Jesus Cristo Yekare Mateus Nîmenukaꞌpî 16:1-28
16 Jesus yarakkîrî eseurîmai tiaronkon fariseuyamîꞌ moropai tiaronkon saduceuyamîꞌ wîtîꞌpî iipia. Jesus anakaꞌmapai toꞌ wanîꞌpî mîîtoꞌpe. Paapa winîpaino pe mîîkîrî wanî pepîn kaiꞌma toꞌ esenumenkaꞌpî. Mîrîrî yeꞌnen kaꞌ winîpainon, tîneraꞌmakon ton esatîꞌpî toꞌya Jesus pîꞌ.
2 Tîîse Jesusya toꞌ maimu yuukuꞌpî: —Wei ewomî tanne suuyu pe tîweꞌsen kaꞌ pîꞌ eraꞌmayaꞌnîkon ya, taawonan amîrîꞌnîkon: “Penane morî pe pata wanî pe man. Aꞌkî, kaꞌ pîꞌ suuyu pe awanî”, taayaꞌnîkon.
3 Moropai penane puꞌkuru suuyu pe pata wanî ya taayaꞌnîkon: “Sîrîrîpe konoꞌ rena pe man”, taayaꞌnîkon. Maasa pra kaꞌ pîꞌ katupuru eraꞌmasaꞌyaꞌnîkon yeꞌnen, moropai ewaron pe pata wanî yeꞌnen. Kaꞌ eraꞌmayaꞌnîkon kaisarî, taapîtîyaꞌnîkon îꞌ eꞌkupî epuꞌtîyaꞌnîkon. Tîîse îꞌ waniꞌ awanî yeꞌnen aneraꞌmaꞌpîkon ayenukon ke, kupîyaꞌnîkon pepîn innape? Îꞌ eꞌkupî epuꞌtîyaꞌnîkon pepîn, îꞌ ikupî eserîkan pepîn eraꞌmayaꞌnîkon tîîse —taꞌpîiya.
4 —Îꞌ yeꞌka pe amîrîꞌnîkon sîrîrî pankon wanî imakuiꞌpî pe, innape ukupî yeꞌka pe pra. Aneraꞌmakon ton esatîyaꞌnîkon upîꞌ. Tîîse îꞌ rî aneraꞌmakon ton kupîuya pepîn. Tîîse tiwinan neken Jonas nurîꞌtî yarakkîrî eꞌkupîꞌpî. Mîrîrî epuꞌtîyaꞌnîkon yuꞌse wai.
Mîrîrî taa tîpo, Jesus epaꞌkaꞌpî moropai attîꞌpî toꞌ piapai.
Fariseuyamîꞌ Moropai Saduceuyamîꞌ Yeseru Fermento Warainon
5 Jesus nenupaꞌsanya ikuꞌpî nuurukkuꞌsaꞌ yai, tîwanmîraꞌnîkon tekkarikon yaasaꞌ toꞌya pra toꞌ wanîꞌpî.
6 Mîrîrî yai taꞌpî Jesusya: —Enpen panpîꞌ eꞌtî, fariseuyamîꞌ moropai saduceuyamîꞌ pîꞌ tîwarî eꞌtî. Aka, tîwî toꞌ piawon trigo saꞌmotoꞌ toꞌ piawon nîsi —taꞌpîiya.
7 Mîrîrî taiya pîꞌ Jesus nenupaꞌsan eseurîmaꞌpî teken siꞌma. Taꞌpî toꞌya: —Mîrîrî taiya maasa pra uyekkarikon ton eneꞌsaꞌ pra awanî yeꞌnen —taꞌpî toꞌya.
8 Inkamoro eseurîmatoꞌ etaꞌpî Jesusya. Mîrîrî yeꞌnen toꞌ ekaranmapoꞌpîiya. Taꞌpîiya: —Îꞌ ton pe see eeseurîmakon koꞌmannîpî mîrîrî, ayekkarikon ton pra awanî pîꞌ? Îꞌ yeꞌka pe see mararî innape ukuꞌtoꞌyaꞌnîkon awanî mîrîrî!
9 Uupia Paapa meruntîri wanî epuꞌtîyaꞌnîkon pra naatî mîîtoꞌpe? Epuꞌtîyaꞌnîkon pra awanîkon mîrîrî ayewankon yaꞌ. Manniꞌ unkupî pîꞌ awenpenatakon pra naatî? Miaꞌtaikinan trigo puusaꞌ pîrikkapîtîꞌpîuya 5.000 kaisaronkon warayoꞌkon yekkariꞌtîꞌpîuya. Moropai îꞌ warapo waikaraꞌpî kaisarî itonparîꞌpî yannukuꞌpîyaꞌnîkon pîꞌ enpenatatî.
10 Moropai manniꞌ asakîꞌnan miaꞌ pona tîîmoꞌtai kaisaron trigo puusaꞌ mîrîrî ke 4.000 kaisaronkon warayoꞌkon yekkariꞌtîꞌpîuya. Moropai îꞌ warapo waikaraꞌpî kaisarî itonparîꞌpî yannukuꞌpîyaꞌnîkon?
11 Mîrîrî tauya manniꞌ epuꞌtîyaꞌnîkon pra awanîkon mîrîrî. Maasa pra trigo puusaꞌ pîꞌ eseurîma pepîn sîrîrî. Tîîse fariseuyamîꞌ moropai saduceuyamîꞌ yeseru pîꞌ eseurîma, mîrîrî tîwarî eꞌtî. Mîrîrî toꞌ yeseru wanî kîsereꞌna saꞌmotoꞌ fermento warantî.
12 Mîrîrî Jesus eseurîmatoꞌ epuꞌtîꞌpî inenupaꞌsanya. Maasa pra kîsereꞌna saꞌmotoꞌ pîꞌ eeseurîma pe pra epuꞌtîꞌpî toꞌya. Tîîse pemonkonyamîꞌ yenupatoꞌ fariseuyamîꞌya moropai saduceuyamîꞌya pîꞌ eeseurîma epuꞌtîꞌpî toꞌya. Toꞌ yeseru pîꞌ tîwarî tîwanîkonpa epuꞌtîꞌpî toꞌya.
Jesus Wanî Cristo Pe Taa Pedroya
13 Moropai Jesus wîtîꞌpî tiaron pata poro, iteseꞌ Cesaréia Filipe. Miarî teerepansaꞌkon pe tînenupaꞌsan ekaranmapoꞌpîiya: —Anîꞌ kaiꞌma uurî, kaꞌ poi iipîꞌpî pîꞌ pemonkonyamîꞌ wanî? —taꞌpîiya.
14 Inkamoroya yuukuꞌpî: —Tiaronkonya taa apîꞌ: “João Batista nurîꞌtî mîîkîrî”, taa toꞌya. Moropai tiaronkonya taa: “Penaroꞌ Paapa maimu ekaremeꞌnen profeta Elias nurîꞌtî mîîkîrî”, taa toꞌya —taꞌpî toꞌya. —Moropai tiaronkonya taa: “Penaroꞌ itekare ekaremeꞌnen profeta Jeremias nurîꞌtî mîîkîrî”, taa toꞌya. “Paapa maimu ekaremeꞌnenan nurîꞌsan yonpa pe awanî”, taa toꞌya —taꞌpî inenupaꞌsanya.
15 —Amîrîꞌnîkon kanan? Anîꞌ pe ukupî pîꞌ naatî? —taꞌpîiya.
16 Simão Pedroya yuukuꞌpî: —Amîrî Paapa nîmenkaꞌpî, Cristo. Ipatîkarî tîîkoꞌmansen Paapa munmu pe awanî —taꞌpî Pedroya.
17 Jesusya taꞌpî Pedro pîꞌ: —Mîrîrî taaya yeꞌnen, morî pe puꞌkuru awanî sîrîrî, Simão, João munmu —taꞌpî Jesusya ipîꞌ. —Maasa pra sîrîrî yairon epuꞌtîya manniꞌ wanî pepîn pemonkon winîpainon pe puꞌkuru. Tîîse uyun kaꞌ pon nîtîrîꞌpî pe awanî aapia —taꞌpî Jesusya Pedro pîꞌ.
18 Mîrîrî yeꞌnen Jesusya taꞌpî Pedro pîꞌ: —Tauya sîrîrî apîꞌ, amîrî Pedro saꞌman, tîꞌ warainon. Moropai sîrîrî tîꞌparappa pona usoosirî konekauya sîrîrî. Mîrîrîya upemonkonoyamîꞌ, usoosirî tawonkon ena pe man meruntî ke, tamîꞌnawîronkon yentai. Saꞌmantantoꞌ yentai toꞌ ena pe man, Makuiya toꞌ tarumaꞌtî tîîse —taꞌpî Jesusya.
19 —Sîrîrî meruntî ke uurî eꞌtoꞌ tîrîuya aapia. Îꞌ taayaꞌnîkon umaimu pe sîrîrî non po, mîrîrî pîꞌ inna taa Paapaya kaꞌ po —taꞌpîiya.
20 Mîrîrî taa tîpo, Jesusya taꞌpî tînenupaꞌsan pîꞌ: —Tîîse Paapa nîmenkaꞌpî pe uurî wanî kîsekaremeꞌtî anîꞌ pîꞌ —taꞌpî Jesusya tînenupaꞌsan pîꞌ.
Jesus Eseurîma Tîîsaꞌmanta Pîꞌ
Moropai Tîîweꞌmîꞌsaꞌka Pîꞌ
21 Moropai mîrîrî pata pai Jesus eseurîma piaꞌtîꞌpî tîîsaꞌmanta pîꞌ. Tînenupaꞌsan pîꞌ taꞌpîiya: —Uutî eꞌpai awanî sîrîrî Jerusalém pona moropai miarî Judeuyamîꞌ esanonya moropai teepîremasanon esanonya uyewanmarî kupî sîrîrî. Moropai Moisés nurîꞌtîya yenupantoꞌ pîꞌ yenupatonkonya nîrî uyewanmarî kupî sîrîrî. Inkamoroya utarumaꞌtî mararî pra. Inkamoroya uwî meꞌpo kupî sîrîrî. Tîîse uusaꞌmanta tîpo, iteseurîno weiyu yai eꞌmîꞌsaꞌka kupî sîrîrî —taꞌpîiya.
22 Mîrîrî taiya yeꞌnen, Pedroya Jesus yarîꞌpî tiaronkon koreꞌtapai tarakkîrî teeseurîmapa, imaimu yuwaꞌtîpa. Moropai taꞌpîiya ipîꞌ: —Uyepotorî, mîrîrî warantî eeseurîma eꞌpai pra man. Paapaya mîrîrî kupî eꞌpai pra man ayarakkîrî —taꞌpî Pedroya Jesus pîꞌ.
23 Jesus eraꞌtîꞌpî Pedro winîkîi. Moropai taꞌpîiya Pedro pîꞌ: —Uupiapai atarimakî, Makui. Uurî maꞌnîpa yuꞌse awanî mîrîrî. Paapa esenumenka warantî eesenumenka pra awanî mîrîrî. Tarî non po tîîkoꞌmansenon esenumenka warantî eesenumenka —taꞌpîiya.
24 Moropai Jesusya taꞌpî tînenupaꞌsan pîꞌ. Taꞌpîiya: —Uwanîyakon pe eꞌpai awanîkon ya, ayeserukon, ituꞌse aweꞌtoꞌkon mîrumakatîi moropai ituꞌse uurî eꞌtoꞌ kuꞌtî. Uwanîyakon pe eꞌpai awanîkon ya, eꞌtarumaꞌtîntoꞌ namapai pra eꞌtî. Moropai uwenairî maaiꞌtîi —taꞌpîiya.
25 —Tîîse anîꞌya tîîkoꞌmantoꞌ pînînma ya kureꞌne, tîweꞌtarumaꞌtî namaiya. Mîrîrî yeꞌnen Paapa pia ipatîkarî tîîkoꞌmantoꞌ ton eporîiya pepîn. Tîîse aminke aakoꞌmamî Paapa pîꞌ. Tîîse uwenai anîꞌya tîîkoꞌmantoꞌ pînînma pra awanî ya, tîweꞌtarumaꞌtîtoꞌ yapîtanîpîiya ya, ipatîkarî enen tîîkoꞌmantoꞌ ton eporîiya Paapa pia.
26 Tamîꞌnawîron sîrîrî non pon yemanne esaꞌ pe anîꞌ ena ya, tîîse ipatîkarî enen tîîkoꞌmantoꞌ ton eporîiya pra awanî ya, eporîiya kupî pepîn rî mîrîrî. Aasaꞌmanta yai tekaton yepeꞌ ton eporîiya pepîn. Aweꞌpîikaꞌtî pepîn.
27 Maasa pra uurî, kaꞌ poi iipîꞌpî iipî kupî sîrîrî Paapa meruntîri yarakkîrî, inserîyamîꞌ pokonpe. Moropai mîrîrî yai tamîꞌnawîronkon pia untîrî tîrîuya kupî sîrîrî toꞌ nîkupîꞌpî wenai.
28 Ayenkuꞌtîuyaꞌnîkon pepîn sîrîrî. Uurî, kaꞌ poi iipîꞌpî pemonkon pe wanî pe man tamîꞌnawîronkon esaꞌ pe. Mîrîrî eraꞌma amîrîꞌnîkon yonpayamîꞌya pe man tîîsaꞌmantakon rawîrî —taꞌpî Jesusya.
