Jesus Cristo Yekare Lucas Nîmenukaꞌpî 8:1-56
8 Mîrîrî tîpo Jesus wîtîpîtîꞌpî patakon kaisarî morî yekare ekaremekî pinunpaꞌpîiya pemonkonyamîꞌ pîꞌ. Taꞌpîiya: —Tîpemonkono pe ayapisîkon Paapaya sîrîrî, ayesaꞌkon pe tîweꞌtoꞌpe kaiꞌma toꞌ pîꞌ ekaremeꞌpîtîꞌpîiya. Asakîꞌne puꞌ pona tîîmoꞌtaiꞌnîkon (12) Jesus nenupaꞌsan wîtîꞌpî ipokonpe.
2 Moropai arinîkon wîriꞌsanyamîꞌ Jesus nepiꞌtîꞌsan wîtîꞌpî nîrî. Inkamoro wîriꞌsanyamîꞌ koreꞌta awanîꞌpî Maria Madalena. Mîîkîrî yaꞌ asakîꞌne miaꞌ pona (7) kaisaronkon oꞌmaꞌkon ewonsaꞌ wanîꞌpî. Tîîse Jesusya tîmeruntîri ke mîîkîrî yapai oꞌmaꞌkon yenpaꞌkasaꞌ wanîꞌpî.
3 Moropai Joana Herodes poitîrî Cuza noꞌpî nîrî wanîꞌpî toꞌ koreꞌta. Susana nîrî awanîꞌpî toꞌ koreꞌta moropai tiaronkon wîriꞌsanyamîꞌ wanîꞌpî. Inkamoroya temannekon yonpa ke Jesus moropai inenupaꞌsan pîikaꞌtîpîtîꞌpî moropai toꞌ yaꞌreꞌ ton tîrîꞌpî toꞌya.
Warayoꞌ Tînmîri Pînnen
4 Moro toꞌ tîîse arinîkon pemonkonyamîꞌ emurukuntîsaꞌ koꞌmamîꞌpî Jesus eseurîma etakonpa kaiꞌma. Inkamoro iiꞌpîtî koꞌmannîpîꞌpî tuꞌke patakon yapai. Mîrîrî tanne inkamoro yenupaꞌpî Jesusya morî panton ke.
5 Taꞌpîiya toꞌ pîꞌ: —Warayoꞌ wîtîꞌpî tînmîri pînse. Mîîkîrîya tînmîri pîmî tanne inpîmî yonpa enaꞌpî eꞌma ena pona. Mîrîrî yakiꞌtapaꞌpî pemonkonyamîꞌya maasa aaroꞌta pra tîîse. Moropai mîrîrî eraꞌmaꞌpî toronyamîꞌya moropai yennoꞌmapîtîꞌpî toꞌya.
6 Moropai tiaron inpîmî yonpa enaꞌpî mararon non tîꞌ parappa po tîweꞌsen pona. Mîrîrî aroꞌtaꞌpî tîîse aakaratatoꞌ pataꞌseꞌ ton pra awanîꞌpî. Mîrîrî yeꞌnen awaꞌpiꞌtaꞌpî.
7 Moropai tiaron enaꞌpî mîꞌnî yeꞌ koreꞌta. Mîꞌnî yeꞌ pokonpe aarentaꞌpî. Moropai mîrîrî tarumaꞌtîꞌpî mîꞌnî yeꞌya. Mîrîrî yeꞌnen eepeta pra awanîꞌpî.
8 Tîîse tiaron enaꞌpî morî non pona. Mîrîrî aroꞌtaꞌpî aarentaꞌpî, moropai eepetaꞌpî. Mararî pra eepetaꞌpî eꞌmaiꞌ pe awanîꞌpî yentai puꞌkuru —taꞌpî Jesusya.
—Anepuꞌpai anîꞌ wanî ya, etakî —taꞌpîiya.
Îꞌ Taatoꞌpe Panton Wanî Ekaremekî Jesusya
9 Inenupaꞌsanya ekaranmapoꞌpî: —Îꞌ taa yuꞌse awanî sîrîrî morî panton ke anna pîꞌ? —taꞌpî toꞌya.
10 Jesusya yuukuꞌpî: —Paapa yeseru anepuꞌtîkon pepîn ekaremekîuya sîrîrî. Îꞌ kaiꞌma awanî pe nai tamîꞌnawîronkon esaꞌ pe Paapa iipî yai ekaremekîuya sîrîrî epuꞌtîkonpa. Tîîse Paapa yuꞌsankon pepîn pîꞌ ekaremekîuya pepîn aronne. Tîîse panton pe neken ekaremekîuya moropai epuꞌtî toꞌya pepîn ituꞌse pra tîwanîkon yeꞌnen.Eta toꞌya tîpanakon ke tîîse îꞌ tînetaꞌpîkon epuꞌtî toꞌya pepîn.Moropai eraꞌma toꞌya tenukon ke tîîse îꞌ pe tîneraꞌmaꞌpîkon wanî epuꞌtî toꞌya pepîn.
kaiꞌma penaron Isaías nurîꞌtîya ekaremekîꞌpî.
11 Ayeurîmauyaꞌnîkon sîrîrî morî panton pîꞌ. Manniꞌ inpîmî wanî Paapa maimu warantî.
12 Moropai inpîmî eꞌma ena pona enaꞌsan warantî pemonkonyamîꞌ wanî. Paapa maimu eta toꞌya tîîse kaꞌneꞌ pe Makui erepamî. Itekare toꞌ netaꞌpî moꞌkaiya toꞌ yewan yapai, innape ikupî toꞌya namai, moropai toꞌ eꞌpîikaꞌtî namai.
13 Moropai inpîmî tîꞌ parappa pon non pona enaꞌsan warantî tiaronkon pemonkonyamîꞌ wanî. Paapa maimu eta toꞌya moropai yapisî toꞌya kureꞌne taatausinpai. Mîî pîkîrî innape ikupî toꞌya. Tîîse toꞌ yewan yaꞌ toꞌ esenumenkatoꞌ ton pra awanî. Mîrîrî yeꞌnen innape ikuꞌtoꞌ tîuyaꞌnîkon wenai toꞌ eꞌtarumaꞌtîtoꞌ erepamî yai, tînetaꞌpîkon rumaka toꞌya tiwinarî.
14 Moropai inpîmî mîꞌnî yeꞌ koreꞌta enaꞌsan warantî tiaronkon wanî. Itekare eta toꞌya tîîse toꞌ yewan wanî kureꞌne sîrîrî pata po tînkonekakon pîꞌ. Moropai ipîkku pe puꞌkuru temannekon ton yuꞌse toꞌ wanî. Moropai sîrîrî non po taatausinpatoꞌkon yuꞌse toꞌ wanî. Mîrîrî yeꞌnen innape ikupî pîꞌ toꞌ koꞌmamî pepîn. Inîꞌ panpîꞌ Paapa yeseru yuꞌse pra toꞌ wanî.
15 Tîîse inpîmî morî non pona enaꞌsan warantî tiaronkon wanî. Itekare eta toꞌya moropai innape ikupî toꞌya tewankon ke. Inkamoro koꞌmamî Paapa maimu yawîrî ikoneka. Mîrîrî yeꞌnen toꞌ eꞌtarumaꞌtîtoꞌ erepamî yai tînetaꞌpîkon rumaka toꞌya pepîn. Toꞌ koꞌmamî Paapa maimu yawîrî. Mîrîrî yeꞌnen toꞌ yeseru wanî morî pe puꞌkuru —taꞌpî Jesusya tînenupaꞌsan pîꞌ.
Uꞌkumaꞌtukon Pîꞌ Jesus Eseurîma
16 Inîꞌrî Jesusya sîrîrî panton ekaremekîꞌpî. —Anîꞌya tîꞌkumaꞌtu yawittanîpî tîpo yenomî pepîn wariꞌsaꞌ yoꞌkoi —taꞌpîiya. —Moropai itîrî pepîn nîrî weꞌnannîtoꞌ yaponseꞌ yoꞌkoi. Tîîse enepî itaponseꞌ pona itîîtoꞌpe aronne panpîꞌ aweꞌtoꞌpe tewonsenon weiyuꞌmatoꞌpeiya.
17 Mîrîrî warantî tamîꞌnawîrî îꞌ esenomîꞌpî eꞌnaponka kupî sîrîrî tiwin wei. îꞌ kaiꞌma epuꞌsaꞌ pepîn esepuꞌtî kupî sîrîrî. Esenomîꞌpî esenpo kupî sîrîrî tamîꞌnawîronkonya epuꞌtoꞌpe.
18 Mîrîrî yeꞌnen, aka. Tîwarî eꞌtî Paapa maimu etayaꞌnîkon pîꞌ. Maasa pra imaimu anepuꞌpainon wanî ya, Paapaya itîrî inîꞌ panpîꞌ epuꞌtoꞌpeiya. Tîîse anepuꞌpainon pepîn wanî ya, epuꞌtîiya pepîn. Mararî inetaꞌpî ena kupî sîrîrî iiwanmîra, îꞌ ton pra eena —taꞌpî Jesusya tînenupaꞌsan pîꞌ.
Jesus Yan Moropai Itaꞌmiꞌsan
19 Jesus yan moropai itaꞌmiꞌsan erepamîꞌpî Jesus eraꞌmapîꞌse teuren. Tîîse iipia toꞌ eꞌrennuku eserîke pra awanîꞌpî maasa pra arinîke pemonkonyamîꞌ wanî yeꞌnen.
20 Mîrîrî tiwinanya taꞌpî Jesus pîꞌ: —Aꞌkî, asan moropai ayaꞌmiꞌsan man poro po ayuwa pîꞌ, ayarakkîrî teeseurîmakonpa —taꞌpîiya Jesus pîꞌ.
21 Tîîse Jesusya taꞌpî tamîꞌnawîronkonya eta tanne: —Maamaꞌ tauya moropai mooyi tauya manniꞌkan innape Paapa maimu kuꞌnenan pîꞌ moropai ikonekanenan pîꞌ —taꞌpî Jesusya.
Jesus Maimu Pe Aꞌsitun Moropai Tuna Atîꞌnapamî
22 Tiaron wei yai Jesus asaraꞌtîꞌpî tînenupaꞌsan pokonpe kanau yaꞌ. Moropai taꞌpîiya toꞌ pîꞌ: —Miarîꞌnîkon rukuꞌnî ikuꞌpî ratai pona. Mîrîrî yeꞌnen toꞌ wîtîꞌpî.
23 Mîrîrî ikuꞌpî nuurukkutî tîuyaꞌnîkon yeꞌka pe, Jesus weꞌnaꞌpî kanau yaꞌ. Mîrîrî pe rî meruntî ke aꞌsitun ataꞌseꞌma piaꞌtîꞌpî ikuꞌpî ka. Moropai kanau yaꞌ toꞌ eꞌtoꞌ yannîpî piaꞌtîꞌpî tuna ke. Nariꞌ pe eenaꞌpî tamîꞌnawîronkon mîrîrî kanau yawonkon pia.
24 Mîrîrî yeꞌnen Jesus nenupaꞌsanya Jesus yenpakaꞌpî iwetun tanne. Taꞌpî toꞌya teesiꞌnîꞌse: —Anna yenupanen, saꞌmantan pe man, tîînase.
Mîrîrî taa toꞌya yeꞌnen, Jesus eꞌmîꞌsaꞌkaꞌpî. Moropai taꞌpîiya aꞌsitun pîꞌ moropai tuna pîꞌ: —Atîꞌnapankî. Aatîꞌnapamîꞌpî tamîꞌnawîrî.
25 Mîrîrî yai Jesusya taꞌpî tînenupaꞌsan pîꞌ: —Innape ukupîyaꞌnîkon pra awanîkon sîrîrî. Oꞌnon pata innape ukuꞌtoꞌyaꞌnîkon nai? Anîꞌ pe wanî epuꞌtîyaꞌnîkon pra naatî? —taꞌpîiya.
Tîîse inkamoro esenumenkasaꞌ wanîꞌpî, teesewankonoꞌmai mararî pra teesiꞌnîꞌse. Moropai taꞌpî toꞌya tîîwarîrîꞌnîkon: —Îꞌ yeꞌka see warayoꞌ mîserî, imaimu yawîrî aꞌsitun moropai tuna eꞌtoꞌ. “Atîꞌnapankî” taiya ya, aatîꞌnapamî —taꞌpî toꞌya.
Oꞌmaꞌkon Yenpaꞌka Jesusya Warayoꞌ Yapai
26 Toꞌ erepamîꞌpî Galiléia ikuꞌpî ratai po tîweꞌsen Gerasa pata pona.
27 Teerepansaꞌkon pe Jesus eseuꞌka tanne kanau yapai, warayoꞌ iipîꞌpî cidade poi iponaya epose. Oꞌmaꞌkon ewonsaꞌ wanîꞌpî mîîkîrî warayoꞌ yaꞌ. Pena pata pai aakoꞌmansaꞌ wanîꞌpî ipon ton pra. Wîttî ta awanî pra, aakoꞌmansaꞌ wanîꞌpî. Tîîse aakoꞌmantoꞌ eꞌpîtîꞌpî uuruwai koreꞌta eꞌtîꞌkaꞌsan koreꞌta.
28 Jesus eraꞌma tîuya pe mîîkîrî warayoꞌ entaimeꞌpî. Moropai aweꞌsekunkaꞌpî Jesus rawîrî. Moropai taꞌpîiya meruntî ke: —Jesus Paapa kaꞌ po tîîkoꞌmansen munmu amîrî. Îꞌ kuꞌse aaiꞌsaꞌ uurî yarakkîrî? Esatîuya sîrîrî apîꞌ, uurî kîꞌtarumaꞌtîi.
29 Mîrîrî taꞌpîiya maasa pra Jesusya oꞌmaꞌ yenpaꞌkasaꞌ yeꞌnen yapai. Tuꞌke iteꞌka yapiꞌpîtîꞌpî oꞌmaꞌya. Mîrîrî yeꞌnen yewaꞌtîpîtîꞌpî toꞌya iꞌpu pîꞌ moropai itenya pîꞌ saꞌman ferro ke. Tîîse mîrîrî yaꞌtîpîtîꞌpîiya toꞌ yentai awanî yeꞌnen. Moropai oꞌmaꞌya yaapîtîꞌpî keren pona.
30 Jesusya mîîkîrî ekaranmapoꞌpî: —Anîꞌ ayeseꞌ? —taꞌpîiya.
Yuukuꞌpîiya: —Uyeseꞌ tuꞌkan —taꞌpîiya. Maasa pra tuꞌke oꞌmaꞌkon ewomîꞌpî wanîꞌpî mîîkîrî warayoꞌ yaꞌ.
31 Moropai oꞌmaꞌkonya taꞌpî Jesus pîꞌ mararî pra tekaꞌnunkai apoꞌ yaꞌ tenumîiyaꞌnîkon namai.
32 Tuꞌkankon porcoyamîꞌ wanîꞌpî tekkarikon yenaꞌnenan ikîrî po aminke pra. Mîrîrî yeꞌnen oꞌmaꞌkonya esatîꞌpî Jesus pîꞌ porcoyamîꞌ yaꞌ teewomîkonpa kaiꞌma. Moropai inna taꞌpî Jesusya.
33 Mîrîrî yeꞌnen oꞌmaꞌkon epaꞌkaꞌpî mîîkîrî warayoꞌ yapai. Moropai toꞌ ewomîꞌpî porcoyamîꞌ yaꞌ. Mîrîrî pe rî porcoyamîꞌ ekaꞌtumîꞌpî irama yai. Toꞌ eꞌsorokaꞌpî tuna ka. Moropai toꞌ naarîꞌpî.
34 Warayoꞌkon porcoyamîꞌ pîꞌ teesenyakaꞌmasanonya mîrîrî eꞌkupî eraꞌmasaꞌ yai toꞌ eꞌtîrîkaꞌpî moropai mîrîrî yekare ekaremekîꞌpî toꞌya cidade po, moropai iwoi tîîkoꞌmansenon pîꞌ.
35 Mîrîrî yeꞌnen tuꞌkankon pemonkonyamîꞌ wîtîꞌpî mîrîrî eraꞌmai. Miarî ya teerepamîkon pe Jesus pia, warayoꞌ eraꞌmaꞌpî toꞌya. Yapai oꞌmaꞌkon epaꞌkaꞌpî. Toꞌ esiꞌnîpîꞌpî ipîꞌ. Maasa pra Jesus pia eereutasaꞌ wanîꞌpî. Tîpon ke awanîꞌpî moropai morî pe, ayawîꞌ pe pra.
36 Tamîꞌnawîronkon mîîkîrî eraꞌmaꞌtîponkonya mîrîrî ekaremekîꞌpî tiaronkon pemonkonyamîꞌ pîꞌ îꞌ kaiꞌma warayoꞌ esepiꞌtîsaꞌ.
37 Mîrîrî wenai Gerasa pata ponkon enaꞌpî kureꞌne eranneꞌ pe. Mîrîrî yeꞌnen Jesus epaꞌkatoꞌpe esatîꞌpî toꞌya tîpatakon yapai. Moropai Jesus asaraꞌtîꞌpî kanau yaꞌ moropai attîꞌpî.
38 Mîîkîrî warayoꞌ oꞌmaꞌkon yenpîꞌ esepiꞌtîsaꞌya Jesus yekaꞌnunkaꞌpî ipîkîrî tuutîpa kaiꞌma. —Uutî apîkîrî, Uyepotorî —taꞌpîiya. Tîîse Jesusya yarimaꞌpî. Taꞌpîiya:
39 —Ennaꞌpokî ayewîꞌ ta. Moropai îꞌ kuꞌsaꞌ Paapaya mekaremekîi. Mîrîrî yeꞌnen mîîkîrî warayoꞌ ennaꞌpoꞌpî tamîꞌnawîrî cidade poro îꞌ kuꞌsaꞌ Jesusya tîmîrî tonpe ekaremekîꞌpîiya pemonkonyamîꞌ pîꞌ.
Jairo Yensi Yepiꞌtî Jesusya
40 Inîꞌrî ikuꞌpî ratai pona Jesus ennaꞌposaꞌ pe arinîkon pemonkonyamîꞌya Jesus yapisîꞌpî kureꞌne taatausinpai. Maasa pra tamîꞌnawîronkon wanîꞌpî inîmîkî pîꞌ miarî siꞌma.
41 Mîrîrî yai warayoꞌ erepamîꞌpî iteseꞌ Jairo. Mîîkîrî wanîꞌpî Judeuyamîꞌ epereꞌtoꞌ yewîꞌ esaꞌ pe tîweꞌsen pe miarî. Mîîkîrî eꞌsekunkaꞌpî Jesus pia moropai Jesus wîtîtoꞌpe esatîꞌpîiya tewîꞌ ta.
42 Maasa pra tiwinan yeꞌ itensi asakîꞌnan puꞌ pona tîîmoꞌtai (12) kaisaron ikono po saꞌmanta koꞌmannîpî yeꞌnen yepiꞌtîi attîtoꞌpe.
Jesus wîtî koꞌmannîpî tanne eꞌma taawîrî arinîkon iipîꞌpî iwenairî. Inkamoroya yatunnukuꞌpî arinîke tîwanîkon yeꞌnen, Jesus eraꞌtî eserîke pra.
43 Mîrîrî yai wîriꞌ iipîꞌpî Jesus pia mîn kannen. Asakîꞌne puꞌ pona tîîmoꞌtai konoꞌ kaisarî mîn kamo pîꞌ aakoꞌmansaꞌ wanîꞌpî. Tamîꞌnawîrî temanne tîꞌkasaiꞌya wanîꞌpî yepiꞌtî tonkon yeꞌma pîꞌ tîîse eesepiꞌtî pra awanîꞌpî.
44 Mîîkîrî iipîꞌpî Jesus poi winî pîꞌ. Moropai mîîkîrîya ipon yeꞌpi pîꞌ yapîꞌpî. Moropai mîrîrî pe rî mîn teetiꞌkansen asaꞌtîꞌpî.
45 Jesusya toꞌ ekaranmapoꞌpî: —Anîꞌya uyapî mîrîrî? —taꞌpîiya.
Tîîse, —Anîꞌya ayapî pra man —taꞌpî toꞌya. Mîrîrî pîꞌ Pedroya taꞌpî: —Uyenupanen, arinîkon pemonkonyamîꞌ man awoi. Tamîꞌnawîronkonya ayatunnuku pîꞌ man —taꞌpîiya.
46 Tîîse Jesusya taꞌpî: —Tîîse tiwinanya uyapî epuꞌtî pîꞌ wai. Maasa pra meruntî epaꞌka epuꞌtî pîꞌ wai —taꞌpîiya.
47 Mîrîrî eta tîuya pe teesenomî eserîke pra awanî epuꞌtîꞌpî mîîkîrî wîriꞌya. Mîrîrî yeꞌnen tîweꞌkîkîꞌma yeꞌka pe aaipîꞌpî. Moropai aweꞌsekunkaꞌpî Jesus pia. Tamîꞌnawîronkonya eraꞌma tanne moropai eesekaremekîꞌpî. Îꞌ ton pe yapîsaꞌ tîuya ekaremekîꞌpîiya. Moropai kaꞌneꞌ pe teesepiꞌtî epuꞌtîꞌpîiya.
48 Mîîkîrî pîꞌ Jesusya taꞌpî: —Maꞌnon, innape ukupîya yeꞌnen eesepiꞌtîsaꞌ sîrîrî. Tarîpai tîîwanmîra atîkî —taꞌpîiya.
49 Miarî maasa Jesus eseurîma tanne Jairo poitîrî erepamîꞌpî Jairo yewîꞌ tapai. Moropai mîîkîrîya taꞌpî Jairo pîꞌ: —Ayensi saꞌmantan pîꞌ man. Mîrîrî yeꞌnen uyenupanenkon wîtî yuꞌse awanî pepîn.
50 Mîrîrî etaꞌpî Jesusya. Moropai taꞌpîiya Jairo pîꞌ: —Teesiꞌnîꞌse pra eꞌkî. Innape neken ukuꞌkî. Moropai ayensi ennapamî —taꞌpîiya.
51 Jairo yewîꞌ ta teerepansaꞌ pe, tarakkîrî Pedro, João moropai Tiago ewomî tîrîꞌpîiya, moropai Jairo moropai wîriꞌ yan, inkamoro neken. Tiaronkon ewomî tîrîiya pra awanîꞌpî.
52 Mîrîrî tanne tamîꞌnawîronkon wanîꞌpî moro tîkaraukon pîꞌ tîwentaimepîtîkon pîꞌ, mîîkîrî wîriꞌ saꞌmantasaꞌ pîꞌ. Inkamoro pîꞌ taꞌpî Jesusya: —Tîkauware pra eꞌtî. Wîriꞌ saꞌmantasaꞌ pra man. Iweꞌnasaꞌ man —taꞌpîiya.
53 Mîrîrî taiya eta tîuyaꞌnîkon yeꞌnen tamîꞌnawîronkon siiraꞌpî ipîꞌ. Maasa pra aasaꞌmantasaꞌ epuꞌtî tîuyaꞌnîkon yeꞌnen. Taꞌpî toꞌya: —Îꞌ tonpe aasaꞌmantasaꞌ eraꞌma yeꞌka pe mîrîrî taiya —taꞌpî toꞌya.
54 Tîîse Jesus wîtîꞌpî iipia. Moropai yapisîꞌpîiya itenya pîꞌ. Moropai taꞌpîiya meruntî ke: —Maꞌnon, eꞌmîꞌsaꞌkakî, kaiꞌma.
55 Kaꞌneꞌ pe mîîkîrî ennapamîꞌpî. Enen eenaꞌpî. Moropai aweꞌmîꞌsaꞌkaꞌpî. Moropai tekkari ton tîîtoꞌpe toꞌya taꞌpî Jesusya.
56 Mîîkîrî yuntonon esenumenkasaꞌ wanîꞌpî kureꞌne. Tîîse Jesusya taꞌpî ekaremekî toꞌya namai tiaron pîꞌ mîrîrî tînkupîꞌpî pîꞌ.
