Jesus Cristo Yekare Marcos Nîmenukaꞌpî 15:1-47
15 Pata erenmapî pe, teepîremasanon esanon, Moisés nurîꞌtîya yenupatoꞌ pîꞌ yenupatonkon, Judeuyamîꞌ panamanenan aꞌyekeꞌtonon, Judeuyamîꞌ esanon tiaronkon, inkamoro eperepîꞌpî tamîꞌnawîrî îꞌ kupî tîuyaꞌnîkon pîꞌ eseurîmai. Teeseurîmakon tîpo tîpoitîrîtononkon surarayamîꞌ pîꞌ taꞌpî toꞌya: —Jesus yaironpîꞌtî. Moropai yaatî pata esaꞌ Governador Pilatos pia —taꞌpî toꞌya. Mîrîrî warantî ikupîꞌpî surarayamîꞌya.
2 Pilatosya Jesus ekaranmapoꞌpî. —Tamîꞌnawîron esaꞌ, rei amîrî, Judeuyamîꞌ esaꞌ? —taꞌpîiya Jesus pîꞌ. —Amîrîya taa mîrîrî. —taꞌpî Jesusya.
3 Teepîremasanon esanon eseurîmaꞌpî seruꞌ pe ipîꞌ. —Mararon pepîn imakuiꞌpî kuꞌsaiꞌya mîrîrî —taꞌpî toꞌya.
4 Pilatosya taꞌpî: —Toꞌ maimu yuukuya pepîn? Mararon pepîn imakuiꞌpî kuꞌsaiꞌya taa pîꞌ toꞌ man apîꞌ.
5 Tîîse inîꞌ Jesus eseurîma pra awanîꞌpî. “Kaane, imakuiꞌpî kuꞌsauꞌya pra wai,” taiya pra awanîꞌpî. Mîrîrî pîꞌ Pilatos esenumenkaꞌpî kureꞌne.
Jesus Wîî Meꞌpo Pilatosya
6 Pilatos yeseru wanîꞌpî Páscoa pîꞌ Judeuyamîꞌ wanî kaisarî tiwin pîꞌ tînarakkamoꞌsan rumakapîtîiya. Tînepuꞌtîkon esaꞌpîtîꞌpî Judeuyamîꞌya. Inkamoro rumakapîtîꞌpîiya tiwin, tiwin konoꞌ tîîse.
7 Atarakkannîtoꞌ ta warayoꞌkon wanîꞌpî imakuiꞌpî kupîtîponkon. Tamîꞌnawîronkon esanon pîꞌ teekoreꞌmakon yai toꞌ poitîrîtonon wîîsaꞌ toꞌya wanîꞌpî. Toꞌ koreꞌta warayoꞌ wanîꞌpî iteseꞌ Barrabás.
8 Arinîkon wîtîꞌpî pata esaꞌ Pilatos pia. Ipîꞌ taꞌpî toꞌya: —Tiwin anarakkamoꞌpî anna yonpa rumakakî. Konoꞌ kaisarî ikupîya manniꞌ warantî irumakakî —taꞌpî toꞌya ipîꞌ.
9 —Anîꞌ rumakauya yuꞌse awanîkon moriya? —taꞌpî Pilatosya. —Mîserî Judeuyamîꞌ esaꞌ rei taayaꞌnîkon manniꞌ ipîꞌ, mîserî rumakauya kaꞌrî —taꞌpîiya.
10 Ipîꞌ tîkinmukon yeꞌnen Jesus eneꞌsaꞌ teepîremasanon esanonya wanîꞌpî epuꞌtîꞌpî Pilatosya. Mîrîrî yeꞌnen anrumakapai awanîꞌpî.
11 Tîîse teepîremasanon esanonya taꞌpî tamîꞌnawîronkon pîꞌ: —Barrabás rumakaya yuꞌse anna man, kaꞌtî ipîꞌ —taꞌpî toꞌya. Mîrîrî warantî taꞌpî tamîꞌnawîronkonya.
12 —Tîîse mîserî kanan, Judeuyamîꞌ esaꞌ, rei taayaꞌnîkon manniꞌ ipîꞌ, îꞌ kupîuya yuꞌse awanîkon ipîꞌ? —taꞌpî Pilatosya.
13 —Iwî meꞌpokî —taꞌpî toꞌya. —Pakîꞌnan pona ipokapîtî meꞌpokî.
14 —Îꞌ wenai anwîpai awanîkon mîrîrî? —taꞌpî Pilatosya. —Îꞌ see mîrîrî imakuiꞌpî inkupîꞌpî? Tîîse aronne panpîꞌ toꞌ entaimepîtîꞌpî: —Pakîꞌnan pona ipokapîtî meꞌpokî —taꞌpî toꞌya.
15 Tamîꞌnawîronkon wakîri pe eꞌpai Pilatos wanîꞌpî. Mîrîrî yeꞌnen Barrabás rumaka meꞌpoꞌpîiya. Jesus poꞌpîtî meꞌpoꞌpîiya pemonkon poꞌpîꞌtoꞌ ke. Mîrîrî tîpo Jesus tîrîꞌpîiya surarayamîꞌ pia pakîꞌnan po ipokapîꞌtoꞌpe toꞌya.
Jesus Pîꞌ Surarayamîꞌ Oꞌmaꞌta
16 Surarayamîꞌya Jesus yarîꞌpî pata esaꞌ Governador Pilatos yewîꞌ ta. Governador yewîꞌ eseꞌ pretório. Tonpakon surarayamîꞌ muurukuntîꞌpî toꞌya tamîꞌnawîrî.
17 Sonpan Jesus pon moꞌkaꞌpî toꞌya moropai suuyu sonpan rei pon yeꞌka yekaꞌmaꞌpî toꞌya ipon ton ipîꞌ tîwoꞌmaꞌtakon pe. Mîꞌnî kapîꞌpî toꞌya itarako ton, rei yarakko warantî. Ipuꞌpai pona itîrîꞌpî toꞌya.
18 Tîwoꞌmaꞌtakon pe ipîꞌ toꞌ esekaremekîꞌpî. —Viva Jesus. Judeuyamîꞌ esaꞌ amîrî. Rei amîrî —taꞌpî toꞌya. Itarumaꞌtîꞌpî toꞌya mîrîrî.
19 Moropai ipaꞌtîpîtîꞌpî toꞌya ipuꞌpai pona yei ke. Tetakukon yenunpîtîꞌpî toꞌya ipona. Teseꞌmukon pona toꞌ enapîtîꞌpî ikaisarî yapurî pe, tîîse toꞌ seruku mîrîrî. Ipîꞌ toꞌ oꞌmaꞌta mîrîrî.
20 Kureꞌne ipîꞌ tîwoꞌmaꞌtakon tîpo, sonpan moꞌkaꞌpî toꞌya. Sonpan ipon tîrîꞌpî toꞌya ipona. Mîrîrî tîpo yarîꞌpî toꞌya pakîꞌnan pona ipokapîꞌse.
Jesus Pokapîtî Toꞌya Pakîꞌnan Po
21 Tuutîkon pe warayoꞌ eporîꞌpî toꞌya, keren poi tuiꞌsen cidade poro tuutîsen, iteseꞌ Simão. Cirene pon mîîkîrî, Alexandre moropai Rufo yun. Mîîkîrî pîꞌ taꞌpî toꞌya meruntî ke: —Kaꞌneꞌ pe panpîꞌ aase sîrîrî pakîꞌnan yarîpa —taꞌpî surarayamîꞌya ipîꞌ. Moropai yarîꞌpîiya.
22 Jesus yarîꞌpî toꞌya Gólgota kîrî pona. Pemonkon puꞌpaiꞌpî warainon taatoꞌ mîrîrî Gólgota.
23 Moro iwuku ton tîrîꞌpî toꞌya uva yekku yaiꞌmesaꞌ remédio iteseꞌ mirra yarakkîrî neꞌneꞌ epuꞌtîiya namai. Tîîse enîrîiya pra awanîꞌpî.
24 15:24,25 Inekaꞌta winîkîi wei tîîse ipokapîtîꞌpî toꞌya pakîꞌnan pona. Tîꞌkon mîrikkî pîꞌ toꞌ suꞌminaꞌpî ipon rîꞌpî pantakapîtî tîuyaꞌnîkon epuꞌtîkonpa kaiꞌma. Mîrîrî warantî ipantakaꞌpî toꞌya.
25 Eraꞌmakî 15:24
26 MÎSERÎ JUDEUYAMÎꞌ ESAꞌ, REI, kaiꞌma kaareta pona itekare menukaꞌpî toꞌya. Moropai itîrîꞌpî toꞌya pakîꞌnan yepoi tamîꞌnawîronkonya eraꞌmatoꞌpe. Mîrîrî kupîꞌpî toꞌya îꞌ waniꞌ awanî yeꞌnen ipokapîꞌsaꞌ tîuyaꞌnîkon epuꞌtoꞌpe tamîꞌnawîronkonya.
27 Moropai asakîꞌne amaꞌyeꞌkon pokapîtîꞌpî toꞌya ipokonpe. Tiwin ipokapîtîꞌpî toꞌya tiaron pakîꞌnan po, Jesus meruntî winî moropai tiwin ipokapîtîꞌpî toꞌya kamaiꞌ winî.
28 Mîrîrî warantî pena Paapa maimu eꞌmenukasaꞌ yawîrî ikupîꞌpî toꞌya. Pena Isaías nurîꞌtîya taꞌpî:Mîîkîrî tarumaꞌtî toꞌya imakuiꞌsan tarumaꞌtî toꞌya warantî
taꞌpîiya.
29 Eꞌma taawîrî tuutîsanon oꞌmaꞌtaꞌpî ipîꞌ. —Kane kane amîrî. “Epîremantoꞌ yewîꞌ yarankauya. Inîꞌ ikonekauya. Seurîwîꞌne wei tîpo ikoneka aretîꞌkauya,” taꞌpîya seruꞌ pe.
30 Mîrîrî kupîpa kaiꞌma, meruntî ke awanî ya, aawarîrî eꞌpîikaꞌtîkî. Autîkî pakîꞌnan poi —taꞌpî toꞌya Jesus pîꞌ.
31 Teepîremasanon esanon oꞌmaꞌtaꞌpî nîrî ipîꞌ, Moisés nurîꞌtîya yenupatoꞌ pîꞌ yenupatonkon pokonpe siꞌma. —Tiaronkon pîikaꞌtîꞌpîiya. Tîîse aawarîrî aweꞌpîikaꞌtî pra awanî —taꞌpî toꞌya.
32 Jesus pîꞌ taꞌpî toꞌya: —Paapa nîmenkaꞌpî pe awanî ya, autîkî pakîꞌnan poi. Awautî eraꞌma annaya ya, yai pra innape Israel nurîꞌtî paa rîꞌsan esaꞌ pe awanî kupî annaya eꞌpainon —taꞌpî toꞌya. Insanan ipokonpe toꞌ nîpokapîtîꞌsan pakîꞌnan pona oꞌmaꞌtaꞌpî nîrî ipîꞌ.
Jesus Saꞌmanta
33 Inekaꞌta pairî wei tîîse pata ewaronpamîꞌpî. Ewaron pe aakoꞌmamîꞌpî wei autî tîpose.
34 Wei autîsaꞌ tanne Jesus entaimeꞌpî aronne. —Eloi, Eloi, lamá sabactâni —taꞌpîiya tîmaimu ta.—Paapa, Paapa, îꞌ waniꞌ awanî yeꞌnen urumakaya sîrîrî?
—taatoꞌ mîrîrî umaimukon ta.
35 Tiaronkon ipîꞌ teesenumenkakon yeꞌka pe mîrîrî taiya etaꞌpî yairî pra. Elias, Elias, taiya kaiꞌma toꞌ esenkuꞌtîꞌpî. Moropai taꞌpî toꞌya: —Aꞌkî. Elias nurîꞌtî yannoiya etatî maasa —taꞌpî toꞌya.
36 Tiaron ekaꞌtumîꞌpî tuna yuꞌnanen esponja eraꞌmai. Mîrîrî tîrîꞌpîiya soꞌri uva yekku kaꞌ yuꞌnatoꞌpeiya. Mîrîrî tîpo yei yaretî pîꞌ yasiꞌtîꞌpîiya. Inta pona irennukuꞌpîiya yuꞌnatoꞌpeiya kaiꞌma. Mîrîrî tîpo taꞌpîiya: —Maasa, pakîꞌnan poi imoꞌkai Elias nurîꞌtî iipî eraꞌmapaiꞌnîkon —taꞌpîiya.
37 Meruntî ke Jesus entaimeꞌpî. Moropai aasaꞌmantaꞌpî.
38 15:38,39 Surarayamîꞌ yepotorî wanîꞌpî moro Jesus eraꞌma pîꞌ. Mîrîrî warantî aasaꞌmanta eraꞌma tîuya pe, —Innape Paapa munmu pe mîserî man —taꞌpîiya. Mîrîrî tanne epîremantoꞌ yewîꞌ tawon Paapa pataꞌseꞌ yuwaꞌtoꞌ kamisa eꞌkarakaꞌpî inekaꞌta poi mai winîkîi. Kureꞌnan soren pe tîweꞌsen pe awanîꞌpî. Ereꞌsin pe nîrî awanîꞌpî.
39 Eraꞌmakî 15:38
40 Wîriꞌsanyamîꞌ wanîꞌpî moro nîrî Jesus eraꞌma pîꞌ aminke siꞌma. Moro toꞌ wanîꞌpî Maria Madalena, Salomé, moropai tiaron Maria, José moropai Tiago maasaron panpîꞌ yan mîîkîrî Maria.
41 Galiléia pata po Jesus asarî yai, inkamoro wîriꞌsanyamîꞌ wanîꞌpî ipîkîrî asarîꞌsan pe. Itekkari ton koneka tîpokon pe. Tiaronkon wîriꞌsanyamîꞌ wanîꞌpî moro nîrî, Jesus wenairî iipîꞌsan Jerusalém pona.
Jesus Yuꞌnaꞌtî Toꞌya
42 Sábado wanîꞌpî Judeuyamîꞌ erîꞌkaꞌtoꞌ weiyu pe. Toꞌ yeseru wanîꞌpî toꞌ ekoneka sexta feira yai sábado yai teerîꞌkapîkonpa. Toꞌ ekonekatoꞌ weiyu yai Jesus saꞌmantaꞌpî.
43 Mîrîrî yeꞌnen José Arimatéia pon wîtîꞌpî Pilatos pia. José wanîꞌpî Judeuyamîꞌ panamanen pe. Tamîꞌnawîronkon esaꞌ pe Paapa iipî nîmîkî pîꞌ tîweꞌsen pe awanîꞌpî nîrî. Eranneꞌ pe pra attîꞌpî Pilatos pia, pata ewaronpamî tanne. Eerepamîꞌpî. Pilatos pîꞌ taꞌpîiya: —Jesus esaꞌrîꞌpî anmoꞌkapai wai pakîꞌnan poi yuꞌnaꞌtîtoꞌpeuya. Sábado yai pakîꞌnan po aakoꞌmamî yuꞌse pra anna man —taꞌpîiya.
44 —Aasîrî aasaꞌmantasaꞌ mîrîrî? —taꞌpî Pilatosya. Imuꞌtunpaꞌpîiya. Surarayamîꞌ esaꞌ yanno meꞌpoꞌpîiya. Aaipîꞌpî. —Aasîrî Jesus saꞌmantasaꞌ mîrîrî? —taꞌpî Pilatosya ipîꞌ.
45 —Inna, aasîrî aasaꞌmantasaꞌ man —taꞌpî surarayamîꞌ esaꞌya. —Moriya itesaꞌrîꞌpî moꞌkata —taꞌpî Pilatosya José pîꞌ.
46 Mîrîrî tîpo Joséya kureꞌnan kamisa yennaꞌpî. Attîꞌpî tiaronkon yarakkîrî Jesus esaꞌrîꞌpî moꞌkai. Imokaꞌpî toꞌya. Moropai iwontîꞌpî toꞌya mîrîrî kamisa ke. Ikîrî yai aꞌta yakasaꞌ Joséya wanîꞌpî isaꞌmantaꞌsan yenseꞌ ton pe. Kureꞌne awanîꞌpî. Mîrîrî yaꞌ Jesus esaꞌrîꞌpî wonnîpîꞌpî toꞌya Judeuyamîꞌ yeseru yawîrî. Moropai aꞌta yettapurîꞌpî toꞌya kureꞌnan tîꞌ ke.
47 Tamîꞌnawîrî mîrîrî kupî toꞌya eraꞌmaꞌpî Maria Madalenaya moropai tiaron Mariaya, José yan Mariaya.
