Jesus Cristo Yekare Mateus Nîmenukaꞌpî 10:1-42
10 Jesusya warayoꞌkon asakîꞌne puꞌ pona tîîmoꞌtaiꞌnîkon yannoꞌpî tîîpia. Moropai inkamoro pia meruntî tîrîꞌpîiya, oꞌmaꞌkon yarakkîrî tîweꞌsanon yapai toꞌ yenpaꞌkatoꞌpe toꞌya tîmaimu ke. Moropai tamîꞌnawîron paran winîpai toꞌ yepiꞌtîtoꞌpe toꞌya toꞌ yeparankon winîpai.
2 Inkamoro asakîꞌne puꞌ pona tîîmoꞌtaiꞌnîkon eseꞌ wanîꞌpî see warantî. Eꞌmaiꞌnon wanîꞌpî Simão, tîîse Pedro kaiꞌma esatîꞌpî toꞌya moropai itakon André. Tiago moropai itakon João Zebedeu munkîyamîꞌ.
3 Moropai Filipe moropai Bartolomeu moropai Tomé moropai Mateus manniꞌ tesanonkon pia toꞌ nîtîrî tîniru yapisî pîꞌ teesenyakaꞌmasen. Moropai Tiago Alfeu munmu moropai Tadeu.
4 Moropai Simão, manniꞌ teepîsen Zelote taatoꞌ, moropai Judas Iscariotes manniꞌ Jesus rumakatîpon iteyatonon pia.
Jesus Nenupaꞌsan Esenyakaꞌmatoꞌ
5 Inkamoro warayoꞌkon yaipontîꞌpî Jesusya toꞌ wîtîtoꞌpe. Tîmaimu tîrîꞌpîiya toꞌ pia see warantî: —Attîkon ya, katîtî Judeuyamîꞌ pepîn pata yaꞌ. Moropai Samaria cidaderî pona kewontî —taꞌpîiya.
6 —Tîîse aminke Paapa piapainokon Israel ponkon koreꞌta itesaꞌ pînon carneiro warainonkon muwatîi —taꞌpîiya toꞌ pîꞌ.
7 —Atîtî inkamoro pîꞌ “Aminke pra tamîꞌnawîronkon esaꞌ pe Paapa iiꞌtoꞌ man”, makatîi toꞌ pîꞌ. “Tîpemonkonoyamîꞌ pîikaꞌtîiya kupî sîrîrî”, makatîi.
8 Moropai ereꞌkîpankon mepiꞌtîtîi, moropai tiaron paran pîꞌ tîweꞌsanon mepiꞌtîtîi. Moropai isaꞌmantaꞌsan miꞌmîꞌsaꞌkatîi. Moropai oꞌmaꞌkon yarakkîrî tîweꞌsanon yapai menpaꞌkatîi. Mîrîrî warantî mîkuꞌtîi teꞌmai pra. Maasa pra teꞌmai pra sîrîrî meruntî yapisîꞌpîyaꞌnîkon. Mîrîrî warantî nîrî itîîtî antîrîkon itepeꞌpî tuwai pra.
9 Attîkon ya îꞌ rî kîsatî asakunikon yaꞌ. Ouro moropai prata moropai tîniru enaꞌpî kîsatî itenseꞌ yaꞌ.
10 Attîkon ya aponkon ton kîsatî moropai aꞌsaꞌsakon ton kîsatî. Moropai ameꞌsipukon kîsatî aapîtatoꞌkon ton. Maasa pra teesenyakaꞌmasanonya taꞌreꞌkon ton yapisî eꞌpai awanî —taꞌpîiya toꞌ pîꞌ.
11 —Eerepamîkon ya cidade pona pemonkonyamîꞌ koreꞌta, eewomîkon ya amîrîꞌnîkon anapiꞌpai tîweꞌsen pemonkon muwatîi. Moropai mîîkîrî pia makoꞌmantîi attîkon pîkîrî.
12 Mîîkîrî pemonkon yewîꞌ ta eewomîkon ya makatîi tîîwanmîra eꞌnîtoꞌ wanî pe man sîrîrî wîttî ta.
13 Anîꞌ amîrîꞌnîkon yapiꞌnen wanî ya morî pe mîîkîrî pia morî tîîwanmîn wanî yarakkîrî. Tîîse amîrîꞌnîkon yapisîiya pra awanî ya, atîtî iipiapai, iipia tîweꞌse pra. Mîrîrî yeꞌnen tîîwanmîn wanî pepîn iipia, tîîse aapiaꞌnîkon neken awanî.
14 Moropai miarî tewîꞌkon ta cidade po ayapisîkon toꞌya pra toꞌ wanî ya morî pe, moropai amaimukon anetapai pra toꞌ wanî ya, miarî pai mepaꞌkatîi toꞌ koreꞌtapai. Moropai eepaꞌkakon pe miarîpai aꞌsaꞌsakon pîꞌ atapisîꞌpî non paꞌtîyaꞌnîkon eꞌpai awanî. Mîrîrî kupîyaꞌnîkon ya, Paapa pia morî pe pra toꞌ wanî, amaimukon anetapai pra toꞌ wanî ekaremekîyaꞌnîkon.
15 Ayenkuꞌtîuyaꞌnîkon pepîn. Îꞌ pensa pemonkonyamîꞌ yenumî Paapaya weiyu erepamî yai toꞌ eꞌtarumaꞌtî pe man. Mîrîrî yai toꞌ eꞌtarumaꞌtî pe man mararî pra, manniꞌkan Sodoma cidaderî ponkon nurîꞌtî moropai Gomorra cidaderî ponkon eꞌtarumaꞌtîꞌpî yentai —taꞌpî Jesusya.
Epuꞌnîtoꞌ Moropai Eꞌtarumaꞌtîntoꞌ
16 —Maasa îꞌ tauya etatî. Amîrîꞌnîkon yarimauya sîrîrî nariꞌkon kaikusiyamîꞌ warainonkon koreꞌta attîkonpa. Amîrîꞌnîkon wanî carneiroyamîꞌ warantî. Mîrîrî yeꞌnen tîwarî eꞌtî, epuꞌnen pe eesenkuꞌtîkon namai. Tîîse eranmîra eꞌtî tiaronkon pîꞌ îꞌ imakuiꞌpî tîkuꞌse pra nariꞌ pe pra wakuꞌkaimîyamîꞌ warantî.
17 Moropai tepuꞌse eꞌtî, ayarîkon toꞌya ya toꞌ epereꞌtoꞌ yewîꞌkon ta, apîꞌnîkon teeseurîmakonpa. Mîrîrî yai tiaronkonya apoꞌpîtîkon mîrîrî toꞌ epereꞌtoꞌkon yewîꞌ tapîꞌ poꞌpînnîtoꞌ ke.
18 Uurî wenai mîrîrî warantî akupîkon toꞌya. Pata esaꞌ pia ayarîkon toꞌya moropai pata esanon esaꞌ pia ayarîkon toꞌya. Mîrîrî yai inkamoro pîꞌ umaimu ekaremekîyaꞌnîkon. Moropai manniꞌkan Judeuyamîꞌ pepîn pîꞌ nîrî umaimu ekaremekîyaꞌnîkon.
19 Îꞌ pensa amîrîꞌnîkon yarî toꞌya yai eꞌtarumaꞌtîntoꞌ yaꞌ, kîsewankonoꞌmatî îꞌ kaiꞌma amaimu ton pra awanî pîꞌ. Maasa pra uurîya amaimukon ton tîrî îꞌ kaiꞌma epuꞌnen pe awanîkonpa. Toꞌ maimu yuꞌtoꞌyakon ton tîrîuya mîrîrî pe rî —taꞌpî Jesusya.
20 —Mîrîrî amaimukon yuꞌtoꞌyaꞌnîkon wanî pepîn aawarîrîꞌnîkon aneporîꞌpîkon pe. Tîîse awanî Paapa yekaton winîpainon pe. Mîrîrî yeꞌnen mîîkîrî eseurîma amîrîꞌnîkon pe.
21 Mîrîrî yeꞌnen tepuꞌse eꞌtî maasa pra amîrîꞌnîkon rumaka tiaronkon pepîn rî ayonpakonya aasaꞌmantakonpa. Moropai toꞌ yunkonyamîꞌya tînmukukon rumaka toꞌ saꞌmantatoꞌpe nîrî. Moropai toꞌ munkîyamîꞌ ena tîyunkon yeyaton pe moropai tîyunkon wîî meꞌpo toꞌya.
22 Moropai tamîꞌnawîronkon pemonkonyamîꞌ yewanma pe amîrîꞌnîkon ena uyeseꞌ wenai. Tîîse anîꞌya yapîtanîpî ya, eꞌtarumaꞌtîntoꞌ meruntî ke tîîsaꞌmanta pîkîrî, mîîkîrî eꞌpîikaꞌtî pe man.
23 Oꞌnon pata amîrîꞌnîkon yewanmîrî toꞌya ya, moropai amuꞌtunpakon toꞌya ya, cidade poi mepetîi tiaron pata pona. Maasa pra tauya sîrîrî apîꞌnîkon. Eesenyakaꞌmatoꞌkon yaretîꞌkasaꞌyaꞌnîkon eserîke pra naatîi, tamîꞌnawîrî cidadekon poro Judeuyamîꞌ pata poro, uurî, kaꞌ poi iipîꞌpî erepamî rawîrî.
24 Aꞌkî, teesenupasen wanî pepîn tenupanen yentai. Moropai tîkaraiwarî yentai ipoitîrî wanî pepîn.
25 Tîîse teesenupasen wanî ya tenupatîpon kaisarî, morî pe awanî. Moropai tîkaraiwarî kenan poitîrî wanî ya tîkaraiwarî kaisarî, morî pe awanî. Itentai awanî eserîke pra. Mîrîrî yeꞌnen Belzebu winîpai meruntî yapisîiya taa toꞌya ya upîꞌ itentai panpîꞌ taa toꞌya awinîkîiꞌnîkon, maasa pra uwenaironkon pe awanîkon —taꞌpî Jesusya.
Anîꞌ Nama Eꞌpai Awanî
26 —Mîrîrî yeꞌnen eranneꞌ pe pra eꞌtî inkamoro yeꞌkakon warayoꞌkon seruꞌyeꞌkon pîꞌ. Maasa pra tamîꞌnawîrî uyeserukon teeseraꞌmai pra siꞌpî, eseraꞌma kupî sîrîrî aronne. Moropai tamîꞌnawîrî îꞌ taꞌpî uurîꞌnîkonya amaꞌ pe, umaimukon esepuꞌtî kupî sîrîrî.
27 Mîrîrî warantî îꞌ tauya manniꞌ apîꞌnîkon tiaronkonya eta pra tîîse mîrîrî mekaremeꞌtîi tamîꞌnawîronkon pîꞌ epuꞌtoꞌpe toꞌya. Moropai uwinîpai anetaꞌpîkon tiaronkon netaꞌpî pepîn, mîrîrî mekaremeꞌtîi aronne tamîꞌnawîronkonya epuꞌtoꞌpe.
28 Mîrîrî yeꞌnen tauya sîrîrî apîꞌnîkon. Eranneꞌ pe pra eꞌtî manniꞌ amîrîꞌnîkon wîînen pîꞌ. Awîtîpoꞌnokon ayekatonkon wîiya eserîke pra man. Tîîse tauya sîrîrî eranneꞌ pe eꞌtî Paapa pîꞌ. Maasa pra mîîkîrîya awîkon tarî moropai ayekatonkon yenumîiya eꞌpainon apoꞌ yaꞌ —taꞌpî Jesusya.
29 Moropai taꞌpîiya: —Aꞌkî, îrîwoꞌyamîꞌ ke toꞌ eꞌrepa epeꞌmîra tiwin prata enaꞌpî. Tîîse inkamoro koreꞌta tiwin ena ya non pona, Paapa, Uyunkonya epuꞌtî. Iwanmînon pepîn inkamoro. Toꞌ koꞌmannîpîiya.
30 Mîrîrî warantî amîrîꞌnîkon puꞌpai siꞌpo wanî tuꞌke teuren, tamîꞌnawîrî Paapaya epuꞌtî, maasa pra ikuꞌneꞌtîsaiꞌya yeꞌnen.
31 Mîrîrî yeꞌnen eranneꞌ pe pra eꞌtî. Maasa pra inkamoro toronyamîꞌ koꞌmannîpî tîuya yentai Paapaya amîrîꞌnîkon koꞌmannîpî tamîꞌnawîrî —taꞌpî Jesusya.
Innape Cristo Kupî Kaane
32 —Pemonkonyamîꞌya taa ya aronne tiaronkonya eta tanne, upemonkono pe tîwanî taiya ya. Mîrîrî warantî nîrî tauya Paapa kaꞌ pon rawîrî siꞌma upemonkono mîserî tauya ipîꞌ.
33 Tîîse anîꞌya tiaronkon rawîrî siꞌma “Uurî kaane, ipemonkono pepîn uurî”, taiya ya, uurîya nîrî mîrîrî warantî taa Paapa kaꞌ pon rawîrî siꞌma. “Upemonkono pepîn mîîkîrî”, tauya —taꞌpî Jesusya.
Tîwanmîn Pepîn Tîîse Eseyaton Pîꞌ Eꞌnîtoꞌ
34 —Tîîse kîsenumenkatî morî tîwanmîn enepîuya kaiꞌma sîrîrî non pona uuipî pîꞌ. Tîîse tauya sîrîrî apîꞌnîkon, morî tîwanmîn eneꞌsauꞌya pra wai. Eseyaton pîꞌ pemonkonyamîꞌ wanî kupî sîrîrî uwenai.
35 Maasa pra tîyunkon yarakkîrî toꞌ munkîyamîꞌ wanî pe man teekoreꞌmai.Moropai toꞌ munkîyamîꞌ wîriꞌsanyamîꞌ wanî pe man tîsankon yarakkîrî teekoreꞌmai.Moropai toꞌ paꞌsetonon wanî pe man tawoꞌpîkon yarakkîrî teekoreꞌmai.
36 Mîrîrî warantî ayonpakon rî wanî pe man ayeyatonkon pe, tiaronkon pepîn
—taꞌpî Jesusya.
37 —Anîꞌya tîyun, tîsan yapurî ya, uyapurî tîuya yentai mîîkîrî wanî eserîke pra awanî upemonkono pe. Moropai anîꞌya tînmukuyamîꞌ yapurî ya, uyapurî tîuya yentai, mîîkîrî wanî eserîke pra awanî upemonkono pe.
38 Manniꞌ uyapurînen wanî ya, mîîkîrîya uwenai tamîꞌnawîrî tîweꞌtarumaꞌtîtoꞌ yapîtanîpîiya pra awanî ya, upemonkono pe eserîke pra awanî. Moropai uwenairî aaipî eserîke pra awanî.
39 Anîꞌya tîweꞌtarumaꞌtîtoꞌ yapîtanîpî pra awanî ya, kureꞌne tîîkoꞌmantoꞌ pînînmaiya yeꞌnen tarî non po, mîîkîrîya ipatîkarî tîîkoꞌmantoꞌ ton eporî pepîn tîîse aasaꞌmanta pe man. Tîîse anîꞌya tîweꞌtarumaꞌtîtoꞌ nama pra awanî ya uwenai, mîîkîrîya enen tîîkoꞌmantoꞌ ton eporî ipatîkarî —taꞌpî Jesusya.
Paapaya Uyeꞌmatoꞌkon
40 —Aꞌkî, anîꞌya amîrîꞌnîkon yapisî morî pe, mîîkîrî ayapisîtîponkonya morî pe uyapisî nîrî. Moropai mîîkîrî uyapisîtîponya uyarimatîpon Paapa yapisî nîrî.
41 Moropai morî pe Paapa maimu ekaremeꞌnen yapiꞌsaꞌ anîꞌya ya tewîꞌ ta, morî eporîya pe man. Maasa pra yapisîꞌpîiya Paapa maimu ekaremeꞌnen pe awanî yeꞌnen. Mîîkîrî repa Paapaya, tîmaimu ekaremeꞌnen repa tîuya warantî. Moropai anîꞌya morî kuꞌnen yapisî ya tewîꞌ ta, morî eporîiya pe man. Maasa pra yapisîꞌpîiya, morî pe mîîkîrî wanî yeꞌnen. Moropai mîîkîrî repa Paapaya, morî kuꞌnen repa tîuya warantî.
42 Anîꞌya tuna tîrî ya, iꞌnîꞌ kenan tiwin copo kaisarî upemonkonoyamîꞌ yaꞌmiꞌpî pia, siꞌmîrikkî pe tîîse iwoꞌpaiya ya, mîîkîrî wanî upemonkono pe. Ayenkuꞌtîuya pepîn, mîîkîrî nîrî repa Paapaya. Iwaꞌkaiya pepîn —taꞌpî Jesusya.
