Jesus Cristo Yekare Mateus Nîmenukaꞌpî 1:1-25
1 Sîrîrî wanî penaronkon Jesus Cristo rawîronkon pîꞌ teeseurîmasen pe. Jesus Cristo wanî Abraão nurîꞌtî paꞌrî pe moropai Davi nurîꞌtî paꞌrî pe ekaremeꞌnen pe awanî.
2 Pena Abraão wanîꞌpî.Mîîkîrî wanîꞌpî Isaque yun pe.Moropai Isaque wanîꞌpî Jacó yun pe.Moropai Jacó wanîꞌpî Judá yun pe moropai itonpayamîꞌ yun pe.
3 Moropai Judá wanîꞌpî monoiꞌ pe esenpoꞌsan yun pe, toꞌ eseꞌ wanîꞌpî Perez moropai Zerá. Inkamoro yankon wanîꞌpî iteseꞌ Tamar.Moropai Perez wanîꞌpî Esrom yun pe.Moropai Esrom wanîꞌpî Arão yun pe.
4 Moropai Arão wanîꞌpî Aminadabe yun pe.Moropai Aminadabe wanîꞌpî Naassom yun pe.Moropai Naassom wanîꞌpî Salmom yun pe.
5 Moropai Salmom wanîꞌpî Boaz yun pe. Mîîkîrî yan wanîꞌpî Raabe.Moropai Boaz wanîꞌpî Obede yun pe. Mîîkîrî yan wanîꞌpî iteseꞌ Rute.Moropai Obede wanîꞌpî Jessé yun pe.
6 Moropai Jessé wanîꞌpî Davi yun pe, pata esaꞌ pe tîweꞌsen.Moropai Davi wanîꞌpî Salomão yun pe. Mîîkîrî yan wanîꞌpî Urias noꞌpî rîꞌpî pe.
7 Moropai Salomão wanîꞌpî Roboão yun pe.Moropai Roboão wanîꞌpî Abias yun pe.Moropai Abias wanîꞌpî Asa yun pe.
8 Moropai Asa wanîꞌpî Josafá yun pe.Moropai Josafá wanîꞌpî Jorão yun pe.Moropai Jorão wanîꞌpî Uzias yun pe.
9 Moropai Uzia wanîꞌpî Jotão yun pe.Moropai Jotão wanîꞌpî Acaz yun pe.Moropai Acaz wanîꞌpî Ezequias yun pe.
10 Moropai Ezequias wanîꞌpî Manassés yun pe.Moropai Manassés wanîꞌpî Amom yun pe.Moropai Amom wanîꞌpî Josias yun pe.
11 Moropai Josias wanîꞌpî Jeconias yun pe moropai itonpayamîꞌ yun pe. Mîrîrî yai Babilônia pata pona Israelponkon yaapîtîꞌpî Babilônia ponkonya tîpoitîrîkon pe toꞌ eꞌtoꞌpe itarumaiꞌpî pe.
12 Babilônia pona toꞌ yarîꞌpî toꞌya tanne Jeconias wanîꞌpî. Mîîkîrî Jeconias wanîꞌpî Salatiel yun pe.Moropai Salatiel wanîꞌpî Zorobabel yun pe.
13 Moropai Zorobabel wanîꞌpî Abiúde yun pe.Moropai Abiúde wanîꞌpî Eliaquim yun pe.Moropai Eliaquim wanîꞌpî Azor yun pe.
14 Moropai Azor wanîꞌpî Sadoque yun pe.Moropai Sadoque wanîꞌpî Aquim yun pe.Moropai Aquim wanîꞌpî Eliúde yun pe.
15 Moropai Eliúde wanîꞌpî Eleazar yun pe.Moropai Eleazar wanîꞌpî Matã yun pe.Moropai Matã wanîꞌpî Jacó yun pe.
16 Moropai Jacó wanîꞌpî José yun pe. Mîîkîrî José wanîꞌpî Jesus Cristo yan Maria niyo pe. Mîîkîrî Jesus wanî Paapa nîmenkaꞌpî pe, Cristo pe tesaꞌsen pe.
17 Sîrîrî warantî Abraão nurîꞌtî payanîꞌsan wanîꞌpî. Inkamoro wanîꞌpî asakîrîrî puꞌ pona tîîmoꞌtai (14) kaisarî. Moropai Davi nurîꞌtî payanîꞌsan wanîꞌpî Babilônia pata pona Israelyamîꞌ yarî toꞌya pîkîrî toꞌ wanîꞌpî asakîrîrî puꞌ pona tîîmoꞌtai (14) kaisarî nîrî. Moropai mîrîrî tîpo Cristo esenpotoꞌ weiyu pîkîrî asakîrîrî puꞌ pona tîîmoꞌtai (14) kaisarî nîrî toꞌ wanîꞌpî.
Jesus Cristo Esenpoꞌpî
18 Jesus Cristo esenpotoꞌ wanîꞌpî sîrîrî warantî. Maria tîîse maasa tîniyotapa tînyo ton José yarakkîrî. Tîîse irawîrî more yan pe eenasaꞌ wanîꞌpî Morî Yekaton Wannî winîpai.
19 Mîîkîrî José yarakkîrî Maria eꞌtoꞌ warayoꞌ wanîꞌpî Paapa maimu yawîrî tîîkoꞌmansen pe. Mîrîrî yeꞌnen yarakkîrî tîwanî namai José esenumenkaꞌpî teesepantoꞌkon yaretîꞌka pîꞌ, tîîse anîꞌya epuꞌtî pra yuꞌse awanîꞌpî. Maasa pra tewasirî Maria winîkîi imakuiꞌpî pe anîꞌ eseurîma namai.
20 Mîrîrî pîꞌ José esenumenka koꞌmannîpî tanne Uyepotorîkon narimaꞌpî inserî esenpoꞌpî José pia iweꞌneꞌ. Moropai taꞌpîiya ipîꞌ: —José, Davi nurîꞌtî paarîꞌpî, eranneꞌ pe pra eꞌkî. Anoꞌpî pe Maria yapiꞌkî. Maasa pra mîîkîrî more yan pe Maria wanî manniꞌ, mîîkîrî man Morî Yekaton Wannî winîpainon pe.
21 Moropai mîîkîrîya more warayoꞌ yenpo pe man. Moropai mîîkîrî eseꞌtîya pe nai Jesus pe iteseꞌ. Maasa pra mîîkîrîya tîpemonkonoyamîꞌ pîikaꞌtî pe man, toꞌ nîkupîꞌpî imakuiꞌpî winîpai —taꞌpîiya ipîꞌ.
22 Tamîꞌnawîrî mîrîrî eꞌkupîꞌpî maasa pra aweꞌkupî kupî sîrîrî taꞌpî Uyepotorîkonya tîmaimu ekaremeꞌnen profeta nurîꞌtî pîꞌ.
23 Taꞌpîiya see warantî:Aurînoꞌpî, warayoꞌ yarakkîrî siꞌpî pepîn ena pe man more yan pe.Moropai tînre ton yenpoiya warayoꞌ pe.Mîîkîrî eseꞌtî toꞌya pe man Emanuel kaiꞌma
taꞌpîiya. Uurîꞌnîkon yarakkîrî Paapa wanî taatoꞌ mîrîrî Emanuel.
24 Moropai José pakaꞌpî tîwetun yeꞌka pe. Moropai îꞌ kaiꞌma taꞌpî Uyepotorîkon narimaꞌpî inserîya yawîrî ikupîꞌpîiya. Moropai Maria yarîꞌpîiya tewîꞌ ta tînoꞌpî pe.
25 Tîîse yarakkîrî awanî pra José wanîꞌpî. Tînre yenpoiya tîpose aakoꞌmamîꞌpî yarakkîrî tîweꞌse pra. Moropai Joséya mîîkîrî inre eseꞌtîꞌpî Jesus kaiꞌma.
