Jesus Cristo Yekare Marcos Nîmenukaꞌpî 1:1-45
1 Eꞌpîikaꞌtîntoꞌ yekare, Jesus, Paapa nîmenkaꞌpî pîꞌ teeseurîmasen ekaremekîuya sîrîrî. Mîîkîrî Jesus Cristo wanî Paapa munmu pe. Sîrîrî warantî penaroꞌ Paapa maimu ekaremeꞌnenya imenukaꞌpî, Isaías nurîꞌtîya.
2 Paapaya taꞌpî: —Aꞌkî, umaimu ekaremeꞌnen yaipontîuya kupî sîrîrî arawîrî.Mîîkîrîya ayeꞌmarî ton koneka kupî sîrîrî keren po.
3 “Uyepotorîkon erepamî yeꞌmarî ton konekatî.Toꞌsarî yarakkanmokatî eerepantoꞌpe”,taiya kupî sîrîrî —taꞌpî Paapaya.
Mîrîrî warantî menukaꞌpî Isaías nurîꞌtîya yawîrî Joãoya taꞌpî pemonkonyamîꞌ ekonekatoꞌpe Jesus Cristo erepamî rawîrî.
4 Isaíasya imenukaꞌpî yawîrî João iipîꞌpî keren pona. Arinîkon pemonkonyamîꞌ eperepîꞌpî iipia. Tiaronkon yenpatakonaꞌpîiya moro. Paapa maimu ekaremekîꞌpîiya. —Imakuiꞌpî ankupîꞌpîkon pîꞌ enpenatatî teesewankonoꞌmai —taꞌpîiya. —Moropai irumakatî, imakuiꞌpî ankupîꞌpîkon kuꞌtoꞌpe Paapaya tîîwanmîra. Moropai esenpatakonatî —taꞌpîiya.
5 Judéia pata poro tîîkoꞌmansenon wîtîꞌpî João pia, tamîꞌnawîrî. Jerusalém ponkon wîtîꞌpî nîrî. Imakuiꞌpî tînkupîꞌpîkon ekaremekîꞌpî toꞌya, moropai toꞌ yenpatakonaꞌpî Joãoya iren Jordão kaꞌ.
6 Mîrîrî yai João pon wanîꞌpî camelo siꞌpotîꞌpî pe. Moropai iworomî wanîꞌpî paaka piꞌpî pe. Itoꞌ wanîꞌpî kaira pe. Moropai wan wanîꞌpî iwuku pe. Penaron Paapa maimu ekaremeꞌnen Elias nurîꞌtî koꞌmamîꞌpî warantî aakoꞌmamîꞌpî.
7 Itekare ekaremeꞌpîtîꞌpîiya: —Uyeꞌmaꞌpî pîꞌ uyentainon iipî kupî sîrîrî —taapîtîꞌpîiya. —Ipîkku pe awanî yeꞌnen iꞌsaꞌsaꞌ yewa yeukauya eserîke pra awanî, itarumaiꞌpî pe wanî yeꞌnen.
8 Uurîya ayenpatakonakon tuna ke. Tîîse Mîîkîrîya Morî Yekaton Wannî yarima kupî sîrîrî ayesaꞌkon pe aakoꞌmantoꞌpe, ayewankon yaꞌ —taꞌpî Joãoya.
Jesus Esenpatakona
9 Moropai Jesus iipîꞌpî Nazaré poi. Mîrîrî Nazaré wanîꞌpî Galiléia pata po tîweꞌsen pe. João Batista pia aaipîꞌpî. Moropai mîîkîrî Joãoya Jesus yenpatakonaꞌpî iren Jordão kaꞌ.
10 Tuna kapai teeseuꞌka pe, kaꞌ esettapuruka eraꞌmaꞌpî Jesusya. Moropai Morî Yekaton Wannî autî eraꞌmaꞌpîiya tîpona, wakuꞌkaimî warantî awautî eraꞌmaꞌpîiya.
11 Kaꞌ po siꞌma Paapa eseurîmaꞌpî: —Amîrî unmu, uwakîri puꞌkuru kureꞌne apîꞌ uurî atausinpa —taꞌpîiya.
Makuiya Jesus Maa Yonpa Imakuiꞌpî Yaꞌ
12 Mîrîrî tîpo Morî Yekaton Wannîya Jesus yarîꞌpî keren pona.
13 Moro aakoꞌmamîꞌpî asakîꞌne pemonkon (40) wei kaisarî keren po. Kamoyamîꞌ pata yaꞌ awanîꞌpî. Imakuiꞌpî kupî Jesusya emapuꞌtî yonpaꞌpî Makuiya, pemonkonyamîꞌ yekaꞌnunkanenya teuren. Tîîse ikupîiya pra awanîꞌpî. Moropai iipiapai Makui wîtîꞌpî. Mîrîrîya kaꞌ poi inserîyamîꞌ autîꞌpî iipia moropai ipîikaꞌtîꞌpî toꞌya.
Jesus Esenyakaꞌma Piaꞌtî Galiléia Pata Po
14 João Batista yarakkamo meꞌpoꞌpî iteyatonya. Mîrîrî tîpo Jesus wîtîꞌpî Galiléia pata pona. Miarî morî Paapa yekare ekaremekî pinunpaꞌpîiya.
15 —Aminke pra tamîꞌnawîronkon esaꞌ pe Paapa iiꞌtoꞌ weiyu eseponî pîꞌ man. Tîpemonkonoyamîꞌ pîikaꞌtîiya kupî sîrîrî —taꞌpî Jesusya. —Imakuiꞌpî ankupîꞌpîkon pîꞌ enpenatatî teesewankonoꞌmai. Moropai irumakatî. Innape itekare kuꞌtî —taꞌpîiya.
16 Galiléia kuꞌpî rîꞌpîkîrî Jesus wîtîꞌpî. Tuutî pe Simão eraꞌmaꞌpîiya, moropai itakon André yarakkîrî. Moroꞌ yapiꞌtoꞌ tîuyaꞌnîkon yenunpîtî pîꞌ toꞌ wanîꞌpî, moroꞌ yapisî pîꞌ, moroꞌ yapiꞌnenan pe inkamoro wanîꞌpî mîîtoꞌpe.
17 —Aaseꞌnîkon upîkîrî —taꞌpî Jesusya toꞌ pîꞌ. —Moroꞌyamîꞌ yapisî pîꞌ eesenyakaꞌmakon koꞌmannîpî sîrîrî. Tarîpai ayenupauyaꞌnîkon pemonkonyamîꞌ maakonpa upemonkono pe —taꞌpîiya.
18 Teesemiꞌtapai moroꞌ yapiꞌtoꞌ tîuyaꞌnîkon nîmîꞌpî toꞌya. Toꞌ wîtîꞌpî Jesus pîkîrî.
19 Inîꞌ panpîꞌ tuutîkon yeꞌka pe, Zebedeu munkîyamîꞌ eraꞌmaꞌpîiya, Tiago moropai itakon João. Tîkanaukon yaꞌ toꞌ wanîꞌpî moroꞌ yapiꞌtoꞌ tîuyaꞌnîkon rumentannîꞌpîtî pîꞌ.
20 Inkamoro yannoꞌpîiya. Tunkon Zebedeu nîmîꞌpî toꞌya kanau yaꞌ tîpoitîrîtonon pokonpe tîîse, moropai Jesus pîkîrî toꞌ wîtîꞌpî.
Oꞌmaꞌ Tîrîka Jesusya
21 Toꞌ erepamîꞌpî Cafarnaum cidaderî pona. Tonpakon Judeuyamîꞌ erîꞌkaꞌtoꞌ weiyu yai, Jesus ewomîꞌpî toꞌ epereꞌtoꞌ yewîꞌ ta moropai tamîꞌnawîronkon yenupaꞌpîiya.
22 Kureꞌne toꞌ esenumenkaꞌpî Jesusya tenupatoꞌkon pîꞌ, maasa pra tînepuꞌtî pîꞌ eeseurîma epuꞌtîꞌpî toꞌya, Moisés nurîꞌtîya yenupantoꞌ pîꞌ yenupatonkon warantî pra.
23 Mîrîrî yai oꞌmaꞌ yarakkîrî tîweꞌsen warayoꞌ wanîꞌpî. Jesus eraꞌma tîuya pe mîîkîrî entaimeꞌpî.
24 —Jesus Nazaré poinon, îꞌ kuꞌse aaiꞌsaꞌ sîrîrî anna pîꞌ? —taꞌpîiya. —Anna tarumaꞌtîi aaiꞌsaꞌ sîrîrî? —taꞌpîiya. —Ayepuꞌnen uurî. Amîrî morî, Paapa piapai iipîꞌpî.
25 Jesusya taꞌpî ipîꞌ: —Moo eꞌkî, mîîkîrî warayoꞌ yapai epaꞌkakî.
26 Oꞌmaꞌya warayoꞌ perenperenmaꞌpî. Aronne panpîꞌ tîwentaimepîtî yeꞌka pe, eepaꞌkaꞌpî mîîkîrî yapai.
27 Mîrîrî pîꞌ tamîꞌnawîronkon esenumenkaꞌpî kureꞌne. Tîmurukun pe siꞌma toꞌ eseurîmaꞌpî. —Îꞌ taatoꞌpe see awanî mîrîrî? —taꞌpî toꞌya. —Aꞌkî, unetaꞌpîkon pepîn pîꞌ uyenupaiyaꞌnîkon mîrîrî. Paapa meruntîri ke oꞌmaꞌkon yaipontîiya moropai yuuku toꞌya —taꞌpî toꞌya.
28 Moropai pata kaisarî tamîꞌnawîronkon eseurîmaꞌpî Jesus yekare pîꞌ. Tamîꞌnawîrî Galiléia pata poro toꞌ eseurîmatoꞌ esetaꞌpî.
Pedro Yawoꞌpî Yepiꞌtî Jesusya
29 Jesus epaꞌkaꞌpî epereꞌnîtoꞌ yewîꞌ tapai moropai attîꞌpî Tiago, João pokonpe Simão yewîꞌ ta. Itakon André yewîꞌ pe nîrî awanîꞌpî.
30 Priꞌya pra Simão yawoꞌpî wanîꞌpî paran pîꞌ. Jesus erepansaꞌ pe, mîîkîrî priꞌyawon pepîn ekaremekîꞌpî toꞌya ipîꞌ.
31 Iipia Jesus wîtîꞌpî. Itenya pîꞌ yapisîꞌpîiya. Moropai iꞌmîꞌsaꞌkaꞌpîiya. Eekomiꞌmakapîꞌpî moropai toꞌ yekkari ton koneka piaꞌtîꞌpîiya.
Priꞌyawonkon Pepîn Yepiꞌtî Jesusya
32 Koꞌmamîiya wei ewomî tanne, priꞌyawonkon pepîn enepîꞌpî toꞌya Jesus pia. Oꞌmaꞌkon eꞌtoꞌkon toꞌ yaꞌ enepîꞌpî toꞌya nîrî.
33 Tamîꞌnawîronkon mororonkon epereꞌsaꞌ wanîꞌpî manaꞌta pia.
34 Moropai arinîkon priꞌyawonkon pepîn yepiꞌtîꞌpîiya. Tuꞌkan paran pîꞌ tîweꞌsanon yepiꞌtîꞌpîiya. Moropai tuꞌkankon oꞌmaꞌkon yenpaꞌkaꞌpîiya. Inkamoro oꞌmaꞌkonya Paapa narimaꞌpî pe Jesus wanî epuꞌtîꞌpî. Tîîse inkamoroya tekaremekî yuꞌse pra Jesus wanîꞌpî.
Jesus Asarî Galiléia Pata Poro
35 Penane marî, pata erenmapî pra tîîse, Jesus eꞌmîꞌsaꞌkaꞌpî, moropai attîꞌpî wîttîkon tapai keren pona. Miarî eepîremaꞌpî.
36 Tîweꞌmîꞌsaꞌkakon pe, Simão moropai yarakkîronkonya Jesus yuwaꞌpî.
37 Eporîꞌpî toꞌya moropai taꞌpî toꞌya ipîꞌ: —Ayuwa pîꞌ tamîꞌnawîronkon man.
38 Taꞌpî Jesusya: —Tiaron pata pona wîtînpaiꞌnîkon, miarî nîrî itekare ekaremeꞌtoꞌpeuya. Mîrîrî kuꞌse yiꞌnî pîꞌ wai —taꞌpîiya. Moropai toꞌ wîtîꞌpî.
39 Galiléia poro Jesus wîtîꞌpî tamîꞌnawîrî. Toꞌ epereꞌtoꞌ yewîꞌ tapîꞌ itekare ekaremeꞌpîtîꞌpîiya moropai oꞌmaꞌkon yenpaꞌkapîtîꞌpîiya.
Priꞌyawon Pepîn Yepiꞌtî Jesusya
40 Moropai ereꞌ pokon warayoꞌ wîtîꞌpî Jesus pia, paran pokon, leprosia iteseꞌ. Aweꞌsekunkaꞌpî Jesus rawîrî. —Uyepiꞌtîpai awanî ya, Uyepotorî, uyepiꞌtîkî —taꞌpîiya Jesus pîꞌ.
41 Jesusya eraꞌmaꞌpî tîꞌnokoꞌpî pe. Tenya tîrîꞌpîiya ipona. —Inna, ayepiꞌtîuya —taꞌpîiya ipîꞌ.
42 Mîrîrî pe rî erekîꞌ pe pra eenaꞌpî. Eesepiꞌtîꞌpî.
43 Meruntî ke Jesusya mîîkîrî panamaꞌpî.
44 —Anîꞌ pîꞌ kîsekaremekîi —taꞌpîiya. —Atîkî teepîremasanon pia ayeraꞌmatoꞌpe toꞌya. Pena Moisés nurîꞌtîya taꞌpî: “Leprosia pokon esepiꞌtîsaꞌ ya, asakîꞌne mayayamîꞌ tîrîiya teepîremasanon pia, teesepiꞌtîsaꞌ yeꞌnen”, taꞌpîiya. Mîrîrî warantî itîîta, eesepiꞌtîsaꞌ yeꞌnen. Atîkî, kaꞌneꞌ panpîꞌ —taꞌpîiya.
45 Tîîse mîîkîrî epaꞌkaꞌpî moropai tamîꞌnawîronkon pîꞌ ekaremekîꞌpîiya. Mîrîrî pata pai Jesus ewomî pra eenaꞌpî pemonkonyamîꞌ pata yaꞌ maasa pra arinîkon pemonkonyamîꞌ iipîꞌpî iipia. Poro po aakoꞌmamîꞌpî, tîîse tamîꞌnawîron pata yapai arinîkon wîtîꞌpî iipia.
