Jesus Cristo Yekare Marcos Nîmenukaꞌpî 4:1-41
4 Tiaron pensa inîꞌrî Jesusya pemonkonyamîꞌ yenupaꞌpî. Ikuꞌpî ena po arinîkon pemonkonyamîꞌ eperepîꞌpî iipia. Arinîke toꞌ wanî yeꞌnen, Jesus asaraꞌtîꞌpî tuna katawon kanau yaꞌ moropai eereutaꞌpî. Pemonkonyamîꞌ wanîꞌpî aꞌmun po, tamîꞌnawîrî.
2 Inkamoro yenupaꞌpîiya morî panton ekaremekî yeꞌka pe. Taꞌpîiya toꞌ pîꞌ:
3 —Aꞌkî, warayoꞌ wîtîꞌpî tînmîri pînse.
4 Tînmîri yaꞌ tînpîmî pîmîꞌpîiya isorokaiꞌma. Mîrîrî inpîmî yonpa enaꞌpî eꞌma ta. Toronyamîꞌ iipîꞌpî moropai yennoꞌmaꞌpî toꞌya.
5 Moro nîrî inmîri yaꞌ, tîꞌ parappa pon non mararon pona, tiaron inpîmî yonpa enaꞌpî. Mararî non wanîꞌpî. Mîrîrî yeꞌnen kaꞌneꞌ pe aaroꞌtaꞌpî.
6 Tîîse wei aꞌnasaꞌ pe awaꞌpiꞌtaꞌpî. Kureꞌne ikara wîtîtoꞌ ton pra awanîꞌpî. Mîrîrî yeꞌnen awaꞌpiꞌtaꞌpî.
7 Moropai tiaron inpîmî yonpa enaꞌpî mîꞌnî ta. Mîrîrî koreꞌta aaroꞌtaꞌpî. Tîîse mîꞌnî yeꞌya itarumaꞌtîꞌpî. Mîrîrî yeꞌnen eepeta pra awanîꞌpî.
8 Moropai tiaron inpîmî yonpa enaꞌpî morî non pona. Mîrîrî aroꞌtaꞌpî, kureꞌne eenaꞌpî, moropai eepetaꞌpî. Tiaron epetaꞌpî, tîîse mararî iteperu wanîꞌpî. Tiaron epetaꞌpî moropai tuꞌke panpîꞌ iteperu wanîꞌpî. Tiaron epetaꞌpî mararî pra, tuꞌke iteperu wanîꞌpî —taꞌpîiya.
9 Moropai taꞌpî Jesusya toꞌ pîꞌ: —Anepuꞌpainon wanî ya, etakî —taꞌpîiya.
Îꞌ Ankapai Mîrîrî Panton Wanî Ekaremekî Jesusya
10 Mîrîrî tîpo pemonkonyamîꞌ wîtîꞌpî. Tîîse asakîꞌne puꞌ pona tîîmoꞌtaiꞌnîkon Jesus nenupaꞌsan eꞌnîmîꞌpî. Tiaronkon eꞌnîmîꞌpî toꞌ pokonpe. Mîrîrî yai inkamoroya Jesus ekaranmapoꞌpî. —Îꞌ taa yuꞌse awanî sîrîrî morî panton ke anna pîꞌ? —taꞌpî toꞌya.
11 —Ekaremekîuya apîꞌnîkon —taꞌpî Jesusya. —Tiaronkon nepuꞌtî pepîn epuꞌtîyaꞌnîkon kupî sîrîrî. Îꞌ kaiꞌma tamîꞌnawîronkon esaꞌ pe Paapa iipî kupî sîrîrî ekaremekîuya sîrîrî. Tiaronkonya epuꞌtî pepîn, tepotorîkon pe Paapa kupî toꞌya pra awanî yeꞌnen. Unekaremekî eta toꞌya panton pe, tîîse epuꞌtî toꞌya pepîn.
12 Mîrîrî pîꞌ Paapa maimu ekaremeꞌnen Isaías nurîꞌtî eseurîmaꞌpî pena. Isaíasya taꞌpî:“Eta toꞌya moropai eraꞌma toꞌya,tîîse îꞌ pe awanî epuꞌtî toꞌya pepîn.Mîrîrî yeꞌnen imakuiꞌpî winîpai toꞌ eraꞌtî pepîn.Imakuiꞌpî toꞌ nîkupîꞌpî kupî Paapaya pepîn tîîwanmîra,”
taꞌpî Isaías nurîꞌtîya.
13 Unekaremekîꞌpî tînmîri pînnen pantoni epuꞌtîyaꞌnîkon pra awanî ya, tiaron unekaremekî epuꞌtîyaꞌnîkon eserîke pra awanî nîrî —taꞌpî Jesusya.
14 —Ipapoiꞌma tînmîri pînnen warayoꞌ warantî, ekaremeꞌnenya itekare ekaremekî pata kaisarî.
15 Eꞌma ta enaꞌsan warantî tiaronkon wanî. Itekare eta toꞌya, tîîse kaꞌneꞌ pe Makui wîtî moropai itekare, toꞌ netaꞌpî moꞌkaiya, inîꞌrî toꞌ enpenata namai ipîꞌ.
16 Moropai tîꞌ pon non pona enaꞌsan warantî tiaronkon wanî. Itekare eta tîuyaꞌnîkon pe yapisî toꞌya. Mararî pra toꞌ atausinpa.
17 Tîîse saꞌme yapisî toꞌya pra awanî tewankon yaꞌ. Mîrîrî yeꞌnen mararî rî toꞌ koꞌmamî mîrîrî. Itekare wenai toꞌ eꞌtarumaꞌtîsaꞌ ya, kaꞌneꞌ pe irumaka toꞌya. Tiaronkonya toꞌ tarumaꞌtîsaꞌ ya, itekare rumaka toꞌya.
18 Mîꞌnî yeꞌka koreꞌta enaꞌsan warantî tiaronkon wanî. Itekare eta toꞌya,
19 tîîse toꞌ yewan wanî sîrîrî pata po tînkonekakon pîꞌ puꞌkuru. Moropai kureꞌne puꞌkuru temannekon yapurî toꞌya. Moropai inîꞌ panpîꞌ temannekon ton yuꞌse toꞌ wanî. Mîrîrî yeꞌkaya itekare tarumaꞌtî. Moropai mîrîrî wenai eepeta pepîn.
20 Moropai yanunsaꞌ non pona enaꞌsan warantî tiaronkon wanî. Itekare eta toꞌya moropai yapisî toꞌya. Mararî tiaron inpîmî yonpa epetaꞌpî warantî, tiaronkonya Paapa maimu kupî, tîîse mararî. Tuꞌke panpîꞌ tiaron epetaꞌpî warantî, tiaronkonya Paapa maimu kupî kureꞌne panpîꞌ. Mararî pra tiaron epetaꞌpî warantî, tiaronkonya Paapa maimu kupî mararî pra —taꞌpî Jesusya.
Uweiyukon Pîꞌ Jesus Eseurîma
21 Tiaron morî panton ekaremekîꞌpî Jesusya: —Uweiyukon enepî pepîn wariꞌsaꞌ yoꞌkoi itîîtoꞌpe —taꞌpîiya. —Itîrî pepîn nîrî weꞌnannîtoꞌ yaponseꞌ yoꞌkoi, tîîse enepî itaponseꞌ pona itîîtoꞌpe.
22 Sîrîrî îꞌ rî esenonsaꞌ ya, mîrîrî eseraꞌma tiaron pensa. Mîrîrî warantî morî panton unekaremekî epuꞌtî tiaronkonya pepîn sîrîrî. Tîîse tiaron pensa epuꞌtî toꞌya.
23 Anepuꞌpai awanîkon ya, moo siꞌma etatî —taꞌpî Jesusya.
24 —Morî pe etatî —taꞌpîiya toꞌ pîꞌ. —Etayaꞌnîkon kaisarî inîꞌ panpîꞌ Paapa maimu epuꞌtîyaꞌnîkon. Moropai etanenanya inîꞌ panpîꞌ epuꞌtî.
25 Umaimu anepuꞌpainon wanî ya, Paapaya itîrî inîꞌ panpîꞌ epuꞌtoꞌpeiya. Tîîse anepuꞌpainon pepîn wanî ya, epuꞌtîiya pepîn. Maasa pra tînetaꞌpî kupîiya tîîwanmîra.
Unpîmîkon Ton Yenaꞌpî Pîꞌ Jesus Eseurîma
26 Inîꞌrî morî panton ekaremekîꞌpî Jesusya. Îꞌ kaiꞌma awanî pe man tamîꞌnawîronkon esaꞌ pe Paapa iipî ya epuꞌtoꞌpe toꞌya. See warantî taꞌpîiya: —Warayoꞌya tekkari yenaꞌpî pîmîꞌpî ipapoiꞌma kawai yenaꞌpî pîmî warantî. Moropai eemikkuꞌpî tewîꞌ ta.
27 Teseru ta ewaron yaꞌ iweꞌnapîtîꞌpî moropai wei epaꞌka tanne, aapakapîtîꞌpî. Mîrîrî tanne, inpîmîꞌpî aroꞌta moropai aarenta. Tîîwarîrî aaroꞌtaꞌpî non yapai, aaretaꞌpî.
28 Moropai aarentaꞌpî. Moropai eepetaꞌpî.
29 Mîrîrî tîpo yaꞌtîꞌpîiya yaꞌtîtoꞌ weiyu eseposaꞌ yeꞌnen. Tîîse îꞌ waniꞌ awanî yeꞌnen tînpîmîꞌpî aroꞌta epuꞌtîiya pra awanîꞌpî. Îꞌ waniꞌ awanî yeꞌnen eepeta epuꞌtîiya pra awanî. Mîrîrî warantî tiaronkonya Paapa yapisî tepotorîkon pe, itekare eta tîuyaꞌnîkon yeꞌnen. Tîîse oꞌnon yeꞌka pe Paapa esenyakaꞌma epuꞌtî toꞌya pepîn, —taꞌpî Jesusya.
Mostarda Yeꞌ Pîꞌ Jesus Eseurîma
30 —Tiaron morî panton ekaremekîuya sîrîrî, îꞌ kaiꞌma awanî pe man tamîꞌnawîronkon esaꞌ pe Paapa iipî ya epuꞌtîkonpa —taꞌpî Jesusya. —See warantî arinîkon pemonkonyamîꞌ yepotorî pe Paapa wanî pe man —taꞌpîiya.
31 —Mostarda yeꞌ taꞌsen yare enaꞌpî wanî tamîꞌnawîron enaꞌpî maꞌre simonkokon pe itenaꞌpî.
32 Tîîse mîrîrî enaꞌpî pînsaꞌ, moropai aarenta, moropai kureꞌne eena tamîꞌnawîron parîꞌ yentai. Mararî pra aapantatapîtî. Toronyamîꞌya taponseꞌkon ton koneka iporo iꞌnîꞌ ya. Eꞌmaiꞌ pe siꞌmîrikkî pe itenaꞌpî wanîꞌpî, tîîse maasa kureꞌne iteꞌ enaꞌpî. Mîrîrî warantî mararonkonya Paapa yapisîꞌpî sîrîrî tepotorîkon pe. Tîîse maasa arinîkonya yapisî kupî sîrîrî —taꞌpî Jesusya.
33 Mîrîrî warantî morî panton ke itekare ekaremekîꞌpîiya toꞌ pîꞌ. Ekaremekîꞌpîiya epuꞌtî toꞌya kaisarî.
34 Panton pe pra toꞌ yeurîmaiya pra awanîꞌpî. Tîîse tîpemonkonoyamîꞌ yarakkîrî neken tîwanî yai, tînekaremekîꞌpî ekaremeꞌ tuꞌkaꞌpîiya toꞌ pîꞌ.
Aꞌsitun Tîꞌnapannîpî Jesusya
35 Mîrîrî koꞌmamîiya yai, taꞌpîiya tîpemonkonoyamîꞌ pîꞌ: —Iyarîꞌnîkon. Kuruꞌnîꞌnîkon —taꞌpîiya.
36 Aasîrî kanau yaꞌ awanîꞌpî. Tamîꞌnawîronkon nîmîꞌpî toꞌya moropai Jesus yarîꞌpî inenupaꞌsanya. Moropai tiaronkon wîtîꞌpî tîkanaukon yaꞌ ipîkîrî.
37 Mîrîrî ikuꞌpî nuurukkutî toꞌya tanne, kureꞌnan aꞌsitun iipîꞌpî tiwinarî. Sipa sipa pe tuna wanîꞌpî. Tuna ewomîꞌpî kanau ya. Kanau yannîpî yonpaꞌpî tunaya.
38 Mîrîrî tanne, Jesus weꞌnasaꞌ wanîꞌpî kanau maikko yaꞌ. Tîꞌmî yeꞌpî yaꞌsantîsaiꞌya wanîꞌpî. Moropai mîîkîrî yenpakaꞌpî toꞌya: —Apakakî —taꞌpî toꞌya. —Îꞌ ton pe saꞌmantan tanne, awetun mîrîrî îꞌ kupîya pra? Apakakî.
39 Mîrîrîya Jesus pakaꞌpî moropai aꞌsitun tîꞌnapannîpîꞌpîiya tîmeruntîri ke. Aꞌsitun pîꞌ taꞌpîiya: —Tîꞌnapankî. Tuna pîꞌ taꞌpîiya: —Tîꞌnapankî. Tuna nîrî tîꞌnapannîpîꞌpîiya tîmeruntîri ke. Seꞌ kaisarî tuna eenaꞌpî.
40 Mîrîrî tîpo taꞌpîiya toꞌ pîꞌ: —Îꞌ ton pe eesiꞌnîꞌpîtîkon? Innape ukupîyaꞌnîkon pra awanîkon mîrîrî, aapiaꞌnîkon puꞌkuru wanî tanne —taꞌpîiya.
41 Mîrîrî mararî pra toꞌ esenumenkaꞌpî ipîꞌ. Tîmurukun pe siꞌma toꞌ eseurîmaꞌpî ipîꞌ: —Îꞌ yeꞌka Mîîkîrî pemonkon? Aꞌsitun tîꞌnapannîꞌnen tîmeruntîri ke moropai tuna tîꞌnapannîꞌnen nîrî tîmeruntîri ke. Oꞌnon yeꞌka pe renamo awanî? —taꞌpî toꞌya.
