Jesus Cristo Yekare Marcos Nîmenukaꞌpî 3:1-35
3 Inîꞌrî Jesus ewomîꞌpî epereꞌnîtoꞌ yewîꞌ ta. Moro awanîꞌpî warayoꞌ apîtaꞌpî itenya.
2 Tiaronkon esenumenkaꞌpî Jesus pîꞌ. Erîꞌkaꞌnîtoꞌ weiyu yai mîîkîrî yepiꞌtî Jesusya anepuꞌpai toꞌ wanîꞌpî, imakuiꞌpî konekaiya taakonpa kaiꞌma.
3 —Asiꞌkî uupia —taꞌpî Jesusya apîtaꞌpî itenya pîꞌ. —Eꞌmîꞌsaꞌkakî tamîꞌnawîronkonya ayeraꞌmatoꞌpe.
4 Tamîꞌnawîronkon ekaranmapoꞌpî Jesusya: —Moisés nurîꞌtîya yenupantoꞌ yawîrî, îꞌ kupîuya eꞌpainon erîꞌkaꞌnîtoꞌ weiyu yai? Morî kupîuya ya, morî pe awanî? Imakuiꞌpî kupîuya ya, morî pe awanî? Anîꞌ pîikaꞌtîuya ya aasaꞌmanta namai, morî pe awanî? Anîꞌ rî wîuya ya, morî pe awanî? Oꞌnon yeꞌka pe eporî pîꞌ naatî? Kaꞌtî upîꞌ —taꞌpîiya.
Tîîse moo toꞌ wanîꞌpî, yuuku toꞌya pra.
5 Teekoreꞌmasaꞌ yeꞌka pe, Jesus esenumenkaꞌpî tamîꞌnawîronkon pîꞌ. Eekoreꞌmaꞌpî maasa pra mîrîrî priꞌyawon pepîn saꞌnama toꞌya pra awanî yeꞌnen. —Ayenya kainunkî —taꞌpîiya apîtaꞌpî itenya pîꞌ. Tenya kainumîꞌpî warayoꞌya moropai eesepiꞌtîsaꞌ wanîꞌpî.
6 Mîrîrî tîpo fariseuyamîꞌ epaꞌkaꞌpî epereꞌnîtoꞌ yewîꞌ tapai. Moropai Herodes pemonkonoyamîꞌ pokonpe toꞌ eseurîmaꞌpî Jesus pîꞌ, iwîkonpa kaiꞌma.
Tiaronkon Priꞌyawonkon Pepîn Yepiꞌtî Jesusya
7 Moropai Jesus wîtîꞌpî tîpemonkonoyamîꞌ pokonpe ikuꞌpî ena pona. Arinîkon Galiléia ponkon wîtîꞌpî nîrî.
8 Moropai Judéia ponkon, Jerusalém ponkon, Iduméia ponkon, Jordão ratai ponkon, Tiro moropai Sidom poro tîîkoꞌmansenon wîtîꞌpî arinîke Jesus wenairî. Priꞌyawonkon pepîn yepiꞌtîpîtîꞌpîiya yekare etasaꞌ tîuyaꞌnîkon yeꞌnen toꞌ wîtîꞌpî.
9 3:9,10 Arinîkon priꞌyawonkon pepîn yepiꞌtîsaiꞌya wanîꞌpî. Tamîꞌnawîronkon priꞌyawonkon pepînya iwoimaꞌtîꞌpî kîrîppe yapîkonpa, teesepiꞌtîkonpa kaiꞌma. Mîrîrî yeꞌnen Jesusya taꞌpî tînenupaꞌsan pîꞌ: —Kanau eneꞌtî, yaꞌ enuꞌtoꞌpe. Pemonkonyamîꞌya uwoimaꞌtî pîꞌ man kîrîppe. Arinîke toꞌ man —taꞌpîiya.
10 Eraꞌmakî 3:9
11 Moropai imariwaꞌkaꞌpankon moropai maawariyamîꞌ poitîrîtononya Jesus eraꞌmasaꞌ tîuyaꞌnîkon yeꞌnen, toꞌ esenunpîtîꞌpî iipia, tentaiꞌnîkon Jesus wanî epuꞌtî tîuyaꞌnîkon yeꞌnen. Aronne panpîꞌ taapîtîꞌpî toꞌya: —Amîrî Paapa munmu —taꞌpî toꞌya.
12 Moropai Jesusya toꞌ yaipontîꞌpî. —Uurî kîsekaremeꞌtî —taꞌpîiya toꞌ pîꞌ.
Tîpemonkono Ton Warayoꞌkon Moꞌka Jesusya
13 Moropai Jesus epaꞌkaꞌpî wîꞌ kîrîkon koreꞌta pîꞌ. Ituꞌse tîweꞌtoꞌkon pemonkonyamîꞌ yanno meꞌpoꞌpîiya. Moropai iipia toꞌ wîtîꞌpî.
14 Moropai asakîꞌne puꞌ pona tîîmoꞌtai pemonkonyamîꞌ moꞌkaꞌpîiya tarakkîrî toꞌ eꞌtoꞌpe toꞌ yenupapa kaiꞌma, toꞌ yarimapa kaiꞌma itekare ekaremeꞌse.
15 Toꞌ meruntîri ton tîrîꞌpîiya, imariwaꞌyamîꞌ moropai maawariyamîꞌ yarimatoꞌpe toꞌya pemonkonyamîꞌ piapai.
16 Simão moꞌkaꞌpî Jesusya moropai eseꞌtîꞌpîiya Pedro pe.
17 Tiago, Zebedeu munmu, moꞌkaꞌpîiya takon João yarakkîrî. Inkamoro eseꞌtîꞌpîiya Boanerges pe. Waraꞌnapi warainokon taatoꞌ mîrîrî Boanerges.
18 André, Filipe, Bartolomeu, Mateus, Tomé, Alfeu munmu iteseꞌ Tiago, Tadeu, moropai Simão teepîsen Zelote taatoꞌ, inkamoro moꞌkaꞌpîiya tamîꞌnawîrî.
19 Moropai Judas Iscariotes moꞌkaꞌpîiya nîrî. Manniꞌ Jesus yapisîton iteyatonon pia itîrîpa. Moropai mîrîrî tîpo, Jesus emikkuꞌpî tewîꞌ ta.
Jesus Eseurîma Makui Yeseru Pîꞌ
20 Mîrîrî warantî inkamoro moꞌkaꞌpîiya tînaipontîkon ton pe. Moropai inîꞌrî arinîkon pemonkonyamîꞌ eperepîꞌpî Jesus pia. Toꞌ pîꞌ Jesus esenyakaꞌmaꞌpî, toꞌ yenupa pîꞌ. Mîrîrî yeꞌnen Jesus moropai inenupaꞌsan entamoꞌka yentai awanîꞌpî.
21 Mîrîrî yekare eta tîuyaꞌnîkon pe, Jesus yonpayamîꞌya taꞌpî:
—Ayawîꞌ pe eena tuꞌkasaꞌ man. Aꞌkî, awentamoꞌka pra awanî eraꞌmatî —taꞌpî toꞌya. Eraꞌmai toꞌ wîtîꞌpî.
22 Moropai Moisés nurîꞌtîya yenupantoꞌ pîꞌ yenupatonkon Jerusalém poi iipîꞌsan eseurîmaꞌpî. —Maawariyamîꞌ yepotorî poitîrî pe Jesus wanî mîrîrî, Belzebu poitîrî pe. (Makui mîîkîrî Belzebu) Maawariyamîꞌ yepotorî meruntîri ke maawariyamîꞌ yaipontîiya mîrîrî, Makui meruntîri ke —taꞌpî toꞌya.
23 Moropai Jesusya toꞌ yannoꞌpî tîîpia. Morî panton ke toꞌ yenupaꞌpîiya.
—Makuiya maawariyamîꞌ yarima pepîn pemonkonyamîꞌ piapai, imaimu pe imakuiꞌpî kupî toꞌya mîîtoꞌpe.
24 Tiwinan pata yaꞌ tîîkoꞌmansenon esiyuꞌpîtî ya, toꞌ koꞌmamî pepîn. Toꞌ epantaka.
25 Moropai tiwinan wîttî ta tîîkoꞌmansenon esiyuꞌpîtî ya, toꞌ koꞌmamî pepîn. Toꞌ epantaka.
26 Mîrîrî warantî Makuiya tîpoitîrîtonon yarima ya pemonkonyamîꞌ yapai, tîîwarîrî eesiyuꞌpîtî eꞌpainon moropai aakoꞌmamî pepîn, aweꞌtîꞌka eꞌpainon.
27 Tîîse meruntî yewîꞌ ta ewonpai amaꞌyeꞌ wanî ya itemanne yamaꞌrunpai, eꞌmaiꞌ pe meruntî ke tîweꞌsen yaironpîtîiya kapuya ke. Mîrîrî tîpo yamaꞌrunpaiya eꞌpainon. Makui yentainon nekenya maawariyamîꞌ yarima.
28 Tamîꞌnawîron imakuiꞌpî pemonkonyamîꞌ nîkupîꞌpî moropai imakuiꞌpî pe toꞌ eseurîmaꞌpî Paapa winîkîi kupî Paapaya tîîwanmîra.
29 Tîîse Morî Yekaton Wannî pîꞌ imakuiꞌpî pe teeseurîmasen wanî ya, inkupîꞌpî kupî Paapaya pepîn tîîwanmîra. Ipatîkarî imakuiꞌpî pe awanî Paapa pîꞌ —taꞌpî Jesusya.
30 Mîrîrî taꞌpî Jesusya, yairî pra tîpîꞌ toꞌ eseurîma yeꞌnen. Makuiya ikuꞌsaꞌ meruntî ke maawariyamîꞌ yarimatoꞌpeiya, imariwaꞌ yarimatoꞌpeiya, taasaꞌ toꞌya wanîꞌpî ipîꞌ. Morî Yekaton Wannîya ikupîꞌpî meruntî ke, tîîse mîrîrî kupî toꞌya pra awanîꞌpî innape.
Jesus Yuwa Itonpayamîꞌya
31 Mîrîrî tîpo Jesus yan moropai itaꞌmiꞌsan erepamîꞌpî. Poro po siꞌma yanno meꞌpoꞌpî toꞌya.
32 Arinîkon pemonkonyamîꞌ ereutasaꞌ wanîꞌpî iipia. —Aꞌkî, asan moropai ayaꞌmiꞌsan man poro po. Ayanno pîꞌ toꞌ man —taꞌpî toꞌya ipîꞌ.
33 Mîrîrî pîꞌ, taꞌpî Jesusya: —Îꞌ yeꞌka kin pemonkonyamîꞌ pîꞌ, maamaꞌ moropai mooyi tauya?
34 Tîîpia ereutaꞌsan pîꞌ eesenumenkaꞌpî. —Tiaronkon tarî toꞌ man. Inkamoro pîꞌ maamaꞌ moropai mooyi tauya eꞌpainon.
35 Maasa pra ituꞌse Paapa eꞌtoꞌ kuꞌnen wanî ya, uyonpa pe awanî. Mîîkîrî pîꞌ, mooyi moropai maꞌnon moropai maamaꞌ tauya eꞌpainon —taꞌpî Jesusya.
