Jesus Cristo Yekare Marcos Nîmenukaꞌpî 6:1-56
6 Moropai Jesus wîtîꞌpî mîrîrî pata pai tînenupaꞌsan pokonpe. Tîpata ya eerepamîꞌpî toꞌ pokonpe.
2 Erîꞌkaꞌnîtoꞌ weiyu yai tamîꞌnawîronkon yenupa piaꞌtîꞌpîiya epereꞌnîtoꞌ yewîꞌ ta. Eta tîuyaꞌnîkon pe arinîkon esenumenkaꞌpî kureꞌne ipîꞌ: —Oꞌnon pata mîrîrî yeꞌka esenumenkantoꞌ kuꞌnen pe tîwanîpa epuꞌnen eporîiya? Oꞌnon yeꞌka pe epuꞌnen pe eenaꞌpî? Anîꞌ winîpai tîmeruntîri ton eporîiya anîꞌya ikupî eserîkan pepîn konekapa? —taꞌpî toꞌya.
3 —Mîîkîrî manniꞌ wîttî konekanen, Maria more, innape nai? —taꞌpî toꞌya. —Tiago, moropai José, moropai Judas, moropai Simão rui mîîkîrî. Tarî iwîrisitonon man —taꞌpî toꞌya. Moropai Jesus yuꞌse pra toꞌ enaꞌpî. Yapurî toꞌya pra awanîꞌpî.
4 Jesusya toꞌ yeurîmaꞌpî: —Tamîꞌnawîron pata ya Paapa maimu ekaremeꞌnen yapurî toꞌya. Tîîse ipata ya yapurî toꞌya pepîn. Itonpayamîꞌya yapurî pepîn. Itewîꞌ tawonkonya yapurî pepîn —taꞌpîiya.
5 Anîꞌya ikoneka eserîkan pepîn tuꞌkan konekaiya yentai awanîꞌpî tîpata ya. Priꞌyawonkon pepîn pona tenya tîrîꞌpîiya, arinîkon pepîn, moropai toꞌ yepiꞌtîꞌpîiya.
6 Kureꞌne Jesus esenumenkaꞌpî inkamoro pîꞌ, innape tîkupî toꞌya pra awanî yeꞌnen.
Moropai aasarîꞌpî tiaronkon pata yapîꞌ toꞌ yenupaꞌpîiya mîrîrî rî pata poro toꞌ yenupaꞌpîiya.
Tînenupaꞌsan Yarima Jesusya
7 Asakîꞌne puꞌ pona tîîmoꞌtaiꞌnîkon yannoꞌpî Jesusya tîîpia. Toꞌ yaipontîꞌpîiya pata kaisarî toꞌ wîtîtoꞌpe asakîꞌneꞌne. Moropai toꞌ meruntîri ton tîrîꞌpîiya meruntî ke oꞌmaꞌkon maawariyamîꞌ yenpaꞌkatoꞌpe toꞌya.
8 Toꞌ yaipontîꞌpîiya: —Attîkon pe îꞌ rî kîsatî. Ameꞌsipukon neken maatîi. Ayaꞌreꞌkon ton kîsatî. Asakunikon kîsatî. Atînirurîkon ton kîsatî.
9 Aꞌsaꞌsakon yekaꞌmayaꞌnîkon moropai aponkon tiwin, apîꞌnîkon asakîꞌne pra.
10 Pemonkonyamîꞌ pata ya eerepansaꞌkon ya, eewomîkon toꞌ yewîꞌ ta. Moropai moro puꞌkuru makoꞌmantîi, mîrîrî pata pai attîkon pîkîrî —taꞌpî Jesusya toꞌ pîꞌ.
11 —Tiaron pata po ayapisîkon toꞌya pra awanî ya, moropai amaimukon anetapai pra toꞌ wanî ya, mîrîrî pata pai matîtîi. Moropai attîkon pe aꞌpukon pîꞌ non atapiꞌsaꞌ, mîrîrî mîsorokatîi eepaꞌkakon pe. Mîrîrî kupîyaꞌnîkon ya, Paapa maimu yuꞌse pra toꞌ wanî yeꞌnen Paapaya toꞌ tarumaꞌtî pe man ekaremekîyaꞌnîkon mîrîrî —taꞌpîiya.
12 Mîrîrî tîpo toꞌ eseꞌmaꞌtîꞌpî. Inkamoroya itekare ekaremekîꞌpî toꞌ pîꞌ: —Ayeserukon winîpai enpenatatî teesewankonoꞌmai eraꞌtîtî —taꞌpî toꞌya tamîꞌnawîronkon pîꞌ.
13 Moropai tuꞌkankon oꞌmaꞌkon yenpaꞌkaꞌpî toꞌya. Priꞌyawonkon pepîn puꞌpai karapaimaꞌpî toꞌya. Toꞌ yepiꞌtîꞌpî toꞌya.
João Batista Wîî Meꞌpo Herodesya
14 Tamîꞌnawîrî Jesus nîkupîꞌpî yekare etaꞌpî tamîꞌnawîronkonya. Mîrîrî yai pata esaꞌ Herodesya etaꞌpî nîrî. Tiaronkonya taapîtîꞌpî: —João Batista nurîꞌtî eꞌmîꞌsaꞌkaꞌpî man isaꞌmantaꞌsan koreꞌtapai. Mîrîrî yeꞌnen anîꞌya ikupî eserîkan pepîn kupîiya mîrîrî —taapîtîꞌpî toꞌya.
15 Moropai tiaronkonya taꞌpî: —Elias nurîꞌtî mîîkîrî. Moropai tiaronkonya taꞌpî: —Paapa maimu ekaremeꞌnenan profetayamîꞌ warainon mîîkîrî.
16 Tîîse itekare eta tîuya pe Herodesya taꞌpî: —João mîîkîrî, uniꞌmîrîkîtîꞌpî ipuꞌpai. Tîîse aweꞌmîꞌsaꞌkasaꞌ mîrîrî tîîsaꞌmanta tîpo, isaꞌmantaꞌsan koreꞌta pai —taꞌpîiya.
17 Maasa pra mîîkîrî rî Herodesya João yarakkamo meꞌpoꞌpî tîuya yeꞌnen atarakkannîtoꞌ yewîꞌ ta. Mîrîrî kupîꞌpî Herodesya maasa pra takon Filipe noꞌpî Herodias yarakkîrî awanî pîꞌ João eseurîmasaꞌ yeꞌnen.
18 Taapîtîꞌpî Joãoya ipîꞌ: —Ayakon noꞌpî yarakkîrî awanî Paapa nekaremekîꞌpî unkupîkon ton pe yairî pra. Imakuiꞌpî kuꞌsaꞌya mîrîrî —taapîtîꞌpîiya.
19 Mîrîrî wenai Herodes noꞌpî Herodias ekoreꞌmaꞌpî ipîꞌ. Moropai João Batista anwîpai awanîꞌpî. —João Batista wîî meꞌpokî —taꞌpîiya Herodes pîꞌ.
20 —Kaane —taꞌpîiya. Mîrîrî taꞌpîiya maasa pra morî pe Paapa maimu yawîron pe João wanî epuꞌtî tîuya yeꞌnen. Moropai inamaꞌpîiya. João maimu eta tîuya pe aatakaꞌmaꞌpî. Mîîwîni tîîse tîwakîri pe etaꞌpîiya.
21 Mîrîrî tanne, tîîkoꞌmamî tîpo, Herodias esenumenkaꞌpî teseru koneka pîꞌ. Moropai Herodesya entamoꞌkantoꞌ konekaꞌpî teesenpoꞌpî weiyu yai. Tîpoitîrîtonon etaꞌpîiya entamoꞌkai. Surarayamîꞌ yepotorîtonon etaꞌpîiya. Moropai ipîkkukon tîniru esanon Galiléia ponkon etaꞌpîiya nîrî entamoꞌkai.
22 Herodias more wîriꞌ ewomîꞌpî toꞌ koreꞌta imanunse. Moropai imananuꞌpî. Herodes wakîri pe awanîꞌpî. Herodes netaꞌsan wakîri pe nîrî awanîꞌpî. Mîrîrî yeꞌnen Herodesya taꞌpî wîriꞌ pîꞌ: —Îꞌ rî yuꞌse awanî ya, esaꞌkî upîꞌ moropai anesatîꞌpî tîrîuya —taꞌpî Herodesya.
23 —Paapaya uyeraꞌma pîꞌ man. Ayenkuꞌtîuya pepîn sîrîrî. Îꞌ rî esatîya ya itîrîuya. Ituꞌse awanî ya, upata tîrîuya arakkita pîkîrî —taꞌpîiya wîriꞌ pîꞌ.
24 Moropai wîriꞌ epaꞌkaꞌpî. Tîsan pia attîꞌpî, Herodias pia. —Îꞌ esatîuya yuꞌse awanî mîrîrî? —taꞌpîiya tîsan pîꞌ. —João Batista puꞌparaikkîꞌtoꞌpeiya kaꞌkî ipîꞌ —taꞌpî Herodiasya tînre pîꞌ.
25 Teesemiꞌtapai mîîkîrî wîtîꞌpî Herodes pia esaꞌse: —João Batista puꞌparaikkîtîyaꞌnîkon yuꞌse wai. Sunpa pona ipuꞌpaiꞌpî enepîyaꞌnîkon yuꞌse wai uupia eraꞌmatoꞌpeuya —taꞌpî wîriꞌya Herodes pîꞌ.
26 Mîrîrî pîꞌ Herodes esewankonoꞌmaꞌpî kureꞌne. Itîrîuya taasaꞌ tîuya pîꞌ moropai mîrîrî etasaꞌ tînetaꞌsanya pîꞌ eesewankonoꞌmaꞌpî. Mîrîrî yeꞌnen wîriꞌ pîꞌ aniꞌnînmapai pra awanîꞌpî.
27 Moropai kaꞌneꞌ pe Herodesya surara yaipontîꞌpî: —Atîkî. João puꞌpai eraꞌmata —taꞌpîiya. Surara wîtîꞌpî. Atarakkannîtoꞌ ta João puꞌparaikkîtîꞌpîiya.
28 João puꞌpaiꞌpî yarîꞌpî suraraya sunpa pona moropai itîrîꞌpîiya wîriꞌ pia. Mîîkîrîya yarîꞌpî tîsan pia.
29 Mîrîrî eta tîuyaꞌnîkon pe João nenupaꞌsan wîtîꞌpî itesaꞌrîꞌpî eraꞌmai. Moropai yuꞌnaꞌtîꞌpî toꞌya.
Arinîkon Yekkariꞌtî Jesusya, 5,000 Kaisaronkon
30 Jesus naipontîꞌsan ennaꞌpoꞌpî iipia. Tamîꞌnawîron tînkupîꞌpîkon moropai pemonkonyamîꞌ yenupaꞌpî tîuyaꞌnîkon ekaremekîꞌpî toꞌya Jesus pîꞌ.
31 Arinîkon pemonkonyamîꞌ erepanpîtîꞌpî toꞌ pia Jesus eraꞌmapîꞌse. Jesus moropai inenupaꞌsan entamoꞌka eserîke pra awanîꞌpî. Mîrîrî yeꞌnen Jesusya taꞌpî tînenupaꞌsan pîꞌ: —Aaseꞌkon see upokonpe keren pona erîꞌkaꞌseꞌnîkon —taꞌpîiya.
32 Mîrîrî yeꞌnen tamîꞌnawîronkon piapai toꞌ wîtîꞌpî kanau yaꞌ keren pona, Jesus moropai inenupaꞌsan.
33 Tîîse arinîkonya toꞌ wîtî eraꞌmaꞌpî. Jesus nenupaꞌsan pe toꞌ epuꞌtîꞌpî toꞌya. Itîîpai nîrî toꞌ wanîꞌpî. Tîpatakon yapai toꞌ esemiꞌtîpaꞌpî tuutîkonpa. Inkamoro wîtîꞌpî aꞌmun poro teekaꞌtunse keren pona. Jesus moropai inenupaꞌsan rawîrî toꞌ erepamîꞌpî.
34 Kanau yapai teeseuꞌka pe, mararonkon pepîn pemonkonyamîꞌ eraꞌmaꞌpî Jesusya. Carneiroyamîꞌ itesaꞌ pînon atakaꞌmaꞌsan warantî toꞌ eraꞌmaꞌpîiya. Mîrîrî yeꞌnen toꞌ saꞌnamaꞌpîiya. Tuꞌkan pîꞌ toꞌ yenupa piaꞌtîꞌpîiya.
35 Pata koꞌmamî pe, Jesus nenupaꞌsan, ipemonkonoyamîꞌ wîtîꞌpî iipia. —Keren po eꞌnî tanne, pata koꞌmannî pîꞌ man.
36 Tamîꞌnawîronkon yaipontîkî cidade pona, moropai poro po tîîkoꞌmansenon pia taꞌreꞌkon ton yennatoꞌpe toꞌya —taꞌpî toꞌya.
37 Tîîse toꞌ maimu yuukuꞌpî Jesusya: —Amîrîꞌnîkonya neken toꞌ yaꞌreꞌ ton tîrî sîrîrî. —Oꞌnon yeꞌka pe? —taꞌpî Jesus nenupaꞌsanya. —Trigo puusaꞌ yenna annaya yuꞌse awanî mîrîrî mararî pra tîniru ke, tuꞌke kapoi kaisarî esenyakaꞌmantoꞌ yepeꞌ yentai awanî. Mîrîrî warantî toꞌ yekkariꞌtî annaya yuꞌse awanî. Tîîse tîniru ton pra man —taꞌpî toꞌya.
38 —Îꞌ warapo pão moro nai aapiaꞌnîkon? Maasa eraꞌmatantî —taꞌpî Jesusya. Eraꞌmai toꞌ wîtîꞌpî. Ekaremekîꞌpî toꞌya Jesus pîꞌ: —Pão moro man miaꞌtaikin neken moropai moroꞌyamîꞌ asakîꞌne —taꞌpî toꞌya.
39 6:39,40 Mîrîrî tîpo Jesusya pemonkonyamîꞌ pantakapîtîꞌpî tîponarîꞌne, tiaronkon 50 kaisarîꞌne, tiaronkon 100 kaisarîꞌne. Toꞌ yaipontîꞌpîiya parîꞌ pona toꞌ ereutatoꞌpe.
40 Eraꞌmakî 6:39
41 Miaꞌtaikinan pão moropai asakîꞌnankon moroꞌyamîꞌ yapisîꞌpîiya tenyaꞌ. Moropai kaꞌ ekaya tenu tanunse ipîremaꞌpîiya. Moropai trigo puusaꞌ pirikkapîtîꞌpîiya. Mîrîrî tîrîꞌpîiya tîpemonkonoyamîꞌ pia. Inkamoroya itîrîꞌpî tamîꞌnawîronkon pemonkonyamîꞌ pia. Moroꞌyamîꞌ waikapîtîꞌpîiya nîrî pemonkonyamîꞌ kaisarî.
42 Tamîꞌnawîronkon entamoꞌkaꞌpî mîrîrî pîꞌ teesepiꞌtîkon pîkîrî.
43 Trigo puusaꞌ yonparîꞌpî moropai moroꞌyamîꞌ yonparîꞌpî eꞌnîmîsaꞌ yaraꞌtîꞌpî toꞌya waikîraꞌpî yaꞌ. Asakîꞌne puꞌ pona tîîmoꞌtai waikîraꞌpî kaisarî itonparîꞌpî awanîꞌpî.
44 Jesus nîtîrîꞌpî pîꞌ entamoꞌkaꞌsan warayoꞌkon wanîꞌpî 5.000 kaisarî.
Jesus Asarî Tuna Poro
45 Teesemiꞌtapai Jesusya tînenupaꞌsan yaipontîꞌpî kanau ya toꞌ asaraꞌtîtoꞌpe, tîrawîrî toꞌ wîtîtoꞌpe iratai pona, Betsaida pona. —Attîkon tanne pemonkonyamîꞌ yarimauya toꞌ emiꞌtoꞌpe —taꞌpîiya toꞌ pîꞌ. Jesus nenupaꞌsan eseꞌmaꞌtîꞌpî. Mîrîrî tîpo Jesusya taꞌpî eꞌnîmîꞌsan pîꞌ: —Ayewîꞌkon ta atîtî see. Morî pe ennaꞌpotî. Uurî nîrî, uutî sîrîrî —taꞌpîiya.
46 Teesekaremekî tîpo, Jesus wîtîꞌpî wîꞌ moreꞌpî pona epîremai tiwinsarî.
47 Pata ewaronpamî tanne, Jesus nenupaꞌsan wanîꞌpî ikuꞌpî yarakkita kanau yaꞌ moropai mîîkîrî wanîꞌpî tiwinsarî aꞌmun po.
48 Mîrîrî yai meruntî aꞌsitun ponaya kanau yawonkon wîtîꞌpî. Tîmoronkon tepuꞌse toꞌ eꞌkuraꞌ eraꞌmaꞌpî Jesusya. Kariwana etun tanne attîꞌpî toꞌ pia tuna poro tîꞌsi po. Toꞌ yuwaꞌka yonpaꞌpîiya.
49 Tîîse aaipî eraꞌmaꞌpî inenupaꞌsanya. Tîꞌsi po tuna poro aaipî eraꞌma tîuyaꞌnîkon pe, oꞌmaꞌ mîîkîrî kaiꞌma toꞌ esenumenkaꞌpî ipîꞌ. Mîrîrî pîꞌ toꞌ esiꞌnîpîꞌpî. Toꞌ entaimepîtîꞌpî.
50 Toꞌ esiꞌnîpî eraꞌma tîuya pe, kaꞌneꞌ pe Jesus eseurîmaꞌpî toꞌ yarakkîrî: —Meruntî ke eꞌtî, teesiꞌnîꞌse pra, maasa pra uurî Jesus —taꞌpîiya toꞌ pîꞌ.
51 Moropai Jesus asaraꞌtîꞌpî toꞌ kanaurî yaꞌ. Mîrîrî pe rî aꞌsitun atîꞌnapamîꞌpî. Mîrîrî pîꞌ taꞌpî inenupaꞌsanya: —Îꞌ yeꞌka see mîîkîrî pemonkon, mîrîrî yeꞌka aꞌsitun tîꞌnapannîꞌnen?
52 Jesus meruntîri eraꞌmaꞌpî toꞌya trigo puusaꞌ pirikkaiya yai. Mîîwîni tîîse iipia Paapa meruntîri wanî epuꞌtî toꞌya pra awanîꞌpî, pakko pe tîwanîkon yeꞌnen. Maasa pra ipîꞌ toꞌ esenumenka pra awanîꞌpî, anîꞌ pe awanî epuꞌtî toꞌya pra awanîꞌpî.
Genesaré Ponkon Yepiꞌtî Jesusya
53 Ikuꞌpî ratai pona teerepansaꞌkon pe toꞌ eseuꞌkaꞌpî Genesaré pata pona. Mîrîrî ikuꞌpî ka tîkanaukon yewaꞌtîꞌpî toꞌya.
54 Moropai kanau yapai toꞌ eseuꞌka pe Genesaré ponkon pemonkonyamîꞌya Jesus epuꞌtîꞌpî.
55 Teekaꞌtunse toꞌ wîtîꞌpî iipia, Jesus erepansaꞌ yekare etasaꞌ tîuyaꞌnîkon yeꞌnen. Oꞌnon pata Mîîkîrî wanî etasaꞌ tîuyaꞌnîkon ya, mîîkîrî pia priꞌyawonkon pepîn yarîꞌpî toꞌya toꞌ yepiꞌtîtoꞌpeiya kaiꞌma.
56 Moropai oꞌnon pata Jesus erepansaꞌ pia, siꞌmîrikkî cidade pona, kureꞌnan cidade pona, cidade po pra tîîkoꞌmansenon pia, moro puꞌkuru priꞌyawonkon pepîn enepîꞌpî toꞌya iipia, erepantoꞌ pataꞌseꞌ yaꞌ. Moropai Jesus yekaꞌnunkaꞌpî toꞌya ipon yeꞌpi yapîkonpa kaiꞌma. Moropai yapîtîponkon esepiꞌtîꞌpî.
