Jesus Cristo Yekare Marcos Nîmenukaꞌpî 7:1-37
7 Fariseuyamîꞌ epereꞌsaꞌ wanîꞌpî Jesus pia Moisés nurîꞌtîya yenupatoꞌ pîꞌ yenupatonkon koreꞌta. Inkamoro Moisés nurîꞌtîya yenupatoꞌ pîꞌ yenupatonkon iiꞌsaꞌ wanîꞌpî Jerusalém poi.
2 7:2-4 Fariseuyamîꞌya tenyakon rona tuꞌke iteꞌka tiwin iteꞌka tîîse. Mîrîrî tîpo taꞌreꞌkon enapî toꞌya. Tamîꞌnawîronkon Judeuyamîꞌ yeseru pe awanî. Tîtamokonya tîpanamaꞌpîkon yawîrî toꞌ wanî mîrîrî. Eꞌrepantoꞌ pataꞌseꞌ yapai teemiꞌse tîweꞌronakon pra awanî ya, taꞌreꞌkon enapî fariseuyamîꞌya pepîn. Mîrîrî warantî nîrî teserukon yawîrî tuꞌke iteꞌka copo ronapîtî toꞌya, îinî ronapîtî toꞌya, pisa ronapîtî toꞌya.Moropai Jesus nenupaꞌsanya taꞌreꞌkon enapî eraꞌmaꞌpî toꞌya. Tîîse fariseuyamîꞌya tenyakon rona manniꞌ warantî tenyakon rona toꞌya pra awanîꞌpî.
3 Eraꞌmakî 7:2
4 Eraꞌmakî 7:2
5 Mîrîrî yeꞌnen fariseuyamîꞌ moropai Moisés nurîꞌtîya yenupatoꞌ pîꞌ yenupatonkonya taꞌpî Jesus pîꞌ: —Îꞌ ton pe see utamokonya uyenupaꞌpîkon yairî pra apemonkonoyamîꞌ wanî mîrîrî? Îꞌ ton pe tenyakon rona tîuyaꞌnîkon rawîrî taꞌreꞌkon enapî toꞌya?
6 Jesusya taꞌpî: —Yairî puꞌkuru Paapa maimu ekaremeꞌnen Isaías nurîꞌtî eseurîmaꞌpî apîꞌnîkon pena. Paapa yapurînen pe pra siꞌma Paapa yapurînenan patakayaꞌnîkon eserîke pra naatîi seruꞌ pe. Sîrîrî Isaías nurîꞌtî maimu rîꞌpî inmenukaꞌpî:“Morî pe eseurîmakoiꞌkon insanan pemonkonyamîꞌ upîꞌ”, taa Paapaya.“Tîîse aminke toꞌ yewan wanî mîrîrî.
7 Îꞌ pe pra rî uyapurî toꞌya mîrîrî.Penaroꞌkonya tîpanamaꞌpîkon yawîrî tonpakon yenupa toꞌya,uurîya tîpanamaꞌpîkon pe tîkuꞌse” taa Paapaya.
Mîrîrî Isaías maimu rîꞌpî —taꞌpî Jesusya toꞌ pîꞌ.
8 —Paapaya upanamaꞌpîkon unkupîkon ton pe mîrîrî rumakasaꞌyaꞌnîkon. Tîîse atamokonya apanamaꞌpîkon yawîrî awanîkon, irumakayaꞌnîkon pata pe pra.
9 Paapaya upanamaꞌpîkon rumakasaꞌyaꞌnîkon atamokonya apanamaꞌpîkon yawîrî awanîkonpa kaiꞌma. Epuꞌnen pe awanîkon kaiꞌma eesenkuꞌtîkon mîrîrî —taꞌpî Jesusya.
10 —Moisés nurîꞌtîya taꞌpî:“Ayunkon, moropai asankon yapurîtî. Imakuiꞌpî pe anîꞌ eseurîma ya tîyun winîkîi, moropai tîsan winîkîi, mîîkîrî mîwîtîi,”
taꞌpîiya —taꞌpî Jesusya.
11 —Mîrîrî yeꞌka pe pra amîrîꞌnîkon eseurîma mîrîrî. Amîrîꞌnîkonya taa: “Uyunkon, moropai usankon pia untîrîkon ton unmoꞌkaꞌpîkon tîrî eꞌpainon Paapa pia. Corbã mîrîrî. Paapa pia neken untîrî ton sîrîrî taatoꞌ mîrîrî corbã”.
12 Mîrîrî warantî taa yeꞌka pe, amîrîꞌnîkonya taa: “Uyunkon moropai usankon pîikaꞌtî pra wanî ya, îꞌ waniꞌ pra awanî Paapa pîꞌ”. Mîrîrî warantî tamîꞌnawîronkon yenupayaꞌnîkon seruꞌ pe —taꞌpî Jesusya.
13 —Atamokonya apanamaꞌpîkon yawîrî awanîkon yeꞌnen Paapa maimu pîinamayaꞌnîkon pra awanî. Tamîꞌnawîronkon panamayaꞌnîkon ayeserukon yawîrî neken toꞌ koꞌmantoꞌpe kaiꞌma. Tuꞌke ayeserukon poiꞌpî moro awanî mîrîrî yeꞌka —taꞌpî Jesusya fariseuyamîꞌ pîꞌ.
Jesus Eseurîma Imakuiꞌpî Uyeserukon Pîꞌ
14 Moropai inîꞌrî Jesusya tamîꞌnawîronkon yannoꞌpî tîîpia. —Umaimu etatî moropai epuꞌtîyaꞌnîkon yuwatî —taꞌpîiya.
15 —Paapa pia imakuiꞌpî pe eꞌnî pepîn uyaꞌreꞌkon unennoꞌmakon wenai. Tîîse imakuiꞌpî pe eꞌnî uyewankon ya tîîkoꞌmansen imakuiꞌpî wenai.
16 Anetapainon wanî ya, etakî, moropai epuꞌkî —taꞌpîiya.
17 Poro po tîweꞌsanon piapai Jesus ewomîꞌpî wîttî ta. Mîîkîrî ekaranmapoꞌpî inenupaꞌsanya: —Îꞌ pîꞌ eeseurîma manniꞌ? —taꞌpî toꞌya ipîꞌ.
18 —Amîrîꞌnîkonya nîrî epuꞌtî pra awanîkon mîrîrî? —taꞌpî Jesusya. —Uyaꞌreꞌkon unennoꞌmakonya ukupîkon pepîn imakuiꞌpî pe.
19 Maasa pra uyewankon ya eewomî pepîn. Uroꞌtakon yaꞌ neken eewomî moropai mîrîrî tîpo iwekannîpî. Tamîꞌnawîron entamoꞌkantoꞌ wanî morî pe. Tamîꞌnawîron entamoꞌkantoꞌ pîꞌ entamoꞌkan eꞌpainon —taꞌpî Jesusya.
20 —Imakuiꞌpî uyewankon yaꞌ tîîkoꞌmansen wanî imakuiꞌpî pe.
21 Uyewankon yaꞌ tîîkoꞌmansen imakuiꞌpî wenai imakuiꞌpî pîꞌ esenumenkan, tamîꞌnawîronkon wîriꞌsanyamîꞌ, warayoꞌkon poro wîtîn, amaꞌyeꞌ pe eꞌnî, tiaron wîî,
22 moropai tiaron noꞌpî, tiaron niyo yarakkîrî eꞌnî, moropai tiaron yemanne yuꞌse eꞌnî, imakuiꞌpî kupî, tiaronkon yenkuꞌtî, nura pe eꞌnî, kinmuwan, imakuiꞌpî pe tiaron pîꞌ eseurîman, moropai mîî pe eꞌnî, eranneꞌ pe pra eꞌnî imakuiꞌpî pîꞌ.
23 Tamîꞌnawîrî imakuiꞌpî pe eꞌnî maasa pra imakuiꞌpî koꞌmamî yeꞌnen uyewankon yaꞌ. Mîrîrî wenai imakuiꞌpî kupî pîꞌ koꞌmannî —taꞌpî Jesusya tînenupaꞌsan pîꞌ.
Oꞌmaꞌ Tîrîka Jesusya Judeupaꞌ Pepîn More Yapai
24 Mîrîrî tîpo Jesus eseꞌmaꞌtîꞌpî. Tiro pata poro moropai Sidom pata poro attîꞌpî. Tîîkoꞌmantoꞌ yewîꞌ ton eporîꞌpîiya. Moro tîwanî epuꞌtî anîꞌya yuꞌse pra awanîꞌpî. Mîrîrî yeꞌka pe tîîse epuꞌtîꞌpî tiaronkonya.
25 7:25,26 Moropai wîriꞌ wanîꞌpî moro. Mîîkîrî wanîꞌpî Judeupaꞌ pe pra, Siro-fenicia pon mîîkîrî. Imaimu wanîꞌpî grego pe. Inre wanîꞌpî wîriꞌ. Oꞌmaꞌ ewonsaꞌ wanîꞌpî mîîkîrî more yaꞌ. Mîrîrî yeꞌnen Jesus erepansaꞌ eta tîuya pe, attîꞌpî iipia. Moropai Jesus puu pia eesenumîꞌpî, yekaꞌnunkaꞌpîiya. Taꞌpîiya Jesus pîꞌ: —Oꞌmaꞌ yenpaꞌkakî unre yapai.
26 Eraꞌmakî 7:25
27 Moropai Jesusya taꞌpî: —Kaane. Eꞌmaiꞌ pe upemonkonoyamîꞌ pîikaꞌtîuya, Judeuyamîꞌ. Amîrî Judeu pepîn. Arinmaraka pia more yaꞌreꞌ tîrî ya, yairî pra awanî. Mîrîrî warantî tamîꞌnawîron Judeuyamîꞌ pîikaꞌtîuya pra tîîse, amîrî pîikaꞌtîuya ya, Judeu pe pra awanî tanne, yairî pra awanî —taꞌpî Jesusya. Judeuyamîꞌya Judeu pepîn esatîꞌpî arinmaraka pe tewanmakon pe toꞌ kupî tîuyaꞌnîkon yeꞌnen.
28 Tîîse wîriꞌya taꞌpî: —Innape man, piipiꞌ. Arinmaraka taa Judeuyamîꞌya upîꞌ, seruꞌ pepîn. Mîrîrî yeꞌka pe tîîse moreyamîꞌ yaꞌreꞌ yaꞌpunuꞌpî eꞌsoroka enapî arinmarakayamîꞌya itaponseꞌ yoꞌkoi siꞌma. Mîrîrî warantî arinmarakayamîꞌ eꞌpîikaꞌtî manniꞌ warantî, upîikaꞌtîkî saꞌne —taꞌpîiya.
29 Jesusya taꞌpî ipîꞌ: —Innape ukupîya epuꞌtî pîꞌ wai, mîrîrî taa pîꞌ nai epuꞌnen pe. Ayewîꞌ ta ennaꞌpokî. Oꞌmaꞌ wîtîn pîꞌ man anre piapai —taꞌpîiya.
30 Moropai mîîkîrî emikkuꞌpî tewîꞌ ta. Tînre eporîꞌpîiya tetteꞌ ta. Oꞌmaꞌ wîtîꞌpî wanîꞌpî.
Imaimu Pîn Panaꞌtîꞌpan Yepiꞌtî Jesusya
31 Moropai Jesus ennaꞌpoꞌpî Tiro pata pai. Tuutî pe Sidom pata pona attîꞌpî, moropai Decápolis pata poro. Eerepamîꞌpî Galiléia kuꞌpî ka.
32 Miarî tiaronkon pemonkonyamîꞌya imaimu pîn moropai panaꞌtîꞌpan warayoꞌ yarîꞌpî Jesus pia. Jesus yekaꞌnunkaꞌpî toꞌya: —Ayenya tîîkî ipona eesepiꞌtîtoꞌpe —taꞌpî toꞌya.
33 Arinîkon pemonkonyamîꞌ piapai Jesusya mîîkîrî moꞌkaꞌpî tiwinsarî. Tenya yeperu tîrîꞌpî Jesusya mîîkîrî pana yaꞌ. Tetaku maꞌpîiya tenya pona. Moropai mîrîrî ke inu yapîꞌpîiya.
34 Moropai tîꞌnokoꞌpî pe eraꞌma tîuya yeꞌnen, Jesus yettapusin enukuꞌpî kaꞌ eraꞌmaiꞌma. —Epata —taꞌpîiya tîmaimu ta. Esettapurukaꞌkî taatoꞌ mîrîrî umaimukon ta.
35 Moropai ipana esettapurukaꞌpî. Inu ekonekaꞌpî. Morî pe eeseurîmaꞌpî.
36 Jesusya toꞌ yaipontîꞌpî. —Anîꞌ pîꞌ unkupîꞌpî kîsekaremeꞌtî —taꞌpîiya toꞌ pîꞌ. Tîîse yuuku toꞌya pra awanîꞌpî. Inîꞌ panpîꞌ toꞌ panamaiya tanne, inîꞌ panpîꞌ ekaremekîꞌpî toꞌya.
37 Mararî pra tamîꞌnawîronkon esenumenkaꞌpî Jesus pîꞌ: —Tamîꞌnawîron mîrîrî morî panpîꞌ kuꞌsaiꞌya. Panaꞌtîꞌpankon pana yettapurîkasaiꞌya moropai imaimu pînon pemonkonyamîꞌ konekasaiꞌya nîrî toꞌ eseurîmatoꞌpe —taꞌpî toꞌya.
