Jesus Cristo Yekare Mateus Nîmenukaꞌpî 17:1-27
17 Tiwin miaꞌ pona tîîmoꞌtai wei tîpo, Jesus wîtîꞌpî kawînan wîꞌ pona tînenupaꞌsan yonpa pokonpe. Pedro wîtîꞌpî moropai Tiago moropai itakon João wîtîꞌpî ipokonpe.
2 Miarî Jesus yenpata etinyakaꞌmaꞌpî toꞌ rawîrî siꞌma. Inkeꞌ pe awanîꞌpî, wei warantî moropai ipon wanîꞌpî aimutun pe puꞌkuru, inkeꞌ pe apoꞌ yaꞌkaru warantî.
3 Mîrîrîya tiwinarî asakîꞌnankon warayoꞌkon, Moisés nurîꞌtî moropai Elias nurîꞌtî esenpoꞌpî toꞌ rawîrî. Moropai Jesus yarakkîrî toꞌ eseurîma eraꞌmaꞌpî toꞌya.
4 Mîrîrî yeꞌnen Pedroya taꞌpî Jesus pîꞌ: —Uyepotorî, morî pe puꞌkuru eꞌnî man tarî. Mîrîrî yeꞌnen ituꞌse awanî ya, eseurîwîꞌne kaisarî tappîi ton konekauya sîrîrî, tiwin amîrî ton moropai tiwin Elias ton moropai tiwin Moisés ton kaiꞌma —taꞌpîiya.
5 Mîrîrî warantî Pedro eseurîma koꞌmannîpî tanne, katupuru inkeꞌya toꞌ napontîꞌpî. Moropai mîrîrî koreꞌta Paapa eseurîmatoꞌ etaꞌpî toꞌya. Taꞌpî Paapaya: —Unmu mîserî uwakîri puꞌkuru ipîꞌ atausinpatoꞌ. Mîîkîrî unmu yuꞌsan uurî mararî pra. Mîîkîrîya îꞌ taatoꞌ etatî —taꞌpî Paapaya.
6 Paapa eseurîmatoꞌ eta tîuyaꞌnîkon pe, Jesus nenupaꞌsan enaꞌpî mararî pra eranneꞌ pe. Mîrîrîya toꞌ yenkasiꞌpannîpîꞌpî. Non pona tenpatakon erennukuꞌpî toꞌya.
7 Tîîse Jesus iipîꞌpî toꞌ pia moropai toꞌ yapîꞌpîiya. Taꞌpîiya toꞌ pîꞌ: —Eꞌmîꞌsaꞌkatî, eranneꞌ pe tîweꞌse pra eꞌtî —taꞌpîiya toꞌ pîꞌ.
8 Inkamoro kurantaꞌpî moropai tîwoiꞌnîkon eraꞌma tîuyaꞌnîkon ya, anîꞌ eraꞌma toꞌya pra awanîꞌpî, tîîse Jesus neken, tiwinsarî eraꞌmaꞌpî toꞌya.
9 Wîꞌ poi tawautîkon pe, Jesusya taꞌpî toꞌ pîꞌ: —Anîꞌ pîꞌ aneraꞌmaꞌpîkon kîsekaremeꞌtî —taꞌpîiya. Uusaꞌmanta tîpo, uurî, kaꞌ poi iipîꞌpî eꞌmîꞌsaꞌkasaꞌ tîpo ekaremekîkonpa.
10 Mîrîrî yeꞌnen inenupaꞌsanya Jesus ekaranmapoꞌpî: —Îꞌ waniꞌ kin awanî yeꞌnen Moisés nurîꞌtîya yenupantoꞌ pîꞌ yenupatonkonya taapîtî mîrîrî? “Eꞌmaiꞌ pe penaroꞌ Paapa maimu ekaremeꞌnen Elias nurîꞌtî iipî pe man. Moropai mîrîrî tîpo Paapa narimaꞌpî Cristo iipî”, taa toꞌya —taꞌpî toꞌya ipîꞌ.
11 Jesusya yuukuꞌpî: —Inna, seruꞌ pepîn Elias nurîꞌtî warainon iiꞌsaꞌ man tamîꞌnawîron konekai Paapa maimu yawîrî.
12 Aaipîꞌpî tîîse tarîronkonya epuꞌtî pra awanîꞌpî. Tîîse itarumaꞌtîꞌpî toꞌya ituꞌse tîwanîkon pîkîrî. Mîrîrî warantî nîrî uurî kaꞌ poi iipîꞌpî tarumaꞌtî inkamoro rî pemonkonyamîꞌya.
13 Mîrîrî warantî Jesus eseurîma yeꞌnen, inenupaꞌsanya imaimu epuꞌtî tuꞌkaꞌpî. João Batista yekare pîꞌ eeseurîma kaiꞌma toꞌ wanîꞌpî.
Jesusya Maasaron Warayoꞌ Yepiꞌtî
14 Arinîkon pemonkonyamîꞌ pia toꞌ erepansaꞌ ya, warayoꞌ iipîꞌpî Jesus pia. Moropai irawîrî aweꞌsekunkaꞌpî.
15 Mîîkîrîya taꞌpî Jesus pîꞌ: —Uyepotorî, unmu saꞌne aꞌnokoꞌpî pe eraꞌmakî. Oꞌmaꞌ ewonsaꞌ man mîîkîrî yaꞌ. Moropai yeporîiya ya, non pona yenumîiya moropai inta arakkunta. Tuꞌke iteꞌka apoꞌ yaꞌ imasaiꞌya man. Moropai tuna ka yenunsaiꞌya man.
16 Mîîkîrî enepîꞌpîuya anenupaꞌsanya yepiꞌtîtoꞌpe kaiꞌma. Tîîse yepiꞌtî toꞌya eserîke pra toꞌ wanîꞌpî —taꞌpîiya ipîꞌ.
17 Jesusya warayoꞌ maimu yuukuꞌpî: —Amîrîꞌnîkon, sîrîrîpankonya ukupî pra awanî innape. Imakuiꞌsan amîrîꞌnîkon. Îꞌ pîkîrî ayapîtanîpîuyaꞌnîkon eꞌpai awanî? Îꞌ pîkîrî amîrîꞌnîkon yarakkîrî uukoꞌmamî sîrîrî? —taꞌpî Jesusya. Moropai taꞌpîiya: —Mîîkîrî warayoꞌ maasaron eneꞌtî uupia —taꞌpîiya.
18 Mîîkîrî epaꞌkatoꞌpe taꞌpî Jesusya. Moropai oꞌmaꞌ epaꞌkaꞌpî mîîkîrî warayoꞌ yapai mîrîrî pe rî. Mîrîrî yeꞌnen eesepiꞌtîsaꞌ wanîꞌpî.
19 Mîrîrî kuꞌsaꞌ Jesusya tîpo, inenupaꞌsan erepamîꞌpî Jesus pia tiwinsarî tîîse. Ekaranmapoꞌpî toꞌya: —Îꞌ waniꞌ awanî yeꞌnen oꞌmaꞌ tîrîka annaya eserîke pra awanî mîrîrî? —taꞌpî toꞌya Jesus pîꞌ.
20 Moropai Jesusya taꞌpî toꞌ pîꞌ: —Maasa pra innape ukupîyaꞌnîkon pra awanîkon yeꞌnen. Aꞌkî, innape ikupîyaꞌnîkon ya, tîwîrî siꞌmîrikkî pe mîrikkî innape ikuꞌtoꞌyaꞌnîkon tîîse, manniꞌ mostarda yenaꞌpî warantî tîîse, taayaꞌnîkon ya seeniꞌ wîꞌ pîꞌ: “Seeniꞌ patapai emoꞌkakî moropai atîkî” taayaꞌnîkon ya, moropai amaimukon pe mîrîrî wîtî eꞌpainon. Mîrîrî warantî ikupîyaꞌnîkon ya, tamîꞌnawîron mîrîrî yeꞌka kupîya eꞌpainon, innape ikupîyaꞌnîkon ya —taꞌpî Jesusya. [
21 —Tîîse mîîkîrî oꞌmaꞌ yarakkîrî tîweꞌsen yepiꞌtîyaꞌnîkon eꞌpainon eepîremakon yeꞌka pe, ayekkarikon tonpai pra tîîse. Mîrîrî warantî neken mîserî oꞌmaꞌ warainon yenpaꞌkayaꞌnîkon eꞌpainon —taꞌpî Jesusya toꞌ pîꞌ.]
Jesus Eseurîma Inîꞌrî Tîîsaꞌmanta Pîꞌ
Moropai Tîweꞌmîꞌsaꞌka Pîꞌ
22 Tînenupaꞌsan pokonpe teemurukuntîi Galiléia po, Jesusya taꞌpî toꞌ pîꞌ: —Uurî kaꞌ poi iipîꞌpî rumaka tiaronkonya kupî sîrîrî uyeyatonon yenyaꞌ.
23 Moropai inkamoroya uyapisî kupî sîrîrî. Moropai uwî toꞌya kupî sîrîrî. Tîîse uwîsaꞌ toꞌya tîpo, iteseurîno weiyu yai eꞌmîꞌsaꞌka kupî sîrîrî —taꞌpîiya.
Moropai mîrîrî taa Jesusya eta tîuyaꞌnîkon pîꞌ, inenupaꞌsan esewankonoꞌmasaꞌ wanîꞌpî mararî pra.
Jesus Eseurîma Tîniru Toꞌ Neꞌma Pîꞌ
24 Cafarnaum cidaderî po Jesus erepansaꞌ tanne tînenupaꞌsan pokonpe, toꞌ epîrematoꞌ yewîꞌ ta tîniru yapisî pîꞌ teesenyakaꞌmasanon wîtîꞌpî Pedro pia. Inkamoroya Pedro ekaranmapoꞌpî: —Amîrîꞌnîkon yenupanenya tîniru tîrî pepîn anna pia? —taꞌpîiya.
25 —Inna, ayeꞌmaiyaꞌnîkon —taꞌpî Pedroya. Mîrîrî taasaꞌ toꞌya tîpo, Pedro ewomîꞌpî wîttî ta, Jesus eꞌtoꞌ ta. Moropai Jesus eseurîmaꞌpî eꞌmaiꞌ pe Pedro eseurîma pra tîîse. Taꞌpîiya: —Îꞌ kaiꞌma esenumenkan pîꞌ nan, Pedro? Anîꞌkanya yeꞌma eꞌpainon manniꞌkan ipîkkukon pata esanon esanon reiyamîꞌ pia tarîronkonya tiaron pata ponkonya kaꞌrî?
26 —Tiaron pata ponkonya yeꞌma —taꞌpî Pedroya. —Inna —taꞌpî Jesusya. —Tîîse tarî tîîkoꞌmansenonya yeꞌma pepîn eꞌpainon maasa pra toꞌ yonpayamîꞌ pe toꞌ wanî yeꞌnen —taꞌpî Jesusya.
27 —Tîîse yeꞌma pra awanî ya, yeꞌma annaya pepîn taa toꞌya namai yeꞌmapai man —taꞌpî Jesusya. —Mîrîrî yeꞌnen konoiꞌ pîꞌ atîkî ikuꞌpî ka. Eꞌmaiꞌnon moroꞌ yeuꞌkasaꞌya ya, mîîkîrî mata yaꞌ tîniru enaꞌpî eporîya. Mîrîrî eꞌtoꞌpe uurî tonpe moropai amîrî tonpe, teepîremasanon pia untîrîkon pe —taꞌpî Jesusya.
