Jesus Cristo Yekare Marcos Nîmenukaꞌpî 16:1-20
16 Sábado esuwaꞌkasaꞌ tîpo inkamoro wîriꞌsanyamîꞌ wîtîꞌpî Salomé pokonpe aꞌpusin yennai Jesus esaꞌrîꞌpî karapaimatoꞌ ton, Judeuyamîꞌ yeseru yawîrî ikupîkonpa kaiꞌma.
2 Eꞌmaiꞌnon wei erenmapî pe, domingo yai toꞌ wîtîꞌpî aꞌta pia itesaꞌrîꞌpî karapaimai. Penane marî puꞌkuru toꞌ eseꞌmaꞌtîꞌpî wei epaꞌkasaꞌ tanne.
3 Tuutîkon pe toꞌ eseurîmaꞌpî. —Anîꞌya aꞌta yettapuru tîꞌ moꞌka ewonnîtoꞌpe? —taꞌpî toꞌya.
4 Mîrîrî taꞌpî toꞌya kureꞌne tîꞌ eꞌsaꞌ yeꞌnen. Moropai teerepamîkon pe aꞌta esettapurukasaꞌ eraꞌmaꞌpî toꞌya. itettapuru eraꞌtîsaꞌ eraꞌmaꞌpî toꞌya.
5 Aꞌta yaꞌ toꞌ ewomîꞌpî. Moro warayoꞌ ereutasaꞌ eporîꞌpî toꞌya meruntî winî. Aimutun pe ipon wanîꞌpî sonpan. Inserî pe awanîꞌpî. Mîîkîrî pîꞌ toꞌ esiꞌnîpîꞌpî.
6 Mîîkîrîya taꞌpî toꞌ pîꞌ: —Teesiꞌnîꞌse pra eꞌtî. Toꞌ nîpokapîtîꞌpî pakîꞌnan pona yuwayaꞌnîkon mîrîrî. Jesus Nazarépon yuwayaꞌnîkon. Tîîse tarî Jesus ton pra man. Aweꞌmîꞌsaꞌkaꞌpî man. Aꞌkî, ipataꞌpî eraꞌmatî —taꞌpîiya.
7 —Galiléia pona wîtîn pîꞌ man arawîrîꞌnîkon. Miarî eraꞌmayaꞌnîkon kupî sîrîrî apîꞌnîkon taꞌpî tîuya manniꞌ yawîrî. Mîrîrî ekaremeꞌtantî Pedro moropai tiaronkon inenupaꞌsan pîꞌ —taꞌpîiya.
8 Toꞌ epaꞌkaꞌpî. Toꞌ esiꞌnîꞌsaꞌ wanîꞌpî îꞌ taa yentai. Toꞌ eꞌtîtîtîkkaꞌpî. Aꞌta piapai toꞌ ekaꞌtumîꞌpî. Tuutîkon pe anîꞌ yarakkîrî toꞌ eseurîma pra awanîꞌpî, teesiꞌnîꞌsaꞌkon yeꞌnen.
Maria Madalenaya Jesus Eraꞌma Enen
9 Domingo yai Jesus eꞌmîꞌsaꞌkaꞌpî mîrîrî penane marî puꞌkuru. Maria Madalenaya Jesus eꞌmîꞌsaꞌkasaꞌ eraꞌmaꞌpî domingo yai, penane marî puꞌkuru, tiaronkonya eraꞌma rawîrî. Mîîkîrî Maria Madalena pena oꞌmaꞌkon ewonsaꞌ wanîꞌpî yaꞌ, asakîꞌne miaꞌ pona tîîmoꞌtai kaisarî. Inkamoro tîrîkaꞌpî Jesusya. Mîîkîrîya Jesus eraꞌmaꞌpî tiaronkonya eraꞌma rawîrî.
10 Inenupaꞌsan esewankonoꞌmasaꞌ karau tanne, toꞌ pia Maria Madalena erepamîꞌpî. —Jesus eꞌmîꞌsaꞌkasaꞌ man —taꞌpîiya toꞌ pîꞌ.
11 —Enen awanî sîrîrî. Uyenu ke eraꞌma pîꞌ wai —taꞌpîiya. Tîîse innape imaimu kupî toꞌya pra awanîꞌpî.
Jesus Eraꞌma Inenupaꞌsanya, Asakîꞌnankonya
12 Mîrîrî tîpo asakîꞌnankon inenupaꞌsanya Jesus eraꞌmaꞌpî cidade poi tuutîkon pe. Tiaron pe eetinyakaꞌmasaꞌ yeꞌnen, kaꞌneꞌ pe epuꞌtî toꞌya pra awanîꞌpî.
13 Tepuꞌtî toꞌya emapuꞌtîsaiꞌya tîpo, toꞌ ennaꞌpoꞌpî tonpakon pia ekaremeꞌse. Tîîse innape toꞌ maimu kupî toꞌya pra awanîꞌpî.
Jesus Eraꞌma Inenupaꞌsanya,
Tiwin Puꞌ Pona Tîîmoꞌtaiꞌnîkonya
14 Mîrîrî tîpo Jesus eraꞌmaꞌpî inenupaꞌsanya, tiwin puꞌ pona tîîmoꞌtaiꞌnîkonya. Tîwentamoꞌkakon yai eraꞌmaꞌpî toꞌya. Jesusya toꞌ panamaꞌpî. —Uyewankonoꞌma pîꞌ naatîi —taꞌpîiya toꞌ pîꞌ. —Îꞌ ton pe see innape eꞌmîꞌsaꞌkasaꞌ kupîyaꞌnîkon pra awanîkon? Eꞌmîꞌsaꞌka tîpo akoreꞌtawonkonya uyeraꞌmaꞌpî enen. Mîîwîni tîîse innape ikupîyaꞌnîkon pra awanîꞌpîkon. Innape ankuꞌpai pra awanîkon mîrîrî —taꞌpîiya.
15 —Pata kaisarî matîtîi. Tamîꞌnawîronkon pîꞌ Paapa yekare mekaremeꞌtîi.
16 Tiaronkonya innape Paapa yekare kupî ya moropai toꞌ yenpatakonayaꞌnîkon eꞌpai man. Mîrîrî warantî inkamoro eꞌpîikaꞌtî. Tîîse tiaronkonya innape Paapa yekare kupî pepîn. Mîrîrî yeꞌnen inkamoro yeꞌka yarima Paapaya apoꞌ yaꞌ —taꞌpîiya.
17 —Innape tîkuꞌnenan kupî Paapaya meruntî ke ikupî eserîkan pepîn kuꞌtoꞌpe toꞌya. Mîrîrî kupî Paapaya innape itekare wanî epuꞌtoꞌpe tamîꞌnawîronkonya. Umeruntîri ke oꞌmaꞌkon tîrîka toꞌya. Tiaron toꞌ nepuꞌtî pepîn tîrîuya toꞌ maimu ton.
18 Tînepuꞌtîkon pe pra sokoroꞌpan îkîi yanunsaꞌ toꞌya ya, toꞌ yeparantîiya pepîn. Tînepuꞌtîkon pe pra tîmaiꞌpatoꞌkon enîrî tîuyaꞌnîkon ya toꞌ emaiꞌpa pepîn. Priꞌyawonkon pepîn pona toꞌ epîrema. Toꞌ yepiꞌtî Paapaya. Mîrîrî warantî innape Paapa kuꞌnenan wanî kupî sîrîrî —taꞌpî Jesusya.
Jesus Wîtî Kaꞌ Pona Paapa Pia
19 Toꞌ yarakkîrî teeseurîma tîpo, Jesus wîtîꞌpî kaꞌ pona. Paapaya yarîꞌpî tîîpia enen tîîse. Paapa meruntîri winî eereutaꞌpî, ikaisarî tamîꞌnawîronkon esaꞌ pe tîwanîpa.
20 Inenupaꞌsan wîtîꞌpî pata kaisarî itekare ekaremeꞌse. Uyepotorîkon Jesusya toꞌ pîikaꞌtîꞌpî. Meruntî ke toꞌ kupîꞌpîiya ikupî eserîkan pepîn kuꞌtoꞌpe toꞌya. Mîrîrî eraꞌma tîuyaꞌnîkon wenai arinîkonya toꞌ maimu kupîꞌpî innape.
