Jesus Cristo Yekare Marcos Nîmenukaꞌpî 10:1-52
10 Moropai Jesus wîtîꞌpî mîrîrî pata poi. Judéia pata poro attîꞌpî moropai iren Jordão ratai poro. Oꞌnon pata arinîkon epereꞌsaꞌ ya tîîpia, inkamoro yenupaꞌpî Jesusya. Inîꞌrî arinîkon eperepîꞌpî iipia moropai inîꞌrî teseru warantî rî toꞌ yenupaꞌpîiya.
2 Fariseuyamîꞌ wîtîꞌpî nîrî Jesus pia. Jesus anakaꞌmapai toꞌ wanîꞌpî. Taꞌpî toꞌya ipîꞌ: —Tînoꞌpî rumakasaꞌ warayoꞌya ya, yairî awanî mîrîrî?
3 —Îꞌ yeꞌka pe Moisés nurîꞌtîya ankupîkon ton ekaremekîꞌpî? —taꞌpî Jesusya.
4 —Moisésya taꞌpî:“Warayoꞌya taasaꞌ ya tînoꞌpî pîꞌ kaareta pona tîmenukai, unoꞌpî pe pra awanî sîrîrî tarîpai, taiya ya, tînoꞌpî pîꞌ irumakaiya eꞌpainon,”
taꞌpîiya —taꞌpî toꞌya Jesus pîꞌ
5 Tîîse Jesusya taꞌpî: —Yairon pepîn mîrîrî. Tîîse mîrîrî warantî ankupîkon ton menukaꞌpî Moisésya maasa pra morî kupîyaꞌnîkon eserîke pra awanîkon epuꞌtî tîuya yeꞌnen.
6 Tîîse tamîꞌnawîron koneka tîuya yai Paapaya warayoꞌ konekaꞌpî moropai wîriꞌ.
7 Mîrîrî yeꞌnen warayoꞌ noꞌpîta yai eemoꞌka tun moropai tîsan pia pai moropai tînoꞌpî yarakkîrî eena.
8 Mîrîrî yeꞌnen asakîꞌne toꞌ tîîse tiwinan warantî toꞌ ena mîrîrî. Mîrîrî yeꞌnen asakîꞌnankon warantî pra toꞌ wanî. Tîîse tiwinan warantî toꞌ enasaꞌ mîrîrî.
9 Uyepotorîkonya saꞌnîrî toꞌ wanî emapuꞌtîsaꞌ yeꞌnen. Anîꞌya toꞌ eturumaka emapuꞌtî yuꞌse awanî pepîn.
10 Mîrîrî tîpo wîttî ta tîîse, Jesus nenupaꞌsanya ekaranmapoꞌpî mîrîrî taiya manniꞌ pîꞌ.
11 Jesusya taꞌpî: —Anîꞌya tînoꞌpî rumakasaꞌ ya, moropai tiaron wîriꞌ yarakkîrî awanî ya, imakuiꞌpî kupîiya mîrîrî tînoꞌpî winîkîi.
12 Moropai wîriꞌya tînyo rumakasaꞌ ya, moropai tiaron warayoꞌ yarakkîrî awanî ya, imakuiꞌpî kupîiya mîrîrî tînyo winîkîi —taꞌpîiya.
Moreyamîꞌ Wîtî Jesus Pia
13 Moropai tiaronkonya moreyamîꞌ yarîꞌpî Jesus pia tenya tîîtoꞌpeiya toꞌ pona, toꞌ pîrematoꞌpeiya. Tîîse inenupaꞌsanya taꞌpî toꞌ pîꞌ: —Insamoro yeꞌkakon moreyamîꞌ kîseneꞌtî Jesus pia.
14 Tîîse epuꞌtî tîuya pe Jesus ekoreꞌmaꞌpî. —Tîwî moreyamîꞌ iiꞌtoꞌpe uupia —taꞌpîiya tînenupaꞌsan pîꞌ. —Toꞌ tîmaꞌnîpai pra eꞌtî. Maasa pra Paapa pemonkonoyamîꞌ wanî insanan moreyamîꞌ warantî. Insanan warainokon innape tîkuꞌnenan esaꞌ pe Paapa wanî —taꞌpîiya.
15 Ayenkuꞌtîuyaꞌnîkon pepîn. Anîꞌ eturumaka pra awanî ya Paapa yenyaꞌ tesaꞌ pe aweꞌtoꞌpe, tesaꞌkon yenyaꞌ moreyamîꞌ eturumaka manniꞌ warantî, Paapa pia tîîkoꞌmantoꞌkon eporî toꞌya pepîn.
16 Mîrîrî tîpo moreyamîꞌ yapisîꞌpî Jesusya tenaꞌ. Moropai taꞌpîiya Paapa pîꞌ: —Paapa, insanan moreyamîꞌ koꞌmannîꞌkî morî pe —taꞌpîiya.
Ipîkku Warayoꞌ Wîtî Jesus Pia
17 Mîrîrî tîpo Jesus eseꞌmaꞌtî tanne, teekaꞌtunse warayoꞌ erepamîꞌpî iipia. Ikaisarî aweꞌsekunkaꞌpî inama yeꞌka pe. Moropai Jesus ekaranmapoꞌpîiya: —Uyenupanen, morî amîrî —taꞌpîiya. —Îꞌ kupîuya eꞌpainon ipatîkarî enen uukoꞌmantoꞌpe Paapa pia? —taꞌpîiya.
18 —Îꞌ waniꞌ awanî yeꞌnen morî amîrî taaya manniꞌ upîꞌ? —taꞌpî Jesusya. —Tiwinan morî moro man, Paapa neken. Tiaron ton pra awanî.
19 Uyeserukon pe Paapa nekaremekîꞌpî epuꞌnen amîrî.Pemonkon kîꞌwîi,moropai tiaron noꞌpî yarakkîrî tîweꞌse pra eꞌkî,amaꞌyeꞌ pe pra eꞌkî,seruꞌyeꞌ pe teeseurîmai pra eꞌkî ayonpa pîꞌ,ayonpa tenkuꞌtîi pra eꞌkî,ayun, moropai asan saꞌnamakî
Paapa nekaremekîꞌpî sîrîrî, tamîꞌnawîrî unkupîkon pe —taꞌpî Jesusya.
20 —Inna, uyenupanen —taꞌpî warayoꞌya. —Mîrîrî yawîron uurî pena pata pai sîrîrî tîpose.
21 Jesus esenumenkaꞌpî ipîꞌ. Ituꞌse awanîꞌpî kureꞌne. —Maasa, inîꞌ tiwinanoꞌpî ankupî ton moro man —taꞌpîiya. —Ayemanne ke eꞌrepata tamîꞌnawîrî. Moropai itepeꞌpî mîtîrîi îꞌ ton pînon saꞌne tîweꞌtarumaꞌtîsanon pia. Mîrîrî kupîya ya, kaꞌ po eerepansaꞌ yai, morî puꞌkuru tîrî Paapaya aapia. Uyeseru pîꞌ esenupai maaipîi —taꞌpî Jesusya ipîꞌ.
22 Mîrîrî taa Jesusya pîꞌ mîîkîrî aꞌmantaꞌpî. Maasa pra mararon pepîn itemanne mîîtoꞌpe. Temanne yapurîꞌpîiya kureꞌne puꞌkuru. Mîrîrî yeꞌnen kureꞌne teesewankonoꞌmai attîꞌpî.
23 Tîwoiꞌnîkon pemonkonyamîꞌ eraꞌmaꞌpî Jesusya. Moropai taꞌpîiya tînenupaꞌsan pîꞌ: —Saꞌme puꞌkuru see awanî Paapa pia ipîkku pe tîweꞌsen eturumaka tesaꞌ pe aweꞌtoꞌpe.
24 Mararî pra inenupaꞌsan esenumenkaꞌpî imaimu pîꞌ. Tîîse inîꞌrî Jesusya taꞌpî toꞌ pîꞌ: —Saꞌme puꞌkuru tîniru esanon ewontoꞌpe Paapa pia ipemonkono pe, kureꞌne tînirurîkon pînînma toꞌya yeꞌnen.
25 Aꞌkî, saꞌme awanî camelo ewontoꞌpe akkusa yeutta yai, itentai tîwanî yeꞌnen. Mîrîrî warantî ipîkku pe tîweꞌsenon wanî. Saꞌme puꞌkuru awanî, inkamoro eturumaka pepîn Paapa pia tesaꞌkon pe aweꞌtoꞌpe —taꞌpî Jesusya toꞌ pîꞌ.
26 Mararî pra toꞌ esenumenkaꞌpî mîrîrî taiya pîꞌ. —Mîrîrî warantî awanî ya, anîꞌ eꞌpîikaꞌtî eꞌpainon moriya? —taꞌpî toꞌya.
27 Inîꞌrî Jesus esenumenkaꞌpî toꞌ pîꞌ: —Tîîwarîrî anîꞌ eꞌpîikaꞌtî pepîn. Tîîse Paapaya tamîꞌnawîronkon pîikaꞌtî eꞌpainon. Tamîꞌnawîron kupî Paapaya eꞌpainon —taꞌpîiya.
28 —Aꞌkî —taꞌpî Pedroya Jesus pîꞌ. —Tamîꞌnawîron rumakasaꞌ annaya moropai awenairî anna iiꞌsaꞌ sîrîrî.
29 10:29,30 Jesusya taꞌpî: —Ayenkuꞌtîuyaꞌnîkon pepîn. Uyapurîtoꞌ tîuya wenai itekare ekaremeꞌse anîꞌ wîtî ya tonpayamîꞌ piapai, mîîkîrîya, inîꞌ panpîꞌ tonpa ton eporî. Tonpayamîꞌ tîwîrisitonon, tîsan, tîyun moropai tînmukuyamîꞌ piapai attî ya, arinîke tonpa ton eporîiya, takon ton, tîwîrisi ton, tîsan ton, tînre ton. Moropai tewîꞌ, tîpata, rumakaiya ya, inîꞌ panpîꞌ tuꞌke tewîꞌ ton moropai tîpata ton eporîiya tuꞌke. Moropai tiaronkonya itarumaꞌtî umaimu yawîrî awanî wenai, sîrîrî non po mîrîrî warantî eporîiya. Moropai kaꞌ po ipatîkarî mîîkîrî koꞌmamî Paapa pia.
30 Eraꞌmakî 10:29
31 Tiaronkon wanî arinîkon esaꞌ pe sîrîrî non po. Tîîse Paapa pia teerepansaꞌkon yai, anîꞌ esaꞌ pe toꞌ wanî pepîn. Tiaronkon wanî anîꞌ esaꞌ pe pra sîrîrî non po. Tîîse Paapa pia teerepansaꞌkon yai, arinîkon esaꞌ pe toꞌ ena —taꞌpî Jesusya.
Inîꞌrî Jesus Eseurîma Tîîsaꞌmanta Kupî Pîꞌ
32 10:32-34 Jesus nenupaꞌsan wanîꞌpî Jerusalém pona tuutîsanon pe, moropai Jesus wanîꞌpî toꞌ rawîrî. Asakîꞌne puꞌ pona tîîmoꞌtaiꞌnîkon moꞌkaꞌpîiya inîꞌrî moropai toꞌ yenupaꞌpîiya tîpîꞌ, oꞌnon yeꞌka pe tîwanî kupî pîꞌ. —Aꞌkî —taꞌpîiya. —Jerusalém pona wîtîn sîrîrî. Uurî kaꞌ poi iipîꞌpî pemonkon pe. Tiaronya utîrî kupî sîrîrî teepîremasanon esanon moropai Moisés nurîꞌtîya yenupatoꞌ pîꞌ yenupatonkon pia. “Iwî eꞌpai man,” taa toꞌya kupî sîrîrî. Mîrîrî tîpo teepîremasanon esanon, Moisés nurîꞌtîya yenupatoꞌ pîꞌ yenupatonkonya utîrî kupî sîrîrî Judeuyamîꞌ pepîn pia. Inkamoro woꞌmaꞌta kupî sîrîrî upîꞌ. Tetakukon yenumî toꞌya upona. Uꞌpoꞌpîtî toꞌya moropai uwî toꞌya. Uwîsaꞌ toꞌya tîpo, iteseurîno wei yai eꞌmîꞌsaꞌka kupî sîrîrî —taꞌpî Jesusya. Kureꞌne inenupaꞌsan esenumenkasaꞌ wanîꞌpî ipîꞌ. Tiaronkon toꞌ wenairî itîꞌsan wanîꞌpî eranneꞌ pe Jerusalém pona Jesus wîtî yeꞌnen.
33 Eraꞌmakî 10:32
34 Eraꞌmakî 10:32
Jesus Warantî Arinîkon Esaꞌ Pe Eꞌpai
Tiago, João Wanî
35 Mîrîrî tîpo Tiago, moropai João wîtîꞌpî iipia. Zebedeu munkîyamîꞌ inkamoro. —Anna yenupanen —taꞌpî toꞌya. —Apîꞌ anna nesatî tîrîya yuꞌse anna man, anna pia —taꞌpî toꞌya.
36 —Îꞌ kupîuya yuꞌse awanîkon? —taꞌpî Jesusya toꞌ pîꞌ.
37 —Tamîꞌnawîronkon esaꞌ pe eena yai, ereutapai anna wanî, tiwin meruntî winî, tiwin kamaiꞌ yaꞌ toꞌ esaꞌ pe anna eꞌtoꞌpe awarantî —taꞌpî toꞌya.
38 Jesusya taꞌpî: —Anesatîkon kupîuya pepîn eꞌpainon. Epuꞌtîyaꞌnîkon pra naatîi. Tiaronkonya utarumaꞌtî kupî sîrîrî. Mîrîrî yapîtanîpîuya kupî sîrîrî. Amîrîꞌnîkon kanan? Uyeseꞌ pîꞌ awanîkon wenai tiaronkonya atarumaꞌtîkon ya, yapîtanîpîyaꞌnîkon eꞌpainon?
39 —Inna. Yapîtanîpî annaya eꞌpainon —taꞌpî toꞌya. —Innape eꞌtarumaꞌtî warantî aweꞌtarumaꞌtîkon nîrî —taꞌpî Jesusya. —Uwî tiaronkonya warantî tiaronkonya awîkon nîrî.
40 Tîîse umeruntîri winî moropai kamaiꞌ winî ereutatî tauya pepîn apîꞌnîkon. Uyunya neken taa eꞌpainon tînmoꞌkaꞌsan pîꞌ —taꞌpî Jesusya.
41 Toꞌ yonpayamîꞌ miaꞌ tamîꞌnawîronkonya toꞌ nesatîꞌpî etaꞌpî moropai toꞌ ekoreꞌmaꞌpî Tiago moropai João pîꞌ.
42 Jesusya toꞌ yannoꞌpî tîîpia. —Sîrîrî non po tamîꞌnawîronkon esanonya tîpemonkonoyamîꞌ yaipontî toꞌ taimerunpai epuꞌtî pîꞌ naatîi. Toꞌ yepotorîtononya toꞌ panama toꞌ tetaꞌkai —taꞌpîiya.
43 —Tîîse mîrîrî warantî pra eꞌtî. Ayonpakon yentai eꞌpai awanîkon ya, toꞌ maꞌre eꞌtî.
44 Toꞌ esaꞌ pe eꞌpai awanîkon ya, toꞌ poitîrî pe eꞌtî —taꞌpî Jesusya toꞌ pîꞌ.
45 —Uurî kaꞌ poi iipîꞌpî aruinankon ton pe —Jesusya taꞌpî. —Tîpoitîrî ke eꞌtoꞌpe kaiꞌma uuiꞌsaꞌ pra wai. Tîîse tamîꞌnawîronkon pîikaꞌtîtoꞌpeuya kaiꞌma uuipîꞌpî. Arinîkon nîkupîꞌpî imakuiꞌpî yepeꞌ pe uusaꞌmantatoꞌpe kaiꞌma uuipîꞌpî —taꞌpî Jesusya.
Enkaruꞌnan Yepiꞌtî Jesusya, Iteseꞌ Bartimeu
46 Mîrîrî tîpo toꞌ wîtîꞌpî Jericó pata poro. Jericó pata pai toꞌ eseꞌmaꞌtîꞌpî, Jesus, inenupaꞌsan, moropai tiaronkon arinîkon. Moropai enkaruꞌnan ereutasaꞌ wanîꞌpî eꞌma ena pona, iteseꞌ Bartimeu. Timeu munmu mîîkîrî. Tuutîsanon yekaꞌnunka pîꞌ aakoꞌmamîꞌpî tîniru tîîtoꞌpe toꞌya.
47 —Jesus Nazarépon erepansaꞌ man —taꞌpî tiaronkonya. Mîrîrî eta tîuya pe, Bartimeu entaimepîtî piaꞌtîꞌpî. Taꞌpîiya: —Jesus, Davi nurîꞌtî paarîꞌpî amîrî, pîikaꞌtîton amîrî. Aꞌnokoꞌpî pe saꞌne uyeraꞌmakî —taꞌpîiya.
48 Arinîkon ekoreꞌmaꞌpî ipîꞌ. —Moo eꞌkî —taꞌpî toꞌya ipîꞌ. Tîîse inîꞌ panpîꞌ awentaimepîtîꞌpî, yuukuiya pra. —Davi nurîꞌtî paarîꞌpî, aꞌnokoꞌpî pe ukuꞌkî saꞌne —taꞌpîiya.
49 Jesus emîꞌpamîꞌpî imaimu eta tîuya yeꞌnen. —Mîîkîrî yannotî —taꞌpîiya. —Ayanno pîꞌ Jesus man —taꞌpî toꞌya enkaruꞌnan pîꞌ. —Atausinpakî. Eꞌmîꞌsaꞌkakî —taꞌpî toꞌya.
50 Sonpan ke aweꞌwontîsaꞌ wanîꞌpî. Mîrîrî tîmoꞌkai aweꞌmîꞌsaꞌkaꞌpî. Moropai Jesus pia attîꞌpî. Tiwinarî mîîkîrî yenu esepiꞌtîꞌpî. —Ayewîꞌ ta ennaꞌpopai awanî ya, tîwanmîra atîkî —taꞌpî Jesusya. Tîîse Jesus wenairî attîꞌpî.
51 —Îꞌ kupîuya yuꞌse awanî apîꞌ? —taꞌpî Jesusya ipîꞌ. —Uyenupanen, uyenu konekakî saꞌne —taꞌpî enkaruꞌnanya ipîꞌ.
52 —Innape ukuꞌsaꞌya yeꞌnen, ayepiꞌtîuya sîrîrî —taꞌpî Jesusya ipîꞌ. Tiwinarî mîîkîrî yenu esepiꞌtîꞌpî. —Ayewîꞌ ta ennaꞌpopai awanî ya, tîîwanmîra atîkî —taꞌpî Jesusya. Tîîse Jesus wenairî attîꞌpî.
