Jesus Cristo Yekare Marcos Nîmenukaꞌpî 14:1-72
14 Konoꞌ kaisarî Judeuyamîꞌ eperepîꞌpî isaꞌmotoꞌ ton pîn trigo puusaꞌ moropai carneiro pîꞌ entamoꞌkai. Penane tîîkoꞌmanse Judeuyamîꞌ entamoꞌkatoꞌkon weiyu wanîꞌpî, iteseꞌ Páscoa. Mîrîrî yai teepîremasanon esanon eseurîmaꞌpî Moisés nurîꞌtîya yenupatoꞌ pîꞌ yenupatonkon yarakkîrî. —Amaꞌ pe Jesus yapisî eꞌpai man iwîtoꞌpe —taꞌpî toꞌya.
2 —Tîîse entamoꞌkan yai arinîkon koreꞌta siꞌma yapisî eserîke pra man. Tamîꞌnawîronkon epereꞌsaꞌ tanne yapisî ya, toꞌ ekoreꞌma eserîke awanî upîꞌnîkon. Uurîꞌnîkon yarakkîrî toꞌ epî eserîke awanî —taꞌpî toꞌya.
Jesus Karapaima Wîriꞌya Aꞌpusin Ke
3 Betânia po Jesus wanîꞌpî Simão yewîꞌ ta. Manniꞌ Simão paran pîꞌ siꞌpî, iteseꞌ leprosia. Mîîkîrî yewîꞌ ta Jesus wanîꞌpî tîwentamoꞌka pîꞌ. Moropai awentamoꞌka tanne wîriꞌ iipîꞌpî iipia. Aꞌpusin enepîꞌpîiya, iteseꞌ nardo tîꞌ konekasaꞌ itenseꞌ, iteseꞌ alabastro. Nardo ke isaꞌmantaꞌsan kîꞌpanenan Judeuyamîꞌ. Epeꞌke puꞌkuru awanî. Itenseꞌ pottî waikîtîꞌpî wîriꞌya. Moropai mîrîrî nardo kamoꞌpîiya Jesus puꞌpai pona.
4 Mîrîrî pîꞌ tiaronkon ekoreꞌmaꞌpî. —Îꞌ ton mîrîrî aꞌpusin kanpîtî mîîkîrîya îꞌ pe pra rî? —taꞌpî toꞌya tonpakon pîꞌ.
5 Mîîkîrî wîriꞌ pîꞌ taꞌpî toꞌya: —Kane kane amîrî. Anna pia mîrîrî tîîsaꞌya ya, anna eꞌrepaꞌpî eꞌpainon. Tiwin konoꞌ warayoꞌ esenyakaꞌmatoꞌ yepeꞌ kaisaron, 300 denari kaisarî yeꞌmaꞌpî tiaronkonya eꞌpainon. Mîrîrî tîrîꞌpî annaya eꞌpainon tîweꞌtarumaꞌtîsanon pia teuren —taꞌpî toꞌya.
6 Tîîse Jesusya taꞌpî toꞌ pîꞌ: —Tîwî mîîkîrî wîriꞌ nîsi. Îꞌ ton pe ipîꞌ eekoreꞌmakon? Morî pe puꞌkuru inkupîꞌpî wanî uurî ton pe.
7 Wei kaisarî tîweꞌtarumaꞌtîsanon tîniru esanon pepîn wanî sîrîrî non po. Inkamoro anpîikaꞌtîpai awanîkon ya, morî tîrîyaꞌnîkon eꞌpainon toꞌ pia. Tîîse uurî, uutî kupî sîrîrî aapiapaiꞌnîkon. Uutî tîpo, morî tîrîyaꞌnîkon pepîn eꞌpainon uupia.
8 Ikupî tîuya eserîkan kuꞌsaiꞌya manniꞌ, isaꞌmantaꞌpî karapaima yuꞌnaꞌtî rawîrî. Mîrîrî warantî ukarapaimasaiꞌya mîrîrî uyuꞌnaꞌtî toꞌya rawîrî.
9 Oꞌnon pata uyekare eseta ya, sîrîrî non po, mîserî wîriꞌ nîkupîꞌpî yekare eseta nîrî tamîꞌnawîronkonya inkupîꞌpî epuꞌtoꞌpe. Ayenkuꞌtîuyaꞌnîkon pepîn —taꞌpî Jesusya.
Judasya Jesus Ekaremekî Iteyatonon Pîꞌ
10 Mîrîrî tîpo inkamoro asakîꞌne puꞌ pona tîîmoꞌtaiꞌnîkon koreꞌtawon, iteseꞌ Judas Iscariotes, wîtîꞌpî teepîremasanon esanon pia. —Jesus anapiꞌpai awanîkon ya, apîikaꞌtî tîuyaꞌnîkon —taꞌpîiya toꞌ pîꞌ.
11 —Inna, morî pe man —taꞌpî toꞌya. —Anna pîikaꞌtîya ya tîniru ke ayeꞌma annaya —taꞌpî toꞌya. Mîrîrî yeꞌnen Judas esenumenkaꞌpî kureꞌne, oꞌnon yeꞌka pe inkamoro pîikaꞌtîtoꞌ tîuya ton pîꞌ Jesus yapiꞌtoꞌpe toꞌya.
Jesus, Inenupaꞌsan Entamoꞌka Páscoa Pîꞌ
12 Isaꞌmotoꞌ ton pîn trigo puusaꞌ pîꞌ toꞌ entamoꞌkatoꞌ esippiaꞌtî yai, páscoa pîꞌ tîwanîkonpa carneiroyamîꞌ tîꞌkaꞌpî toꞌya. Mîrîrî yai Jesus nenupaꞌsanya taꞌpî ipîꞌ: —Oꞌnon pata entamoꞌkantoꞌ koneka annaya yuꞌse awanî? Oꞌnon pata páscoa pîꞌ eꞌnî kupî sîrîrî? —taꞌpî toꞌya.
13 Jesusya asakîꞌne tînenupaꞌsan moꞌkaꞌpî toꞌ yarimapa kaiꞌma. —Cidade pona atîtî. Moro tuna mankanen warayoꞌ eporîyaꞌnîkon. Mîîkîrî wenairî matîtîi wîttî ta eerepamî pîkîrî.
14 Wîttî ta eerepamîkon pe wîttî esaꞌ meurîmatîi. “Uyenupanenkonya tîmaimu yarima pîꞌ man aapia. Upataꞌseꞌ ton yuꞌse wai, moro unenupaꞌsan yarakkîrî entamoꞌkatoꞌpe, páscoa pîꞌ anna eꞌtoꞌpe, taa pîꞌ uyenupanenkon man,” makatîi —taꞌpî Jesusya toꞌ pîꞌ.
15 —Moropai upataꞌseꞌkon ton ekaremekîiya apîꞌnîkon, kureꞌnan sala, kawînan. Aasîrî eekonekasaꞌ eraꞌmayaꞌnîkon. Tamîꞌnawîron îꞌ rî yuꞌse awanîkon ya moro awanî aasîrî. Moro entamoꞌkantoꞌ ton mîkonekatîi —taꞌpî Jesusya.
16 Moropai Jesus nenupaꞌsan eseꞌmaꞌtîꞌpî. Cidade pona toꞌ wîtîꞌpî. Taa Jesusya manniꞌ warantî puꞌkuru eporîꞌpî toꞌya, tamîꞌnawîrî. Moro toꞌ entamoꞌkatoꞌ ton konekaꞌpî toꞌya páscoa pîꞌ toꞌ eꞌtoꞌpe.
17 Moropai pata ewaronpamî pe, Jesus wîtîꞌpî toꞌ pia tîîpia eꞌnîmîꞌsan tînenupaꞌsan yarakkîrî.
18 Entamoꞌkantoꞌ yaponseꞌ pia tîwentamoꞌkakon pe Jesusya taꞌpî toꞌ pîꞌ: —Amîrîꞌnîkon koreꞌtawon tarîronya uyekaremekî kupî sîrîrî uyeyatonon pîꞌ. Ayenkuꞌtîuyaꞌnîkon pepîn. Uyarakkîrî tîwentamoꞌkasenya ikupî kupî sîrîrî —taꞌpîiya.
19 Mîrîrî pîꞌ toꞌ esewankonoꞌmaꞌpî. —Uurîya ikupî pepîn, innape nai? —taꞌpî toꞌya ipîꞌ tiwin pîꞌ siꞌma.
20 —Unenupaꞌsan amîrîꞌnîkon, asakîꞌne puꞌ ponaꞌnîkon. Tîîse tiwin akoreꞌtawonkon ayonpakonya uyekaremekî kupî sîrîrî. Uyarakkîrî awentamoꞌka manniꞌ tiwinan prato po, mîîkîrîya uyekaremekî kupî sîrîrî.
21 Uurî kaꞌ poi iipîꞌpî aruinankon pe. Paapa maimu eꞌmenukasaꞌ manniꞌ yawîrî, uusaꞌmanta kupî sîrîrî. Tîîse aka saꞌne mîîkîrî uyekaremekîton. Pena isanya mîîkîrî tînre yenposaꞌ pra awanî ya, morî pe panpîꞌ awanîꞌpî eꞌpainon. Eesenposaꞌ pra awanî ya, aweꞌtarumaꞌtî pepîn teuren. Tîîse kureꞌne aweꞌtarumaꞌtî kupî sîrîrî —taꞌpî Jesusya.
Jesus Eseurîma Tîmînî Pîꞌ
22 Tîwentamoꞌkakon pe Jesusya trigo puusaꞌ yapisîꞌpî moropai eepîremaꞌpî. —Morî puꞌkuru amîrî, Paapa. Anna yekkari ton tîrî pîꞌ nai —taꞌpîiya Paapa pîꞌ. Mîrîrî tîpo ipîrikkapîtîꞌpîiya moropai itîrîꞌpîiya toꞌ kaisarî. —Maa. Sîrîrî upun —taꞌpîiya.
23 Mîrîrî tîpo pisa yapisîꞌpîiya. —Morî puꞌkuru amîrî, Paapa. Anna wuku ton tîrî pîꞌ nai —taꞌpîiya Paapa pîꞌ. Mîrîrî tîpo itîrîꞌpîiya toꞌ kaisarî. Tamîꞌnawîronkonya enîrîꞌpî.
24 Jesusya taꞌpî toꞌ pîꞌ: —Sîrîrî umînî. Umînî etiꞌkamo kupî sîrîrî arinîkon nîkupîꞌpî imakuiꞌpî yepeꞌ pe. Mîrîrî wenai Paapaya tamîꞌnawîron kupî eꞌpainon apîikaꞌtîtoꞌpeiyaꞌnîkon ekaremeꞌpîtîuya yawîrî —taꞌpîiya.
25 —Inîꞌrî uva yekku enîrîuya pepîn tamîꞌnawîronkon esaꞌ pe tîwanî yenpo Paapaya pîkîrî. Mîrîrî yai amenan uva yekku enîrîuya —taꞌpîiya.
26 Moropai toꞌ eserenkaꞌpî Paapa yapurî pe. Mîrîrî tîpo toꞌ epaꞌkaꞌpî. Oliveira kîrî pona toꞌ wîtîꞌpî. Toꞌ erepamîꞌpî.
Jesusya Pedro Panama
27 Moropai Jesusya taꞌpî toꞌ pîꞌ: —Eranneꞌ pe awanîkon yeꞌnen urumakayaꞌnîkon kupî sîrîrî, tamîꞌnawîrî. Mîrîrî warantî aweꞌmenukasaꞌ Paapa kaaretarî pîꞌ. Paapaya taꞌpî:“Carneiroyamîꞌ eraꞌmanen wîuyamoropai carneiroyamîꞌ eꞌtîrîka.”
Mîrîrî warantî aweꞌmenukasaꞌ. Uwî toꞌya kupî sîrîrî moropai amîrîꞌnîkon eꞌtîrîka.
28 Tîîse uusaꞌmanta tîpo, Paapaya uꞌmîꞌsaꞌka. Mîrîrî tîpo Galiléia pata pona uutî arawîrîꞌnîkon —taꞌpî Jesusya.
29 Pedroya taꞌpî ipîꞌ: —Tamîꞌnawîronkonya arumaka ya, eranneꞌ pe tîwanîkon yeꞌnen, uurîya arumaka pepîn.
30 Jesusya taꞌpî ipîꞌ: —Kaane, Pedro. Sîrîrî ewaronoꞌ yaꞌ itakon iteꞌka pe kariwana etun rawîrî amîrîya taa kupî sîrîrî, “Unepuꞌtî pepîn mîîkîrî Jesus”. Ayenkuꞌtîuya pepîn, seurîwîꞌne iteꞌka mîrîrî taaya kupî sîrîrî —taꞌpîiya.
31 Mîrîrî pîꞌ Pedro eseurîmaꞌpî meruntî ke. —Awî toꞌya yai uurî nîrî wîî toꞌya ya, mîîwîni tîîse “Unepuꞌtî pepîn Jesus,” tauya pepîn —taꞌpîiya. Mîrîrî warantî nîrî taꞌpî toꞌya, tamîꞌnawîrî.
Jesus Epîrema Tîpemonkonoyamîꞌ Wetun Tanne
32 Moropai Jesus yarakkîrî toꞌ ewomîꞌpî Oliveira yeꞌkanaꞌ pîꞌ. Oliveira yeꞌka eseꞌ Getsêmani. Moropai Jesusya taꞌpî tînenupaꞌsan pîꞌ: —Tarî ereutatî uyun Paapa yarakkîrî eseurîma tanne.
33 Toꞌ yonpayamîꞌ piapai Pedro, moropai Tiago, moropai João yarîꞌpîiya. Eranneꞌ pe eena piaꞌtîꞌpî. Ipîra eesewankonoꞌmaꞌpî.
34 Inkamoro pîꞌ taꞌpîiya: —Ipîra esewankonoꞌman pîꞌ wai. Esewankonoꞌmatoꞌya uwî eserîke man. Maasa, tarî eꞌtî. Tîwarî eꞌtî. Pemonkon iipî eraꞌmatî —taꞌpîiya.
35 Toꞌ piapai Jesus atarimaꞌpî mararî. Eesenumîꞌpî non pona epîremai. Paapa pîꞌ esatîꞌpîiya tîweꞌtarumaꞌtî namai.
36 —Paapa —taꞌpîiya. —Tamîꞌnawîron kupîya eꞌpainon. Upîikaꞌtîkî eꞌtarumaꞌtî namai. Tîîse ituꞌse wanî yawîrî kîꞌkupîi. Ituꞌse awanî yawîrî neken ikuꞌkî —taꞌpîiya.
37 Moropai inkamoro seurîwîꞌnankon pia awennaꞌpoꞌpî. Toꞌ weꞌnasaꞌ eporîꞌpîiya. Toꞌ kurantanîpîꞌpîiya. Pedro pîꞌ taꞌpîiya: —Awetun mîrîrî? Mararî tîwarî aakoꞌmamî yentai awanî mîrîrî?
38 Tîwarî akoꞌmantî. Paapa yarakkîrî eseurîmatî Makuiya ayenkuꞌtîkon namai. Ayewankon ya Paapa maimu yawîrî ikoꞌmanpai awanîkon, tîîse ikupîyaꞌnîkon eserîke pra awanîkon aꞌtuꞌmîra puꞌkuru awanîkon yeꞌnen.
39 Moropai inîꞌrî toꞌ piapai attîꞌpî Paapa yarakkîrî eseurîmai. Eꞌmaiꞌ pe mîrîrî taꞌpî tîuya manniꞌ warantî eepîremaꞌpî inîꞌrî.
40 Toꞌ pia tîwennaꞌposaꞌ pe, inîꞌrî toꞌ weꞌnasaꞌ eporîꞌpîiya. Mararî pra iweꞌnunpai toꞌ wanîꞌpî yapîtanîꞌpî toꞌya yentai. Toꞌ yenpakaꞌpîiya inîꞌrî. Toꞌ eppeꞌsaꞌ wanîꞌpî tîweꞌnasaꞌkon pîꞌ. Îꞌ taa tîuyaꞌnîkon epuꞌtî toꞌya pra awanîꞌpî Jesus pîꞌ.
41 Iteseurîno iteꞌka pe Jesus wîtîꞌpî toꞌ piapai epîremai. Moropai inîꞌrî awennaꞌpoꞌpî toꞌ pia. —Sîrîrî tîpose awetunkon mîrîrî —taꞌpîiya toꞌ pîꞌ. —Aasîrî man. Uurî kaꞌ poi iipîꞌpî eraꞌmai tiaron iipî. Sîrîrî puꞌkuru utîrîiya kupî sîrîrî imakuiꞌsan warayoꞌkon pia.
42 Eꞌmîꞌsaꞌkatî. Wîtîn sîrîrî. Aꞌkî, imakuiꞌsan pia utîrîton warayoꞌ yiꞌnî pîꞌ man —taꞌpîiya.
Jesus Yapisî Toꞌya
43 Moropai mîrîrî pe rî Jesus eseurîma tanne, tiwin inenupaꞌpî warayoꞌ Judas erepamîꞌpî. Teepîremasanon esanon, Moisés nurîꞌtîya yenupantoꞌ pîꞌ yenupatonkon, moropai Judeuyamîꞌ panamanenan aꞌyekeꞌtonon, inkamoro narimaꞌsan erepamîꞌpî Judas pokonpe. Arinîke toꞌ wanîꞌpî. Tîkasuparaikon moropai tîtaikapukon eneꞌsaꞌ toꞌya wanîꞌpî.
44 Tîîse tuutîkon rawîrî Judasya taasaꞌ wanîꞌpî tîpokon pe tuutîsanon pîꞌ: —Warayoꞌ pîꞌ esekaremekî moropai yuꞌnauya. Mîîkîrî anapisîkon ton. Mapiꞌtîi moropai tîwarî siꞌma maatîi ayesanonkon pia —taꞌpîiya.
45 Moropai teerepamî pe Judas wîtîꞌpî Jesus pia. —Aapia yiꞌnî pîꞌ wai —taꞌpîiya tepotorî pîꞌ. Moropai Jesus yuꞌnaꞌpîiya itenpata pîꞌ.
46 Moropai Judas pokonpe iipîꞌsanya Jesus yapisîꞌpî.
47 Moro awanîꞌpî warayoꞌ, Jesus nenupaꞌpî. Mîîkîrîya teepîremasanon esanon yepotorî poitîrî wîî yonpaꞌpî tîkasuparai ke. Tîîse ipuremekîꞌpîiya. Ipana neken yaꞌtîꞌpîiya.
48 —Uyapiꞌse aaiꞌsaꞌkon tiaronkonya amaꞌyeꞌ yapisî warantî —taꞌpî Jesusya toꞌ pîꞌ. —Akasuparaikon moropai ataikîpukon eneꞌsaꞌyaꞌnîkon mîrîrî.
49 Wei kaisarî epîremantoꞌ yewîꞌ ta akoreꞌtaꞌnîkon eꞌpîtîꞌpî tamîꞌnawîronkon yenupa pîꞌ. Mîrîrî kupîuya tanne, uyapisîꞌpîyaꞌnîkon wanîꞌpî eꞌpainon. Tîîse ikupîyaꞌnîkon pra awanîꞌpî. Tîîse Paapa maimu eꞌmenukasaꞌ manniꞌ yawîrî eenasaꞌ mîrîrî —taꞌpîiya.
50 Moropai Jesus nenupaꞌsanya irumakaꞌpî. Toꞌ epeꞌpî, tamîꞌnawîrî iipiapai.
51 Jesus yarîꞌpî toꞌya. Tiaron warayoꞌ, maasaron wîtîꞌpî toꞌ pîkîrî. Kamisa tîîsaiꞌya wanîꞌpî taꞌsan pe. Mîîkîrî yapisîꞌpî inkamoroya itaꞌsan pîꞌ.
52 Tîîse mîîkîrîya tîpon rumakaꞌpî. Eekaꞌtumîꞌpî ipon pra.
Imakuiꞌpî Jesus Nîkupîꞌpî Yuwa Toꞌya
53 Moropai Jesus yarîꞌpî toꞌya teepîremasanon esanon yepotorî pia. Teepîremasanon esanon, Moisés nurîꞌtîya yenupantoꞌ pîꞌ yenupatonkon, Judeuyamîꞌ panamanenan aꞌyekeꞌtonon, inkamoro epereꞌsaꞌ wanîꞌpî moro.
54 Aminke Jesus pîꞌ Pedro iipîꞌpî iteꞌmaꞌpî pîꞌ teepîremasanon esanon yepotorî yewîꞌ poro yiꞌpîrî pîkîrî. Moro aweꞌnîmîꞌpî. Mororonkon surarayamîꞌ pokonpe eereutaꞌpî. Toꞌ atapinaꞌpî apoꞌ pia.
55 Imakuiꞌpî pe Jesus winîkîi teeseurîmasanon yuwaꞌpî teepîremasanon esanon moropai Judeuyamîꞌ esanon tiaronkonya. Seꞌ kaisarî asakîꞌnankon eseurîma yuꞌse toꞌ wanîꞌpî imakuiꞌpî inkupîꞌpî pîꞌ mîrîrî wenai iwîkonpa kaiꞌma teuren. Tîîse mîrîrî warantî toꞌ eseurîma pra awanîꞌpî.
56 Arinîkon eseurîmaꞌpî ipîꞌ seruꞌ pe. Tîîse seꞌ kaisarî asakîꞌnankon eseurîma pra awanîꞌpî.
57 Tiaronkon eꞌmîꞌsaꞌkaꞌpî moropai seruꞌ pe toꞌ eseurîmaꞌpî. —Jesus eseurîmaꞌpî epîremantoꞌ yewîꞌ pîꞌ —taꞌpî toꞌya.
58 —See warantî taꞌpîiya: “Seeniꞌ epîremantoꞌ yewîꞌ konekaꞌpî pemonkonyamîꞌya. Tîîse yarankauya kupî sîrîrî. Moropai seurîwîꞌne wei tîpo inîꞌrî ikonekauya. Wîttî koneka warantî aweꞌkoneka pepîn manniꞌ amenan”, taꞌpî Jesusya —taꞌpî toꞌya. Mîrîrî warantî toꞌ eseurîmaꞌpî Jesus pîꞌ.
59 Mîrîrî yeꞌka pe tîîse, seꞌ kaisarî asakîꞌnankon eseurîma pra awanîꞌpî.
60 Teepîremasanon esanon yepotorî eꞌmîꞌsaꞌkaꞌpî. Toꞌ yarakkita attîꞌpî. Jesus pîꞌ taꞌpîiya: —Imakuiꞌpî pe insanan warayoꞌkon eseurîman pîꞌ man apîꞌ. Toꞌ maimu yuukuya pepîn?
61 Tîîse yuukuiya pra Jesus wanîꞌpî. Moo awanîꞌpî. Inîꞌrî teepîremasanon esanon yepotorî eseurîmaꞌpî: —Cristo amîrî, Paapa munmu, Paapa nîmenkaꞌpî? —taꞌpîiya.
62 —Inna, Cristo uurî —taꞌpî Jesusya. —Kaꞌ poi iipîꞌpî uurî pemonkon pe. Paapa meruntî winî ereutasaꞌ eraꞌmayaꞌnîkon kupî sîrîrî. Katupuru koreꞌta uuipî eraꞌmayaꞌnîkon kupî sîrîrî.
63 Mîrîrî eta tîuya pe, teepîremasanon esanon yepotorî ekoreꞌmaꞌpî kureꞌne. Mîrîrî yeꞌnen tîpon karakaꞌpîiya. —Inîꞌrî imakuiꞌpî inkupîꞌpî yuwapai pra man —taꞌpîiya.
64 —Imakuiꞌpî pe eeseurîma Paapa winîkîi etaꞌnîkon man. Oꞌnon yeꞌka pe epuꞌtî pîꞌ naatî? Îꞌ yeꞌka pe ikuꞌpai nai? —taꞌpîiya. —Iwîpai man —taꞌpî tamîꞌnawîronkonya.
65 Moropai tiaronkonya tetakukon yenumîꞌpî ipona. Itenpata yettapurî tîuyaꞌnîkon tîpo ipaꞌtîpîtîꞌpî toꞌya. —Anîꞌya apaꞌtî pîꞌ nai? Epuꞌkî, Cristo pe awanî ya —taꞌpî toꞌya ipîꞌ. Moropai surarayamîꞌya ipaꞌtîpîtîꞌpî tenyakon ke.
Unepuꞌtî Pepîn Taa Pedroya Jesus Pîꞌ
66 Mîrîrî tanne Pedro wanîꞌpî poro po. Teepîremasanon esanon yepotorî poitîrîpaꞌ epaꞌkaꞌpî poro pona.
67 Apoꞌ pia Pedro atapina eraꞌmaꞌpîiya. Eesenumenkaꞌpî ipîꞌ. —Amîrî nîrî Jesus Nazarépon pokonpan —taꞌpîiya.
68 —Kaane —taꞌpî Pedroya. —Unepuꞌtî pepîn mîîkîrî. Mîrîrî tîpo wîttî iwaꞌtoꞌ manaꞌta pia attîꞌpî.
69 Mîrîrî poro tuutî pe, inîꞌrî mîîkîrî wîriꞌya eraꞌmaꞌpî. Manaꞌta piawonkon pîꞌ taꞌpîiya: —Mîîkîrî Jesus pemonkono —taꞌpîiya.
70 —Iseruku —taꞌpî Pedroya inîꞌrî.
Aakoꞌmamîꞌpî mararî moropai mororonkon warayoꞌkonya taꞌpî ipîꞌ: —Innape Jesus pemonkono pe awanî eserîke awanî. Galiléia pon mîîkîrî, amîrî nîrî Galiléia pon —taꞌpî toꞌya.
71 Mîrîrî pîꞌ Pedroya taꞌpî: —Unepuꞌtî pepîn mîîkîrî ipîꞌ eeseurîmakon manniꞌ. Useruku pepîn Paapaya uyeraꞌma pîꞌ man. Seruꞌ pe eseurîma ya Paapaya utarumaꞌtî —taꞌpîiya.
72 Mîrîrî pe rî kariwana eꞌnaꞌpî itakon iteꞌka pe. Mîrîrî etaꞌpî Pedroya. Moropai awenpenataꞌpî Jesusya teurîmaꞌpî pîꞌ. “Itakon iteꞌka pe kariwana etun rawîrî, unepuꞌtî pepîn mîîkîrî Jesus, taaya eseurîwîꞌne iteꞌka,” taasaꞌ Jesusya pîꞌ awenpenataꞌpî. Moropai tîkauware attîꞌpî, seruꞌ pe tîweꞌsaꞌ yeꞌnen.
