Jesus Cristo Yekare Marcos Nîmenukaꞌpî 2:1-28
2 Pata poro taasarî tîpo, Cafarnaum pona Jesus ennaꞌpoꞌpî tewîꞌ ta. Tewîꞌ ta awanî etaꞌpî tamîꞌnawîronkonya.
2 Arinîkon eperepîꞌpî iipia. Toꞌ pataꞌseꞌ ton pra awanîꞌpî wîttî ta moropai manaꞌta po. Miarî Paapa maimu ekaremekî pîꞌ Jesus wanîꞌpî toꞌ pîꞌ.
3 Mîrîrî tanne pemonkonyamîꞌ erepamîꞌpî. Ekeꞌnepamîꞌpî warayoꞌ eneꞌsaꞌ toꞌya wanîꞌpî Jesus pia. Tamîꞌnawîrî itesaꞌ ekeꞌnepansaꞌ wanîꞌpî. Asakîrîronkon warayoꞌkonya mîîkîrî yarîꞌpî.
4 Jesus pia mîîkîrî yarî toꞌya yentai awanîꞌpî. Mîrîrî yeꞌnen wîttî pona toꞌ enukuꞌpî. Maasa pra seꞌ kaisarî wîttî wanîꞌpî, inekaꞌta ton pra. Moropai yamîkaꞌpî toꞌya Jesus kaisarî. Moropai mîîkîrî priꞌyawon pepîn yenuꞌtîꞌpî toꞌya Jesus pia, mîrîrî aꞌta yai, tetteꞌ ta tîîse.
5 Innape tîkupî toꞌya epuꞌtîꞌpî Jesusya. Mîrîrî yeꞌnen taꞌpîiya ekeꞌnan pîꞌ:
—Mooyi, imakuiꞌpî ankupîꞌpî rona pîꞌ wai —taꞌpîiya.
6 Moisés nurîꞌtîya yenupantoꞌ pîꞌ yenupanenan ereutasaꞌ wanîꞌpî moro. Jesus maimu pîꞌ toꞌ esenumenkaꞌpî tîîwarîrîꞌnîkon.
7 —Îꞌ ton pe mîîkîrî eseurîma mîrîrî warantî? Anîꞌya imakuiꞌpî pe warayoꞌ eꞌtoꞌ moꞌka pepîn, Paapa pe pra siꞌma, tîîse Paapaya neken imoꞌka. Mîrîrî yeꞌnen Paapa pe aweꞌkuꞌsaꞌ mîrîrî —kaiꞌma toꞌ esenumenkaꞌpî.
8 Mîrîrî warantî toꞌ esenumenka tîpîꞌ epuꞌtîꞌpî Jesusya. Mîrîrî yeꞌnen toꞌ pîꞌ taꞌpîiya: —Îꞌ ton pe mîrîrî warantî eesenumenkakon mîrîrî ayewankon yaꞌ?
9 2:9,10 Imakuiꞌpî ankupîꞌpî rona pîꞌ wai taa pîꞌ wai mîserî priꞌyawon pepîn pîꞌ. Tîîse innape ikuꞌsauꞌya epuꞌtîyaꞌnîkon eserîke pra awanî. Mîrîrî yeꞌnen Uurîya, pemonkon pe kaꞌ poi iipîꞌpîya aneraꞌmakon ton kupî sîrîrî. Meruntî ke wai imakuiꞌpî ronatoꞌpeuya —taꞌpî Jesusya. —Seruꞌ pe pra eseurîma epuꞌtîkonpa, mîîkîrî priꞌyawon pepîn yepiꞌtîuya. Iꞌmîꞌsaꞌkauya, tetteꞌ yanmakoꞌmatoꞌpeiya aasatoꞌpe —taꞌpî Jesusya.
10 Eraꞌmakî 2:9
11 Moropai Jesusya priꞌyawon pepîn yeurîmaꞌpî: —Eꞌmîꞌsaꞌkakî. Ayetteꞌ yanmakoꞌmakî. Ayewîꞌ ta ennaꞌpokî —taꞌpîiya.
12 Moropai aweꞌmîꞌsaꞌkaꞌpî. Kaꞌneꞌ pe tetteꞌ yanmakoꞌmaꞌpîiya moropai tamîꞌnawîronkonya teraꞌma tanne, eepaꞌkaꞌpî. Mîrîrî pîꞌ tamîꞌnawîronkon esenumenkaꞌpî kureꞌne. —Morî puꞌkuru, Paapa —taꞌpî toꞌya. —Mîrîrî yeꞌka eraꞌmanenan pepîn anna —taꞌpî toꞌya.
Jesus Pemonkono Pe Levi Ena
13 Mîrîrî tîpo Jesus epaꞌkaꞌpî mîrîrî cidaderî yapai. Moropai attîꞌpî inîꞌrî Galiléia kuꞌpî kaꞌ. Miarî arinîkon pemonkonyamîꞌ wîtîꞌpî iipia. Moropai inkamoro yenupa piaꞌtîꞌpîiya.
14 Taasarî yeꞌka pe Alfeu munmu eporîꞌpîiya, iteseꞌ Levi. Tîniru yapiꞌnen pe awanîꞌpî. Teesenyakaꞌmatoꞌ pataꞌseꞌ yaꞌ eereutasaꞌ wanîꞌpî. —Aase upîkîrî, ayenupatoꞌpeuya —taꞌpî Jesusya ipîꞌ.
Moropai attîꞌpî Jesus pîkîrî.
15 Mîrîrî tîpo Levi yewîꞌ ta Jesus entamoꞌka tanne, arinîkon imposto ton tîniru yapiꞌnenan entamoꞌkaꞌpî ipokonpe moropai tînenupaꞌsan pokonpe. Imakuiꞌsan pemonkonyamîꞌ entamoꞌkaꞌpî nîrî toꞌ pokonpe. Arinîke toꞌ wanîꞌpî Jesus pîkîrî itîꞌsan.
16 Moisés nurîꞌtîya yenupantoꞌ pîꞌ yenupanenan moropai fariseuyamîꞌ wanîꞌpî moro. Inkamoroya Jesus eraꞌmaꞌpî. Imakuiꞌsan pemonkonyamîꞌ moropai imposto yapiꞌnenan pokonpe awentamoꞌka eraꞌmaꞌpî toꞌya. Mîrîrî pîꞌ taꞌpî toꞌya Jesus nenupaꞌsan pîꞌ: —Îꞌ ton pe mîîkîrî entamoꞌka imposto yapiꞌnenan pokonpe, imakuiꞌsan pokonpe? Morîkon pemonkonyamîꞌ anna warainîkon entamoꞌka pepîn imakuiꞌsan pokonpe. Imakuiꞌpî kupîiya mîrîrî —taꞌpî toꞌya.
17 Mîrîrî taa toꞌya etaꞌpî Jesusya. Moropai taꞌpîiya toꞌ pîꞌ: —Priꞌya puꞌkuru eꞌnî ya, uyepiꞌtînenkon ton pemonkon yuwa pepîn. Tîîse priꞌya pra eꞌnî ya, uyepiꞌtînenkon ton pemonkon yuwa eꞌpainon. Mîrîrî warantî morî pe tîweꞌkuꞌsanon pemonkonyamîꞌ yannoi uuiꞌsaꞌ pra wai. Tîîse imakuiꞌpî pe tîweꞌkuꞌsanon pemonkonyamîꞌ yannoi iipîꞌpî uurî. Imakuiꞌpî pe tîwanîkon epuꞌtî tîuyaꞌnîkon yeꞌnen, tîpîikaꞌtîtoꞌkon ton yuꞌse toꞌ wanî —taꞌpî Jesusya.
Jesus Eseurîma
Tekkarikon Tonpai Pra Fariseuyamîꞌ Wanî Pîꞌ
18 Judeuyamîꞌ yeseru yairî Paapa yapurî yeꞌka pe, taꞌreꞌkon tonpai pra João Batista pemonkonoyamîꞌ wanîꞌpî. Tiaronkon wîtîꞌpî Jesus pia moropai taꞌpî toꞌya ipîꞌ: —Taꞌreꞌkon tonpai pra João pemonkonoyamîꞌ man, fariseuyamîꞌ man nîrî mîrîrî warantî. Tîîse apemonkonoyamîꞌ wanî inkamoro warantî pra. Îꞌ waniꞌ awanî yeꞌnen uyeserukon yairî pra toꞌ wanî mîrîrî? —taꞌpî toꞌya.
19 Taꞌpî Jesusya toꞌ pîꞌ: —Tînetaꞌsan pokonpe tîweꞌmarimasen wanî tanne, taꞌreꞌkon tonpai pra inetaꞌsan wanî pepîn. Toꞌ pokonpe tîweꞌmarimasen koꞌmamî pîkîrî taꞌreꞌkon tonpai pra toꞌ wanî pepîn. Toꞌ entamoꞌka, moropai toꞌ atausinpa.
20 Uurî wanî tîweꞌmarimasen warantî, moropai unenupaꞌsan wanî inetaꞌsan warantî. Maasa umoꞌka tiaronkonya kupî sîrîrî unenupaꞌsan piapai. Mîrîrî yai unenupaꞌsanya taꞌreꞌkon yonpa pepîn teesewankonoꞌmakon yeꞌnen —taꞌpîiya.
21 —Ipoiꞌpî uponkon rumentannîꞌpî pepîn eꞌpainon kamisa amenan ke. Irumentanîꞌpî ya, irumentanîꞌtoꞌ emoꞌka ipoi. Amenan emoꞌka ipoiꞌpî poi moropai inîꞌ panpîꞌ aweꞌkaraka.
22 Moropai amenan woꞌ, maiꞌ pe teenasen tîrî pepîn eꞌpainon penaroꞌ itenseꞌ yaꞌ, cabra piꞌpî konekasaꞌ penaroꞌ yaꞌ —taꞌpîiya. —Maasa pra woꞌ, maiꞌ pe teenasen yannîpî, moropai awannîꞌsaꞌ pe penaroꞌ cabra piꞌpî karakaiya, moropai woꞌ etiꞌkamo. Mîrîrî epuꞌtîꞌnîkon yeꞌnen, amenan woꞌ tîrî amenan itenseꞌ yaꞌ —taꞌpî Jesusya. Mîrîrî taꞌpîiya amenan esenupantoꞌ pîꞌ tenupaiyaꞌnîkon epuꞌtoꞌpe toꞌya.
Jesus Eseurîma Erîꞌkaꞌnîtoꞌ Weiyu Pîꞌ
23 Mîrîrî tîpo erîꞌkaꞌnîtoꞌ weiyu yai, Jesus asarîꞌpî trigo yeꞌkanaꞌ pîꞌ. Tuutîkon yeꞌka pe inenupaꞌsanya trigo pikkaꞌpî.
24 Mîrîrî kupî toꞌya eraꞌmaꞌpî fariseuyamîꞌya. —Aꞌkî, toꞌ esenyakaꞌma mîrîrî erîꞌkaꞌnîtoꞌ weiyu yai. Trigo pikka pîꞌ toꞌ man, erîꞌkaꞌnîtoꞌ weiyu yai. Moisés nurîꞌtîya uyenupaꞌpîkon yawîrî pra toꞌ wanî yeꞌnen, yairî pra toꞌ wanî mîrîrî —taꞌpî toꞌya.
25 2:25,26 Moropai taꞌpî Jesusya toꞌ pîꞌ: —Pena Judeuyamîꞌ yepotorî rîꞌpî Davi nurîꞌtî wanîꞌpî îꞌ ton pra. Emiꞌne awanîꞌpî tîpokonpankon pokonpe. Abiatar wanîꞌpî teepîremasanon yepotorî pe mîrîrî yai. Paapa maimu pe aweꞌmenukasaꞌ mîrîrî, toꞌ nîkupîꞌpî. Paapa yewîꞌ ta Davi ewomîꞌpî. Moro awanîꞌpî trigo puusaꞌ teepîremasanon nîtîrîꞌpî Paapa pia. Paapaya taasaꞌ wanîꞌpî mîrîrî tîîtoꞌpe toꞌya moropai aakoꞌmamî tîpo, yaꞌtoꞌpe toꞌya. Tîîse teepîremasanonya neken yaku taasaꞌ Paapaya wanîꞌpî. Tîîse emiꞌne tîwanî yeꞌnen, Daviya yakuꞌpî moropai itîrîꞌpîiya nîrî tîpokonpankon pia. Tîîse mîrîrî pîꞌ Paapa ekoreꞌma pra awanîꞌpî.
26 Eraꞌmakî 2:25
27 Pemonkonyamîꞌ konekaꞌpî Paapaya eꞌmaiꞌ pe. Mîrîrî tîpo erîꞌkaꞌnîtoꞌ weiyu ekaremekîꞌpîiya pemonkonyamîꞌ ton pe toꞌ pîikaꞌtîpa kaiꞌma. Pemonkonyamîꞌ konekaiya pra awanîꞌpî erîꞌkaꞌnîtoꞌ weiyu yeseru pîꞌ toꞌ esekatonkatoꞌpe.
28 Moropai uurî, kaꞌ poi iipîꞌpî, uurî wanî erîꞌkaꞌnîtoꞌ weiyu yai tamîꞌnawîronkon nîkupî ton ekaremeꞌnen pe —taꞌpî Jesusya.
