Jesus Cristo Yekare Marcos Nîmenukaꞌpî 5:1-43
5 Toꞌ erepamîꞌpî ikuꞌpî ratai pona. Gerasenoyamîꞌ pata pona toꞌ erepamîꞌpî.
2 Kanau yapai Jesus eseuꞌka pe, uuruwai koreꞌtapai warayoꞌ iipîꞌpî iipia. Oꞌmaꞌ ewonsaꞌ wanîꞌpî mîîkîrî warayoꞌ yaꞌ.
3 Uuruwai koreꞌta tîîkoꞌmansen pe mîîkîrî wanîꞌpî, tîꞌ ta, eꞌpîyamîꞌ koreꞌta tîîkoꞌmansen.
4 Tuꞌke iteꞌka yewaꞌtîpîtîꞌpî toꞌya saꞌman ferro ke itenya pîꞌ moropai iꞌpu pîꞌ. Tîîse yewaꞌtî toꞌya kaisarî tewaꞌtîtoꞌ yaꞌtîpîtîꞌpîiya tiwinarî. Anîꞌya yewaꞌtî yentai awanîꞌpî.
5 Awentaimepîtîꞌpî ewaron kaisarî moropai wei kaisarî uuruwai koreꞌta siꞌma. Aakoꞌmantoꞌpe rî awanîꞌpî. Aweꞌpaꞌtîpîtîꞌpî nîrî tîꞌ ke.
6 Aminke siꞌma Jesus eraꞌma tîuya pe, eekaꞌtumîꞌpî iipia moropai aweꞌsekunkaꞌpî irawîrî. Tamîꞌnawîronkon yentainon mîserî, kaiꞌma eesenumenkaꞌpî Jesus pîꞌ.
7 5:7,8 Jesusya taꞌpî ipîꞌ: —Mîîkîrî yapai epaꞌkatî, oꞌmaꞌkon —taꞌpîiya. Meruntî ke warayoꞌ entaimeꞌpî. —Jesus amîrî kaꞌ po tîîkoꞌmansen munmu. Amîrî Paapa munmu. Îꞌ kuꞌse aaiꞌsaꞌ uyarakkîrî? Ayekaꞌnunkauya sîrîrî. Paapaya eta tanne, atarumaꞌtîuya pepîn kaꞌkî upîꞌ —taꞌpîiya.
8 Eraꞌmakî 5:7
9 Moropai Jesusya mîîkîrî ekaranmapoꞌpî. —Anîꞌ ayeseꞌ? —taꞌpîiya. —Uyeseꞌ tuꞌkan, maasa pra arinîkon anna —taꞌpîiya.
10 Mararî pra Jesus yekaꞌnunkaꞌpî oꞌmaꞌya. —Anna kîsaipontîi tiaron pata pona —taapîtîꞌpî toꞌya.
11 Aminke pra ikîrî po arinîkon porcoyamîꞌ wanîꞌpî tekkarikon enaꞌnenan.
12 Oꞌmaꞌkonya Jesus yekaꞌnunkaꞌpî. —Anna yaipontîkî porcoyamîꞌ koreꞌta anna ewontoꞌpe toꞌ yaꞌ —taꞌpî toꞌya.
13 —Atîtî, moriya —taꞌpî Jesusya. Oꞌmaꞌkon epaꞌkaꞌpî mîîkîrî warayoꞌ yapai moropai porcoyamîꞌ yaꞌ toꞌ ewomîꞌpî. Moropai porcoyamîꞌ ekaꞌtumîꞌpî ikîrî poi tuna kata. Moropai toꞌ eꞌsorokaꞌpî tuna kaꞌ moropai toꞌ anarîꞌpî. Arinîke toꞌ wanîꞌpî, 2.000 kaisarî.
14 Mîrîrî eraꞌma tîuyaꞌnîkon yai, porcoyamîꞌ eraꞌmanenan wîtîꞌpî. Tîneraꞌmaꞌpîkon ekaremekîꞌpî toꞌya tamîꞌnawîronkon pîꞌ, cidade ponkon pîꞌ moropai poroponkon pîꞌ. Mîrîrî ya pemonkonyamîꞌ wîtîꞌpî oꞌnon yeꞌka pe awanî eraꞌmai.
15 Moropai Jesus pia toꞌ erepamîꞌpî. Mîîkîrî warayoꞌ oꞌmaꞌkon yenpîꞌ eporîꞌpî toꞌya. Eereutasaꞌ wanîꞌpî, tîpon ke ayawîꞌ pe pra. Mîîkîrî arinîkon oꞌmaꞌkon wanîꞌpî yaꞌ eporîꞌpî toꞌya mîrîrî. Mîrîrî pîꞌ toꞌ esenumenkaꞌpî. Moropai eranneꞌ pe toꞌ enaꞌpî.
16 Moropai oꞌnon yeꞌka pe eenaꞌpî ekaremekîꞌpî eraꞌma tîponkonya, porcoyamîꞌ yekare moropai warayoꞌ oꞌmaꞌkon yenpîꞌ yekare ekaremekîꞌpî toꞌya.
17 Moropai Jesus yekaꞌnunkaꞌpî tamîꞌnawîronkonya attîtoꞌpe tîpatakon yapai.
18 Kanau yaꞌ Jesus asaraꞌtî tanne, mîîkîrî warayoꞌ oꞌmaꞌkon yenpîꞌ wîtîꞌpî iipia. —Uurî nîrî, itîîpai wai apîkîrî —taꞌpîiya.
19 —Kaane —taꞌpî Jesusya. —Ayewîꞌ ta ennaꞌpokî ayonpayamîꞌ pia. Paapa nîkupîꞌpî apîꞌ ekaremeꞌta. Tîꞌnokoꞌpî pe uyeraꞌmaꞌpîiya kaꞌta —taꞌpî Jesusya ipîꞌ.
20 Mîîkîrî wîtîꞌpî. Jesus nîkupîꞌpî tîpîꞌ ekaremekî pinunpaꞌpîiya Decápolis poro. Moropai tamîꞌnawîronkon esenumenkaꞌpî ipîꞌ.
Jairo Yekare
21 Moropai inîꞌrî Jesus ennaꞌpoꞌpî ikuꞌpî ratai pona kanau ya. Eerepansaꞌ tanne, arinîkon pemonkonyamîꞌ eperepîꞌpî iipia. Ikuꞌpî ena po Jesus wanîꞌpî.
22 Judeuyamîꞌ epereꞌtoꞌ yewîꞌ eraꞌmanen wîtîꞌpî Jesus pia, iteseꞌ Jairo. Jesus eraꞌma tîuya pe, mîîkîrî Jairo esenumîꞌpî non pona, Jesus rawîrî moropai yekaꞌnunkaꞌpîiya.
23 —Aase, uyewîꞌ ta uyensi saꞌmanta pe man —taꞌpî Jairoya Jesus pîꞌ. —Aase uyewîꞌ ta ayenya tîrîpa ipona eesepiꞌtîtoꞌpe aasaꞌmanta namai —taꞌpîiya.
24 Mîrîrî yeꞌnen Jesus wîtîꞌpî ipîkîrî. Arinîkon pemonkonyamîꞌ wîtîꞌpî toꞌ pokonpe. Jesus woimaꞌtîꞌpî toꞌya. Yatunnukuꞌpî toꞌya.
Mîn Kannen Wîriꞌ Yepiꞌtî Jesusya
25 Arinîkon koreꞌta wîriꞌ wanîꞌpî priꞌyawon pepîn, mîn kannen. Asakîꞌne puꞌ pona tîîmoꞌtai konoꞌ kaisarî aakoꞌmansaꞌ wanîꞌpî priꞌya pra.
26 Arinîkon neꞌneꞌkon yepiꞌtîtonkon wanîꞌpî yepiꞌtî yuꞌse. Tîîse yepiꞌtî toꞌya pra awanîꞌpî. Yepiꞌtî toꞌya tanne inîꞌ panpîꞌ neꞌneꞌ eena tuꞌkaꞌpî. Inkamoro yeꞌmatîuya ke temanne tîꞌkaꞌpîiya wanîꞌpî tamîꞌnawîrî. Tîîse eesepiꞌtî pra awanîꞌpî. Inîꞌ panpîꞌ priꞌya pra eenaꞌpî.
27 5:27,28 Jesus yekare etasaꞌ mîîkîrî wîriꞌya wanîꞌpî. Mîrîrî yeꞌnen mîîkîrî wîriꞌ esenumenkaꞌpî Jesus pon yeꞌpi pîꞌ yapîsauꞌya ya esepiꞌtî eꞌpainon kaiꞌma, wîriꞌ esenumenkaꞌpî. Jesus poi winî aaipîꞌpî moropai ipon yeꞌpi pîꞌ yapîꞌpîiya.
28 Eraꞌmakî 5:27
29 Mîrîrî pe rî mîn asaꞌtîꞌpî, yapîiya pe, moropai eesepiꞌtîsaꞌ epuꞌtîꞌpî mîîkîrî wîriꞌya.
30 Tîmeruntîri ke tiaron yepiꞌtîsaꞌ tîuya epuꞌtîꞌpî Jesusya. Mîrîrî pe rî eeraꞌtîꞌpî arinîkon koreꞌta. —Anîꞌya uyapî pîꞌ nai upon pîꞌ? —taꞌpîiya.
31 —Arinîkon pemonkonyamîꞌ koreꞌta siꞌma, anîꞌya upon pîꞌ uyapî pîꞌ nai taaya. Pakko pe awanî mîrîrî —taꞌpî Jesus pemonkonoyamîꞌya ipîꞌ.
32 Tîîse tîwoinokon pîꞌ Jesus esenumenkaꞌpî anîꞌya ikupîꞌpî epuꞌtîpa kaiꞌma.
33 Teesepiꞌtîsaꞌ epuꞌtî tîuya yeꞌnen, mîîkîrî wîriꞌ esiꞌnîpîꞌpî. Moropai tîweꞌkîkîꞌma yeꞌka pe attîꞌpî Jesus pia. Eesenumîꞌpî non pona irawîrî. Moropai tekare ekaremekîꞌpîiya Jesus pîꞌ tamîꞌnawîrî.
34 —Maꞌnon, innape ukupîya yeꞌnen eesepiꞌtîsaꞌ mîrîrî —taꞌpî Jesusya mîîkîrî wîriꞌ pîꞌ. —Tîwanmîra atîkî. Inîꞌrî ayeparanya ayeporî pepîn —taꞌpîiya.
Jairo Yensi Yepiꞌtî Jesusya
35 Jesus eseurîma tanne, tiaronkon warayoꞌkon erepamîꞌpî epereꞌnîtoꞌ yewîꞌ eraꞌmanen, Jairo yewîꞌ tapaiꞌnîkon. —Ayensi saꞌmantan pîꞌ man. Inîꞌ uyenupanenkon kîsarîi —taꞌpî toꞌya.
36 —Toꞌ eseurîmatoꞌ tîpîinamai pra —taꞌpî Jesusya epereꞌnîtoꞌ eraꞌmanen pîꞌ. —Kesiꞌnîpîi. Innape neken ukuꞌkî. Kîsewankonoꞌmai —taꞌpîiya.
37 Pedro, moropai Tiago, moropai Tiago yakon João, inkamoro neken wîtî tarakkîrî tîrîꞌpî Jesusya. Tiaronkon wîtî tîrîiya pra awanîꞌpî.
38 Epereꞌnîtoꞌ yewîꞌ eraꞌmanen yewîꞌ ta teerepansaꞌ pe, arinîkon pemonkonyamîꞌ eraꞌmaꞌpî Jesusya. Tiaronkon karau moropai tiaronkon entaimepîtî etaꞌpîiya.
39 Wîttî ta teewonsaꞌ pe, taꞌpîiya toꞌ pîꞌ: —Îꞌ ton pe aronne awentaimepîtîkon mîrîrî? —taꞌpîiya toꞌ pîꞌ. —Moropai akaraukon mîrîrî? Maꞌnon saꞌmantasaꞌ pra man. Iweꞌnasaꞌ mîrîrî —taꞌpîiya.
40 Moropai toꞌ siiraꞌpî Jesus pîꞌ mîrîrî taiya yeꞌnen.
Tîîse poro pona toꞌ yenpaꞌkaꞌpîiya. Moropai eewomîꞌpî isaꞌmantaꞌpî pia itun moropai isan, moropai eseurîwîꞌnankon tînenupaꞌsan pokonpe eewomîꞌpî.
41 Mîîkîrî isaꞌmantaꞌpî yenya yapisîꞌpîiya. —Tarita kumi —taꞌpîiya ipîꞌ tîmaimu ta. Maꞌnon, eꞌmîꞌsaꞌkakî, taatoꞌ mîrîrî umaimukon ta.
42 Mîrîrî pe rî wîriꞌ eꞌmîꞌsaꞌkaꞌpî moropai aasarîꞌpî. Asakîꞌne puꞌ pona tîîmoꞌtai kaisarî ikono po awanîꞌpî. Kureꞌne tamîꞌnawîronkon esenumenkaꞌpî eesepiꞌtîsaꞌ pîꞌ.
43 Jesusya taꞌpî tamîꞌnawîronkon pîꞌ: —Anîꞌ pîꞌ unkupîꞌpî kîsekaremeꞌtî —taꞌpîiya. Moropai wîriꞌ yun, isan pîꞌ taꞌpîiya: —Maꞌnon yekkari ton antîîtî —taꞌpîiya.
