Jesus Cristo Yekare Marcos Nîmenukaꞌpî 8:1-38
8 Mararî tîîkoꞌmamîkon tîpo, arinîkon eperepîꞌpî inîꞌrî Jesus pia. Toꞌ narîꞌpî, toꞌ yaꞌreꞌ eꞌtîꞌkaꞌpî. Mîrîrî yeꞌnen Jesusya tînenupaꞌsan yannoꞌpî tîîpia toꞌ yeurîmapa kaiꞌma.
2 —Seurîwîꞌne wei kaisarî insanan koꞌmansaꞌ sîrîrî uupia —taꞌpîiya. —Tarîpai toꞌ yaꞌreꞌ eꞌtîꞌkan pîꞌ man. Mîrîrî yeꞌnen toꞌ saꞌnama pîꞌ wai.
3 Iwan pe toꞌ tîîse toꞌ yarimauya ya tewîꞌkon ta, toꞌ enkîsiꞌpanpîtî tuutîkon pe. Aminke pai tiaronkon iiꞌsaꞌ mîrîrî —taꞌpîiya.
4 —Keren po siꞌma toꞌ yaꞌreꞌ ton tîrî eserîke pra awanî —taꞌpî inenupaꞌsanya Jesus pîꞌ.
5 —Îꞌ warapo trigo puusaꞌ moro nai aapiaꞌnîkon? —taꞌpî Jesusya. —Asakîꞌne miaꞌ pona tîîmoꞌtai kaisarî man —taꞌpî toꞌya.
6 Tamîꞌnawîronkon pîꞌ taꞌpî Jesusya: —Maasa non pona ereutatî. Asakîꞌne miaꞌ pona tîîmoꞌtaiꞌnon trigo puusaꞌ yapisîꞌpîiya. Moropai eeseurîmaꞌpî Paapa yarakkîrî: —Morî puꞌkuru amîrî, Paapa. Anna yaꞌreꞌ ton tîrî pîꞌ nai —taꞌpîiya Paapa pîꞌ. Mîrîrî tîpo trigo puusaꞌ pirikkapîtîꞌpîiya. Tînenupaꞌsan pia itîrîꞌpîiya tamîꞌnawîronkon kaisarî itîîtoꞌpe toꞌya. Moropai toꞌ kaisarî itîrîꞌpî toꞌya.
7 Moroꞌyamîꞌ mîrikkî wanîꞌpî mararî toꞌ pia. Inkamoro nîrî yapisîꞌpîiya. —Morî puꞌkuru amîrî, Paapa. Anna yoꞌ ton tîrî pîꞌ nai —taꞌpîiya Paapa pîꞌ. —Maa. Seeniꞌ tîîtî tamîꞌnawîronkon kaisarî —taꞌpîiya tînenupaꞌsan pîꞌ. Moropai itîrîꞌpî toꞌya tamîꞌnawîronkon kaisarî.
8 Moropai inkamoro entamoꞌkaꞌpî teesepiꞌtîkon pîkîrî. Inkamoroya taꞌreꞌkon yonpa rîꞌpî yannukuꞌpî. Asakîꞌne miaꞌ pona tîîmoꞌtai waikîraꞌpî kaisarî wanîꞌpî.
9 Entamoꞌkaꞌsan wanîꞌpî 4.000 kaisarî.
10 Mîrîrî tîpo tamîꞌnawîronkon yarimaꞌpî Jesusya toꞌ wîtîtoꞌpe. Moropai toꞌ enukuꞌpî kanau yaꞌ tînenupaꞌsan yarakkîrî. Dalmanuta iteseꞌ pata pona toꞌ wîtîꞌpî.
Tîneraꞌmakon Ton Meruntî
Esatî Fariseuyamîꞌya Jesus Pîꞌ
11 Moropai fariseuyamîꞌ wîtîꞌpî Jesus pia. Toꞌ esiyuꞌpîtî piaꞌtîꞌpî yarakkîrî. —Anna neraꞌma ton ankuꞌkî innape Paapa winîpai tuiꞌsen pe ameruntîri wanî eraꞌmatoꞌpe annaya —taꞌpî toꞌya. Mîrîrî taꞌpî toꞌya maasa pra innape Paapa winîpai imeruntîri iipî kupî tîuyaꞌnîkon pra awanî yeꞌnen.
12 Neꞌneꞌ pe itewan kuꞌsaꞌ toꞌya wanîꞌpî. —Sîrîrî pankon wanî tîneraꞌmakon ton yuꞌse. Tîîse ayenkuꞌtîuyaꞌnîkon pepîn. Aneraꞌmakon ton tîrî Paapaya pepîn —taꞌpîiya.
13 Inkamoro Fariseuyamîꞌ piapai attîꞌpî. Kanau yaꞌ toꞌ enukuꞌpî. Moropai tînenupaꞌsan pokonpe eeseꞌmaꞌtîꞌpî iratai pona.
Fariseuyamîꞌ, Herodes Yeseru Pîꞌ Jesus Eseurîma
14 Tîîwanmîraꞌnîkon taꞌreꞌkon ton yarî toꞌya pra awanîꞌpî. Trigo puusaꞌ tiwinan neken wanîꞌpî moro kanau yaꞌ.
15 Moropai Jesusya toꞌ panamaꞌpî: —Tîwarî panpîꞌ eꞌtî. Tîwî fariseuyamîꞌ piawon moropai Herodes piawon trigo saꞌmotoꞌ nîsi —taꞌpîiya.
16 Teepereꞌse toꞌ eseurîmaꞌpî mîrîrî pîꞌ: —Îꞌ pîꞌ taiya manniꞌ? Uyaꞌreꞌkon ton eneꞌsaꞌ pra awanî yeꞌnen mîrîrî taa pîꞌ man —taꞌpî toꞌya.
17 Trigo puusaꞌ pîꞌ pra eeseurîma manniꞌ. Fariseuyamîꞌ moropai Herodes yeseru pîꞌ eeseurîma. Tîîse trigo puusaꞌ ton pra tîwanîkon pîꞌ toꞌ eseurîma epuꞌtîꞌpî Jesusya. —Îꞌ ton pe ayaꞌreꞌkon ton pra awanîkon pîꞌ eeseurîmakon mîrîrî? Uyeseru pîꞌ eesenumenkakon pepîn. Anepuꞌpai pra awanîkon mîrîrî. Ayewankon ya unekaremekîꞌpî enasaꞌ pra awanî.
18 Tenu kenankon amîrîꞌnîkon. Tîîse enkaruꞌnan warantî awanîkon. Tîpana kenankon amîrîꞌnîkon. Tîîse panaꞌtîꞌpan warantî awanîkon.
19 Miaꞌtaikin trigo puusaꞌ ke manniꞌ 5.000 pemonkonyamîꞌ yaꞌreꞌtîuya yai, toꞌ yaꞌreꞌ yonpa rîꞌpî yanumîꞌpîyaꞌnîkon. Îꞌ warapo waikîraꞌpî kaisarî awanîꞌpî? —taꞌpîiya. —Asakîꞌne puꞌ pona tîîmoꞌtai waikîraꞌpî kaisarî —taꞌpî toꞌya.
20 —Moropai asakîꞌne miaꞌ pona tîîmoꞌtai trigo puusaꞌ ke 4.000 kaisaronkon pemonkonyamîꞌ yaꞌreꞌtîuya yai, toꞌ yaꞌreꞌ yonparîꞌpî yanumîꞌpîyaꞌnîkon. Îꞌ warapo waikîraꞌpî kaisarî awanîꞌpî? —taꞌpîiya. —Asakîꞌne miaꞌ pona tîîmoꞌtai waikîraꞌpî kaisarî awanîꞌpî —taꞌpî toꞌya.
21 —Sîrîrî tîpose uyeseru epuꞌtîyaꞌnîkon pra awanîkon mîrîrî? —taꞌpîiya toꞌ pîꞌ.
Enkaruꞌnan Betsaida Pon Yepiꞌtî Jesusya
22 Moropai toꞌ erepamîꞌpî Betsaida iteseꞌ pata pona. Miarî enkaruꞌnan warayoꞌ yarîꞌpî tiaronkonya Jesus pia. Jesus yekaꞌnunkaꞌpî toꞌya enkaruꞌnan yapîtoꞌpeiya kaiꞌma.
23 Enkaruꞌnan yarîꞌpîiya itenya pîꞌ tapiꞌse pemonkonyamîꞌ pata yapai. Tetaku maꞌpîiya enkaruꞌnan yenu yaꞌ. Moropai tenya tîrîꞌpîiya itenu pona. Tenya moꞌkaꞌpîiya. —Pata eraꞌma pîꞌ nan? —taꞌpîiya.
24 Teesenumenka tîpo taꞌpîiya: —Inna. Pemonkonyamîꞌ asarî eraꞌma pîꞌ wai, tîîse morî pe pra. Yei warantî toꞌ eraꞌma pîꞌ wai —taꞌpîiya.
25 Inîꞌrî tenya tîrîꞌpî Jesusya itenu pona. Tenya moꞌkaꞌpîiya. Tîwoiꞌnîkon pîꞌ teesenumenka pe, enkaruꞌnan yenu esepiꞌtîꞌpî. Tamîꞌnawîron eraꞌmaꞌpîiya morî pe.
26 Moropai mîîkîrî yarimaꞌpî Jesusya tewîꞌ ta: —Toꞌsarî atîkî. Pemonkonyamîꞌ koreꞌta katîi —taꞌpîiya.
Pedroya Jesus Epuꞌtî Cristo Pe
27 Moropai Jesus wîtîꞌpî tiaron pata iteseꞌ Cesaréia-Filipe poro tînenupaꞌsan pokonpe. Tuutîkon yeꞌka pe tînenupaꞌsan ekaranmapoꞌpîiya: —Anîꞌ pe rî ukupî pîꞌ tarîronkonya? —taꞌpîiya.
28 —Tiaronkonya taꞌpî: “João Batista yekatonoꞌpî mîîkîrî”. Tîîse tiaronkonya taꞌpî: “Pena itekare ekaremeꞌpîtîtîpon Elias yekatonoꞌpî mîîkîrî”. Moropai tiaronkonya taꞌpî: “Penaroꞌ Paapa maimu ekaremeꞌnen yekatonoꞌpî mîîkîrî”. Mîrîrî warantî apîꞌ toꞌ eseurîma —taꞌpî Jesus nenupaꞌsanya ipîꞌ.
29 —Amîrîꞌnîkon kanan. Anîꞌ pe uyepuꞌtî pîꞌ naatî? —taꞌpî Jesusya toꞌ pîꞌ. Pedroya taꞌpî: —Amîrî Paapa nîmenkaꞌpî, Cristo —taꞌpîiya. Paapa nîmenkaꞌpî taatoꞌ mîrîrî Cristo.
30 —Inna. Tîîse maasa sîrîrî Paapa nîmenkaꞌpî pe wanî kîsekaremeꞌtî —taꞌpî Jesusya.
Jesus Eseurîma Tîîsaꞌmanta Pîꞌ
31 Moropai Jesusya toꞌ yenupaꞌpî: —Uurî kaꞌ poi iipîꞌpî. Kureꞌne eꞌtarumaꞌtî kupî sîrîrî. Judeuyamîꞌ panamanenan, moropai teepîremasanon esanon, Moisés nurîꞌtîya yenupatoꞌ pîꞌ yenupatonkon, inkamoro ena kupî sîrîrî uyuꞌse pra. Uwî toꞌya kupî sîrîrî. Uusaꞌmantasaꞌ koꞌmamî kupî sîrîrî asakîꞌne wei kaisarî moropai iteseurîno wei yai eꞌmîꞌsaꞌka —taꞌpîiya.
32 Mîrîrî taꞌpîiya aronne, tiaronkonya epuꞌtî yuꞌse tîwanî yeꞌnen. Moropai Pedroya yarîꞌpî tiaronkon koreꞌta pai. —Mîrîrî yeꞌka pe teeseurîmai pra eꞌkî. Mîrîrî warantî aasaꞌmanta eꞌpai pra man —taꞌpî Pedroya Jesus pîꞌ.
33 Tîîse Jesus eraꞌtîꞌpî tiaronkon tînenupaꞌsan winîkîi moropai taꞌpîiya Pedro pîꞌ: —Sinpata atîkî uupiapai. Makui maimu warantî amaimu wanî mîrîrî. Paapa esenumenka warantî eesenumenka pra awanî mîrîrî. Eesenumenka non po tîîkoꞌmansenon esenumenka warantî —taꞌpîiya.
34 Mîrîrî tîpo tînenupaꞌsan pokonpe tamîꞌnawîronkon yannoꞌpîiya tîîpia. Taꞌpîiya toꞌ pîꞌ: —Uwanîyakon pe eꞌpai anîꞌ wanî ya, iteseru, ituꞌse tîweꞌtoꞌ rumaka eꞌpai awanî. Uwanîyakon pe tîwanî wenai, tîweꞌtarumaꞌtîtoꞌ namaiya eꞌpai pra awanî. Uwanîyakon pe tîwanî wenai, tîsaꞌmantatoꞌ namaiya eꞌpai pra awanî. Moropai uwenairî aaipî eꞌpai awanî.
35 Maasa pra anîꞌya tîîkoꞌmantoꞌ pînînma ya kureꞌne, tîweꞌtarumaꞌtî namaiya. Mîrîrî yeꞌnen Paapa pia ipatîkarî tîîkoꞌmantoꞌ ton eporîiya pepîn. Tîîse aminke aakoꞌmamî Paapa pîꞌ. Tîîse uwanîyakon pe tîwanî wenai, tîîkoꞌmantoꞌ pînînmaiya pra tîwanî ya, tîweꞌtarumaꞌtîtoꞌ yapîtanîpîiya ya, ipatîkarî enen tîîkoꞌmantoꞌ ton eporîiya Paapa pia.
36 Tamîꞌnawîron sîrîrî non pon manne esaꞌ pe anîꞌ wanî ya, tîîse ipatîkarî enen tîîkoꞌmantoꞌ ton eporîiya pra awanî ya, eporîiya kupî pepîn rî mîrîrî. Aasaꞌmanta yai tekaton yepeꞌ ton eporîiya pepîn, aweꞌpîikaꞌtî pepîn.
37 Îꞌ ton pra awanî sîrîrî pata po, itekaton yepeꞌ pe.
38 Imakuiꞌsan sîrîrî pankon koreꞌta uurî pîꞌ moropai umaimu pîꞌ anîꞌ eppepî ya, uurî kaꞌ poi iipîꞌpî eppepî kupî sîrîrî ipîꞌ. Uurî kaꞌ poi iipîꞌpî. Inîꞌrî uuipî pe wai, Paapa pia tîîkoꞌmansenon inserîyamîꞌ pokonpe. Uuipî yai Uyun kaisarî wanî kupî sîrîrî meruntî ke. Mîrîrî yai eppepî kupî sîrîrî ipîꞌ.
