Jesus Cristo Yekare Marcos Nîmenukaꞌpî 12:1-44
12 Moropai toꞌ yeurîma piaꞌtîꞌpîiya panton pe: —Warayoꞌya tînmîri ton yaꞌtîꞌpî. Tekkari ton pîmîꞌpîiya mararon pepîn uva yeꞌka. Iwatîꞌpîiya inonkon tîꞌkon ke. Kureꞌnan tîꞌ yai aꞌta ton yakaꞌpîiya uva yekku asuꞌkatoꞌ ton. Tînmîri eraꞌmanenan yaponseꞌ ton kawînan konekaꞌpîiya, ipo siꞌma oꞌmaꞌkon ewomî eraꞌmatoꞌpe toꞌya. Mîrîrî tîpo tiaronkon warayoꞌkon pîꞌ taꞌpîiya: “Umîri pîꞌ eesenyakaꞌmakon ya uyekkari yonpa ke ayeꞌmauyaꞌnîkon. Itonpa wanî uyekkari pe moropai itonpa wanî ayekkarikon pe,” taꞌpîiya. “Inna. Îꞌ waniꞌ pra man,” taꞌpî toꞌya. Moropai attîꞌpî tiaron pata pona.
2 Mîrîrî tîpo itekkari emîrîꞌpî. Mîrîrî yai tîpoitîrî yarimaꞌpîiya, inkamoro warayoꞌkon pia tekkari yonpa eraꞌmai. Eerepamîꞌpî.
3 Tîîse mîîkîrî yapisîꞌpî toꞌya. Iꞌpoꞌpîtîꞌpî toꞌya. Îꞌ rî tîtîse pra tîîse mîîkîrî tîrîkaꞌpî toꞌya. Îꞌ ton pra awennaꞌpoꞌpî tîkaraiwarî pia.
4 Moropai tiaron tîpoitîrî yarimaꞌpî umî esaꞌya. Mîîkîrî paꞌtîpîtîꞌpî toꞌya ipuꞌpai yai. Imakuiꞌpî kupîꞌpî toꞌya yarakkîrî.
5 Moropai inîꞌrî tiaron yarimaꞌpîiya. Mîîkîrî wîꞌpî toꞌya. Mîrîrî warantî tiaronkon yarimapîtîꞌpîiya tiwin pîꞌ. Moropai mîrîrî warantî inkamoro pîꞌ imakuiꞌpî kupîꞌpî toꞌya toꞌ yarakkîrî. Tiaronkon poꞌpîtîꞌpî toꞌya moropai tiaronkon wîꞌpî toꞌya.
6 Moro awanîꞌpî tiwinanoꞌpî warayoꞌ. Umî esaꞌ munmu mîîkîrî. Kureꞌne tînmu yapurîꞌpîiya. Upoitîrîtonon yapurî toꞌya pra awanîꞌpî. Tîîse mîserî unmu yapurî toꞌya kaiꞌma eesenumenkaꞌpî. Mîrîrî yeꞌnen tînmu yarimaꞌpîiya.
7 Tîîse inkamoro warayoꞌkon pia mîîkîrî erepamî pe, ipîꞌ toꞌ eseurîmaꞌpî teepereꞌse. “Aꞌkî. Umî esaꞌ saꞌmanta yai, inmurîꞌpî pata pe umî ena. Mîrîrî yeꞌnen iwîpaiꞌnîkon. Mîrîrî tîpo umî esaꞌ saꞌmanta yai, upatakon pe eena itesaꞌ ton pra awanî yeꞌnen,” taꞌpî toꞌya.
8 Mîrîrî yeꞌnen mîîkîrî umî esaꞌ munmu yapisîꞌpî toꞌya. Moropai iwîꞌpî toꞌya. Itesaꞌ rîꞌpî yenumîꞌpî toꞌya umî yapai —taꞌpîiya.
9 —Mîrîrî epuꞌtî tîuya pe, îꞌ kupî uva yeꞌka esaꞌya eserîke awanî? —taꞌpî Jesusya toꞌ pîꞌ. —Tînmîri yaꞌ attî moropai inkamoro warayoꞌkon, inmu wîîtîponkon tîꞌkaiya eserîke awanî tamîꞌnawîrî. Mîrîrî tîpo tiaronkon warayoꞌkon eporîiya tînmîri eraꞌmanenan ton —taꞌpî Jesusya.
10 —Sîrîrî Paapa maimu eꞌmenukasaꞌ epuꞌnenan amîrîꞌnîkon. Sîrîrî warantî Paapa eseurîmaꞌpî. Sîrîrî warantî imenukaꞌpî toꞌya:Tîꞌ pe wîttî konekanenanya taꞌpî: “Sîrîrî tîꞌ wanî pepîn morî pe, wîttî konekatoꞌpe”, taa toꞌya.Moropai yenumîꞌpî toꞌya.Tîîse toꞌ nenumîꞌpî wanîꞌpî morî pe puꞌkuru tamîꞌnawîron tîꞌ yentai.Tarîpai wîttî koꞌmannîpîiya tamîꞌnawîron tîꞌ yentai eesenumî namai.
11 Uyepotorîkonya toꞌ nîrumakaꞌpî kupîꞌpî tamîꞌnawîron yentai.Kureꞌne esenumenkan inkupîꞌpî pîꞌ.
Mîrîrî warantî Paapa maimu menukaꞌpî penaroꞌkonya —taꞌpî Jesusya.
12 Tîwinîkîiꞌnîkon Jesus eseurîma panton pe epuꞌtîꞌpî teepîremasanon esanon, Moisés nurîꞌtîya yenupatoꞌ pîꞌ yenupatonkon, moropai Judeuyamîꞌ panamanenan aꞌyekeꞌtononya. Mîrîrî yeꞌnen anapiꞌpai toꞌ wanîꞌpî. Tîîse tamîꞌnawîronkon namaꞌpî toꞌya arinîke toꞌ wanî yeꞌnen. Jesus rumakaꞌpî toꞌya. Moropai toꞌ wîtîꞌpî.
Jesus Eseurîma Imposto Pîꞌ
13 Mîrîrî tîpo fariseuyamîꞌ yarimaꞌpî tiaronkonya Jesus pia Herodes pemonkonoyamîꞌ pokonpe. Jesus anakaꞌmapai toꞌ wanîꞌpî. Yairî pra eeseurîma yuꞌse toꞌ wanîꞌpî, “Aꞌkî, imakuiꞌpî pe eeseurîma,” taakonpa kaiꞌma.
14 Toꞌ erepamîꞌpî iipia. —Anna yenupanen —taꞌpî toꞌya ipîꞌ. —Ayeseru epuꞌnenan anna. Seruꞌyeꞌ pepîn amîrî. Ipîkkukon pepîn yentai ipîkkukon yapurînen pepîn amîrî. Paapa yeseru ekaremekîya tiaronkon ipîkkukon tînamai pra. Ayekaranmapo annaya sîrîrî. Uyesaꞌkon César nekaremekîꞌpî tamîꞌnawîronkon neꞌmaton pe, tîîpia yeꞌma annaya ya, morî pe awanî? Paapa nekaremekîꞌpî unkupîkon ton pe yairî anna wanî mîrîrî? —taꞌpî toꞌya.
15 —Oꞌnon yeꞌka pe epuꞌtî pîꞌ nan? Yeꞌma annaya kaꞌrî? Yeꞌma annaya pepîn kaꞌrî? Tîîse seruꞌ pe tenkuꞌtî toꞌya epuꞌtîꞌpî Jesusya. —Yairî pra amaimukon yuukuuya yuꞌse awanîkon epuꞌtî pîꞌ wai eeseurîmakonpa kaiꞌma —taꞌpîiya. —Maasa, tîniru eneꞌtî eraꞌmatoꞌpeuya.
16 Tîniru enaꞌpî enepîꞌpî toꞌya. Jesusya yapisîꞌpî. —Anîꞌ eseꞌ eꞌmenukasaꞌ sîrîrî? —taꞌpîiya toꞌ pîꞌ. —Uyesaꞌkon César mîîkîrî —taꞌpî toꞌya.
17 —Inna, moriya —taꞌpî Jesusya. —Itîîkî iipia, imîrî pe awanî yeꞌnen. César nekaremekîꞌpî unkupîkon ton pe kuꞌtî moropai Paapa nekaremekîꞌpî unkupîkon ton pe kuꞌtî nîrî.
Mîrîrî taiya pîꞌ taꞌpî toꞌya: —Akaya, epuꞌnen mîîkîrî.
Jesus Eseurîma Eꞌmîꞌsaꞌkantoꞌ Pîꞌ
18 Mîrîrî tîpo saduceuyamîꞌ wîtîꞌpî Jesus pia. Saduceuyamîꞌ inkamoro Judeuyamîꞌ. Tiaron pe rî toꞌ esenumenka. Saꞌmantan tîpo ipatîkarî tîpannî kaiꞌma toꞌ esenumenka. Eꞌmîꞌsaꞌkan pepîn saꞌmantan tîpo kaiꞌma toꞌ esenumenka. Inkamoro wîtîꞌpî Jesus pia. Moropai ekaranmapoꞌpî toꞌya.
19 —Anna yenupanen —taꞌpî toꞌya. —Moisés nurîꞌtîya uyeserukon ton menukaꞌpî. Mîrîrî warantî taꞌpîiya inmu pîn warayoꞌ saꞌmanta ya itakonoꞌpîya inoꞌpî rîꞌpî yapisî eꞌpai awanî tînoꞌpî pe. Mîrîrî tîpo more yan pe irui noꞌpîrîꞌpî enasaꞌ ya tînre yenpoiya yai, “Urui munmuꞌpî mîserî”, taa warayoꞌya tînmu pe tîîse. Mîrîrî Moisés nurîꞌtî nîmenukaꞌpî uyeserukon ton pe.
20 Tarîpai, moro awanîꞌpî warayoꞌkon asakîꞌne miaꞌ pona tîîmoꞌtaiꞌnîkon kaisarî. Toꞌ ruinankon noꞌpîtaꞌpî tîîse inmu pra siꞌma aasaꞌmantaꞌpî.
21 Mîrîrî tîpo tîrui noꞌpî rîꞌpî yarakkîrî itakonoꞌpî wanîꞌpî. Tîîse mîrîrî warantî nîrî aasaꞌmantaꞌpî inmu pra siꞌma. Moropai mîîkîrî yakonoꞌpîya tîruinankon nurîꞌtî noꞌpî rîꞌpî yapisîꞌpî tînoꞌpî pe mîrîrî warantî. Moropai mîrîrî warantî nîrî inmu pra siꞌma aasaꞌmantaꞌpî.
22 Tamîꞌnawîrî toꞌ saꞌmantaꞌpî, tiwin pîꞌ tîruinankon nurîꞌtî noꞌpî rîꞌpî yarakkîrî tîwanîkon tîpo, toꞌ eꞌtîꞌkaꞌpî. Moropai warayoꞌkon saꞌmanta tîpo, mîîkîrî wîriꞌ nîrî saꞌmantaꞌpî.
23 Asakîꞌne miaꞌ pona tîîmoꞌtai kaisarî warayoꞌkon eꞌsaꞌ wanîꞌpî. Mîîkîrî wîriꞌ yarakkîrî inkamoro wanîꞌpî inyo pe tamîꞌnawîrî. Innape isaꞌmantaꞌsan eꞌmîꞌsaꞌka ya, oꞌnon yeꞌka warayoꞌ noꞌpî pe mîîkîrî wîriꞌ wanî eꞌpainon toꞌ eꞌmîꞌsaꞌka yai? —taꞌpî saduceuyamîꞌya Jesus pîꞌ.
24 —Paapa maimu epuꞌtîyaꞌnîkon pra naatîi —taꞌpî Jesusya. —Moropai meruntî ke puꞌkuru Paapa wanî epuꞌtîyaꞌnîkon pra naatîi. Mîrîrî yeꞌnen eesenkuꞌtîkon mîrîrî.
25 Isaꞌmantaꞌsan eꞌmîꞌsaꞌkasaꞌ yai, anîꞌ wanî pepîn tînoꞌpî ke. Moropai tînyo ke wîriꞌ wanî pepîn. Toꞌ koꞌmamî kaꞌ ponkon Paapa maimu eneꞌnenan inserîyamîꞌ warantî —taꞌpî Jesusya.
26 —Maasa isaꞌmantaꞌsan eꞌmîꞌsaꞌkatoꞌ pîꞌ ayeurîmauyaꞌnîkon. Moisés nurîꞌtî nîmenukaꞌpî itekare epuꞌnenan amîrîꞌnîkon. Manniꞌ parîꞌ aramorîꞌpî aramî ekaremekî tîuya pe, tarakkîrî Paapa eseurîmaꞌpî ekaremekîꞌpîiya. Paapaya taꞌpî:“Uurî Paapa wanî Abraão nurîꞌtî yepotorî pe,moropai Isaque nurîꞌtî yepotorî pe,moropai Jacó nurîꞌtî yepotorî pe,” taꞌpîiya.
taꞌpî Moisés nurîꞌtîya.
27 Ipatîkarî pemonkon tîpamî ya, itesaꞌ pe Paapa wanî pepîn eꞌpainon aatîpansaꞌ yeꞌnen. Enen tîîpia tîîkoꞌmansenon esaꞌ pe awanî. Mîrîrî yeꞌnen mîrîrî taa Paapaya manniꞌ wenai enen Abraão nurîꞌtî wanî, moropai Isaque nurîꞌtî wanî, moropai Jacó nurîꞌtî wanî Paapa pia epuꞌtî mîrîrî. Mararî pra amîrîꞌnîkon esenkuꞌtîsaꞌ mîrîrî —taꞌpî Jesusya.
Jesus Eseurîma
Paapa Nekaremekîꞌpî Unkupîkon Ton Pîꞌ
28 Moisés nurîꞌtîya yenupatoꞌ pîꞌ yenupaton warayoꞌ erepamîꞌpî toꞌ pia. Jesus yarakkîrî saduceuyamîꞌ esiyuꞌpîtî etaꞌpîiya. Morî pe Jesusya saduceuyamîꞌ maimu yuuku etaꞌpîiya. Moropai Jesus ekaranmapoꞌpîiya. —Uyeserukon ton pe Paapa nekaremekîꞌpî moro man. Tîîse oꞌnon wanî toꞌ yentai panpîꞌ? Oꞌnon yawîrî koꞌmannî yuꞌse Paapa wanî kureꞌne panpîꞌ? —taꞌpîiya.
29 Jesusya taꞌpî: —Sîrîrî toꞌ yentaino panpîꞌ. See warantî aweꞌmenukasaꞌ:Etatî, Israel yonparîꞌsan. Ayesaꞌkon Paapa tiwinan. Tiaron ikaisaron ton pra man.
30 Paapa yapurîtî tamîꞌnawîrî ayewankon ke.Mîîkîrî kuꞌtî ayesaꞌkon pe.Kureꞌne eesenumenkatoꞌkon ke yapurîtî.Moropai tamîꞌnawîrî ameruntîrikon ke esenyakaꞌmatî iipia.
Mîrîrî warantî aweꞌmenukasaꞌ —taꞌpî Jesusya.
31 —Itonpa nîrî moro man. Sîrîrî itonpa:Tamîꞌnawîronkon pînînmatî aawarîrî eetîꞌnînma manniꞌ warantî.
Mîrîrî warantî aweꞌmenukasaꞌ man —taꞌpî Jesusya.
32 —Innape man, uyenupanen —taꞌpî mîîkîrî Moisés nurîꞌtîya yenupatoꞌ pîꞌ yenupanenya. —Tiwinan Paapa seruꞌ pepîn. Innape ikaisaron ton pra awanî taaya manniꞌ warantî.
33 Kureꞌne ituꞌse eꞌnî eꞌpai awanî. Ipîꞌ esenumenkan eꞌpai awanî mararî pra. Meruntî ke iipia esenyakaꞌman eꞌpai awanî. Moropai uuwarîrîꞌnîkon etîꞌnînman kaisarî tamîꞌnawîronkon pînînma eꞌpai awanî seruꞌ pepîn. Mîrîrî warantî ikupî ya, Paapa wakîri pe panpîꞌ eꞌnî. Tîwakîri pe ikupîiya iipia untîrîkon pe uyekînkon poꞌtî yentai, moropai uyekînkon wîî yentai —taꞌpîiya.
34 Epuꞌnen pe mîîkîrîya tîmaimu yuuku epuꞌtî tîuya yeꞌnen, Jesusya taꞌpî ipîꞌ: —Ayesaꞌ pe Paapa yapisîya eserîke epuꞌtî pîꞌ wai. Mîrîrî tîpo tamîꞌnawîronkon enaꞌpî eranneꞌ pe Jesus pîꞌ. Inîꞌ anekaranmapopai pra toꞌ awanîꞌpî.
Jesus Eseurîma Anîꞌ Pe Cristo Wanî Pîꞌ
35 Moropai Jesusya tamîꞌnawîronkon yenupaꞌpî epîremantoꞌ yewîꞌ ta. Taꞌpîiya toꞌ pîꞌ: —Moisés nurîꞌtîya yenupatoꞌ pîꞌ yenupatonkonya taa: “Penaroꞌ Judeuyamîꞌ esaꞌ Davi nurîꞌtî parîꞌpî neken mîîkîrî Cristo, Paapa nîmenkaꞌpî,” taa toꞌya. Îꞌ waniꞌ awanî yeꞌnen mîîkîrî taa toꞌya? —taꞌpî Jesusya.
36 —Cristo pîꞌ Davi nurîꞌtî eseurîmaꞌpî pena. Morî Yekaton Wannîya eeseurîma emapuꞌtîꞌpî. Sîrîrî Davi nurîꞌtî maimu rîꞌpî:Uyesaꞌ pîꞌ Paapaya taꞌpî:“Uupia ereutakî meruntî winîayeyatonon aretîꞌkauya pîkîrî” taꞌpîiya.
Sîrîrî Davi maimu rîꞌpî.
37 Davi paa pe neken Cristo wanî ya, îꞌ waniꞌ awanî yeꞌnen uyesaꞌ taa Daviya manniꞌ ipîꞌ? —taꞌpî Jesusya. Arinîkonya Jesusya tenupakon etaꞌpî tîwakîrikon pe.
Jesus Eseurîma
Moisés Nurîꞌtîya Yenupatoꞌ Pîꞌ Yenupatonkon Pîꞌ
38 Toꞌ yenupa tîuya pe Jesusya taꞌpî: —Tîwarî panpîꞌ eꞌtî Moisés nurîꞌtîya yenupatoꞌ pîꞌ yenupatonkonya ayenkuꞌtîkon namai. Kusan panpîꞌ sonpan tîponkon yekaꞌma toꞌya tîwakîrikon pe tiaronkon yentai tîwanîkon epuꞌtoꞌpe tamîꞌnawîronkonya. Tamîꞌnawîronkon esekaremekî yuꞌse toꞌ wanî aronne panpîꞌ eꞌrepantoꞌ pata ya tîwanîkon ya.
39 Epereꞌnîtoꞌ yewîꞌ ta tîwanîkon yai, tamîꞌnawîronkon yenu kaisarî ereutapai toꞌ wanî aronne panpîꞌ teeseraꞌmakonpa. Arinîkon koreꞌta entamoꞌkai tuutîkon ya, eꞌmaiꞌ pe entamoꞌkapai toꞌ wanî tamîꞌnawîronkon rawîrî.
40 Tîîse inyo isaꞌmantaꞌsan wîriꞌsanyamîꞌ yemanne moropai toꞌ pata moꞌka toꞌya. Mîrîrî tanne kureꞌne toꞌ epîrema epîremantoꞌ yewîꞌ ta morî pe tîwanîkon kaiꞌma tamîꞌnawîronkon esenumenkatoꞌpe tîpîꞌnîkon. Mîrîrî warantî inkamoro Moisés nurîꞌtîya yenupatoꞌ pîꞌ yenupatonkon wanî mîrîrî. Mararî pra Paapaya toꞌ tarumaꞌtî kupî sîrîrî —taꞌpî Jesusya.
Jesus Eseurîma Paapa Pia Wîriꞌ Nîtîrîꞌpî Pîꞌ
41 Mîrîrî tîpo Jesus ereutaꞌpî tîniru yapiꞌtoꞌ yenseꞌ pia. Paapa yapurî pe arinîkonya tîtînirurîkon tîrî itenseꞌ ya eraꞌmaꞌpîiya. Mararon pepîn tîniru tîrîꞌpî arinîkonya tîniru esanonya.
42 Inyo isaꞌmantaꞌpî wîriꞌ iipî eraꞌmaꞌpîiya. Tîweꞌtarumaꞌtîsen mîîkîrî, tîniru esaꞌ pepîn. Mîîkîrîya asakîꞌne tîniru enaꞌpî mîrikkî tîrîꞌpî itenseꞌ ya. Tiwin iteꞌka tîwentamoꞌkatoꞌ yepeꞌ kaisaron tîrîꞌpîiya mîrîrî.
43 Mîrîrî eraꞌma tîuya pe, tînenupaꞌsan pîꞌ taꞌpî Jesusya: —Mîîkîrî eraꞌmatî. Ayenkuꞌtîuyaꞌnîkon pepîn. Tîweꞌtarumaꞌtîsen mîîkîrî wîriꞌ inyo isaꞌmantaꞌpî. Tîîse tîniru yenseꞌ ya tamîꞌnawîronkon nîtîrîꞌpî yentai intîrîꞌpî eraꞌma Paapaya tîwakîri pe.
44 Inkamoro tînirurî wanî kureꞌne moropai itonpa pe neken itîîsaꞌ toꞌya. Tîîse îꞌ ton pra siꞌma wîriꞌya tîtînirurî tîrîꞌpî tamîꞌnawîrî. Tekkari yeꞌmatoꞌ tîîsaiꞌya mîrîrî Paapa pia —taꞌpî Jesusya.
