Jesus Cristo Yekare Mateus Nîmenukaꞌpî 18:1-35
18 Moropai mîrîrî yai inenupaꞌsanya Jesus ekaranmapoꞌpî. —Anîꞌ wanî eꞌpainon ipîkku pe panpîꞌ anna koreꞌta, Paapa pemonkonoyamîꞌ? —taꞌpî toꞌya.
2 Mîrîrî taa toꞌya yeꞌnen, toꞌ rawîrî siꞌma Jesusya more yannoꞌpî tîîpia. Moropai mîîkîrî tîrîꞌpîiya toꞌ rawîrî.
3 Moropai taꞌpîiya: —Ayenkuꞌtîuyaꞌnîkon pepîn, yairî tauya sîrîrî. Tiaron pe eesenumenkakon pra awanîkon ya, moropai tiaronkon maꞌre eꞌpai pra awanîkon ya, mîserî more warantî, Paapa wanî pepîn ayesaꞌkon pe, ipemonkono pe awanîkon pepîn.
4 Mîrîrî yeꞌnen anîꞌ wanî ya tiaronkon maꞌre eꞌpai, mîserî more warantî, mîîkîrî wanî ipîkku pe panpîꞌ Paapa pemonkonoyamîꞌ koreꞌta.
5 Moropai anîꞌya mîserî more warainon yapisî ya tîwakîri pe, uyapurî tîuya yeꞌnen, mîrîrî warantî uurî nîrî yapisîiya tîwakîri pe more yapisî tîuya manniꞌ warantî —taꞌpî Jesusya tînenupaꞌsan pîꞌ.
Nariꞌ Pe Imakuiꞌpî Wanî
6 —Tîîse anîꞌya innape ukuꞌnenan moreyamîꞌ koreꞌta tiwinan toꞌ yonpa yenupa ya imakuiꞌpî kuꞌtoꞌpeiya, mîîkîrî imakuiꞌpî kupîiya emapuꞌtîtîpon tarumaꞌtî Paapaya mararî pra. Morî pe panpîꞌ awanî eꞌpainon, mîîkîrî pîmî pîꞌ kureꞌnan aꞌ pe ikonekasaꞌ tîꞌ yewaꞌtî toꞌya ya, moropai mîîkîrî yenumî toꞌya ya iren kaꞌ. Maasa pra mîrîrî yentai itarumaꞌtî Paapaya imakuiꞌpî kupî tiaronya emapuꞌtîsaiꞌya ya.
7 Aka, tîwarî eꞌtî, tamîꞌnawîronkon pemonkonyamîꞌ sîrîrî pata po tîîkoꞌmansenon. Maasa pra imakuiꞌpî kupî toꞌya emapuꞌtîsanon moro awanî. Mîrîrî eꞌkupî eꞌpai awanî, tîîse manniꞌ tiaronya imakuiꞌpî kupî emapuꞌtînen, mîîkîrî tarumaꞌtî Paapaya pe man mararî pra —taꞌpî Jesusya.
8 —Aꞌkî, imakuiꞌpî kupîya emapuꞌtî ayenya ya, mîrîrî yaꞌtîkî. Moropai aꞌpuya nîrî imakuiꞌpî kupîya emapuꞌtî ya, mîrîrî yaꞌtîkî moropai yenunkî imakuiꞌpî kupîya namai. Morî pe awanî maꞌtîkîꞌ siꞌma enen aakoꞌmantoꞌ ton eporîya ya, morî pe eꞌtoꞌ yawîrî siꞌma apoꞌ yaꞌ ayenumî Paapaya yentai, manniꞌ apoꞌ îꞌ pensa eesiꞌnîpî ton pepîn yaꞌ.
9 Moropai ayenuya imakuiꞌpî kupîya emapuꞌtî ya, mîrîrî ayenu ratai moꞌkakî moropai mîrîrî yenunkî poro pona imakuiꞌpî kupîya namai. Maasa pra morî pe awanî, taiken ayenu tîîse, aakoꞌmantoꞌ ton eporîya ya, saꞌnîrî tîîse apoꞌ yaꞌ ayenumî Paapaya yentai —taꞌpî Jesusya.
Carneiro Atakaꞌmaꞌpî Yekare
10 —Mîrîrî yeꞌnen, aka tîwarî eꞌtî manniꞌkan moreyamîꞌ innape ukuꞌnenan kupîyaꞌnîkon namai ayewanmakon pe. Maasa pra tauya sîrîrî apîꞌnîkon, inkamoro koꞌmannîꞌnenankon pe inserîyamîꞌ wanî aminke pra Paapa pia, îꞌ eꞌkupî toꞌ yarakkîrî ekaremeꞌnenan pe. [
11 Moropai uurî, kaꞌ poi iipîꞌpî sîrîrî non pona atakaꞌmaꞌsan pîikaꞌtîi —taꞌpî Jesusya.]
12 Jesusya toꞌ nepuꞌtî ton ekaremekîꞌpî. Taꞌpîiya: —Îꞌ kaiꞌma eesenumenkakon eꞌpainon. Warayoꞌ wanî ya 100 kaisarî carneiroyamîꞌ esaꞌ pe tîweꞌse, tîîse inkamoro yonpa esepuꞌtî pra awanî ya tiwin, îꞌ kupîiya eꞌpainon? Tîwî inkamoro 99 kaisaronkon nîmîiya tekkarikon yonpa toꞌya tanne. Moropai attî eeseraꞌma pra awanî manniꞌ yuwai, innape nai? —taꞌpî Jesusya.
13 —Moropai tauya mîîkîrî eposaiꞌya ya, kureꞌne aatausinpa. Inkamoro 99 kaisaronkon pîꞌ aatausinpa yentai.
14 Mîrîrî warantî nîrî Paapa ayunkon kaꞌ pon wanî tiwin mîrikkî more, tîpemonkonoyamîꞌ yonpa atakaꞌma yuꞌse pra, imakuiꞌpî yaꞌ attî namai —taꞌpî Jesusya.
Uyonpakonya Imakuiꞌpî Kuꞌsaꞌ Ya
15 Moropai taꞌpîiya: —Ayonpaya imakuiꞌpî kuꞌsaꞌ ya awinîkîi, iipia atîkî imakuiꞌpî inkupîꞌpî konekata yarakkîrî. “Yairî pra aweꞌsaꞌ nai, uyonpa”, kaꞌta ipîꞌ. Tîîse mîrîrî konekakî saꞌnîrî siꞌma neken amîrîꞌnîkon, tiaronkon koreꞌta pra siꞌma. Morî pe tîpanamatoꞌya eta ayonpaya ya, morî pe awanî, maasa pra ipîikaꞌtîya yeꞌnen mîrîrî winîpai.
16 Tîîse tîpanamatoꞌya anetapai pra awanî ya, tiwin asakîꞌnankon innape Jesus kuꞌnenan yaakî ayarakkîrî. Paapa maimu eꞌmenukasaꞌ manniꞌ yawîrî awanîkonpa. Maasa pra see warantî aweꞌmenukasaꞌ man:Asakîꞌne eseurîwîꞌne etatonkon eꞌpai awanî innape yairî eseurîmannîꞌpî eꞌtoꞌpe,
taasaiꞌya man.
17 Tîîse toꞌ maimu anetapai pra awanî ya, tamîꞌnawîronkon innape Jesus kuꞌnenan soosi tawonkon pîꞌ ekaremeꞌtî. Mîrîrî warantî tîîse toꞌ maimu anetapai pra wanî ya, mîîkîrî pîꞌ eꞌtî Paapa epuꞌnen pepîn pîꞌ awanîkon warantî ikuꞌtî, imakuiꞌpî pe tîweꞌsen warantî ikuꞌtî —taꞌpî Jesusya.
18 —Yairî tauya sîrîrî apîꞌnîkon, mîrîrî amaimukon pîꞌ inna taa Paapaya. Moropai amaimukon anetapainon yapisîyaꞌnîkon ya inîꞌrî ayonpa pe mîrîrî amaimukon pîꞌ inna taa Paapaya nîrî.
19 Moropai inîꞌrî tauya apîꞌnîkon îꞌ rî anesatîkon asakîꞌne siꞌma esatîyaꞌnîkon ya, Paapa pîꞌ eepîrematoꞌkon ke, tamîꞌnawîrî mîrîrî eta Paapaya. Mîrîrî yeꞌnen itîrî uyun kaꞌ ponya aapiaꞌnîkon.
20 Maasa pra oꞌnon pata siꞌma uyapurînenan emurukuntîsaꞌ wanî ya, asakîꞌnankonya eseurîwîꞌnankonya uyapurî ya uyeseꞌ pîꞌ inkamoro koreꞌta uurî koꞌmamî —taꞌpî Jesusya.
Imakuiꞌpî Ipoitîrî
21 Moropai Pedro wîtîꞌpî Jesus pia. Moropai taꞌpîiya Jesus pîꞌ: —Uyepotorî, îꞌ warapo iteꞌka uyonpa nîkupîꞌpî imakuiꞌpî uwinîkîi kuꞌtoꞌpeuya uuwanmîra? Îꞌ waniꞌ pra man taatoꞌpeuya ipîꞌ? —taꞌpî Pedroya. —Asakîꞌne miaꞌ pona tîîmoꞌtai iteꞌka kaꞌrî tauya eꞌpainon?
22 Jesusya yuukuꞌpî: —Asakîꞌne miaꞌ pona tîîmoꞌtai kaisarî tauya pepîn. Tîîse tuꞌke iteꞌka kaꞌkî, 77 kaisarî kaꞌkî —taꞌpî Jesusya ipîꞌ.
23 —Maasa pra mîrîrî warantî pemonkonyamîꞌ esaꞌ pe tîweꞌsen Paapaya ikupî tîpemonkonoyamîꞌ yarakkîrî. Awanî Reiya epeꞌmîra toꞌ eꞌtoꞌ eraꞌma warantî —taꞌpîiya.
24 —Mîrîrî kupî piaꞌtî toꞌ yepuruya epeꞌmîra tîweꞌsanon pîꞌ. Tiaronkon pemonkonyamîꞌya tiwin ipoitîrî enepîꞌpî iipia. Mîîkîrî ipoitîrî wanîꞌpî tepuru pia mararî pra epeꞌmîra 400 milhão kaisarî.
25 Tîîse mîrîrî epeꞌmîra tîweꞌtoꞌ yeꞌmaiya eserîke pra ipoitîrî wanîꞌpî. Mîrîrî yeꞌnen taꞌpî itepuruya surarayamîꞌ pîꞌ: “Mîserî warayoꞌ ke eꞌrepatî. Moropai inoꞌpî ke moropai inmukuyamîꞌ ke. Moropai tamîꞌnawîrî itewîꞌ ta tîꞌweꞌsen itemanne ke eꞌrepatî mîrîrî yepeꞌpî ke epeꞌmîra aweꞌtoꞌ yeꞌmakonpa”, taꞌpîiya.
26 Mîrîrî taiya yeꞌnen, mîîkîrî ipoitîrî eꞌsekunkaꞌpî irawîrî. Moropai taꞌpîiya tepuru pîꞌ: “Uyepuru, maasa yeꞌmauya nîmîꞌpai man. Ayeꞌmauya pra wanî pepîn tîîse ayeꞌmauya tamîꞌnawîrî” taꞌpî ipoitîrîya.
27 Mîrîrî taiya yeꞌnen, mîîkîrî tîpoitîrî eraꞌmaꞌpî itepuruya tîꞌnokoꞌpî pe saꞌne. Mîrîrî yeꞌnen taꞌpîiya tîpoitîrî pîꞌ: “Îꞌ waniꞌ pra man, tîwî natîpamîi uurî kîseꞌmai”, taꞌpîiya ipîꞌ. Moropai attîtoꞌpe taꞌpî itepuruya tîîpiapai.
28 Tîkaraiwarî piapai tuutî pe, tiaron warayoꞌ, tepuru pia esenyakaꞌmaꞌpî eporîꞌpîiya. Mîîkîrî saꞌne wanîꞌpî iipia itarumaiꞌpî pe. Mîîkîrî wanîꞌpî mararî epeꞌmîra iipia 300 kaisarî. Mîîkîrî saꞌne yapisîꞌpîiya iꞌmî pîꞌ yapisîꞌpîiya. Moropai taꞌpîiya ipîꞌ: “Uupia epeꞌmîra aweꞌtoꞌ yeꞌmakî tarîpai”, taꞌpîiya ipîꞌ.
29 Mîrîrî taiya yeꞌnen, mîîkîrî saꞌne eꞌsekunkaꞌpî irawîrî. Moropai taꞌpîiya mîîkîrî pîꞌ: “Maasa ayeꞌmauya nîmîꞌpai man. Yeꞌmatoꞌ ton eposauꞌya. Ayeꞌmauya pra wanî pepîn tamîꞌnawîrî ayeꞌmauya” taꞌpîiya.
30 Tîîse, inna îꞌ waniꞌ pra man, taiya pra mîîkîrî iipia epeꞌmîra aweꞌtoꞌ wanîꞌpî. Mîrîrî yeꞌnen mîîkîrî yarîꞌpîiya amaꞌyeꞌkon atarakkantoꞌ yewîꞌ ta. Miarî yarakkamo yeꞌka pe taꞌpîiya: “Tarî akoꞌmankî uupia epeꞌmîra aweꞌtoꞌ yeꞌmaya pîkîrî”, taꞌpîiya ipîꞌ.
31 Tîîse mîrîrî warantî mîîkîrîya ikupî eraꞌmaꞌpî tiaronkon itepuru poitîrîtononya. Inkamoro enaꞌpî yairî maꞌre mararî pra, mîrîrî eraꞌma tîuyaꞌnîkon yeꞌnen. Tarîpai mîrîrî ekaremeꞌse toꞌ erepamîꞌpî tepurukon pia. Moropai mîrîrî ekaremekîꞌpî toꞌya ipîꞌ.
32 Moropai itepuruya mîîkîrî tîpoitîrî eꞌmaiꞌnon yanno meꞌpoꞌpî aaiꞌtoꞌpe tîîpia. Mîîkîrî pîꞌ taꞌpî itepuruya: “Amîrî imakuiꞌpî. Teuren uupia epeꞌmîra aweꞌtoꞌ pîꞌ îꞌ waniꞌ pra man moriya, taasauꞌya tanne, esatîya yeꞌnen.
33 Tîîse îꞌ waniꞌ awanî yeꞌnen tiaron upoitîrî eraꞌmaya pepîn aꞌnokoꞌpî pe, uurîya uꞌnokoꞌpî pe ayeraꞌmaꞌpî warantî?” taꞌpî itepuruya ipîꞌ.
34 Mîrîrî yai mîîkîrî pîꞌ itepuru ekoreꞌmaꞌpî mararî pra. Mîrîrî yeꞌnen mîîkîrî tîpoitîrî rumakaꞌpîiya surarayamîꞌya yarakkamotoꞌpe atarakkannîtoꞌ yewîꞌ ta. Mîrîrî warantî aweꞌtarumaꞌtîꞌpî tamîꞌnawîrî epeꞌmîra tîweꞌtoꞌ yeꞌma tîuya pîkîrî.
35 Sîrîrî warantî uyun kaꞌ po manniꞌya ikupî kupî sîrîrî tiwin pîꞌ amîrîꞌnîkon yarakkîrî, awinîkîiꞌnîkon imakuiꞌpî ayonpakon nîkupîꞌpî kuꞌsaꞌyaꞌnîkon pra awanîkon ya, aawanmîraꞌnîkon —taꞌpî Jesusya toꞌ pîꞌ.
