Jesus Cristo Yekare Mateus Nîmenukaꞌpî 22:1-46
22 Jesusya inîꞌrî panton ekaremekîꞌpî pemonkonyamîꞌ nepuꞌtî tonpe. Taꞌpîiya:
2 —Tamîꞌnawîronkon esaꞌ pe Paapa iipî yai awanî pe man sîrîrî panton warantî. Ipîkku pata esaꞌ pe, rei pe tîweꞌsen tînmu eꞌmarimatoꞌ festarî koneka pîꞌ awanîꞌpî.
3 Mîîkîrîya tîpoitîrîtonon yaipontîꞌpî toꞌ wîtîtoꞌpe pemonkonyamîꞌ yannoi toꞌ iiꞌtoꞌpe tînmu festarî pîꞌ. Tîîse inkamoro toꞌ netaꞌsan iipî pra awanîꞌpî. Iiꞌpai pra toꞌ wanîꞌpî.
4 Moropai inîꞌrî tiaronkon tîpoitîrîtonon yarimaꞌpîiya tîmaimu yaatoꞌpe toꞌya toꞌ pia: “Makatîi toꞌ pîꞌ”, taꞌpîiya. “ ‘Tamîꞌnawîrî ekonekasaꞌ man festa yainon tonpe, taa pîꞌ man’, makatîi. ‘Paakayamîꞌ kaiwankon tîꞌkasauꞌya wai, taa pîꞌ man’ makatîi. ‘Tamîꞌnawîron konekasaiꞌya man. Mîrîrî yeꞌnen asiꞌtî festa pona’, makatîi” taꞌpîiya.
5 —Tîîse innape nai, taa toꞌya pra inetaꞌsan wanîꞌpî. Mîrîrî yeꞌnen puwana pîꞌ tîweꞌtoꞌkon pîꞌ toꞌ wîtîꞌpî. Tiaron wîtîꞌpî tekînon pataꞌseꞌ yaꞌ toꞌ eraꞌmapîꞌse. Moropai tiaron wîtîꞌpî temanne yewîꞌ pe tînkonekaꞌpî yaꞌ ekaya pra.
6 Moropai tiaronkonya inkamoro ipîkku poitîrîtonon yapisîꞌpî moropai toꞌ poꞌpîtîꞌpî toꞌya. Moropai toꞌ wîꞌpî toꞌya.
7 Mîrîrî pîꞌ mîîkîrî ipîkku rei ekoreꞌmaꞌpî mararî pra. Inkamoro tîpoitîrîtonon wîîtîponkon tîꞌka meꞌpoꞌpîiya moropai toꞌ pata cidade poꞌtî meꞌpoꞌpîiya.
8 Mîrîrî tîpo inîꞌrî tîpoitîrîtonon yannoꞌpîiya moropai taꞌpîiya toꞌ pîꞌ: “Manniꞌkan unetaꞌsan iipî pra man maasa pra îꞌ pe pra rî toꞌ wanî yeꞌnen” taꞌpîiya.
9 “Tarîpai atîtî seeniꞌ eꞌmakon taawîrî. Moropai tamîꞌnawîrî pemonkonyamîꞌ eporîyaꞌnîkon pîkîrî toꞌ metatîi” taꞌpîiya tîpoitîrîtonon pîꞌ.
10 Moropai ipoitîrîtonon wîtîꞌpî eꞌmakon taawîrî. Inkamoroya toꞌ etaꞌpî tamîꞌnawîrî toꞌ eporî tîuyaꞌnîkon kaisarî. Toꞌ muurukuntîꞌpî toꞌya. Morîkon pemonkonyamîꞌ moropai îrirîkon pemonkonyamîꞌ. Inkamoroya mîrîrî toꞌ pataꞌseꞌ pe ikonekasaꞌ yannîpîꞌpî. Intapîkîrî awanîꞌpî.
11 Mîîkîrî ipîkku epaꞌkaꞌpî inkamoro etasaꞌkon erepansaꞌ eraꞌmai. Moropai mîrîrî toꞌ pataꞌseꞌ pe tînkonekaꞌpî yaꞌ eewomîꞌpî. Miarî warayoꞌ eraꞌmaꞌpîiya festa pîꞌ tîwanî pon yaꞌ pra tîweꞌsen maasa pra tiwin toꞌ pon wanîꞌpî mîîtoꞌpe.
12 Moropai mîîkîrî yekaranmapoꞌpîiya: “Uwanîyakon, oꞌnon yeꞌka pe eewonsaꞌ sîrîrî tarîwaya, festa pîꞌ awanî pon tekaꞌmai pra?” taꞌpîiya. Tîîse imaimu yuukuiya pra awanîꞌpî.
13 Mîrîrî yeꞌnen mîîkîrî ipîkku reiya taꞌpî tîpoitîrîtonon pîꞌ: “Mîserî warayoꞌ yewaꞌtîtî iꞌpu pîꞌ moropai itenya pîꞌ. Moropai yenuntî poro pona, ewaron pe tîweꞌsen yaꞌ, oꞌnon pata karawannîtoꞌ pataꞌseꞌ yaꞌ. Mîîkîrî karawatoꞌpe, tee yeꞌkaiya mararî pra neꞌneꞌ pe tîwanî yeꞌnen”, taꞌpî ipîkkuya —taꞌpî Jesusya.
14 Moropai Jesusya teeseurîmatoꞌ yaretîꞌkaꞌpî. Taꞌpîiya: —Tuꞌke etasaꞌkon pemonkonyamîꞌ wanî sîrîrî Paapa pia aakoꞌmamîtonkon. Tîîse tuꞌkankon iipî pepîn Paapa pia yairî inkamoro yapiꞌtoꞌpeiya —taꞌpî Jesusya.
Roma Ponkon Esaꞌ Yeꞌmatoꞌ Pîꞌ
Jesus Ekaranmapo Toꞌya
15 Mîrîrî tîpo fariseuyamîꞌ epaꞌkaꞌpî moropai inkamoroya teserukon konekaꞌpî, îꞌ kaiꞌma Jesus anapiꞌpai tîwanîkon pîꞌ, iiwanmîra teeseurîmakonpa kaiꞌma ipîꞌ.
16 Mîrîrî yeꞌnen tiaronkon warayoꞌkon yarimaꞌpî toꞌya îꞌ kupî Jesusya eraꞌmatonkon. Moropai inkamoro pokonpe pata esaꞌ Herodes pemonkonoyamîꞌ wîtîꞌpî Jesus ekaranmapopîꞌse. Taꞌpî toꞌya:
—Anna yenupanen, yairon pe puꞌkuru amîrî wanî epuꞌtî pîꞌ anna man —taꞌpî toꞌya. —Maasa pra yairon Paapa maimu ke yenupaton pe awanî yeꞌnen. Moropai tiaronkon pemonkonyamîꞌya taa ya apîꞌ: “Mîrîrî warantî kîseurîmai”. Mîrîrî taa toꞌya pîꞌ tîpîinamai tîweꞌsen pepîn amîrî. Maasa pra seꞌ kaisarî pemonkonyamîꞌ pîꞌ tîweꞌsen amîrî —taꞌpî toꞌya.
17 —Mîrîrî yeꞌnen îꞌ kaiꞌma epuꞌtî pîꞌ nan? Yairî awanî kaꞌrî, kaane kaꞌrî, yairî pra awanî? Uyesaꞌkon pe tîweꞌsen Romanoyamîꞌ esaꞌ César yeꞌma annaya ya?
18 Tîîse Jesusya îꞌ ankuꞌpai toꞌ wanî tarakkîrî epuꞌtîꞌpî. Moropai taꞌpîiya toꞌ pîꞌ: —Seruꞌyeꞌkon amîrîꞌnîkon. Aawarîrîꞌnîkon teesenkuꞌtîsanon morî pe tîwanîkon kaiꞌma. Îꞌ waniꞌ awanî yeꞌnen uuwanmîra uurî anapiꞌpai awanîkon mîrîrî? —taꞌpîiya.
19 Moropai taꞌpîiya: —Moriya mîrîrî yeꞌmatoꞌyaꞌnîkon eneꞌtî uupia eraꞌmatoꞌpeuya —taꞌpîiya.
Mîrîrî enepîꞌpî toꞌya.
20 Moropai inkamoro yekaranmapoꞌpîiya: —Anîꞌ eseꞌ mîserî? Anîꞌ yekaton sîrîrî pîrata enaꞌpî pîꞌ? —taꞌpîiya.
21 Inkamoroya yuukuꞌpî: —Romanoyamîꞌ esaꞌ César eseꞌ —taꞌpî toꞌya. Mîrîrî taa toꞌya yeꞌnen, Jesusya taꞌpî: —Moriya itîîkî iipia, imîrî pe awanî yeꞌnen, îꞌ taꞌpî Césarya yawîrî ikuꞌtî. Moropai îꞌ kuꞌtî taꞌpî Paapaya yawîrî nîrî ikuꞌtî —taꞌpîiya.
22 Mîrîrî taa Jesusya pîꞌ toꞌ esenumenkaꞌpî mararî pra teesenumenkai, îꞌ taiya eta tîuyaꞌnîkon pîꞌ. Mîrîrî yeꞌnen Jesus piapai toꞌ wîtîꞌpî. Îꞌ kupî toꞌya pra awanîꞌpî Jesus pîꞌ.
Saꞌmantan Tîpo Eꞌmîꞌsaꞌkan Pepîn
Taa Saduceuyamîꞌya
23 Mîrîrî yai saduceuyamîꞌ wîtîꞌpî Jesus pia. Inkamoro esenumenkatoꞌ wanîꞌpî isaꞌmantaꞌsan eꞌmîꞌsaꞌka pepîn taawonan pe. Mîrîrî yeꞌnen isaꞌmantaꞌsan eꞌmîꞌsaꞌka pepîn taapîtîꞌpî toꞌya.
24 Moropai inkamoroya taꞌpî Jesus pîꞌ:
—Anna yenupanen, pena Moisés nurîꞌtîya anna yenupaꞌpî see warantî —taꞌpî toꞌya. —Tiwin warayoꞌ noꞌpîta, tîîse tînmu ton tepose pra aasaꞌmanta mîîkîrî noꞌpîrîꞌpî eꞌnîmî. Mîîkîrî yarakkîrî itakonoꞌpî wanî eꞌpai awanî —taꞌpîiya. —Moropai more yan pe tîrui noꞌpîrîꞌpî enasaꞌ ya, tînre ton yenpoiya. Mîîkîrî more pîꞌ urui munmuꞌpî taiya, tînmu pe tîîse.
25 Moro toꞌ man anna koreꞌta asakîꞌne miaꞌ pona tîîmoꞌtai kaisarî warayoꞌkon. Toꞌ ruinankon noꞌpîtaꞌpî, tîîse aasaꞌmantaꞌpî inmu ton pra siꞌma. Mîîkîrî noꞌpî rîꞌpî yarakkîrî itakonoꞌpî wanîꞌpî.
26 Tîîse mîrîrî warantî rî mîîkîrî nîrî saꞌmantaꞌpî inmu ton pra tîîse. Moropai toꞌ eseurîno yarakkîrî mîrîrî warantî awanîꞌpî. Moropai tamîꞌnawîrî toꞌ saꞌmantaꞌpî inmuku pra toꞌ tîîse. Inkamoro saꞌmantaꞌpî.
27 Mîrîrî tîpo wîriꞌ nîrî saꞌmantaꞌpî —taꞌpîiya.
28 Mîrîrî ekaranmapoꞌpî saduceuyamîꞌya Jesus pîꞌ. Taꞌpî toꞌya: —Inkamoro warayoꞌkon eꞌsaꞌ asakîꞌne miaꞌ pona tîîmoꞌtai kaisarî mîîkîrî wîriꞌ yarakkîrî. Tamîꞌnawîronkon eꞌmîꞌsaꞌka yai oꞌnon yeꞌka warayoꞌ noꞌpî pe awanî kupî sîrîrî? —taꞌpî toꞌya. —Maasa pra tamîꞌnawîrî yarakkîrî toꞌ eꞌsaꞌ yeꞌnen.
29 Jesusya toꞌ maimu yuukuꞌpî: —Aka, eesenkuꞌtîsaꞌkon mîrîrî, îꞌ taasaꞌ Paapa maimu eꞌmenukasaꞌya epuꞌtîyaꞌnîkon pra naatîi. Meruntî ke Paapa wanî epuꞌtîyaꞌnîkon pepîn mîrîrî —taꞌpî Jesusya toꞌ pîꞌ.
30 Aꞌkî, isaꞌmantaꞌsan eꞌmîꞌsaꞌka yai tînoꞌpî ke anîꞌ wanî pepîn. Maasa pra mîrîrî toꞌ wanî inserîyamîꞌ warantî, kaꞌ ponkon warantî. Mîrîrî yeꞌnen tînoꞌpî ke toꞌ wanî pepîn.
31 Tîîse isaꞌmantaꞌsan eꞌmîꞌsaꞌkatoꞌ pîꞌ Paapa eseurîmapîtîꞌpî pena. Mîrîrî erenkasaꞌyaꞌnîkon pra naatî? See warantî taꞌpî Paapaya:
32 “Uurî Paapa, Abraão nurîꞌtî yepotorî, moropai Isaque nurîꞌtî yepotorî. Moropai Jacó nurîꞌtî yepotorî pe wanî”,
ekaremekîꞌpîiya. Saꞌmantasaꞌ pe inkamoro koꞌmamî pepîn ipatîkarî. Paapa wanî enen tîîkoꞌmansenon yepotorî pe. Isaꞌmantaꞌsan yepotorî pe pra awanî.
33 Mîrîrî taa Jesusya eta tîuyaꞌnîkon pe, arinîkon pemonkonyamîꞌ wanîꞌpî teesenumenkai mararî pra, îꞌ kaiꞌma toꞌ yenupatoiꞌya pîꞌ.
Tamîꞌnawîron Paapa Nekaremekî
Unkupîkon Ton Ipîkku Panpîꞌ
34 Mîrîrî tîpo fariseuyamîꞌ eperepîꞌpî Jesus pia. Maasa pra saduceuyamîꞌ tîꞌnapamî emapuꞌtîsaiꞌya yeꞌnen, toꞌ iipîꞌpî iipia.
35 Warayoꞌ epuꞌnen Moisés nurîꞌtîya yenupantoꞌ pîꞌ yenupaton iipîꞌpî iipia maasa pra seruꞌyeꞌ pe Jesus eseurîma anepuꞌpai awanîꞌpî. Mîrîrî yeꞌnen Jesus ekaranmapoꞌpîiya.
36 —Anna yenupanen, oꞌnon wanî mîrîrî ipîkku pe panpîꞌ unkupîkon ton pe Paapa nekaremekîꞌpî pe? —taꞌpîiya.
37 Jesusya yuukuꞌpî:—Ayepotorî Paapa yapurîkî tamîꞌnawîrî ayewan ke, moropai tamîꞌnawîrî ayekaton ke. Moropai tamîꞌnawîrî eesenumenkatoꞌ ke
—taꞌpîiya.
38 —Mîrîrî wanî eꞌmaiꞌnon, ipîkku pe ituꞌse Paapa eꞌtoꞌpe.
39 Moropai itakon moro wanî manniꞌ eꞌmaiꞌnon warantî rî. Taiya:Ayonpa saꞌnamakî kureꞌne aawarîrî amîrî eꞌsaꞌnama manniꞌ warantî.
40 Mîrîrî warantî mîrîrî asakîꞌnan yawîrî kuꞌsaꞌyaꞌnîkon ya, tamîꞌnawîron sîrîrî Moisés nurîꞌtî nekaremekîꞌpî yawîrî awanîkon. Moropai penaronkon Paapa maimu ekaremeꞌnenan profetayamîꞌ nurîꞌtî nekaremekîꞌpîya taasaꞌ yawîrî awanîkon —taꞌpî Jesusya.
Anîꞌ Munmu Pe Paapa Nîmenkaꞌpî Wanî
41 Moropai fariseuyamîꞌ emurukuntîsaꞌ tanne, Jesusya toꞌ ekaranmapoꞌpî:
42 —Îꞌ kaiꞌma see eesenumenkakon mîrîrî mîîkîrî Paapa nîmenkaꞌpî pîꞌ? Anîꞌ paarîꞌpî pe awanî mîrîrî? —taꞌpîiya.
—Davi nurîꞌtî paarîꞌpî mîîkîrî —taꞌpî toꞌya ipîꞌ.
Moropai inîꞌrî toꞌ ekaranmapoꞌpî Jesusya:
43 —Îꞌ waniꞌ awanî yeꞌnen kin Davi nurîꞌtî eseurîmaꞌpî Paapa nîmenkaꞌpî pîꞌ pena? Morî Yekaton Wannîya eeseurîma emapuꞌtîꞌpî. “Uyepotorî” taꞌpîya. Davi nurîꞌtî maimu rîꞌpî sîrîrî.
44 Uyepotorî pîꞌ Paapaya taꞌpî:“Uupia ereutakî umeruntîri winîkîiayeyatonon yaretîꞌkauya pîkîrî” taꞌpîiya
taꞌpî Daviya, sîrîrî imaimu.
45 Aꞌkî, Davi paarîꞌpî pe neken Paapa nîmenkaꞌpî wanî ya. Îꞌ waniꞌ awanî yeꞌnen Uyepotorî taa Daviya ipîꞌ, manniꞌ? —taꞌpî Jesusya.
46 Mîrîrî taa Jesusya yuuku toꞌya pra toꞌ wanîꞌpî. Moropai mîrîrî patapai inîꞌrî Jesus anekaranmapopai pra toꞌ enaꞌpî.
