Jesus Cristo Yekare Lucas Nîmenukaꞌpî 7:1-50
7 Pemonkonyamîꞌ yeurîma aretîꞌka tîpo, Jesus wîtîꞌpî Cafarnaum cidaderî pona.
2 Miarî Cafarnaum po surarayamîꞌ yepotorî wanîꞌpî Roma pon, Judeu pepîn. Mîîkîrî poitîrî kureꞌne inapurî iwakîri ipoitîrî enasaꞌ wanîꞌpî priꞌya pra. Mararî pra aasaꞌmanta yonpasaꞌ wanîꞌpî.
3 Jesus pîꞌ toꞌ eseurîma etasaꞌ tîuya yai mîîkîrî surarayamîꞌ esaꞌya tiaronkon Judeuyamîꞌ esaꞌ pe tîweꞌsanon yarimaꞌpî Jesus pia toꞌ wîtîtoꞌpe. Jesus yanno meꞌpoꞌpîiya itewîꞌ ta aaiꞌtoꞌpe mîîkîrî saꞌne ipoitîrî yepiꞌtîi.
4 Inkamoro wîtîꞌpî epose. Moropai eposaꞌ tîuyaꞌnîkon ya yai, attîtoꞌpe taa pîꞌ toꞌ koꞌmamîꞌpî ipîꞌ tîkoꞌman pe mîîkîrî surarayamîꞌ esaꞌ yewîꞌ ta. Taꞌpî toꞌya: —Mîserî pîikaꞌtîya eꞌpai awanî, maasa pra morî pe tîweꞌsen mîserî —taꞌpî toꞌya.
5 —Maasa pra anna yonpayamîꞌ saꞌnamaiya mararî pra. Moropai mîserîya epereꞌnîtoꞌ yewîꞌ ton koneka meꞌpoꞌpî anna ton pe —taꞌpî toꞌya.
6 —Inna, moriya. Uttî yepiꞌtîi —taꞌpî Jesusya. Mîrîrî yeꞌnen Jesus wîtîꞌpî toꞌ pokonpe. Mîîkîrî erepamî koꞌmannîpî tanne, aminke pra surarayamîꞌ esaꞌya tonpayamîꞌ yarimaꞌpî Jesus ponaya kai, toꞌ wîtîtoꞌpe. Taꞌpî surarayamîꞌ esaꞌya toꞌ pîꞌ: —Makatîi ipîꞌ: “ ‘Uurî saꞌne wanî îꞌ pe pra rî arawîrî maasa pra uyentai amîrî wanî yeꞌnen, uyewîꞌ ta eewomî eserîke pra nai’, taa pîꞌ man” makatîi.
7 “Moropai ‘anîꞌ pe pra uurî wanî uutîtoꞌpe aapia. Tîîse taaya yuꞌse wai miarî siꞌma, amaimu ke upoitîrî esepiꞌtîtoꞌpe kaꞌkî’, taa pîꞌ man”, makatîi.
8 “ ‘Epuꞌtî pîꞌ wai kureꞌne uurî wanî tîîse uyesanon moro toꞌ wanî uyentainonkon inkamoro maimu yawîrî tîweꞌsen uurî. Moropai mîrîrî warantî nîrî uurî pemonkonoyamîꞌ moro toꞌ man surarayamîꞌ umaimu yawîrî tîweꞌsanon. Tauya ya tiwinan pîꞌ: “atîkî”, tauya ya, moropai attî umaimu pe. Tiaron pîꞌ: “asiꞌkî”, tauya ya, moropai aaipî uupia. Moropai tauya ya upoitîrî pîꞌ: “seeniꞌ kuꞌkî”, tauya ya, moropai ikupîiya umaimu pe. Mîrîrî warantî nîrî ikupîya epuꞌtî pîꞌ wai tamîꞌnawîrî îꞌ taaya ya, amaimu pe awanî. Itentai puꞌkuru awanî yeꞌnen’, taa pîꞌ man”, makatîi —taꞌpîiya toꞌ pîꞌ. Mîrîrî yeꞌnen toꞌ wîtîꞌpî Jesus pia. Tamîꞌnawîrî ekaremekîꞌpî toꞌya.
9 Mîrîrî taasaꞌ mîîkîrî warayoꞌya eta tîuya pîꞌ Jesus esenumenkaꞌpî kureꞌne. Mîîkîrî eraꞌtîꞌpî arinîkon pemonkonyamîꞌ winîkîi. Moropai taꞌpîiya toꞌ pîꞌ: —Aꞌkî, tauya apîꞌnîkon. Amîrîꞌnîkon Israel ponkon, Paapa pemonkonoyamîꞌ koreꞌta sîrîrî warantî innape ukuꞌnen eraꞌmasauꞌya pra wai. Tîîse mîserî esaꞌya ukuꞌsaꞌ man innape, kaꞌran pe tîwanî tîîse —taꞌpîiya.
10 Mîrîrî tîpo mîîkîrî surarayamîꞌ esaꞌ narimaꞌsan ennaꞌpoꞌpî wîttî ta. Moropai inkamoroya mîîkîrî surarayamîꞌ esaꞌ poitîrî eporîꞌpî miarî priꞌya eesepiꞌtîsaꞌ wanîꞌpî Jesus maimu pe.
Jesusya Wîriꞌ Inyo Isaꞌmantaꞌpî More Pîmîꞌsaꞌka
11 Tîkoꞌman pe puꞌkuru pra tîîkoꞌmamî tîpo, Jesus wîtîꞌpî Naim cidaderî pona. Inenupaꞌsan moropai tuꞌkankon pemonkonyamîꞌ wîtîꞌpî nîrî ipokonpe.
12 Mîrîrî cidade pona Jesus erepamî tanne, aminke pra tîîse, pemonkonyamîꞌ epaꞌkaꞌpî, isaꞌmantaꞌpî esaꞌrîꞌpî yaanenan. Mîîkîrî wanîꞌpî tiwinan yeꞌ inyo isaꞌmantaꞌpî wîriꞌ more pe. Mîîkîrî pîkîrî arinîkon pemonkonyamîꞌ mîrîrî cidade ponkon wîtîꞌpî uuruwai pona.
13 Mîîkîrî saꞌne wîriꞌ karau eraꞌmaꞌpî Uyepotorîkonya tîꞌnokoꞌpî pe. Mîrîrî yeꞌnen wîriꞌ pîꞌ taꞌpîiya: —Tîkarawai pra eꞌkî —taꞌpîiya.
14 Mîîkîrî yaponseꞌ pia eerepamîꞌpî. Moropai itaponseꞌ yapîꞌpîiya. Mîîkîrî yaanenan emîꞌpamîꞌpî. Moropai taꞌpî Jesusya maasaron warayoꞌ pîꞌ: —Eꞌmîꞌsaꞌkakî tauya apîꞌ —taꞌpîiya.
15 Mîrîrî taiya pe mîîkîrî isaꞌmantaꞌpî eꞌmîꞌsaꞌkaꞌpî tîmaikko pona. Moropai eeseurîma piaꞌtîꞌpî. Moropai Jesusya isan pia irumakaꞌpî tepiꞌtîi.
16 Mîrîrî eraꞌma tîuyaꞌnîkon pîꞌ tamîꞌnawîronkon pemonkonyamîꞌ esenumenkaꞌpî mararî pra Jesus namaiꞌma. Moropai inkamoroya Paapa yapurîꞌpî. Taꞌpî toꞌya: —Mîserî see kureꞌnan Paapa maimu ekaremeꞌnen uurîꞌnîkon koreꞌta aaiꞌsaꞌ sîrîrî. Paapa iiꞌsaꞌ man tîpemonkonoyamîꞌ pîikaꞌtîi —taꞌpî toꞌya.
17 Mîrîrî kuꞌsaꞌ Jesusya yekare etaꞌpî mîrîrî Judéia patapon pemonkonyamîꞌya. Moropai mîrîrî Judéia woi tîîkoꞌmansenonkonya epuꞌtîꞌpî.
João Batista Nenupaꞌsan
18 João Batista nenupaꞌsanya tamîꞌnawîrî îꞌ kuꞌsaꞌ Jesusya ekaremekîꞌpî. Moropai Joãoya asakîꞌnankon tînenupaꞌsan yannoꞌpî.
19 Inkamoro yarimaꞌpîiya Uyepotorîkon pia ekaranmapoi toꞌ wîtîtoꞌpe kaiꞌma, taatoꞌpe toꞌya: —“Amîrî manniꞌ kaꞌ poi tarîwaya aaipî ton anna nînîmîkî, tiaron kaꞌrî moro nai inîmîkî annaya manniꞌ”, makatîi ipîꞌ —taꞌpî Joãoya toꞌ pîꞌ.
20 Mîrîrî yeꞌnen toꞌ wîtîꞌpî Jesus pia. Moropai taꞌpî toꞌya: —João Batistaya anna yarima pîꞌ man ayekaranmapoi. Amîrî manniꞌ tarîwaya eerepamî ton kaane kaꞌrî? Tiaron moro nai anna nînîmîkî? —taꞌpî toꞌya ipîꞌ.
21 Mîrîrî taa toꞌya tanne, tuꞌkankon neꞌneꞌkon pemonkonyamîꞌ paran pokonkon yepiꞌtîꞌpî Jesusya. Moropai oꞌmaꞌ yarakkîrî tîweꞌsanonkon yapai oꞌmaꞌkon yenpaꞌkaꞌpîiya, moropai tuꞌkankon enkaruꞌnankon yenu yenponkaꞌpîiya.
22 Moropai inkamoro maimu yuukuꞌpîiya. —Ennaꞌpotî moropai João pîꞌ aneraꞌmaꞌpîkon moropai anetaꞌpîkon mekaremeꞌtîi. Makatîi ipîꞌ see warantî: “Tarîpai enkaruꞌnankonya eraꞌma pîꞌ man. Moropai asakoi pepîn asanî pîꞌ man. Moropai erekîꞌpankon esepiꞌtîsaꞌ man. Moropai panaꞌtîꞌpankonya eta pîꞌ man. Moropai isaꞌmantaꞌsan eꞌmîꞌsaꞌkan pîꞌ man. Moropai itekare Paapa winîpainon esekaremeꞌsaꞌ man îꞌ ton pînon pîꞌ”, makatîi, penaron Isaías nurîꞌtîya taasaꞌ yawîrî Paapa nîmenkaꞌpî pîꞌ —taꞌpîiya.
23 —Taatausinpai pemonkonyamîꞌ wanî, manniꞌkan innape ukuꞌnenan tîwî tîkuꞌse pra. Moropai teesenumenkakon yawîrî pra unkupî pîꞌ teesewankonoꞌmai pra toꞌ wanî —taꞌpîiya.
24 João Batista nenupaꞌsan ennaꞌpoꞌpî tanne, Jesus eseurîma piaꞌtîꞌpî pemonkonyamîꞌ pîꞌ João yekare pîꞌ: —Keren pona attîsaꞌkon yai João yarakkîrî epose, îꞌ eraꞌmaꞌpîyaꞌnîkon? Konoiꞌ yepu yeꞌ yariꞌmapîtî aꞌsitunya kaꞌrî —taꞌpîiya.
25 —Îꞌ eraꞌmai attîꞌpîkon kin warayoꞌ epontîsaꞌ kaꞌrî morî pe tîpon yaꞌ eraꞌmai? Aꞌkî, tauya warayoꞌ morî pe epontîꞌpî morî tîpon yaꞌ mîîkîrî koꞌmamî eꞌpainon morî puꞌkuru wîttî ta ipîkku pe tîweꞌsen yewîꞌ ta —taꞌpîiya.
26 —Kaꞌtî upîꞌ, îꞌ eraꞌmaꞌpîyaꞌnîkon? Paapa maimu ekaremeꞌnen profeta kaꞌrî. Inna, tauya sîrîrî apîꞌnîkon. Tîîse profeta Paapa maimu ekaremeꞌnen yentainon eraꞌmaꞌpîyaꞌnîkon.
27 Maasa pra mîîkîrî João wanî Paapa nîmenkaꞌpî iipî rawîrî aaipîton pe, manniꞌ Paapaya taꞌpî yawîrî.Aꞌkî, mîserî umaimu ekaremeꞌnenyarimauya kupî sîrîrîarawîrî attîtoꞌpe,ayeꞌmarî ton konekai eꞌmaiꞌ pe
taꞌpî Paapaya —taꞌpî Jesusya.
28 Moropai Jesus eseurîma koꞌmannîpîꞌpî: —Tauya amîrîꞌnîkon pîꞌ, mîîkîrî Paapa maimu ekaremeꞌnen João wanî tamîꞌnawîronkon warayoꞌkon yentai tîweꞌsen pe awanî. Tîîse anîꞌya innape uurî kupî ya, mîîkîrî esaꞌ pe Paapa wanî. Mîrîrî yeꞌnen ipîkku pe mîîkîrî wanî João yentai —taꞌpîiya.
29 Mîrîrî taiya etaꞌpî tîniru yapisî pîꞌ teesenyakaꞌmasanonya moropai tamîꞌnawîronkon pemonkonyamîꞌya. Inkamoro wanîꞌpî manniꞌkan yairî Paapa maimu wanî epuꞌnenan pe. Inkamoro wanîꞌpî João Batista nenpatakonaꞌsan pe.
30 Tîîse fariseuyamîꞌ moropai Moisés yeseru rîꞌpî pîꞌ yenupatonkon wanîꞌpî Joãoya tenpatakonakon yuꞌse pra. Maasa pra ituꞌse Paapa eꞌtoꞌ kupî toꞌya pra, yewanmîrîꞌpî toꞌya.
31 Mîrîrî pîꞌ taꞌpî Jesusya: —Anîꞌkan warantî see sîrîrî pankon pemonkonyamîꞌ kupîuya eꞌpainon? Îꞌ kaiꞌma toꞌ wanî?
32 Inkamoro wanî moreyamîꞌ tîsuꞌminansenon warantî. Inkamoro wanî poro yiꞌpî po. Tiaronkon pîꞌ toꞌ entaimepîtî koꞌmannîpî.“Manannîtoꞌ waiyi yeꞌnunpaꞌpî annayatîîse amîrîꞌnîkon mananu pra awanîꞌpî”, taapîtîꞌpî toꞌya.“Moropai isaꞌmantaꞌpî kararunpatoꞌ kupîꞌpî annayatîîse amîrîꞌnîkon karau pra awanîꞌpî”,
taapîtîꞌpî toꞌya.
33 Inkamoro moreyamîꞌ yeꞌkakon amîrîꞌnîkon, sîrîrî pankon wanî. Awakîrikon pe anîꞌ kuꞌsaꞌyaꞌnîkon pepîn. Maasa pra João Batista iiꞌsaꞌ yai tekkari yonpa pra awanîꞌpî tiaronkon pemonkonyamîꞌya yonpa warantî pra. Moropai tîwuku vinho enîrîiya pra awanîꞌpî. Mîîkîrî pîꞌ taayaꞌnîkon: “Oꞌmaꞌkon yarakkîrî tîweꞌsen pe awanî mîrîrî”, taayaꞌnîkon.
34 Moropai uurî kaꞌ poi iipîꞌpî entamoꞌka ya, moropai uwuku enîrîuya ya taayaꞌnîkon upîꞌ: “Aꞌkî, mîîkîrî warayoꞌ kureꞌne taꞌreꞌ yonpanen. Moropai kureꞌne tîwuku enîꞌnen, teetînsen” taayaꞌnîkon. “Moropai tîniru yapisî pîꞌ teesenyakaꞌmasanon yonpa mîîkîrî. Moropai pemonkonyamîꞌ imakuiꞌsan pokonpe tîweꞌsen mîîkîrî”, taayaꞌnîkon upîꞌ.
35 Tîîse tauya anîꞌya Paapa winîpainon epuꞌnen yapisî ya mîîkîrîya yairî tîwanî epuꞌtî mîrîrî —taꞌpî Jesusya.
Jesus Wanî Simão Fariseu Yewîꞌ Ta.
36 Tiwin fariseuya Jesus etaꞌpî entamoꞌkai attîtoꞌpe tewîꞌ ta. Mîrîrî yeꞌnen Jesus wîtîꞌpî itewîꞌ ta. Moropai teerepansaꞌ pe eereutaꞌpî toꞌ yaponseꞌ pona takiraꞌ tekkari yonpai mesa pia.
37 Mîrîrî yai miarî cidade po wîriꞌ wanîꞌpî imakuiꞌpî kupîtîpon. Mîîkîrîya Jesus entamoꞌka yekare etaꞌpî mîîkîrî fariseu yewîꞌ ta. Mîrîrî yeꞌnen mîîkîrîya tîkarapa aꞌpusin karaꞌ yenseꞌ yarîꞌpî moropai attîꞌpî Jesus pia.
38 Mîîkîrî wanîꞌpî Jesus pai winî siꞌma aminke pra tîkarau pîꞌ. Moropai ikaruwatoꞌ yaꞌ Jesus puu yamannîpîꞌpî itenu paruya. Moropai mîrîrî tîpo tîpuꞌpai siꞌpo ke Jesus puu yamannîꞌsaꞌ tîuya yaꞌmananîpîꞌpîiya. Moropai mîîkîrîya Jesus puu yuꞌnapîtîꞌpîiya. Moropai mîrîrî tîkarapa aꞌpusin tînarîꞌpî kanpîtîꞌpîiya Jesus puu pona.
39 Mîrîrî eraꞌma tîuya pe fariseu esenumenkaꞌpî tîîwarîrî taꞌpîiya: —Mîserî warayoꞌ wanî ya innape profeta pe, anîꞌ pe mîserî wîriꞌ epuꞌtîiya eꞌpainon. Imakuiꞌpî kupîtîpon pe wanî epuꞌtîiya ya, yai pra aweꞌrennuku tîrîiya pepîn eꞌpainon tîîpia —taꞌpîiya.
40 Mîîkîrî fariseu pîꞌ Jesusya taꞌpî: —Simão, apîꞌ unekaremekî ton moro man —taꞌpîiya.
—Kaꞌkî moriya, uyenupanen —taꞌpî Simãoya Jesus pîꞌ.
41 Moropai Jesusya taꞌpî: —Asakîꞌnankon warayoꞌkon wanî epeꞌmîra tiwinan warayoꞌ pîꞌ. Mîîkîrî tîniru esaꞌsaꞌya itîînen pîꞌ epeꞌmîra toꞌ wanîꞌpî. Tiwinan neꞌma ton wanîꞌpî 500 prata enaꞌpî kaisarî. Moropai tiaron neꞌma ton wanîꞌpî 50 prata enaꞌpî kaisarî.
42 Tîîse tiwinanya yeꞌma pra awanîꞌpî saꞌnîrî siꞌma yeꞌmaꞌpî toꞌya eꞌpainon teuren mîrîrî tînesatîpîkon. Mîrîrî kupîꞌpî mîîkîrî epeꞌmîra toꞌ eꞌtoꞌya iipia tîwî, yeꞌma toꞌya namai, taꞌpîiya. Oꞌnon yeꞌkaya tîwakîri pe ikupîꞌpî kureꞌne? —taꞌpî Jesusya ipîꞌ.
43 Simãoya yuukuꞌpî: —Uurî pia manniꞌ kureꞌne panpîꞌ epeꞌmîra tîweꞌsenya tîwakîri pe ikupîꞌpî, yeꞌmakî taiya pra awanî yeꞌnen —taꞌpî Simãoya.
—Innape man, yairî taa pîꞌ nai —taꞌpî Jesusya.
44 Mîrîrî taa tîpo Jesus eraꞌtîꞌpî wîriꞌ ekaya. Moropai taꞌpîiya Simão pîꞌ: —Mîserî wîriꞌ eraꞌma pîꞌ nan? Ayewîꞌ ta ewonsaꞌ tanne, amîrîya tuna tîrî pra man uꞌpu ronatoꞌ ton. Tîîse mîserîya uꞌpu rona sîrîrî tîkarawatoꞌ ke, tenu paru ke. Moropai tîpuꞌpai siꞌpo ke uꞌpu yaꞌmananî pîꞌ man.
45 Moropai amîrîya uyuꞌna pra man ayewîꞌ ta ewonsaꞌ tanne. Tîîse mîserî wîriꞌya yuꞌnapîtî koꞌmannîpî uꞌpu pîꞌ, ayewîꞌ ta ewomîꞌpî pata pai.
46 Moropai amîrîya upuꞌpai pona akarapa yonpa tîrî pra man. Tîîse mîserî wîriꞌya tîkarapa aꞌpusin kamo pîꞌ man uꞌpu pona —taꞌpîiya.
47 —Tauya apîꞌ, mîîkîrîya kureꞌne uyapurî eseraꞌma mîrîrî. Maasa pra kureꞌnan imakuiꞌpî inkupîꞌpî kupîuya uuwanmîra. Tîîse manniꞌ mararî uyapurînen mîîkîrî nîkupîꞌpî kupîuya uuwanmîra mararî, mararî uyapurîiya yeꞌnen —taꞌpî Jesusya.
48 Mîrîrî yai Jesusya wîriꞌ pîꞌ taꞌpî: —Imakuiꞌpî ankupîꞌpî kupî pîꞌ wai uuwanmîra —taꞌpîiya.
49 Mîrîrî eta tîuyaꞌnîkon pe mesa po ereutaꞌsan esekaranmapopîtî piaꞌtîꞌpî tîîwarîrîꞌnîkon. Taꞌpî toꞌya: —Anîꞌ see mîserî mîîtoꞌpe imakuiꞌpî kuꞌnen tîîwanmîra kaiꞌma?
50 Tîîse Jesusya taꞌpî wîriꞌ pîꞌ: —Innape puꞌkuru ukupîya yeꞌnen, imakuiꞌpî ankupîꞌpî kupî pîꞌ wai uuwanmîra. Mîrîrî yeꞌnen atîkî tîîwanmîra —taꞌpî Jesusya wîriꞌ pîꞌ.
