Jesus Cristo Yekare Marcos Nîmenukaꞌpî 13:1-37
13 Epîremantoꞌ yewîꞌ tapai teepaꞌkakon pe, Jesus nenupaꞌpî warayoꞌya taꞌpî ipîꞌ: —Aꞌkî, seeniꞌ epîremantoꞌ yewîꞌ konekasaꞌ toꞌya morî pe, inonkon panpîꞌ tîꞌ ke eraꞌmakî —taꞌpîiya tepotorî Jesus pîꞌ.
2 Jesusya taꞌpî ipîꞌ: —Kureꞌnan seeniꞌ wîttî eraꞌma pîꞌ naatîi. Tîîse tiaronkonya seeniꞌ wîttî yaranka kupî sîrîrî tamîꞌnawîrî. Yaranka toꞌya tîpo tonpa po tiwinan tîꞌ eꞌnîmî pepîn. Yenumî toꞌya tamîꞌnawîrî.
Tînenupaꞌsan Yeurîma Jesusya
Oꞌnon Yeꞌka Pe Pata Ena Kupî Pîꞌ
3 Mîrîrî tîpo Oliveira kîrî po Jesus ereutasaꞌ wanîꞌpî tiaronkon yarakkîrî. Moro siꞌma epîremantoꞌ yewîꞌ eraꞌmaꞌpî toꞌya. Tonpakon koreꞌtapai teemoꞌkai Pedro, moropai Tiago, moropai João, moropai André, inkamoroya taꞌpî Jesus pîꞌ:
4 —Maasa, îꞌ pensa mîrîrî taaya manniꞌ kupî toꞌya? —taꞌpî toꞌya. —Oꞌnon yeꞌka pe mîrîrî kupî toꞌya pe awanî epuꞌtî annaya eꞌpainon?
5 Jesusya toꞌ yeurîma piaꞌtîꞌpî. —Tîwarî eꞌtî, anîꞌya ayenkuꞌtîkon namai.
6 Uurî pe arinîkon eꞌkupî kupî sîrîrî seruꞌ pe. “Uurî Cristo. Paapaya uyarimasaꞌ sîrîrî,” taa toꞌya kupî sîrîrî. Mîrîrî warantî arinîkon yenkuꞌtî toꞌya kupî sîrîrî.
7 Aminkankon pepîn eseyaꞌnama moropai aminkankon eseyaꞌnama yekare etayaꞌnîkon. Tîîse mîrîrî pîꞌ teesiꞌnîꞌse pra meꞌtîi. Mîrîrî warantî pata wanî pe man. Tîîse maasa tamîꞌnawîron ataretîꞌka pepîn mîrîrî.
8 Pemonkonyamîꞌ eseyaꞌnama tiaron pata po tîîkoꞌmansenon yarakkîrî. Moropai pemonkonyamîꞌ esanon eseyaꞌnama tiaronkon esanon yarakkîrî. Tuꞌke iteꞌka pata eꞌtîtîtîkka kupî sîrîrî. Iwan wanî kupî sîrîrî kureꞌne pata kaisarîꞌne. Mîrîrî warantî tamîꞌnawîronkon eꞌtarumaꞌtî piaꞌtî mîrîrî.
9 Tîwarî akoꞌmantî. Judeuyamîꞌya ayapisîkon moropai tesanonkon pia ayarîkon toꞌya. Epereꞌnîtoꞌ yewîꞌ ta aꞌpoꞌpîtîkon toꞌya. Pemonkonyamîꞌ esanon governadoryamîꞌ pia moropai pemonkonyamîꞌ esanon reiyamîꞌ pia ayarîkon toꞌya upemonkono pe awanîkon wenai. Inkamoro pîꞌ nîrî uyeseru ekaremekîyaꞌnîkon yuꞌse Paapa wanî.
10 Paapa yekare ekaremekîyaꞌnîkon eꞌpai awanî tamîꞌnawîronkon pîꞌ sîrîrî non po. Mîrîrî ekaremeꞌsaꞌyaꞌnîkon tîpo, sîrîrî non ataretîꞌka.
11 Moropai tesanonkon pia ayarîkon toꞌya yai, “Aka, yuꞌtouꞌya ton epuꞌtîuya pra wai,” kîkatî. Aawarîrîꞌnîkon eeseurîmakon eꞌpai pra awanî. Tîîse Morî Yekaton Wannîya anekaremekîton ekaremekî ya, mîrîrî mekaremeꞌtîi.
12 Warayoꞌkonya takonkon wîî meꞌpo. Tiaronkonya tînmukukon wîî meꞌpo. Tiaronkon ekoreꞌma tunkon, moropai tîsankon pîꞌ. Tunkon, tîsankon wîî meꞌpo toꞌya.
13 Moropai tewanmakon pe tamîꞌnawîronkonya akupîkon, upemonkono pe awanîkon wenai. Tîîse aasaꞌmantakon pîkîrî uyapurîyaꞌnîkon ya, Paapaya apîikaꞌtîkon.
14 Penaroꞌ Paapa maimu ekaremeꞌnen wanîꞌpî iteseꞌ Daniel. Mîîkîrî maimu rîꞌpî eꞌmenukasaꞌ pîꞌ esenupatî. Mîîkîrîya taꞌpî:Tamîꞌnawîronkon yewanma pe tîweꞌsen imakuiꞌpî tîrî tiaronkonya kupî sîrîrî epîremantoꞌ yewîꞌ ta. Mîrîrî yeꞌka tîîtoꞌ pepîn mîrîrî teuren, tîîse moro itîrî toꞌya
taꞌpî Daniel nurîꞌtîya. Mîrîrî kupî toꞌya yai, wîꞌkon koreꞌta Judéia pata ponkon epe eꞌpai awanî —taꞌpî Jesusya.
15 —Mîrîrî tauya manniꞌ kupî toꞌya ya, poro pona teepaꞌkasaꞌkon yeꞌka pe, kaꞌneꞌ pe toꞌ epe eꞌpai awanî, temannekon eraꞌmai teewonse pra wîttî ta.
16 Tînmîrikon ya teesenyakaꞌmakon yai mîrîrî kupî toꞌya ya, kaꞌneꞌ pe toꞌ epe eꞌpai awanî tîponkon tînmoꞌkaꞌpîkon tanunse pra.
17 Aka more yan pe tîweꞌsanon moropai manaꞌpokonkon toꞌ munkîyamîꞌ wîriꞌsanyamîꞌ. Inkamoro eꞌtarumaꞌtî kupî sîrîrî mîrîrî yai. Toꞌ epe eserîke pra awanî, more yan pe tîwanîkon yeꞌnen, manaꞌpokonkon pe toꞌ munkîyamîꞌ wanî yeꞌnen.
18 Mepîrematîi konoꞌ yai mîrîrî imakuiꞌpî iipî namai. Maasa pra konoꞌ yai aaipî ya, anîꞌ epe eserîke pra awanî kureꞌne tuna wanî yeꞌnen.
19 Mîrîrî warantî eena yai, enen tîweꞌsanon eꞌtarumaꞌtî ipîra. Sîrîrî non konekaꞌpî Paapaya pata pai sîrîrî tîpose anîꞌ eꞌtarumaꞌtî pra awanî, inkamoro eꞌtarumaꞌtîtoꞌ ton kaisarî. Moropai mîrîrî warantî toꞌ eꞌtarumaꞌtî tîpo inîꞌ anîꞌ eꞌtarumaꞌtî pepîn mîrîrî warantî.
20 Tîkoꞌman pe tamîꞌnawîronkon eꞌtarumaꞌtî ya mîrîrî warantî, enen anîꞌrî koꞌmamî pepîn. Tîîse tînmoꞌkaꞌsan pînînma Paapaya kureꞌne. Inkamoro tînmoꞌkaꞌsan wenai, kureꞌne tîkoꞌman pe tamîꞌnawîronkon eꞌtarumaꞌtî tîrîiya pepîn.
21 Mîrîrî yai anîꞌya taasaꞌ ya apîꞌnîkon: “Aꞌkî, Paapa nîmenkaꞌpî tarî man, Cristo,” innape mîîkîrî kîꞌkuꞌtî. “Aꞌkî siiniꞌ pata Cristo man” taa tiaronya ya, mîîkîrî maimu kîꞌkuꞌtî innape.
22 Maasa pra seruꞌ uurî pe tîweꞌkuꞌsanon iipî. “Uurî Cristo,” taa toꞌya kupî sîrîrî. Moropai seruꞌ pe Paapa maimu ekaremeꞌnen pe tîweꞌkuꞌsanon iipî kupî sîrîrî nîrî. Ikupî eserîkan pepîn kupî toꞌya tamîꞌnawîronkon neraꞌma ton pe. Moropai mîrîrî wenai tiaronkon esenkuꞌtî. “Innape Paapa narimaꞌpî pe man,” taa toꞌya. Tîpemonkono pe Paapa nîmoꞌkaꞌsan anakaꞌmapai inkamoro seruꞌyeꞌkon wanî, mîrîrî kupî tîuyaꞌnîkon eserîke awanî ya.
23 Mîrîrî namai tîwarî akoꞌmantî. Maasa mîrîrî warantî eena pra tîîse amîrîꞌnîkon pîꞌ ekaremekî pîꞌ wai epuꞌtîkonpa. Mîrîrî yeꞌnen tîwarî akoꞌmantî.
Tînenupaꞌsan Yeurîma Jesusya Inîꞌrî Tuipî Pîꞌ
24 Mîrîrî yai tamîꞌnawîronkon eꞌtarumaꞌtî tîpo,wei esiꞌnîpî pe man.Moropai aꞌkare pra kapoi ena pe man.
25 Moropai sirikkîyamîꞌ eꞌsoroka pe man kaꞌ poi.Kaꞌ pîꞌ tîweꞌsanon eꞌtîtî tîkka tamîꞌnawîrî.
26 Mîrîrî tîpo, pemonkon pe kaꞌ poi iipîꞌpî uurî eraꞌma tamîꞌnawîronkonya katupuru koreꞌta. Upîꞌ toꞌ eseurîma mîrîrî yai: “Ikaisaron meruntî ton pra man. Ikaisaron ipîkku ton pra man,” taa toꞌya.
27 Mîrîrî yai upoitîrîtonon inserîyamîꞌ yarimauya upemonkono pe unmoꞌkaꞌsan muurukuntîi. Tamîꞌnawîrî pata kaisarî toꞌ wîtî upemonkonoyamîꞌ unmoꞌkaꞌsan eraꞌmai, sîrîrî non po moropai kaꞌ po.
28 Aꞌkî, arawen yeꞌ yeseru epuꞌnenan amîrîꞌnîkon. Arawen yeꞌ ariꞌkutasaꞌ ya aminke pra, “Konoꞌ pîtî wanî sîrîrî,” taayaꞌnîkon.
29 Mîrîrî warantî nîrî mîrîrî ekaremekîuya manniꞌ kupî toꞌya eraꞌmayaꞌnîkon yai, “Cristo ennaꞌpo kupî sîrîrî kaꞌ poi. Eerepamî kupî sîrîrî,” taayaꞌnîkon mîrîrî eraꞌmayaꞌnîkon pîꞌ.
30 Ayenkuꞌtîuyaꞌnîkon pepîn. Tamîꞌnawîrî sîrîrîpe enen tîîkoꞌmansenon saꞌmanta pepîn mîrîrî tauya manniꞌ iipî rawîrî.
31 Kaꞌ moropai non eꞌtîꞌka, tîîse umaimu esuwaꞌka pepîn. Ipatîkarî yairî puꞌkuru aakoꞌmamî.
32 Îꞌ yai moropai oꞌnon poro wei tîîse uuipî inîꞌrî sîrîrî non pona esepuꞌtî pepîn. Kaꞌ ponkon inserîyamîꞌya epuꞌtî pepîn. Uurîya nîrî, epuꞌtî pra man. Uyunya neken tamîꞌnawîrî epuꞌtî.
33 Tîwarî panpîꞌ akoꞌmantî. Îꞌ pensa ennaꞌpo epuꞌtîyaꞌnîkon pra naatîi.
34 See warantî awanî pe man: Tiaron pata pona warayoꞌ wîtî yai, tewîꞌ tapai tîpoitîrîtonon pîꞌ taiya, tewîꞌ eraꞌma pîꞌ toꞌ koꞌmantoꞌpe. Toꞌ kaisarî toꞌ esenyakaꞌmatoꞌ ton ekaremekîiya. Moropai tiaron pîꞌ taiya: “Manaꞌta po akoꞌmankî. Morî pe uyewîꞌ eraꞌmakî” taiya.
35 Uurî wanî wîttî esaꞌ warantî. Amîrîꞌnîkon wanî ipoitîrîtonon warantî. Îꞌ pensa ennaꞌposaꞌ iipî epuꞌtîyaꞌnîkon pra naatîi. Yai pra pata ewaronpansaꞌ tanne uuipî. Yai pra anoinna yai, yai pra kariwana etun tanne, yai pra pata erenmapî tanne uuipî.
36 Mîrîrî yeꞌnen tîwarî akoꞌmantî, erepamî namai unîmîkîyaꞌnîkon pra tîîse.
37 Apîꞌnîkon tauya manniꞌ ekaremekîuya nîrî tamîꞌnawîronkon pîꞌ: Enpen panpîꞌ akoꞌmantî.
