Jesus Cristo Yekare Mateus Nîmenukaꞌpî 15:1-39
15 Mîrîrî yai fariseuyamîꞌ moropai Moisés nurîꞌtîya yenupantoꞌ pîꞌ yenupatonkon wîtîsaꞌ wanîꞌpî Jerusalém poi Jesus yarakkîrî eseurîmai.
2 Inkamoroya taꞌpî Jesus pîꞌ:
—Îꞌ waniꞌ awanî yeꞌnen kin anenupaꞌsan wanî pepîn utamokonya uyenupaꞌpîkon yawîrî pra toꞌ wanî? Tenyakon rona toꞌya pepîn tekkarikon yonpa tîuyaꞌnîkon rawîrî. Mîrîrî yawîrî kupî toꞌya pra awanî yeꞌnen upanamaꞌpîkon utamokonya yawîrî pra toꞌ wanî mîrîrî —taꞌpî toꞌya.
3 Jesusya toꞌ maimu yuukuꞌpî. Moropai taꞌpîiya toꞌ pîꞌ: —Îꞌ waniꞌ kin awanî yeꞌnen Paapa maimuya taasaꞌ yawîrî ikupîyaꞌnîkon pra, atamokonya ayenupaꞌpîkon yawîrî ikupî pîꞌ aakoꞌmamîkon? —taꞌpîiya.
4 —Maasa pra Paapaya taꞌpî ankupîkon ton pîꞌ.“Ayunkon yapurîtî moropai asankon yapurîtî”,
taꞌpîiya. Moropai taꞌpîiya nîrî:“Anîꞌ eseurîma ya imakuiꞌpî pe tun winîkîi moropai tîsan winîkîi, mîîkîrî wîî eꞌpai awanî”,
taꞌpî Paapaya —taꞌpîiya.
5 —Tîîse tiaronkon yenupayaꞌnîkon yairî pra. Amîrîꞌnîkonya taa toꞌ pîꞌ. Tiaron moro awanî tîyun anpîikaꞌtîpainon tîîse taayaꞌnîkon: “ ‘Kaane, untîrî ton pra man uyun pia ipîikaꞌtîtoꞌ ton, maasa pra Paapa pia untîrî pe seeniꞌ moꞌkasauꞌya sîrîrî’ taatoꞌpe toꞌya”, taayaꞌnîkon seruꞌ pe.
6 Moriya mîrîrî warantî taayaꞌnîkon ya, ayunkon yapurîyaꞌnîkon pepîn mîrîrî. Mîrîrî warantî Paapa maimu yuꞌse pra awanîkon eseraꞌma mîrîrî, ayeserukon neken yawîrî ikupîkonpa.
7 Seruꞌyeꞌkon teesenkuꞌtîsanon tîîwarîrîꞌnîkon. Apîꞌnîkon penaroꞌ Paapa maimu ekaremeꞌnen profeta Isaías nurîꞌtî eseurîmaꞌpî yairî.
8 “Morî pe eseurîmakoiꞌkon insanan pemonkonyamîꞌ upîꞌ” taa Paapaya.“Tîîse toꞌ yewan wanî aminke upîꞌ” taiya.
9 “Mîrîrî yeꞌnen uyapurîtoꞌ toꞌya wanî îꞌ pe pra rî.Penaronkonya tîpanamaꞌpîkon yawîrî tonpakon yenupa toꞌya,uurîya tîpanamaꞌpîkon pe tîkuꞌse” taꞌpî Paapaya,
taꞌpî profeta Isaías nurîꞌtîya —taꞌpî Jesusya toꞌ pîꞌ.
Imakuiꞌpî Pîꞌ Jesus Eseurîma
10 Mîrîrî taa tîpo Jesusya arinîkon yannoꞌpî moropai taꞌpîiya toꞌ pîꞌ: —Maasa umaimu etatî moropai epuꞌtîyaꞌnîkon yuwatî —taꞌpîiya.
11 —Imakuiꞌpî pe eꞌnî pepîn uyaꞌreꞌkon unenapîkon wenai. Tîîse imakuiꞌpî pe eꞌnî imakuiꞌpî pe eseurîma wenai, imakuiꞌpî pîꞌ esenumenkan wenai. Mîrîrîya imakuiꞌpî pe ukupîkon —taꞌpîiya.
12 Mîrîrî taasaiꞌya tîpo, Jesus nenupaꞌsan wîtîꞌpî iipia. Moropai inkamoroya taꞌpî ipîꞌ: —Uyepotorî, îꞌ taaya manniꞌ pîꞌ fariseuyamîꞌ atasiꞌsirunpasaꞌ man amaimu pîꞌ —taꞌpî toꞌya.
13 Jesusya taꞌpî: —Tamîꞌnawîronkon tînpîmîꞌpî pepîn aroꞌtasaꞌ yaroka umî esaꞌya. Mîrîrî warantî tamîꞌnawîronkon Paapa pemonkono pe pra tîweꞌsanon moꞌkaiya tîpemonkonoyamîꞌ koreꞌtapai —kaiꞌma toꞌ maimu yuukuꞌpî Jesusya.
14 —Inkamoro yeꞌkakon tîpîinamai pra eꞌtî. Maasa pra toꞌ wanî enkaruꞌnankon warantî. Mîrîrî yeꞌnen tiaronkon yenupa toꞌya eserîke pra toꞌ wanî. Enkaruꞌne siꞌma enkaruꞌnanya tiaron yarî eserîke pra awanî. Yarî yuꞌse tîwanî ya toꞌ eꞌsoroka ituꞌnakan yaꞌ saꞌnîrî.
15 Mîrîrî taiya yeꞌnen, Pedroya Jesus pîꞌ esatîꞌpî. —Mîrîrî panton ekaremeꞌkî anna pîꞌ —taꞌpîiya.
16 Jesusya taꞌpî: —Sîrîrî tîpose pakko pe aakoꞌmamîkon mîrîrî? —taꞌpîiya.
17 —Aꞌkî, uyaꞌreꞌkon unennoꞌmakonya imakuiꞌpî pe ukupîkon pepîn. Maasa pra uyewankon yaꞌ eewomî pepîn, uroꞌtakon yaꞌ neken yennoꞌma moropai yenpaꞌka.
18 Tîîse eseurîmantoꞌ wanî uyewankon yapai teepaꞌkasen esenumenkantoꞌ wenai. Mîrîrîya ukîꞌpakon imakuiꞌpî pe.
19 Maasa pra uyewankon yaꞌ tîîkoꞌmansen imakuiꞌpî wenai esenumenkan imakuiꞌpî pe, pemonkon anwîpai eꞌnî, moropai tiaron noꞌpî yarakkîrî eꞌnî, moropai seꞌ tapairî wîriꞌsanyamîꞌ yarakkîrî eꞌnî. Moropai amaꞌ pe eꞌnî, moropai seruꞌyeꞌ pe eꞌnî, imakuiꞌpî pe eseurîman tiaronkon winîkîi.
20 Sîrîrîkon imakuiꞌpî uyewankon yaꞌ tîîkoꞌmansen wenai, imakuiꞌpî kupî pîꞌ koꞌmannî. Mîrîrî tîîse uyenyakon tîronai pra uyaꞌreꞌkon yonpasaꞌ wenai, imakuiꞌpî pe eꞌnî pepîn —taꞌpî Jesusya tînenupaꞌsan pîꞌ.
Judeupaꞌ Pepîn Wîriꞌ Pîꞌ Jesus Eseurîma
21 Mîrîrî pata yapai Jesus eseꞌmaꞌtîꞌpî. Attîꞌpî Tiro pata poro aminke pra cidade pîꞌ. Moropai Sidom pata poro attîꞌpî.
22 Miarî wîriꞌ wanîꞌpî Cananeu pon, Judeupaꞌ pepîn. Jesus erepansaꞌ tanne, mîîkîrî iipîꞌpî iipia. Moropai taꞌpîiya tîwentaimepîtî yeꞌka pe: —Uyepotorî, amîrî wanî Davi nurîꞌtî paarîꞌpî pe. Pîikaꞌtîton amîrî. Aꞌnokoꞌpî pe saꞌne uyeraꞌmakî. Oꞌmaꞌ ewonsaꞌ man unre wîriꞌ yaꞌ. Mîîkîrîya toneꞌ ikupî pîꞌ man —taꞌpîiya.
23 Tîîse Jesusya imaimu yuuku pra awanîꞌpî. Mîrîrî tanne, inenupaꞌsan erepamîꞌpî iipia aminke pra. Moropai inkamoroya taꞌpî: —Mîîkîrî wîriꞌ wîtîtoꞌpe kaꞌkî, uwenairîꞌnîkon aaipî koꞌmannîpî mîrîrî taa enepîiya. Moropai awentaimepîtî koꞌmannîpî —taꞌpî toꞌya.
24 Jesusya yuukuꞌpî: —Paapaya uyarimasaꞌ man upemonkonoyamîꞌ neken pîikaꞌtîtoꞌpeuya, Judeuyamîꞌ atakaꞌmaꞌsan, carneiro wanî itesaꞌ pra warantî tîweꞌsanon —taꞌpîiya.
25 Tîîse mîîkîrî wîriꞌ iipîꞌpî Jesus rawîrî moropai aweꞌsekunkaꞌpî moropai mîîkîrîya taꞌpî: —Uyepotorî, upîikaꞌtîkî saꞌne —taꞌpîiya.
26 —Aꞌkî —taꞌpî Jesusya ipîꞌ. —More yaꞌreꞌ tîrî ya arinmaraka pia, morî pe pra awanî. Mîrîrî warantî awanî apîikaꞌtî tîuya ya, Judeupaꞌ pe pra awanî yeꞌnen.
27 Tîîse wîriꞌya taꞌpî Jesus pîꞌ: —Innape man, Uyepotorî. Mîrîrî yeꞌka pe tîîse tesaꞌkon yaꞌreꞌ yaꞌpunuꞌpî eꞌsoroka enapî arinmarakayamîꞌya itaponseꞌ yoꞌkoi siꞌma. Mîrîrî yeꞌnen mararî mîrikkî itîîkî uupia.
28 Jesusya taꞌpî ipîꞌ: —Mîrîrî taaya yeꞌnen, innape ukupîya epuꞌtî pîꞌ wai, maꞌnon —taꞌpî Jesusya. —Mîrîrî yeꞌnen îꞌ taaya manniꞌ mîrîrî kupîuya. Moropai mîrîrî taa Jesusya pe mîîkîrî wîriꞌ more oꞌmaꞌ yarakkîron esepiꞌtîꞌpî.
Tuꞌkankon Pemonkonyamîꞌ Yepiꞌtî Jesusya
29 Miarî pai Jesus eseꞌmaꞌtîꞌpî moropai attîꞌpî Galiléia kuꞌpî rî pîkîrî. Moropai mîîkîrî enukuꞌpî wîꞌ pona moropai eereutaꞌpî miarî.
30 Miarî nîrî arinîkon pemonkonyamîꞌya priꞌyawonkon pepîn yarîꞌpî. Asakoiꞌkon pepîn, moropai maꞌtîkîꞌ pankon, moropai enkaruꞌnankon, moropai imaimu pînon moropai tuꞌkan paran pîꞌ tîweꞌsanon yarîꞌpî toꞌya Jesus pia toꞌ yepiꞌtîtoꞌpeiya kaiꞌma. Moropai inkamoro yepiꞌtîꞌpîiya.
31 Mîrîrî kupî Jesusya eraꞌma tîuyaꞌnîkon pîꞌ pemonkonyamîꞌ esenumenkaꞌpî mararî pra teesewankonoꞌmai, maasa pra imaimu pîn eseurîma yeꞌnen, moropai maꞌtîkîꞌ pankon esepiꞌtîsaꞌ yeꞌnen, moropai asakoiꞌkon pepîn asarî yeꞌnen, moropai enkaruꞌnankonya eraꞌma yeꞌnen. Mîrîrî pîꞌ Judeuyamîꞌ yepotorî Paapa yapurîꞌpî toꞌya mararî pra.
Jesusya 4.000 Kaisaronkon
Pemonkonyamîꞌ Yekkariꞌtî
32 Jesusya tînenupaꞌsan yannoꞌpî tîîpia toꞌ yeurîmapa kaiꞌma moropai taꞌpîiya: —Eseurîwîꞌne wei kaisarî insanan pemonkonyamîꞌ koꞌmansaꞌ man uupia. Uꞌnokoꞌpî pe toꞌ eraꞌma pîꞌ wai toꞌ yaꞌreꞌ ton pra tîîse —taꞌpîiya. —Toꞌ anaipontîpai pra wai tekkarikon yonpa toꞌya pra toꞌ tîîse. Maasa pra yai toꞌ wîtî eserîke wanî eꞌma taawîrî emiꞌne tîwanîkon pîꞌ —taꞌpîiya.
33 Inenupaꞌsanya Jesus ekaranmapoꞌpî: —Oꞌnon yeꞌka pe insanan mararonkon pepîn pemonkonyamîꞌ yekkari ton eporî eꞌpainon tarî keren po siꞌma? Îꞌ ton pîn yaꞌ eꞌnî tanne —taꞌpî toꞌya.
34 Inkamoro ekaranmapoꞌpî Jesusya: —Îꞌ warapo kaisarî trigo puusaꞌ nai? —taꞌpîiya. —Asakîꞌne miaꞌ pona tîîmoꞌtai kaisarî moropai moroꞌyamîꞌ mîrikkî —taꞌpî toꞌya.
35 Moropai tamîꞌnawîronkon pîꞌ taꞌpî Jesusya: —Non pona ereutatî —taꞌpîiya.
36 Moropai Jesusya asakîꞌne miaꞌ pona tîîmoꞌtai kaisaron trigo puusaꞌ yapisîꞌpî, moropai moroꞌyamîꞌ nîrî. Mîrîrî tîpo eepîremaꞌpî Paapa pîꞌ. —Morî puꞌkuru amîrî, anna yaꞌreꞌ ton tîînen —taꞌpîiya Paapa pîꞌ. Mîrîrî tîpo trigo puusaꞌ pirikkapîtîꞌpîiya. Mîrîrî tîrîꞌpîiya tînenupaꞌsan pia itîîtoꞌpe toꞌya pemonkonyamîꞌ pia.
37 Mîrîrî pîꞌ tamîꞌnawîronkon entamoꞌkaꞌpî teesepiꞌtîkon pîkîrî. Mîrîrî yonparîꞌpî yannukuꞌpî inenupaꞌsanya asakîꞌne miaꞌ pona tîîmoꞌtai kaisarî waikaraꞌpî.
38 Inkamoro Jesus nekkariꞌtîꞌsan wanîꞌpî warayoꞌkon 4.000 kaisarî wîriꞌsanyamîꞌ tîkuꞌnetîi pra moropai moreyamîꞌ.
39 Mîrîrî tîpo Jesusya pemonkonyamîꞌ yaipontîꞌpî toꞌ wîtîtoꞌpe. Moropai Jesus asaraꞌtîꞌpî kanau yaꞌ, moropai attîꞌpî Magadã pata pona.
