapa iipî tamîꞌnawîronkon esaꞌ pe anekaremeꞌpai wai. Maasa pra sîrîrî tîmaimu ekaremeꞌse Paapaya uyarimaꞌpî —taꞌpîiya.
44 Mîrîrî warantî sîrîrî itekare Paapa maimu ekaremekî pinunpaꞌpîiya, toꞌ epereꞌtoꞌkon yewîꞌkon tapîꞌ tamîꞌnawîrî mîrîrî pata poro.
