Jesus Cristo Yekare Mateus Nîmenukaꞌpî 24:1-51
24 Epîremantoꞌ yewîꞌ tapai teepaꞌkakon pe, aasarî tuutîkon yeꞌka pe, Jesus nenupaꞌsan erepamîꞌpî iipia. Moropai inkamoro eseurîmaꞌpî wîttî, epîremantoꞌ yewîꞌ konekasaꞌ pîꞌ. Maasa pra morî pe puꞌkuru awanî yeꞌnen.
2 Jesusya toꞌ maimu yuukuꞌpî. Taꞌpîiya: —Ayenkuꞌtîuya pepîn. Seeniꞌ wîttî kureꞌnan eraꞌma pîꞌ naatî? Tîîse aakoꞌmamî pepîn kupî sîrîrî. Maasa pra tiaronkonya yaranka toꞌ weiyu erepamî yai. Tamîꞌnawîrî isoroka toꞌya tiwinan tîꞌ eꞌnîmî pepîn tonpa po. Tîîse tamîꞌnawîrî yenumî toꞌya kupî sîrîrî.
Epuꞌnîtoꞌ Moropai Eꞌtarumaꞌtîntoꞌ
3 Mîrîrî tîpo Oliveira yeꞌka kîrî po, Jesus ereutasaꞌ wanîꞌpî. Mîrîrî tanne inenupaꞌsan erepamîꞌpî iipia, tiaronkon ton pra tîîse. Moropai Jesus ekaranmapoꞌpî toꞌya: —Oꞌnon yeꞌka pe mîrîrî eꞌkupî kupî sîrîrî? Oꞌnon yeꞌka pe mîrîrî kupî toꞌya epuꞌtî annaya eꞌpainon? Îꞌ eseraꞌma wenai aminke pra aaiꞌtoꞌpe wanî moropai tamîꞌnawîron eꞌtîꞌka epuꞌtî annaya? —taꞌpî toꞌya.
4 Jesusya toꞌ maimu yuukuꞌpî: —Tîwarî eꞌtî aka, anîꞌya ayenkuꞌtîkon namai.
5 Maasa pra tuꞌkankon asarî kupî sîrîrî uyeseꞌ pîꞌ teeseurîmasanon pe tîweꞌkuꞌse. Moropai taa toꞌya: “Uurî Cristo, Paapa nîmenkaꞌpî”, taa toꞌya. Moropai mîrîrî taa toꞌya pîꞌ tuꞌke pemonkonyamîꞌ esenkuꞌtî kupî sîrîrî.
6 Moropai pemonkonyamîꞌ eseyaꞌnamatoꞌ etayaꞌnîkon pîꞌ teesiꞌnîꞌse pra meꞌtîi moropai teepîsanon yekare etayaꞌnîkon ya. Tamîꞌnawîrî mîrîrî yeꞌka eꞌkupî kupî sîrîrî, tîîse maasa pata ataretîꞌka pepîn.
7 Pemonkonyamîꞌ eseyaꞌnama tiaron pata ponkon yarakkîrî. Moropai pemonkonyamîꞌ esanon eseyaꞌnama tiaronkon esanon yarakkîrî. Moropai pata eserentîkîꞌma kupî sîrîrî tiaron pata poro. Mîrîrî yai emiꞌnan wanî kupî sîrîrî pata po.
8 Sîrîrî yeꞌka eꞌkupî kupî sîrîrî manniꞌ eꞌmaiꞌnon neꞌneꞌ epuꞌtî more yan pe tîweꞌsen wîriꞌya warantî —taꞌpî Jesusya.
9 —Mîrîrî yai tiaronkonya ayapisîkon kupî sîrîrî tesanonkon pia. Ayarîkon toꞌya atarumatîtoꞌkon pe toꞌya. Moropai inkamoroya amîrîꞌnîkon wîî. Moropai tamîꞌnawîronkonya amuꞌtunpakon uurî yapurîyaꞌnîkon wenai.
10 Mîrîrî yai tuꞌkankon uyapurînenanya uyapurîtoꞌ tîuyaꞌnîkon kupî tîwî. Maasa pra innape ukupî toꞌya pra toꞌ enasaꞌ yeꞌnen, tiaronkon yewanmîrînenan pe toꞌ wanî kupî sîrîrî. Moropai tonpakon rumaka toꞌya kupî sîrîrî teeyatonon yenyaꞌ.
11 Mîrîrîya Paapa maimu ekaremeꞌnenan, profetayamîꞌ pe tîweꞌkuꞌsanon seruꞌyeꞌkon esenpo kupî sîrîrî pemonkonyamîꞌ yenkuꞌtîi. Inkamoroya tuꞌke toꞌ yenkuꞌtî.
12 Mîrîrî warantî imakuiꞌpî eꞌparaipîka kupî sîrîrî kaꞌneꞌ pe. Mîrîrî wenai mararonkon pepîn innape Paapa yapurînenanya Paapa yapurîtoꞌ tîuyaꞌnîkon yenomî inîꞌ toꞌ enpenata pepîn.
13 Tîîse tamîꞌnawîron mîrîrî yeꞌka yapîtanîpîtîpon wanî ya ikîꞌpî tîpose, mîîkîrî pîikaꞌtîsaꞌ Paapaya mîrîrî —taꞌpîiya.
14 —Moropai mîrîrî yai îꞌ kaiꞌma pemonkonyamîꞌ esaꞌ pe Paapa wanî esekaremekî kupî sîrîrî tamîꞌnawîrî pata poro. Tamîꞌnawîronkon pemonkonyamîꞌya eta kupî sîrîrî uyekare pîꞌ. Moropai mîrîrî yai tamîꞌnawîron eꞌtîꞌka weiyu erepamî —taꞌpî Jesusya.
Kureꞌnan Eꞌtarumaꞌtîntoꞌ
15 Moropai Jesus eseurîma koꞌmannîpîꞌpî: —Penaroꞌ Paapa maimu ekaremeꞌnen Daniel nurîꞌtî eseurîmaꞌpî.“Tamîꞌnawîronkon yewanma pe tîweꞌsen imakuiꞌpî, Paapa newanma pe tîweꞌsen tîrî tiaronkonya epîremantoꞌ yewîꞌ ta. Mîrîrî yeꞌka pataꞌseꞌ pepîn yaꞌ itîrî toꞌya”,
taꞌpî Daniel nurîꞌtîya. Mîrîrî eraꞌmayaꞌnîkon yai, epuꞌtîyaꞌnîkon yuꞌse wai îꞌ taatoꞌpe awanî —taꞌpîiya.
16 Mîrîrî yeꞌnen anîꞌ wanî ya Judéia pata po, kaꞌneꞌ pe eepe eꞌpai awanî wîꞌ pona.
17 Moropai anîꞌ wanî ya tewîꞌ po kaꞌneꞌ pe awautî eꞌpai awanî moropai eepe eꞌpai awanî, tewîꞌ ta temanne eraꞌmai teewonse pra.
18 Moropai anîꞌ wanî ya keren po mîîkîrî ennaꞌpo eꞌpai pra wanî tewîꞌ ta tîponkon eraꞌmai, tîîse eepe eꞌpai awanî kaꞌneꞌ pe.
19 Mîrîrî yai aka saꞌne wîriꞌsanyamîꞌ more yankon moropai manaꞌpokonkon toꞌ munkîyamîꞌ. Inkamoro eꞌtarumaꞌtî kupî sîrîrî mararî pra maasa pra kaꞌneꞌ pe toꞌ epe eserîke pra toꞌ wanî yeꞌnen.
20 Mepîrematîi Paapa pîꞌ maasa pra konoꞌ yai mîrîrî yeꞌka eꞌkupî namai. Moropai erîꞌkaꞌnîtoꞌ weiyu yai aweꞌkupî namai.
21 Maasa pra kureꞌnan eꞌtarumaꞌtîntoꞌ iipî kupî sîrîrî. Paapaya pata konekaꞌpî patapai eseraꞌmaꞌpî pepîn eꞌkupî kupî sîrîrî ikaisaron ton pra.
22 Tamîꞌnawîronkon eꞌtarumaꞌtî kupî sîrîrî mararî pra. Tîîse Paapaya ipîra toꞌ eꞌtarumaꞌtîtoꞌ yaretîꞌka kupî sîrîrî maasa tînkuꞌneꞌtîꞌpî weiyu eseporî pra tîîse. Mîrîrî kuꞌsaiꞌya pra awanî ya enen anîꞌ koꞌmamî pepîn eꞌpainon. Tîîse Paapaya tînmoꞌkakon pînînma kureꞌne tîpemonkono pe toꞌ wanî yeꞌnen. Toꞌ yaretîꞌka eꞌtarumaꞌtîntoꞌya tîrîiya pepîn.
23 Mîrîrî yeꞌnen anîꞌya taa ya apîꞌnîkon: “Paapa nîmenkaꞌpî Cristo tarî man”, taiya ya, innape mîîkîrî maimu kîꞌkuꞌtî. Moropai “Siiniꞌ pata man”, taa toꞌya ya apîꞌnîkon, innape inkamoro yeꞌka maimu kîꞌkuꞌtî.
24 Maasa pra seruꞌyeꞌkon iipî, uurî pe tîweꞌkuꞌsanon, Paapa maimu ekaremeꞌnenan pe tîweꞌkuꞌse toꞌ iipî. Inkamoroya anîꞌ nîkupî eserîkan pepîn kupî pemonkonyamîꞌ neraꞌmakon ton kupî, toꞌ yenkuꞌtîkonpa kaiꞌma. Mîrîrî wenai tamîꞌnawîronkon yenkuꞌtî toꞌya eꞌpainon Paapa nîmenkaꞌsan nîrî toꞌ yenkuꞌtî toꞌya tîrî Paapaya ya. Tîîse itîrîiya pepîn.
25 Tîîse mîrîrî rawîrî apîꞌnîkon ekaremekî pîꞌ wai epuꞌtîkonpa.
26 —Mîrîrî yeꞌnen anîꞌya taa ya apîꞌnîkon: “Aꞌkî, sinpata man keren po”, taiya ya, eraꞌmai katîtî. Inîꞌrî taa anîꞌya ya apîꞌnîkon: “Aꞌkî, tarî man eesenonsaꞌ”, taa toꞌya ya, innape toꞌ maimu kîꞌkuꞌtî ayenkuꞌtîkon toꞌya pîꞌ.
27 Maasa pra uurî kaꞌ poinon iiꞌtoꞌ wanî kupî sîrîrî aronne amaꞌ pe pra. Eꞌwinî pairî kaꞌ pîꞌ waraꞌnapi eꞌsisiuka eseraꞌma manniꞌ warantî tamîꞌnawîronkonya eraꞌma uuipî yai —taꞌpîiya.
28 —Aꞌkî, oꞌnon pata anîꞌ saꞌmantasaꞌ ya, mîîkîrî pîꞌ watunaiyamîꞌ emurukuntîsaꞌ wanî. Mîrîrî warantî uurî iipî inkamoro imakuiꞌpî kuꞌnenan koreꞌta apoꞌ yaꞌ toꞌ yenuntoꞌpeuya —taꞌpî Jesusya.
Kaꞌ Poinon Iiꞌtoꞌ Sîrîrî Non Pona
29 Jesusya taꞌpî inîꞌrî: —Mîrîrî yai tamîꞌnawîronkon eꞌtarumaꞌtîꞌpî tîpo,wei esiꞌnîpî kupî sîrîrî.Moropai kapoi ena kupî sîrîrî aꞌka pe pra.Moropai siirikkîyamîꞌ eꞌsoroka kupî sîrîrî.Moropai tamîꞌnawîrî kaꞌ pîꞌ tîweꞌsanon eꞌtîtîtîꞌka kupî sîrîrî.
30 Mîrîrî tîpo kaꞌ poi iipîꞌpî pemonkon pe eraꞌma tamîꞌnawîronkon pemonkonyamîꞌya. Uuipî katupuru koreꞌta aꞌka pe kaꞌ winîpai. Mîrîrî yai tamîꞌnawîrî pata ponkon karau kupî sîrîrî mararî pra. Maasa pra meruntî ke uuipî aꞌka pe, wei warantî.
31 Mîrîrî yai kureꞌnan usinarî yeꞌnunpa pe upoitîrîtonon inserîyamîꞌ yarimauya upemonkono pe umenkaꞌsan muurukuntîi. Tamîꞌnawîrî patakon kaisarî toꞌ wîtîtoꞌpe upemonkono pe umoꞌkaꞌsan eraꞌmai sîrîrî non po —taꞌpî Jesusya.
Arawen Yeꞌ Yekare Pîꞌ Esenupantoꞌ
32 Moropai inîꞌrî taꞌpî Jesusya: —Sîrîrî figo yeꞌ yekare pîꞌ esenupatî. Eꞌmaiꞌ pe aarenta. Moropai eepantakasaꞌ ya, aareta. Mîrîrî pîꞌ taayaꞌnîkon aminke pra konoꞌpîtî wanî sîrîrî taawonan amîrîꞌnîkon.
33 Mîrîrî warantî nîrî ekaremekîuya manniꞌ eꞌkupî eraꞌmayaꞌnîkon yai, Cristo ennaꞌpo kupî sîrîrî kaꞌ poi, taayaꞌnîkon. Mîrîrî warantî aminke pra uuiꞌtoꞌ wanî epuꞌtîyaꞌnîkon.
34 Ayenkuꞌtîuyaꞌnîkon pepîn. Sîrîrî yeꞌka eꞌkupî kupî sîrîrî seruꞌyeꞌ pe pra. Tamîꞌnawîronkon sîrîrî pankon enenankon saꞌmanta pepîn sîrîrî eꞌkupî rawîrî.
35 Tauya sîrîrî, tamîꞌnawîron ataretîꞌka kupî sîrîrî kaꞌ moropai non, pata, tîîse umaimu ataretîꞌka pepîn tiwin kin, ipatîkarî aakoꞌmamî —taꞌpî Jesusya.
Anîꞌya Iweiyu Epuꞌtî Pepîn
36 Jesus eseurîma koꞌmannîpîꞌpî. Taꞌpîiya: —Îꞌ pensa moropai îꞌ weiyu yai uuipî inîꞌrî sîrîrî non pona epuꞌtîyaꞌnîkon eserîke pra naatîi. Moropai inserîyamîꞌ kaꞌ ponkonya nîrî epuꞌtî pra man. Moropai uurî, Paapa munmuya epuꞌtî pepîn. Tîîse uyunya neken iweiyu epuꞌtî.
37 Aꞌkî, pena Noé nurîꞌtî wanî yai, aweꞌkupîꞌpî warantî, uurî kaꞌ poi iipîꞌpî sîrîrî non pona ennaꞌpotoꞌ wanî pe man.
38 Maasa pra mîrîrî eꞌkupî rawîrî pemonkonyamîꞌ wanîꞌpî teserukon yawîrî. Toꞌ entamoꞌkaꞌpî mararî pra moropai tîwukukon enîrîꞌpî toꞌya. Moropai mîrîrî yai warayoꞌkon noꞌpîtapîtîꞌpî, moropai wîriꞌsanyamîꞌ etiyomapîtîꞌpî teserukon yawîrî. Mîrîrî kupîꞌpî toꞌya tîkanau yaꞌ Noé nurîꞌtî asaraꞌtî pîkîrî, ikupîꞌpî toꞌya.
39 Mîrîrî kupî pîꞌ toꞌ koꞌmanpîtîꞌpî maasa pra îꞌ eꞌkupî epuꞌtî tîuyaꞌnîkon pra tîwanîkon yeꞌnen. Mîrîrî kupî pîꞌ toꞌ koꞌmamî tanne, Paapaya pata maꞌtînîpîꞌpî tuna ke. Moropai tamîꞌnawîrî inkamoro tîꞌkaꞌpîiya. Mîrîrî warantî nîrî uurî kaꞌ poinon iiꞌtoꞌ weiyu wanî pe man. Inîmîkî toꞌya pra tîîse uuipî.
40 Mîrîrî yai asakîꞌnankon warayoꞌkon wanî teesenyakaꞌmakon pîꞌ tînmîri yaꞌ. Tîîse iwanîyakon yarîuya tiwin moropai tiaron eꞌnîmî.
41 Moropai asakîꞌne wîriꞌsanyamîꞌ wanî teesenyakaꞌmakon pîꞌ. Toꞌ esenyakaꞌma aꞌnai yeꞌpa pîꞌ aꞌ yai. Mîîkîrî wanîyakon yarîuya tiwin moropai tiaron eꞌnîmî. Mîrîrî warantî aweꞌkupî pe man.
42 Mîrîrî namai tîwarî panpîꞌ akoꞌmantî maasa pra îꞌ pensa uurî ayepotorîkon erepantoꞌ weiyu sîrîrî non pona, epuꞌtîyaꞌnîkon pra naatîi.
43 Maasa esenumenkatî sîrîrî pîꞌ: Aꞌkî, manniꞌ wîttî esaꞌya sîrîrîpe amaꞌyeꞌ erepamî epuꞌtî ya tewîꞌ yamaꞌrunpai, mîîkîrîya eerepamî nîmîkî eꞌpainon, tewîꞌ yamaꞌrunpaiya namai, innape nai?
44 Mîrîrî warantî nîrî amîrîꞌnîkon koꞌmamî eꞌpai awanî tîwarî. Maasa pra uurî kaꞌ poinon ennaꞌpotoꞌ weiyu sîrîrî non pona epuꞌtîyaꞌnîkon pra naatîi. Enpen eꞌtî unîmîkîyaꞌnîkon pra awanîkon tanne, ayeporîuyaꞌnîkon namai —taꞌpî Jesusya.
Ipoitîrî Yairon Moropai Yairon Pepîn
45 Inîꞌrî Jesus eseurîmaꞌpî. Taꞌpîiya: —Oꞌnon yeꞌka mîîkîrî tîkaraiwarî maimu yawîrî tîweꞌsen yairon moropai epuꞌnen? Manniꞌ mîîkîrî ikaraiwarîya tewîꞌ koꞌmannîꞌnen pe itîrîꞌpî. Moropai tiaronkon teesenyakaꞌmasanon esaꞌ pe itîrîꞌpî. Moropai toꞌ yaꞌreꞌ ton tîînen pe itîrîꞌpîiya. Moropai tamîꞌnawîrî taꞌpî tîkaraiwarîya yawîrî ikuꞌnen pe awanîꞌpî —taꞌpîiya.
46 —Taatausinpai puꞌkuru mîîkîrî ipoitîrî wanî îꞌ pensa tîkaraiwarî erepantoꞌ weiyu yai, maasa pra îꞌ taꞌpî tîkaraiwarîya yawîrî ikuꞌsaꞌ tîuya yeꞌnen.
47 Yairî tauya sîrîrî apîꞌnîkon. Mîrîrî warantî tîkaraiwarî nîtîrîꞌpî koꞌmannîꞌsaiꞌya yeꞌnen. Ikaraiwarîya mîîkîrî tîpoitîrî pia inîꞌ panpîꞌ tamîꞌnawîron temanne tîrî iipia ikoꞌmannîꞌtoꞌpeiya.
48 Tîîse mîrîrî warantî pra ipoitîrî wanî ya imakuiꞌpî pe. Maasa pra taiya: “Kaꞌneꞌ pe ukaraiwarî iipî pe pra man”, taiya. Tîîwarîrî siꞌma eeseurîma.
49 Mîrîrî yeꞌnen tiaronkon tîkaraiwarî poitîrîtonon tonpayamîꞌ tarumaꞌtî piaꞌtîiya. Toꞌ poꞌpîtîiya toꞌ yaꞌreꞌ ton tîrîiya pepîn. Moropai mîîkîrîya taꞌreꞌ yonpa mararî pra, moropai eetîmî maiꞌ enîꞌnenan pokonpe. Mîrîrî kupîiya maasa pra tîkaraiwarî iipî pra awanî yeꞌnen kaꞌneꞌ pe.
50 Moropai mîrîrî tîpo, tîîkoꞌmanse puꞌkuru pra ikaraiwarî erepamî. Mararî enpen pra tîîse tîpoitîrî eporîiya.
51 Mîrîrî yai inkupîꞌpî eraꞌma tîuya pe, ikaraiwarîya itarumaꞌtî mararî pra. Iꞌpoꞌpîtîiya, moropai yenumîiya tîmaimu yawîronkon pepîn, seruꞌyeꞌkon pataꞌseꞌ yaꞌ, tîmoron epuꞌtoꞌpeiya. Inkamoro seruꞌyeꞌkon pokonpe mîîkîrî karau pe man, mararî pra tee tîpaꞌtîi, neꞌneꞌ pe tîwanî yeꞌnen —taꞌpî Jesusya.
