Jesus Cristo Yekare Mateus Nîmenukaꞌpî 21:1-46
21 Jerusalém pona tuutîkon pe, aminke pra rî tîîse toꞌ erepamîꞌpî pemonkonyamîꞌ koꞌmantoꞌ pata iteseꞌ Betfagé pona, Oliveira kîrî po tîweꞌsen pona. Miarîpai Jesusya asakîꞌne tînenupaꞌsan yaipontîꞌpî eꞌmaiꞌ pe tîrawîrî toꞌ wîtîtoꞌpe.
2 Taꞌpîiya toꞌ pîꞌ: —Atîtî mîrîrî pata pona eꞌmaiꞌ pe. Moropai miarî eerepansaꞌkon pe jumenta eporîyaꞌnîkon mîîtî ewaꞌtîsaꞌ pe tînre kenan. Mîîkîrî meukatîi, moropai toꞌ meneꞌtîi saꞌnîrî —taꞌpîiya.
3 —Anîꞌya taa ya: “Îꞌ tonpe mîîkîrî yarîyaꞌnîkon mîrîrî”, taa toꞌya ya, “Uyepotorîkon man ituꞌse”, makatîi ipîꞌ. Mîrîrî warantî taayaꞌnîkon ya, irumakaiya toꞌ enepîkonpa —taꞌpîiya.
4 Mîrîrî warantî aweꞌkupîꞌpî maasa pra penaroꞌ Paapa maimu ekaremeꞌnen profeta nurîꞌtîya imenukaꞌpî yawîrî aweꞌtoꞌpe.
5 Taꞌpîiya see warantî:Makatîi Jerusalém ponkon pîꞌ Paapa pemonkonoyamîꞌ pîꞌ:“Aꞌkî ayesaꞌkon iipî pe manjumenta more pona teenuꞌse.Eranmîra eerepamî pe man” makatîi toꞌ pîꞌ.
Mîrîrî warantî penaroꞌ Paapa maimu ekaremeꞌnenya imenukaꞌpî.
6 Moropai Jesus nenupaꞌsan wîtîꞌpî eꞌmaiꞌ pe. Moropai inkamoroya îꞌ kaiꞌma taꞌpî Jesusya yawîrî ikupîꞌpî toꞌya.
7 Inkamoroya jumenta enepîꞌpî inre yarakkîrî. Inkamoroya taꞌsankon tîrîꞌpî ipona. Moropai Jesus enukuꞌpî ipona.
8 Mîîkîrî iipî eraꞌma tîuyaꞌnîkon yeꞌnen, arinîkon pemonkonyamîꞌya taꞌsankon yarenkaꞌpî non pona, iporo Jesus wîtîtoꞌpe kaiꞌma. Moropai tiaronkonya yuꞌ yare sorokaꞌpî eꞌma ta, irawîrî.
9 Yarakkîrî tuutîsanon entaimepîtîꞌpî irawîrî siꞌma, moropai iteꞌmaꞌpî pîꞌ siꞌma mararî pra:—Yapurîpaiꞌnîkon man Davi parîꞌpî pe tîweꞌsen.Morî pe puꞌkuru man, aaipîꞌpî manniꞌ Uyepotorîkon maimu pe —taꞌpî toꞌya tîwentaimepîꞌse.—Paapa kaꞌ pon manniꞌ yapurîpaiꞌnîkon man —taa pîꞌ toꞌ koꞌmamîꞌpî.
10 Jesus ewonsaꞌ pe cidade pona, tamîꞌnawîronkon pemonkonyamîꞌ wanîꞌpî tataimurunpai mararî pra. Moropai ekaranmapoꞌpî toꞌya: —Anîꞌ pe see mîîkîrî wanî mîrîrî? —taꞌpî toꞌya.
11 Mîrîrî taa toꞌya yuukuꞌpî arinîkonya: —Manniꞌ Paapa maimu ekaremeꞌnen profeta Jesus, Galiléia pata pon, Nazaré poinon —taꞌpî toꞌya.
Jesus Wanî Epîremantoꞌ Yewîꞌ Ta
12 Miarî Jerusalém po, epîremantoꞌ yewîꞌ ta teewomî pe, Jesusya pemonkonyamîꞌ eporîꞌpî. Carneiroyamîꞌ ke moropai paakayamîꞌ ke, wakuꞌkaimîyamîꞌ ke tîweꞌrepasanon eporîꞌpîiya. Inkamoro yenpaꞌkaꞌpîiya teekoreꞌmai. Tamîꞌnawîrî inkamoro eꞌrepa yaponseꞌkon raꞌtîꞌpîiya. Toꞌ tînirurî yenseꞌ raꞌtîꞌpîiya non pona tîsorokai.
13 Moropai taꞌpîiya toꞌ pîꞌ: —Paapa maimu eꞌmenukasaꞌya taasaꞌ man see warantî. Paapaya taꞌpî:“Uyewîꞌ wanî pe man epîremantoꞌ yewîꞌ pe. Tîîse amîrîꞌnîkonya uyewîꞌ kuꞌsaꞌ amaꞌyeꞌkon yewîꞌ pe”,
taꞌpî Paapaya —taꞌpî Jesusya.
14 Mîrîrî yai enkaruꞌnankon moropai maꞌtîkîꞌpankon yarîꞌpî toꞌya iipia, epîremantoꞌ yewîꞌ ta toꞌ esepiꞌtîtoꞌpe. Inkamoro yepiꞌtîꞌpîiya.
15 Tîîse mîrîrî ikupî eserîkan pepîn kupî Jesusya eraꞌma tîuyaꞌnîkon pîꞌ teepîremasanon esanon moropai Moisés nurîꞌtîya yenupantoꞌ pîꞌ yenupatonkon ekoreꞌmaꞌpî. Moropai epîremantoꞌ yewîꞌ ta moreyamîꞌya Paapa yapurîꞌpî tîwentaimepîꞌse. —Morî puꞌkuru Paapa nîmenkaꞌpî, Davi nurîꞌtî paarîꞌpî man yapurîtoꞌpe —taꞌpî toꞌya Jesus pîꞌ. Mîrîrî pîꞌ toꞌ ekoreꞌmaꞌpî mararî pra.
16 Moropai Jesus pîꞌ taꞌpî toꞌya: —Îꞌ taa toꞌya eta pîꞌ nan? —taꞌpî toꞌya. Yuukuꞌpî Jesusya: —Innape awanî —taꞌpîiya. —Îꞌ taasaꞌ Paapa maimuya epuꞌtîyaꞌnîkon pra kin naatî? Taꞌpî Paapa maimu ekaremeꞌnenya:Insanan moreyamîꞌ yenupaꞌpî Paapayatapurîtoꞌpe toꞌya morî pe puꞌkuru eꞌtoꞌ yawîrî
taasaiꞌya man —taꞌpî Jesusya.
17 Taa tîpo Jesusya toꞌ nîmîꞌpî. Eepaꞌkaꞌpî toꞌ pata cidade poi. Moropai attîꞌpî pemonkonyamîꞌ koꞌmantoꞌ Betânia pona attîꞌpî. Moropai miarî eewaronpamîꞌpî moropai eerenmapîꞌpî.
Jesusya Figo Yeꞌ Paꞌnîpî
18 Tiaron wei yai, penane puꞌkuru cidade Jerusalém pona tîwennaꞌpo pe, Jesus wanîꞌpî emiꞌne.
19 Mîîkîrîya yei, figo yeꞌ eraꞌmaꞌpî eꞌma ena po. Moropai mîîkîrî wîtîꞌpî itekare pîꞌ iteperu moro wanî kaiꞌma. Tîîse iteperu eporîiya pra Jesus wanîꞌpî tîîse yare pe neken awanîꞌpî. Mîrîrî yeꞌnen Jesusya taꞌpî figo yeꞌ pîꞌ: —Ipatîkarî teepetai pra aakoꞌmamî tarîpai —taꞌpîiya. Moropai tiwinarî aawaꞌpiꞌtaꞌpî.
20 Mîrîrî eraꞌmaꞌpî inenupaꞌsanya. Mîrîrî kureꞌne teesenumenkai toꞌ wanîꞌpî, mîrîrî taasaꞌ Jesusya pîꞌ. Moropai inkamoroya taꞌpî: —Îꞌ kaiꞌma see aawaꞌpiꞌta mîrîrî kaꞌneꞌ pe? —taꞌpî toꞌya.
21 Mîrîrî taa toꞌya yeꞌnen, Jesusya taꞌpî: —Ayenkuꞌtîuyaꞌnîkon pepîn. Yairî tauya sîrîrî. Innape puꞌkuru Paapa kuꞌtoꞌyaꞌnîkon wanî ya yairî, mîîkîrî tîmuꞌtunpai pra, mîrîrî yei figo yeꞌ pîꞌ ikuꞌsauꞌya manniꞌ warantî nîrî ikupîyaꞌnîkon eꞌpainon, innape ikuꞌtoꞌyaꞌnîkon wenai. Mîrîrî neken figo yeꞌ pîꞌ ikupîyaꞌnîkon pepîn, tîîse seeniꞌ wîꞌ pîꞌ taayaꞌnîkon ya: “Seeniꞌ apataꞌseꞌ yapai amoꞌtakî, atîkî tuna ka”, taayaꞌnîkon ya, moropai “Esenunkî”, taayaꞌnîkon ya, innape ikuꞌtoꞌyaꞌnîkon wenai, mîrîrî eꞌkupî eꞌpainon —taꞌpî Jesusya.
22 —Innape puꞌkuru Paapa kupîiꞌma esatîyaꞌnîkon ya, eepîremakon pe anesatîkon yapisîyaꞌnîkon —taꞌpî Jesusya.
Anîꞌ Maimu Pe Jesusya Ikupî
23 Mîrîrî tîpo Jesus ennaꞌpoꞌpî Jerusalém pona. Miarî epîremantoꞌ yewîꞌ ta siꞌma, pemonkonyamîꞌ yenupaiya tanne, teepîremasanon esanon, moropai Judeuyamîꞌ esanon erepamîꞌpî iipia. Moropai inkamoroya ekaranmapoꞌpî: —Anîꞌ maimu pe see koꞌmanpara manniꞌkan yenpaꞌkaꞌpîya mîrîrî? Anîꞌya ikupîpa taasaꞌ mîrîrî apîꞌ? —taꞌpî toꞌya.
24 Inkamoro maimu yuukuꞌpî Jesusya: —Uurî nîrî amîrîꞌnîkon ekaranmapouya sîrîrî. Yairî ayekaranmapotoꞌkonuya yuukuyaꞌnîkon ya, uurî nîrî anîꞌ maimu pe sîrîrî yeꞌka unkupî ekaremekîuya apîꞌnîkon —taꞌpîiya.
25 —Tarîpai yuꞌtî. Anîꞌ maimu pe kin Joãoya tamîꞌnawîronkon yenpatakonaꞌpî? Paapa maimu pe kaꞌrî, pemonkonyamîꞌ maimu pe kaꞌrî? Oꞌnon yeꞌka pe epuꞌtî pîꞌ naatî?
Mîrîrî taiya yeꞌnen toꞌ eseurîmaꞌpî tîîwarîrîꞌnîkon. —Inna Paapa maimu pe taasaꞌ ya, uurîꞌnîkon ekaranmapoiya eserîke awanî. “Tîîse îꞌ tonpe innape João Batista nurîꞌtî kupîyaꞌnîkon pra awanîkon?” taiya eserîke awanî —taꞌpî toꞌya.
26 —Moropai pemonkon maimu pe taasaꞌ ya, arinîkon pemonkonyamîꞌya uurîꞌnîkon tarumaꞌtî eserîke awanî. Maasa pra inkamoroya João Batista nurîꞌtî epuꞌtîꞌpî, Paapa maimu ekaremeꞌnen pe awanî epuꞌtîꞌpî mîîtoꞌpe.
27 Mîrîrî yeꞌnen inkamoroya Jesus maimu yuukuꞌpî: —Epuꞌtî annaya pra man —taꞌpî toꞌya. —Uurî nîrî anîꞌ maimu pe seeniꞌ yeꞌka kupîuya ekaremekîuya pepîn —taꞌpî Jesusya.
Jesusya Asakîꞌnankon Inmukuyamîꞌ
Yekare Ekaremekî
28 Jesusya tiaron panton ekaremekîꞌpî. Taꞌpîiya: —Îꞌ yeꞌka pe sîrîrî pîꞌ eesenumenkakon eserîke awanî? Warayoꞌ wanîꞌpî asakîꞌnankon inmukuyamîꞌ. Mîîkîrîya taꞌpî tînmu irui pîꞌ: “Unmu, sîrîrîpe umî yaꞌ uva yeꞌkanaꞌ esenyakaꞌmai attî yuꞌse wanî sîrîrî”, taꞌpîiya.
29 Tîîse mîîkîrîya tîyun maimu yuukuꞌpî. “Itîîpai pra wai”, taꞌpîiya. Tîîse mîrîrî tîpo awenpenataꞌpî moropai attîꞌpî.
30 Moropai itakon pîꞌ taꞌpî itunya irui pîꞌ taꞌpî tîuya warantî: “Inna, paapa, uutî”, taꞌpîiya tîyun pîꞌ. Tîîse attî pra awanîꞌpî.
31 Oꞌnon yeꞌka inmuya ituꞌse tîyun eꞌtoꞌ yawîrî ikupîꞌpî? —taꞌpî Jesusya. Moropai inkamoroya imaimu yuukuꞌpî: —Manniꞌ iruiya ikupîꞌpî —taꞌpî toꞌya.
Mîrîrî pîꞌ taꞌpî Jesusya: —Ayenkuꞌtîuyaꞌnîkon pepîn. Manniꞌkan tesanonkon pia toꞌ nîtîrî tîniru yapisî pîꞌ teesenyakaꞌmasanon, moropai manniꞌkan wîriꞌsanyamîꞌ tesaꞌkon ke tîweꞌrepasanon seꞌ tapairî. Imakuiꞌsan, inkamoro yeꞌka esaꞌ pe Paapa iipî pe man amîrîꞌnîkon rawîrî innape puꞌkuru ikupî toꞌya yeꞌnen.
32 Mîrîrî warantî João Batista nurîꞌtî iipîꞌpî pena yairon puꞌkuru eꞌma ekaremeꞌse. Tîîse innape mîîkîrî nekaremekîꞌpî kuꞌsaꞌyaꞌnîkon pra awanîkon. Tîîse inkamoro tîniru yapiꞌnenanya innape puꞌkuru ikupîꞌpî. Moropai wîriꞌsanyamîꞌ seꞌ tapaironkon, itesaꞌ pînonya innape puꞌkuru ikupîꞌpî. Teuren mîrîrî yeꞌka eraꞌma tîpo, amîrîꞌnîkon enpenata pra aakoꞌmamîkon imakuiꞌpî rumaka pîꞌ innape ikupîkonpa —taꞌpî Jesusya.
Imakuiꞌsan Pe Teesenyakaꞌmasanon Wanî
33 Jesusya taꞌpî inîꞌrî: —Sîrîrî panton ekaremekîuya etatî —taꞌpîiya. —Warayoꞌya tekkari yeꞌ ton uva yeꞌka pîmîꞌpî mararî pra. Moropai mîrîrî iwatîꞌpîiya inonkon tîꞌkon ke. Moropai tîꞌ yai uva yekku asuꞌkatoꞌ ton konekaꞌpîiya. Moropai kawînan konekaꞌpîiya ipo siꞌma tamîꞌnawîron eraꞌmatoꞌpe tîpoitîrîtononya kaiꞌma. Inkamoro tînmîri eraꞌmanenan pîꞌ taꞌpîiya: “Seeniꞌ uyekkari yonpa ke ayeꞌmauyaꞌnîkon” taꞌpîiya. Mîrîrî yeꞌnen toꞌ wîtîꞌpî moropai toꞌ karaiwarî wîtîꞌpî tiaron pata pona.
34 Mîrîrî tîpo itekkari emîrî piaꞌtîꞌpî. Mîrîrî yeꞌnen umî esaꞌya tîpoitîrîtonon yarimaꞌpî umî eraꞌmanenan pia tîmîrî ton tekkari yonpa eraꞌmai.
35 Tîîse inkamoro yapisîꞌpî umî eraꞌmanenanya. Moropai inkamoro tarumaꞌtîꞌpî toꞌya. Moropai tiaron poꞌpîtîꞌpî toꞌya. Moropai tiaron ipoitîrî wîꞌpî toꞌya. Moropai tiaron pona tîꞌ yenunpîtîꞌpî toꞌya. Mîrîrî warantî ikupîꞌpî toꞌya ipoitîrîtonon pîꞌ.
36 Mîrîrî tîpo inîꞌrî tiaronkon yarimaꞌpî umî esaꞌya eꞌmaiꞌ pe toꞌ yarimaꞌpî tîuya yentai. Mîrîrî warantî rî ikupîꞌpî toꞌya inkamoro yarakkîrî.
37 Mîrîrî warantî tamîꞌnawîrî ikupî tîpo umî esaꞌya tînmu yarimaꞌpî. Eesenumenkaꞌpî maasa pra “mîserî unmu yarimasauꞌya ya, îꞌ kupî toꞌya pepîn eꞌpainon. Inama toꞌya eserîke awanî”, taꞌpî umî esaꞌya.
38 Tîîse mîîkîrî umî esaꞌ munmu eraꞌma tîuyaꞌnîkon pe, inkamoro umî eraꞌmanenanya taꞌpî: “Aꞌkî, mîserî umî esaꞌ munmu pîꞌ îꞌ kuꞌpai nai yarakkîrî”, taꞌpî toꞌya. “Iwîpaiꞌnîkon uurîꞌnîkon pe sîrîrî umî eturumakatoꞌpe itun saꞌmanta yai, inmu pe awanî namai”, taꞌpî toꞌya.
39 Mîrîrî yeꞌnen mîîkîrî, umî esaꞌ munmu yapisîꞌpî toꞌya yenpaꞌkaꞌpî toꞌya umî yapai poro pona, moropai iwîꞌpî toꞌya —taꞌpîiya.
40 Mîrîrî pîꞌ toꞌ ekaranmapoꞌpî Jesusya: —Îꞌ pensa mîîkîrî umî esaꞌ ennaꞌpo ya, îꞌ kupîiya eserîke awanî inkamoro umî eraꞌmatîponkon warayoꞌkon yarakkîrî?
41 Inkamoroya yuukuꞌpî: —Inkamoro warayoꞌkon tînmu wîîtîponkon tîꞌkaiya eserîke awanî. Mîrîrî tîpo tiaronkon warayoꞌkon eporîiya tînmîri eraꞌmatonkon. Moropai inkamoroya itekkari yonpa tîrî iipia, emîrî weiyu yai —taꞌpî toꞌya.
42 Inîꞌrî Jesusya toꞌ ekaranmapoꞌpî. Taꞌpîiya: —Paapa maimu eꞌmenukasaꞌ erenkasaꞌyaꞌnîkon pra kin naatî, îꞌ taasaiꞌya? Sîrîrî warantî aweꞌmenukasaꞌ:Wîttî konekanenanya tîꞌ yenumîꞌpî, seeniꞌ tîꞌ wanî morî pe pra taa tîuyaꞌnîkon yeꞌnen.Tîîse mîrîrî toꞌ newanmîrîꞌpî tîꞌ wanîꞌpî morî pe puꞌkuru tiaronkon tîꞌkon toꞌ nîmenkaꞌpî yentai.Mîrîrî kupîꞌpî Uyepotorîkonya.Moropai morî pe puꞌkuru awanî anna pia.
43 Tarîpai tauya sîrîrî amîrîꞌnîkon Judeuyamîꞌ piapai imoꞌka Paapaya tîpemonkono pe puꞌkuru awanîkon namai. Moropai tiaronkon esaꞌ pe eena. Manniꞌkan seꞌ tapairî innape ikuꞌnenan pepîn pia, Paapa maimu yawîrî tîîkoꞌmansenon pia itîrîiya, toꞌ esaꞌ pe tîweꞌtoꞌpe.
44 Anîꞌ atareꞌmo ya manniꞌ tîꞌ pona, mîîkîrî maꞌta mîrîrî. Tîîse manniꞌ tîꞌ ena ya ipona, mîîkîrî yankaiya tamîꞌnawîrî.
45 Mîrîrî taa Jesusya etaꞌpî teepîremasanon esanonya moropai fariseuyamîꞌya. Mîrîrî epuꞌtîꞌpî toꞌya, tîpîꞌnîkon Jesus eseurîma pe awanî.
46 Mîrîrî yeꞌnen Jesus yapisî tîuyaꞌnîkon pîꞌ toꞌ esenumenkaꞌpî. Tîîse arinîkon rawîrî siꞌma ikupî toꞌya pra awanîꞌpî maasa pra eranneꞌ pe toꞌ wanîꞌpî. Maasa pra pemonkonyamîꞌya Jesus epuꞌtîꞌpî, Paapa maimu ekaremeꞌnen pe awanî.
