Jesus Cristo Yekare Marcos Nîmenukaꞌpî 11:1-33
11 Oliveira yeꞌka kîrî pona toꞌ erepamîꞌpî. Aminke pra toꞌ wanîꞌpî Jerusalém pîꞌ. Moro awanîꞌpî pata mîrikkî pemonkonyamîꞌ koꞌmantoꞌ Betfagé moropai Betânia mîrikkî aminke pra nîrî. Oliveira kîrî pona teerepamîkon pe, Jesusya asakîꞌnankon tînenupaꞌsan yarimaꞌpî taponseꞌ ton jumenta eraꞌmai.
2 Toꞌ yarima tîuya pe taꞌpîiya toꞌ pîꞌ: —Aminke pra pata mîrikkî man. Mîrîrî pona atîtî. Eerepansaꞌkon pe jumenta more yewaꞌtîsaꞌ eporîyaꞌnîkon anîꞌ enukuꞌpî pepîn ipona. Mîîkîrî meukatîi moropai meneꞌtîi.
3 “Îꞌ ton pe mîîkîrî yarîyaꞌnîkon mîrîrî?” taa anîꞌya ya, “Uyesaꞌkon man ituꞌse,” makatîi, “Maasa tîîkoꞌmanse innaꞌpoiya” makatîi —taꞌpî Jesusya.
4 Imaimu pe toꞌ wîtîꞌpî. Jumenta more yewaꞌtîsaꞌ eporîꞌpî toꞌya eꞌma ta aminke pra manaꞌta pîꞌ. Mîîkîrî yeukaꞌpî toꞌya.
5 Mororonkonya taꞌpî: —Îꞌ ton pe jumenta more yarîyaꞌnîkon mîrîrî kaiꞌma?
6 Jesus maimu ekaremekîꞌpî toꞌya, moropai yaatoꞌpe toꞌya toꞌ rumakaꞌpî toꞌya.
7 Jumenta more yarîꞌpî toꞌya Jesus pia. Teerepansaꞌkon pe, tîponkon tîrîꞌpî toꞌya ipona Jesus enuꞌtoꞌpe, moropai eenukuꞌpî ipona.
8 Arinîkonya tîponkon tîrîꞌpî eꞌma tapîꞌ. Tiaronkonya tînaꞌtîꞌpîkon yuꞌ yare tîrîꞌpî nîrî. Mîrîrî kupîꞌpî toꞌya itekîn wîtîtoꞌpe iporo, Jesus yapurî tîuyaꞌnîkon yeꞌnen.
9 Tiaronkon wîtîꞌpî irawîrî moropai tiaronkon iteꞌmaꞌpî pîꞌ.—Morî pe puꞌkuru Paapa man —taꞌpî toꞌya mararî pra tîwentaimepîꞌse.—Morî pe puꞌkuru man taapaiꞌnîkon Paapa narimaꞌpî pîꞌ, Jesus pîꞌ.Mîîkîrî yapurîpaiꞌnîkon —taꞌpî toꞌya.
10 —Penaronkon esaꞌ pe Davi nurîꞌtî wanîꞌpî warantî upatakon esaꞌ pemîîkîrî ena kupî sîrîrî uyesaꞌkon pe.Mîîkîrî yapurîpaiꞌnîkon.“Morî pe puꞌkuru man,” taapaiꞌnîkon.Morî pe puꞌkuru Paapa man taa kaꞌ po tîîkoꞌmansenonya eꞌpai awanî
—taꞌpî toꞌya.
11 Mîrîrî tîpo Jesus erepamîꞌpî Jerusalém pona. Epîremantoꞌ yewîꞌ ta eewomîꞌpî. Tîîse pata koꞌmansaꞌ wanîꞌpî. Mîrîrî yeꞌnen, tamîꞌnawîron eraꞌma tîuya tîpo eepaꞌkaꞌpî. Moropai Betânia pona attîꞌpî, asakîꞌne puꞌ pona tîîmoꞌtaiꞌnîkon tînenupaꞌsan pokonpe. Moro toꞌ weꞌnaꞌpî.
Figo Yeꞌ Paꞌnîpî Jesusya
12 Pata erenmapî pe, Betânia poi toꞌ eseꞌmaꞌtîꞌpî. Jerusalém pona toꞌ wîtîꞌpî. Tuutîkon pe, emiꞌne Jesus enaꞌpî.
13 Aminke siꞌma figo yeꞌ aretasaꞌ eraꞌmaꞌpîiya. Mîrîrî yekare pîꞌ attîꞌpî iteperu pikkai. Tîîse iteperu pra awanîꞌpî. Yare neken eporîꞌpîiya maasa pra eepeta yai pra awanîꞌpî mîîtoꞌpe.
14 Mîrîrî yei pîꞌ taꞌpî Jesusya: —Ipatîkarî teepetai pra akoꞌmankî tarîpai. Mîrîrî taiya etaꞌpî inenupaꞌsanya.
Epîremantoꞌ Yewîꞌ Tapai
Tîweꞌrepasanon Tîrîka Jesusya
15 Mîrîrî tîpo toꞌ erepamîꞌpî Jerusalém pona. Epîremantoꞌ yewîꞌ ta eewomîꞌpî. Epîremantoꞌ yewîꞌ ta siꞌma tîweꞌrepasanon moropai yennanenan tîrîkaꞌpîiya. Moropai tîniru miakanmanan yaponseꞌ raꞌtîꞌpîiya. Mayayamîꞌ ke tîweꞌrepasanon yaponseꞌ raꞌtîꞌpîiya. Inkamoro tîrîkaꞌpîiya imakuiꞌpî kupî toꞌya yeꞌnen epîremantoꞌ yewîꞌ ta, toꞌ eꞌrepa yeꞌnen.
16 Epîremantoꞌ yewîꞌ tapîꞌ temannekon mankanan pîꞌ taꞌpîiya: —Sîrîrî poro katîtî. Eꞌma pepîn sîrîrî. Epîremantoꞌ yewîꞌ sîrîrî —taꞌpîiya.
17 Mîrîrî tîpo tamîꞌnawîronkon yenupaꞌpîiya: —Penaroꞌ Paapa maimu ekaremeꞌnenya Paapa maimu menukaꞌpî.“Tamîꞌnawîronkon pemonkonyamîꞌ ton peepîremantoꞌ yewîꞌ pe uyewîꞌ wanî mîrîrî,”
taꞌpî Paapaya. Mîrîrî warantî imenukaꞌpî Paapa maimu ekaremeꞌnenya —taꞌpî Jesusya. —Tîîse amaꞌyeꞌkon yewîꞌ pe ikuꞌsaꞌyaꞌnîkon mîrîrî. Tarî epîremai iipîꞌsan yenkuꞌtîyaꞌnîkon aweꞌrepatoꞌkon ke.
18 Mîrîrî etaꞌpî teepîremasanon esanonya moropai Moisés nurîꞌtîya yenupatoꞌ pîꞌ yenupatonkonya. Tamîꞌnawîronkon esenumenka kureꞌne Jesusya tenupakon pîꞌ epuꞌtîꞌpî toꞌya. Mîrîrî yeꞌnen inamaꞌpî toꞌya. —Maasa oꞌnon yeꞌka pe mîîkîrî wîîꞌnîkon eꞌpainon? —taꞌpî toꞌya.
19 Pata ewaronpamî pe, Jesus moropai inenupaꞌsan ennaꞌpoꞌpî cidade poi Betânia pona. Betânia po toꞌ weꞌnaꞌpî.
Jesus Eseurîma Epîremantoꞌ Pîꞌ
20 Pata erenmaꞌsaꞌ pe, Jerusalém pona toꞌ wîtîꞌpî inîꞌrî. Tuutîkon pe, figo yeꞌ eraꞌmaꞌpî toꞌya. Awaꞌpiꞌtasaꞌ wanîꞌpî irupukon pîkîrî.
21 Jesus nîkupîꞌpî pîꞌ Pedro enpenataꞌpî. —Uyenupanen, maasa figo yeꞌ eraꞌmakî. Anpaꞌnîpîꞌpî saꞌmantasaꞌ sîrîrî eraꞌmakî —taꞌpîiya Jesus pîꞌ.
22 Jesusya taꞌpî ipîꞌ: —Innape Paapa kuꞌtî.
23 Ayenkuꞌtîuyaꞌnîkon pepîn. “Seeniꞌ wîꞌ yarimakî parau ka,” taayaꞌnîkon ya Paapa pîꞌ, ikupîiya. Tîîse Paapa tîmuꞌtunpai pra esatîyaꞌnîkon eꞌpai awanî. Innape ikupîyaꞌnîkon eꞌpai awanî.
24 Mîrîrî yeꞌnen mîrîrî warantî apanamauyaꞌnîkon sîrîrî. Paapa yarakkîrî eeseurîmakon pe “Innape unesatî kupîiya pe nai,” makatîi. Imuꞌtunpa pra awanî ya, ikupîiya.
25 Paapa yarakkîrî eeseurîmakon yai, awinîkîiꞌnîkon imakuiꞌpî ayonpakon nîkupîꞌpî wenai teekoreꞌmai aakoꞌmamîkon ya, mîrîrî kuꞌtî aawanmîraꞌnîkon. Awinîkîiꞌnîkon ayonpakon nîkupîꞌpî imakuiꞌpî kupîyaꞌnîkon ya aawanmîraꞌnîkon, ayunkon kaꞌ po tîîkoꞌmansenya tîwinîkîi ankupîꞌpîkon imakuiꞌpî kupî nîrî tîîwanmîra.
26 Aawanmîraꞌnîkon ayonpakon nîkupîꞌpî awinîkîiꞌnîkon kupîyaꞌnîkon pra awanî ya, ankupîꞌpîkon tîwinîkîi kupî Paapa pepîn nîrî tîîwanmîra —taꞌpî Jesusya.
Anîꞌ Maimu Pe Jesus Esenyakaꞌma
Anepuꞌpai Judeuyamîꞌ Esanon Wanî
27 Jesus moropai inenupaꞌsan erepamîꞌpî inîꞌrî Jerusalém pona. Epîremantoꞌ yewîꞌ ta Jesus asarî tanne teepîremasanon esanon moropai Moisés nurîꞌtîya yenupatoꞌ pîꞌ yenupatonkon wîtîꞌpî aꞌyekeꞌtonon Judeuyamîꞌ panamanenan yarakkîrî iipia eseurîmai.
28 —Anîꞌ maimu pe insanan tîrîkaꞌpîya sîrîrî epîremantoꞌ yewîꞌ tapai? Anîꞌya ayaipontîꞌpî mîrîrî warantî ikupîpa? —taꞌpî toꞌya ipîꞌ.
29 —Ayekaranmapouyaꞌnîkon eꞌmaiꞌ pe —taꞌpî Jesusya toꞌ pîꞌ. —Apîꞌnîkon unekaranmapo ekaremekîyaꞌnîkon ya, anîꞌ maimu pe insanan tîrîkaꞌpîuya ekaremekîuya nîrî apîꞌnîkon —taꞌpîiya.
30 —Anîꞌ maimu pe João Batistaya tamîꞌnawîronkon yenpatakonapîtîꞌpî mîrîrî? Paapa maimu pe kaꞌrî? Pemonkon maimu pe kaꞌrî? Oꞌnon yeꞌka pe epuꞌtî pîꞌ naatî? —taꞌpîiya.
31 Mîrîrî taa Jesusya pîꞌ toꞌ eseurîmaꞌpî teepereꞌse îꞌ yeꞌka pe yuuku tîuyaꞌnîkon epuꞌtîkonpa kaiꞌma. João Batista nurîꞌtî eseurîmapîtîꞌpî Paapa maimu pe kaiꞌma tamîꞌnawîronkon esenumenkaꞌpî ipîꞌ. Mîrîrî epuꞌtîꞌpî teepîremasanon esanon, Moisés nurîꞌtîya yenupatoꞌ pîꞌ yenupatonkon moropai Judeuyamîꞌ panamanenan aꞌyekeꞌtononya. Mîrîrî yeꞌnen inkamoro João Batista nurîꞌtî yapurînenan namaꞌpî toꞌya. —Paapa maimu pe Joãoya toꞌ yenpatakonaꞌpî taasaꞌ ya, “Îꞌ waniꞌ awanî yeꞌnen João kupîyaꞌnîkon pra awanîꞌpîkon innape moriya?” taa Jesusya eserîke awanî —taꞌpî toꞌya.
32 —Tîîse tiaron pemonkon maimu pe toꞌ yenpatakonaꞌpîiya taasaꞌ ya, tamîꞌnawîronkon ekoreꞌma upîꞌnîkon. Imakuiꞌpî kupî toꞌya eserîke awanî upîꞌnîkon —taꞌpî toꞌya.
33 Mîrîrî yeꞌnen taꞌpî toꞌya Jesus pîꞌ: —Epuꞌtî annaya pra man. Mîrîrî pîꞌ taꞌpî Jesusya: —Moriya anîꞌ maimu pe unkupî kupîuya ekaremekîuya pepîn nîrî —taꞌpîiya.
