Jesus Cristo Yekare Lucas Nîmenukaꞌpî 6:1-49
6 Erîꞌkaꞌnîtoꞌ weiyu sábado yai Jesus asarîꞌpî trigo yeꞌka koreꞌta pîꞌ tînenupaꞌsan pokonpe. Mîrîrî yai tuutîkon yeꞌka pe inenupaꞌsan enaꞌpî emiꞌne. Mîrîrî yeꞌnen trigo pikkaꞌpî toꞌya. Mîrîrî piꞌkaꞌpî toꞌya tîsikiisikiꞌmai tenyakon ke. Mîrîrî yakuꞌpî toꞌya.
2 Miarî tiaronkon fariseuyamîꞌ wanîꞌpî toꞌ koreꞌta. Mîrîrî eraꞌma tîuyaꞌnîkon yeꞌnen taꞌpî toꞌya: —Îꞌ ton pe see trigo pikka pîꞌ eesenyakaꞌmakon mîrîrî? Moisés nurîꞌtîya sîrîrî erîꞌkaꞌnîtoꞌ weiyu yai esenyakaꞌmantoꞌpe taasaꞌ pra man —taꞌpî toꞌya.
3 Inkamoro maimu yuukuꞌpî Jesusya: —Aꞌkî, îꞌ kaiꞌma kaareta erenkasaꞌyaꞌnîkon pra naatî? Pena rei Davi nurîꞌtî nîkupîꞌpî pîꞌ teeseurîmasen? Pena emiꞌne awanîꞌpî moropai ipokonpankon wanîꞌpî.
4 Mîrîrî yeꞌnen mîîkîrî ewomîꞌpî Paapa yewîꞌ ta moropai Paapa pia toꞌ nîtîrîꞌpî pão moꞌkaꞌpîiya. Moropai yakuꞌpîiya moropai itîrîꞌpîiya nîrî tîpokonpankonya yaꞌtoꞌpe. Mîrîrî pîꞌ Paapa ekoreꞌma pîn, teepîremasanon neken naku itîîsaꞌ yaꞌsaꞌ toꞌya pîꞌ —taꞌpîiya.
5 Jesusya teeseurîmatoꞌ yaretîꞌkaꞌpî see warantî: —Uurî kaꞌ poi iipîꞌpî wanî erîꞌkaꞌnîtoꞌ weiyu yai tamîꞌnawîronkon nîkupî ton ekaremeꞌnen pe —taꞌpîiya.
Itemekon Atapîmîꞌpî Warayoꞌ Yepiꞌtî Jesusya
6 Tiaron pensa Jesus ewomîꞌpî erîꞌkaꞌnîtoꞌ weiyu yai toꞌ epereꞌtoꞌ yewîꞌ ta. Moropai toꞌ yenupa piaꞌtîꞌpîiya. Mîrîrî yai warayoꞌ wanîꞌpî meruntî winon itemekon atapîmîꞌpî.
7 Mîrîrî yai miarî tiaronkon Moisés yeserurîꞌpî pîꞌ yenupatonkon wanîꞌpî moropai fariseuyamîꞌ nîrî wanîꞌpî. Inkamoro wanîꞌpî Jesus yenu pîkîrî. Maasa pra erîꞌkaꞌnîtoꞌ weiyu yai anîꞌ yepiꞌtîiya eraꞌmakonpa kaiꞌma. Îꞌ kuꞌsaiꞌya ya, ipîꞌ teeseurîmakonpa teserukon yawîrî pra awanî yeꞌnen.
8 Tîîse Jesusya toꞌ esenumenkatoꞌkon epuꞌtîꞌpî. Mîrîrî yeꞌnen taꞌpîiya mîîkîrî warayoꞌ itemekon atapîmîꞌpî pîꞌ: —Eꞌmîꞌsaꞌkakî moropai satippe eꞌkî inkamoro koreꞌta. Moropai warayoꞌ eꞌmîꞌsaꞌkaꞌpî satippe eenaꞌpî toꞌ koreꞌta.
9 Moropai taꞌpî Jesusya toꞌ pîꞌ: —Uurîya ayekaranmapokon sîrîrî. Îꞌ kaiꞌma uyeserukonya taasaꞌ nai erîꞌkaꞌnîtoꞌ weiyu yaino pîꞌ? Îꞌ wanî mîrîrî, morî kuꞌtoꞌpe sábado yai, morî ou imakuiꞌpî? Anîꞌ pîikaꞌtî ou tîwî anîꞌ saꞌmanta tanne eraꞌmapîtî? —taꞌpîiya.
10 Tîmaimu yuuku toꞌya pra yeꞌka pe, Jesusya tamîꞌnawîronkon tîwoinokon eraꞌmaꞌpî. Moropai taꞌpîiya mîîkîrî warayoꞌ pîꞌ: —Ayemekon kainunkî. Moropai warayoꞌya temekon kainumîꞌpî. Mîîkîrî esepiꞌtîꞌpî.
11 Mîrîrî eraꞌmasaꞌ tîuyaꞌnîkon ya pe toꞌ ekoreꞌmaꞌpî mararî pra. Moropai teeseurîmakon piaꞌtîꞌpî toꞌya, îꞌ kupî tîuyaꞌnîkon pîꞌ Jesus winîkîi.
Tînenupatonkon Menka Jesusya, 12 Kaisaronkon
12 Mîrîrî tîpo mararî tîîkoꞌmanse, Jesus enukuꞌpî wîꞌ pona epîremai. Moropai ewaron iwaꞌkaꞌpîiya teepîrema pîꞌ Paapa pîꞌ.
13 Eerenmaꞌsaꞌ pe tînenupatonkon yannoꞌpîiya tîîpia. Inkamoro menkaꞌpîiya. Asakîꞌne puꞌ pona tîîmoꞌtaiꞌnîkon menkaꞌpîiya. Inkamoro yarimapa kaiꞌma itekare ekaremeꞌse toꞌ menkaꞌpîiya. Mîrîrî warantî insamoro asakîꞌne puꞌ pona tîîmoꞌtaiꞌnîkon wanîꞌpî.
14 Awanîꞌpî Simão. Mîîkîrî eseꞌtîꞌpîiya Pedro kaiꞌma. Moropai itakon André wanîꞌpî. Tiago moropai João moropai Filipe moropai Bartolomeu.
15 Mateus moropai Tomé, moropai Afeu munmu iteseꞌ Tiago, moropai Simão manniꞌ teepîsen Zelote taatoꞌ.
16 Moropai awanîꞌpî Tiago munmu, Judas. Moropai Judas Iscariotes manniꞌ Jesus yapisîton iteyatonon pia itîrîpa. Inkamoro menkaꞌpîiya tînaipontîkon ton pe.
Priꞌyawonkon Pepîn Pemonkonyamîꞌ
Yepiꞌtî Jesusya
17 Mîrîrî tîpo Jesus autîꞌpî wîꞌ poi toꞌ pokonpe wîꞌ parakon pona. Moro toꞌ wanîꞌpî tuꞌkankon inenupaꞌsan. Moropai tiaronkon pemonkonyamîꞌ tîpatakon poi iipîꞌsan wanîꞌpî miarî. Judéia pata ponkon moropai Jerusalém cidaderî ponkon. Moropai Tiro cidaderî ponkon moropai Sidon cidaderî ponkon, tuna rîꞌpîkîrî tîweꞌsanon.
18 Inkamoro wanîꞌpî iipîꞌsan pe Jesus eseurîma etai. Moropai Jesusya tepiꞌtîtoꞌkon pe teparankon winîpai. Moropai oꞌmaꞌ yarakkîrî tîweꞌsanon nîrî wanîꞌpî miarî. Moropai inkamoro yepiꞌtîꞌpî Jesusya.
19 Mîrîrî yai tamîꞌnawîronkon wanîꞌpî Jesus anapîpai. Maasa pra imeruntîri wenai pemonkonyamîꞌ esepiꞌtîꞌpî. Mîrîrî yeꞌnen anapîpai tamîꞌnawîronkon wanîꞌpî.
Atausinpantoꞌ Pîꞌ Moropai Esewankonoꞌmantoꞌ Pîꞌ Jesus Eseurîma
20 Mîrîrî yai Jesusya tînenupaꞌsan eraꞌmaꞌpî moropai taꞌpîiya toꞌ pîꞌ:—Morî pe awanî amîrîꞌnîkonîꞌ ton pra tîweꞌsanon ton pe.Maasa pra amîrîꞌnîkon yapisî Paapa ayesaꞌkonya,tîpemonkono pe aweꞌtoꞌpeꞌnîkon.
21 Morî pe awanî amîrîꞌnîkonemiꞌnankon ton pe,maasa pra awore awanîkon kupî sîrîrî.Morî pe awanî amîrîꞌnîkontîkauware eesewankonoꞌmatoꞌkon pîꞌ.Maasa pra kureꞌne asisikon kupî sîrîrî taatausinpai.
22 Morî pe awanî amîrîꞌnîkon,kaꞌ poi iipîꞌpî pemonkon pe uurî wenai ayewanmîrîkon toꞌya ya,ayenpaꞌkakon toꞌya ya tîkoreꞌtapaiꞌnîkon,moropai amuꞌtunpakon toꞌya ya,moropai tamîꞌnawîrî atarumaꞌtîkon toꞌya ya,morî pe awanî amîrîꞌnîkon ton pe.
23 Mîrîrî yeꞌnen atausinpatî, arapunpîꞌtî taatausinpai. Maasa pra mararon pepîn amîrîꞌnîkon ton konekasaꞌ Paapaya man kaꞌ po. Taatausinpai eꞌtî, maasa pra mîrîrî warantî inkamoro atarumatîkon toꞌya manniꞌkan tamorîꞌsanya penaronkon Paapa maimu ekaremeꞌnenan profetayamîꞌ nurîꞌtî tarumaꞌtîꞌpî.
24 Tîîse “ekenne” taayaꞌnîkon pe naatîi,ipîkkukon pe tîweꞌsanon.Maasa pra aasîrî ituꞌse aweꞌtoꞌkon yapisîꞌpîyaꞌnîkon tamîꞌnawîrî.Inîꞌ panpîꞌ yapisîyaꞌnîkon pepîn —taꞌpîiya.
25 —“Ekenne” taayaꞌnîkon pe naatîi,amîrîꞌnîkon awore tîweꞌsanon.Maasa pra emiꞌne awanîkon kupî sîrîrî.“Ekenne” taayaꞌnîkon pe naatîi,amîrîꞌnîkon tîsiꞌrîsanon.Maasa pra akaraukon kupî sîrîrî teesewankonoꞌmai.
26 “Ekenne” taayaꞌnîkon pe naatîi,tamîꞌnawîronkon pemonkonyamîꞌ napurîꞌsan.Maasa pra pena mîrîrî warantî inkamoro tamorîꞌsanya seruꞌyeꞌkon profetayamîꞌ yapurîꞌpî.Moropai toꞌ eꞌtarumaꞌtîꞌpî warantî amîrîꞌnîkon eꞌtarumaꞌtî kupî sîrîrî
—taꞌpîiya toꞌ pîꞌ.
Ayeyatonon Saꞌnama Eꞌpai Awanî
27 —Tîîse tauya amîrîꞌnîkon eseurîma etanenan pîꞌ —taꞌpî Jesusya. —Ayeyatonkon saꞌnamatî. Moropai morî kuꞌtî ayewanmîrîꞌnenkon pîꞌ.
28 Moropai amuꞌtunpanenkon yapurîtî, moropai epîrematî inkamoro yeꞌkakon atarumaꞌtînenkon pona —taꞌpîiya.
29 —Aꞌkî, anîꞌya ayenpataꞌmo ya, mîîkîrî paꞌtîya kîsuwai. Tîîse iratai winî eraꞌtîkî apaꞌtîtoꞌpeiya inîꞌrî. Moropai anîꞌya ayaꞌsan yarîꞌpî ya, tîwî nîsi, inîꞌ panpîꞌ apon anapai tîwanî ya, yaatoꞌpeiya.
30 Îꞌ rî esatî anîꞌya ya, iipia itîîkî. Tiaronya îꞌ rî ayemanne moꞌkaꞌpî ya, kîsinaꞌpoi iipiapai. Mîrîrî yeꞌka pe ikuꞌtî tîwîrî apîꞌnîkon mîrîrî kuꞌnenan yarakkîrî.
31 Tiaronkon pîꞌ morî kupîyaꞌnîkon eꞌpai man, inkamoroya amîrîꞌnîkon pîꞌ mîrîrî warantî ikupî yuꞌse awanîkon, manniꞌ warantî.
32 Awakîrikon neken saꞌnamayaꞌnîkon ya, îꞌ pe pra rî mîrîrî kuꞌsaꞌyaꞌnîkon wenai îꞌ rî tîrî Paapaya pepîn aapiaꞌnîkon. Maasa pra tiaronkon imakuiꞌpî kuꞌnenanya nîrî ikupî mîrîrî warantî.
33 Moropai nîrî morî pe awanîkon manniꞌkan apîꞌnîkon morî pe tîweꞌsanon pîꞌ neken, îꞌ pe pra rî awanîkon. Mîrîrî kuꞌsaꞌyaꞌnîkon pîꞌ Paapaya ayapurîkon pepîn. Maasa pra tiaronkon imakuiꞌpî kuꞌnenanya nîrî ikupî mîrîrî warantî.
34 Mîrîrî warantî ayemanne tîrîyaꞌnîkon ya, kaꞌneꞌ pe manniꞌkan yeꞌmatoꞌ esanon pia îꞌ pe pra rî mîrîrî wanî. Aapiaꞌnîkon Paapaya îꞌ rî tîrî pepîn mîrîrî kuꞌsaꞌyaꞌnîkon wenai. Maasa pra imakuiꞌpî kuꞌnenanya nîrî ikupî mîrîrî warantî innaꞌpokonpa kaiꞌma.
35 Tîîse mîrîrî warantî pra ikupîyaꞌnîkon eꞌpai awanî. Ayeyatonkon pe tîweꞌsanon inkamoro saꞌnamatî. Morî kuꞌtî inkamoro ton pe. Ayemannekon tîîtî innaꞌpoyaꞌnîkon pata pe pra. Mîrîrî kupîyaꞌnîkon ya Paapa nîtîrî kureꞌne yapisîyaꞌnîkon. Mîrîrî warantî kupîyaꞌnîkon ya, tamîꞌnawîronkon yentainon Paapa munkî pe awanîkon. Mîrîrî yeꞌnen morî kuꞌtî. Maasa pra Paapa wanî morî pe puꞌkuru manniꞌkan iwinîpai tînapisîꞌpîkon “Morî pe man” taawonan pepîn pîꞌ. Moropai îrirîkon pîꞌ nîrî morî pe awanî.
36 Mîrîrî yeꞌnen tamîꞌnawîronkon eraꞌmatî aꞌnokoꞌpîkon pe tîꞌnokoꞌpî pe amîrîꞌnîkon eraꞌma Paapa uyunkonya manniꞌ warantî —taꞌpîiya.
Tiaronkon Yakoꞌmenkatoꞌ Pîꞌ Jesus Eseurîma
37 Jesus eseurîma koꞌmannîpîꞌpî. Taꞌpîiya: —Tiaronkon nîkupîꞌpî pîꞌ taatakoꞌmenkai pra eꞌtî, Paapaya ankupîꞌpîkon pîꞌ ayakoꞌmenkakon namai. “Yairî pra awanîkon” kîkatî tiaronkon pîꞌ, mîrîrî warantî Paapaya taa namai apîꞌnîkon. Tîîse kaꞌtî toꞌ pîꞌ: “Tamîꞌnawîrî îꞌ rî ankupîꞌpîkon uwinîkîi kupî pîꞌ wai uuwanmîra, îꞌ waniꞌ pra man”, kaꞌtî. Mîrîrî taayaꞌnîkon ya, mîrîrî warantî ankupîꞌpîkon kupî Paapaya tîîwanmîra.
38 Tiaronkon nesatî antîîtî toꞌ pia. Mîrîrî tîîsaꞌyaꞌnîkon ya, toꞌ pia Paapaya nîrî itîrî aapiaꞌnîkon. Mîrîrî tîîtî kureꞌne antîîpai awanîkon pîkîrî, anneꞌ pe tîweꞌse pra. Mîrîrî tîrîyaꞌnîkon ya mîrîrî tîîtî mararî pra tîsaꞌmannîꞌpîꞌse tuꞌke aweꞌtoꞌpe. Maasa pra mîrîrî warantî rî itîrî Paapaya nîrî aapiaꞌnîkon itîrîꞌpîyaꞌnîkon kaisarî —taꞌpîiya.
39 Jesusya toꞌ nepuꞌtîton panton ekaremekîꞌpî. Taꞌpîiya see warantî: —Aꞌkî, enkaruꞌnan pemonkonya tiaron pemonkon enkaruꞌnan yarî pepîn eꞌpainon ituꞌnakan pe tîweꞌsen ekaya. Maasa pra mîrîrî warantî toꞌ wîtî ya, ituꞌnakan yaꞌ toꞌ eꞌsoroka saꞌnîrî —taꞌpîiya.
40 Moropai taꞌpîiya inîꞌrî: —Aꞌkî, teesenupasen wanî pepîn ipîkku pe tenupanen yentai. Tîîse teesenupatoꞌ yaretîꞌkasaꞌ tîuya ya tamîꞌnawîrî tenupanenya tenupatoꞌ epuꞌsaiꞌya ya iwarantî awanî. Maasa pra teesenupaꞌpî pîkîrî neken tenupasaiꞌya yeꞌnen. Tenupatîpon kaisarî awanî itentai pra.
41 Moropai taꞌpîiya inîꞌrî: —Îꞌ waniꞌ awanî yeꞌnen kin ayonpa nîkupîꞌpî iteseru eraꞌmaya morî pe. Tîîse itentai ikupîtîpon pe siꞌma. Ayeseru nura eraꞌmaya pepîn ayewan yaꞌ mararî pra tîîse. Siꞌmîrikkî pe tîweꞌsen ayonpa yenu yawon eraꞌmaya kureꞌnan yei warantî, ayenu yaꞌ tîweꞌsen teraꞌmai pra? —taꞌpî Jesusya iteseru imakuiꞌpî pîꞌ.
42 —Tîîse oꞌnon yeꞌka pe ayonpa pîꞌ taa yuꞌse awanî. “Uyakon maasa ayenu yaꞌ tîweꞌsen moꞌkatoꞌpeuya” taa yuꞌse awanî? Tîîse mîrîrî kureꞌnan ayeseru imakuiꞌpî ankupîꞌpî teraꞌmai pra aawarîrî. Amîrî seruꞌyeꞌ pe aawarîrî morî pe tîweꞌse aweꞌkuꞌsen. Eꞌmaiꞌ pe ayeseru imakuiꞌpî ankupîꞌpî eraꞌmakî. Ayeseru konekakî morî pe. Moropai mîrîrî tîpo morî pe tepuꞌse ayonpa nîkupîꞌpî imakuiꞌpî pîꞌ pîikaꞌtîpa —taꞌpî Jesusya.
Teperu Tîînen Yei Pîꞌ Jesus Eseurîma
43 Mîrîrî tîpo Jesusya taꞌpî: —Morî yeiya, imakuiꞌpî pe teperu tîrî pepîn eꞌpainon. Moropai yei, apakkoriꞌtaꞌpîya morî pe teperu tîrî pepîn.
44 Mîrîrî yeꞌnen tiwin pîꞌ yei tîîse iteperu pîꞌ eesepuꞌtî. Anîꞌya figo yeperu pikka pepîn mîꞌnî yeꞌ poi. Moropai uva yeperu pikka pepîn mîꞌnî yeꞌ poi.
45 Tîîse warayoꞌ morî pe tîweꞌsen, eseurîma morî pe maasa pra morî pe itewan wanî yeꞌnen. Mîrîrî warantî warayoꞌ imakuiꞌpî pe tîweꞌsen eseurîma imakuiꞌpî pe. Maasa pra tewan yaꞌ tîweꞌsen yawîrî eeseurîma —taꞌpî Jesusya.
Asakîꞌnankon Wîttî Konekanen Pîꞌ Jesus Eseurîma
46 —Îꞌ ton pe see “Uyepotorî” kaiꞌma uyesatîyaꞌnîkon sîrîrî umaimu yawîrî ikuꞌtî taꞌpîuya yawîrî ikupîiꞌma pra —taꞌpîiya.
47 —Tarîpai anepuꞌtîkon ton ekaremekîuya sîrîrî. Manniꞌ umaimu etanen moropai ikonekanen wanî morî pe, innape ikupîiya yeꞌnen.
48 Mîîkîrî wanî manniꞌ warayoꞌ tewîꞌ ton konekanen warantî. Mîîkîrîya non yaka ituꞌna moropai tîꞌ tîrîiya iteꞌseꞌ ton, saꞌme aweꞌtoꞌpe tîꞌ pona. Mîrîrî konekasaiꞌya tanne, tuna yannîpî moropai ipona eerepamî. Tîîse yenumîiya pepîn, saꞌman pe awanî yeꞌnen.
49 Tîîse manniꞌ umaimu etanen tîîse ikonekanen pepîn, mîîkîrî wanî, manniꞌ warayoꞌ tewîꞌ ton konekatîpon saꞌman pepîn non yaꞌ warantî. Îꞌ pensa tuna erepamî ya ipona, yenumîiya kaꞌneꞌ pe. Tamîꞌnawîrî eesenumî, saꞌme pra awanî yeꞌnen —taꞌpî Jesusya.
