Jesus Cristo Yekare Mateus Nîmenukaꞌpî 25:1-46
25 Inîꞌrî Jesusya panton ekaremekîꞌpî: —Îꞌ kaiꞌma tamîꞌnawîronkon esaꞌ pe Paapa iiꞌtoꞌ wanî pe man, sîrîrî eꞌmarimatoꞌ warantî —taꞌpîiya. —Miaꞌ tamîꞌnawîronkon wîriꞌsanyamîꞌ maasaronkon wanîꞌpî. Inkamoroya tîꞌkumaꞌtukon ton lamparinha yapisîꞌpî moropai toꞌ wîtîꞌpî tîweꞌmarimasen ponaya.
2 Tîîse toꞌ yonpayamîꞌ wanîꞌpî miaꞌtaikin kaisarî tîweꞌneꞌnokon. Moropai miaꞌtaikin toꞌ wanîꞌpî tîweꞌneꞌ pra, epuꞌnenan pe toꞌ wanîꞌpî.
3 Mîrîrî yeꞌnen inkamoro wîriꞌsanyamîꞌ tîweꞌneꞌnokonya tîꞌkumaꞌtukon paru ton yarî toꞌya pra toꞌ wanîꞌpî itenseꞌ yaꞌ, maasaron ton.
4 Tîîse tiaronkon epuꞌnenan wîriꞌsanyamîꞌya tîꞌkumaꞌtukon lamparinha paru ton yarîꞌpî itenseꞌ yaꞌ maasaron ton. Inkamoroya tîweꞌmarimasen iipî nîmîkîꞌpî.
5 Tîîse tîweꞌmarimasen erepamî pra aakoꞌmamîꞌpî. Moropai iweꞌnunpai toꞌ enaꞌpî. Moropai inkamoro weꞌnaꞌpî kaꞌneꞌ pe.
6 Toꞌ weꞌnasaꞌ tanne, anoinna tîweꞌmarimasen erepamîꞌpî. Mîîkîrî erepamî yeꞌnen, toꞌ entaime etaꞌpî wîriꞌsanyamîꞌya. Taꞌpî toꞌya: “Tîweꞌmarimasen erepannî pîꞌ man! Asiꞌtî iipia kaꞌneꞌ pe erepantî”, taꞌpî toꞌya.
7 Mîrîrî taa toꞌya pe, inkamoro miaꞌ tamîꞌnawîronkon maasaronkon wîriꞌsanyamîꞌ pakaꞌpî. Moropai inkamoroya tîꞌkumaꞌtukon lamparinha yawittanîpîꞌpî.
8 Tîîse inkamoro miaꞌtaikinankon tîweꞌneꞌnokonya taꞌpî tiaronkon epuꞌnenan pîꞌ: “Anna kumaꞌtu paru ton ke anna repatî maasa pra anna kumaꞌtu esiꞌnîꞌnî pîꞌ man”, taꞌpî toꞌya.
9 Tîîse inkamoroya yuukuꞌpî: “Kaane, anna kumaꞌtu paru man anna pe neken”. Tîîse taꞌpî toꞌya toꞌ pîꞌ: “Aꞌkumaꞌtukon paru ton yuꞌse awanîkon ya, tîweꞌrepasanon pia anennatantî”, taꞌpî toꞌya.
10 Mîrîrî yeꞌnen inkamoro epuꞌnenan pepîn tîweꞌneꞌnokon wîriꞌsanyamîꞌ wîtîꞌpî tîꞌkumaꞌtukon paru ton yennai. Maasa inkamoro tîîse poro po tîweꞌmarimasen erepamîꞌpî. Mîrîrî yeꞌnen miaꞌtaikinankon epuꞌnenan wîriꞌsanyamîꞌ ewomîꞌpî yarakkîrî tîweꞌmarimasen festarî pîꞌ. Moropai mîrîrî tîpo manaꞌta yarakkamoꞌpî toꞌya.
11 Tîkoꞌman pe puꞌkuru pra, inkamoro wîriꞌsanyamîꞌ erepamîꞌpî. Moropai inkamoro entaimepîtî piaꞌtîꞌpî. Taꞌpî toꞌya: “Anna yepotorî, anna ewontoꞌpe manaꞌta yarakkanmokakî”, taꞌpî toꞌya.
12 Tîîse tîweꞌmarimasenya yuukuꞌpî. Taꞌpîiya: “Anîꞌkan amîrîꞌnîkon? Ayepuꞌtîuyaꞌnîkon pra wai”, taꞌpîiya toꞌ pîꞌ.
13 Moropai Jesusya teeseurîmantoꞌ yaretîꞌkaꞌpî see warantî:
—Mîrîrî yeꞌnen tîwarî panpîꞌ akoꞌmantî. Maasa pra îꞌ pensa, îꞌ weiyu yai, erepamî weiyu epuꞌtîyaꞌnîkon pra naatîi —taꞌpî Jesusya.
Eseurîwîꞌnankon Ipoitîrîtonon
14 Inîꞌrî tiaron panton ekaremekîꞌpî Jesusya: —Tamîꞌnawîronkon esaꞌ pe Paapa iiꞌtoꞌ wanî pe man see warantî. Warayoꞌ tiaron pata pona tuutîsen wanîꞌpî. Tuutî rawîrî tîpoitîrîtonon yannoꞌpîiya moropai tîpata rumakaꞌpîiya ikoꞌmannîꞌtoꞌpe toꞌya.
15 Moropai mîîkîrîya tiwin pîꞌ toꞌ tîîse toꞌ nenyakaꞌma ton tîniru tîrîꞌpî yenyakaꞌma toꞌya eserîke eraꞌma tîuya yeꞌnen. Eꞌmaiꞌnon warayoꞌ pia itîrîꞌpîiya 5.000 pîrata enaꞌpî kaisarî. Moropai tiaron pia itîrîꞌpîiya 2.000 kaisarî, pîrata enaꞌpî. Moropai tiaron pia itîrîꞌpîiya 1.000 kaisarî, pîrata enaꞌpî. Mîrîrî tîpo mîîkîrî wîtîꞌpî.
16 Mîîkîrî eꞌmaiꞌnon warayoꞌ 5.000 kaisarî pîrata enaꞌpî yapisîtîpon epaꞌkaꞌpî yenyakaꞌmai moropai mîîkîrîya mîrîrî ke tiaron 5.000 kaisarî eporîꞌpî.
17 Mîrîrî warantî nîrî mîîkîrî 2.000 kaisarî yapisîtîponya yenyakaꞌmaꞌpî. Moropai tiaron eporîꞌpîiya mîrîrî ke 2.000 kaisarî.
18 Tîîse tiaron warayoꞌ 1.000 kaisarî pîrata enaꞌpî yapisîtîpon epaꞌkaꞌpî. Moropai aꞌta yakaꞌpîiya non yai. Moropai mîrîrî tîkaraiwarî tîniru yuꞌnaꞌtîꞌpîiya non yaꞌ.
19 Moropai kureꞌne tîîkoꞌmamî tîpo, toꞌ karaiwarî ennaꞌpoꞌpî. Moropai toꞌ nîkupîꞌpî anepuꞌpai awanîꞌpî, toꞌ eesenyakaꞌmaꞌpî konekapa kaiꞌma toꞌ yarakkîrî.
20 Mîrîrî yeꞌnen mîîkîrî eꞌmaiꞌnon 5.000 kaisarî pîrata enaꞌpî yapisîtîpon erepamîꞌpî iipia, moropai 10.000 kaisarî tînirurîꞌpî rumakaꞌpîiya. Taꞌpîiya: “Seeniꞌ manniꞌ uupia itîrîya neꞌtîkini, 5.000 pîrata enaꞌpî ke tiaron eporîꞌpîuya 5.000 kaisarî”, taꞌpîiya tîkaraiwarî pîꞌ.
21 Mîîkîrî pîꞌ taꞌpî ikaraiwarîya: “Morî pe puꞌkuru man, innape yairî puꞌkuru ikonekasaꞌya nai”, taꞌpîiya. “Mîrîrî yeꞌnen aapia tuꞌkan ankoꞌmannîpî ton tîrîuya, morî pe eesenyakaꞌmasaꞌ yeꞌnen. Mararon tîrîꞌpîuya aapia, tîîse morî pe yenyakaꞌmasaꞌya nai. Mîrîrî yeꞌnen asiꞌkî uyarakkîrî aatausinpapa”.
22 Moropai tiaron ipoitîrî 2.000 kaisarî pîrata enaꞌpî yapisîtîpon erepamîꞌpî iipia. Moropai taꞌpîiya tîkaraiwarî pîꞌ: “Uupia 2.000 pîrata enaꞌpî tîrîꞌpîya. Mîrîrî ke seeniꞌ eposauꞌya sîrîrî inîꞌ panpîꞌ 2.000 kaisarî”, taꞌpîiya.
23 Mîîkîrî pîꞌ ikaraiwarîya taꞌpî: “Morî pe puꞌkuru man, upoitîrî”, taꞌpîiya. “Morî pe mararî untîrîꞌpî yenyakaꞌmasaꞌya nai. Mîrîrî yeꞌnen inîꞌ panpîꞌ aapia tuꞌkan tîrîuya, ankoꞌmannîpî ton. Mîrîrî yeꞌnen asiꞌkî uyarakkîrî aatausinpapa”, taꞌpîiya.
24 Mîrîrî tîpo tiaron ipoitîrî 1.000 kaisarî pîrata enaꞌpî yapisîtîpon erepamîꞌpî iipia moropai taꞌpîiya: “Ukaraiwarî, ayeseru epuꞌtî pîꞌ wai, ariꞌkeꞌ pe awanî. Mararî eesenyakaꞌma tanne tuꞌke îꞌ eponen pe. Moropai oꞌnon pata îꞌ tîpînse pra miarî imoꞌkanen amîrî mararî pra.
25 Mîrîrî yeꞌnen uurî wanîꞌpî eranneꞌ pe amîrî pîꞌ. Saꞌman amîrî. Mîrîrî yeꞌnen seeniꞌ pîrata ayemanne yuꞌnaꞌtîꞌpîuya itîꞌkauya namai. Mîrîrî manaꞌpouya sîrîrî aapia yapisîꞌpîuya warantîrî”, taꞌpîiya.
26 Mîîkîrî pîꞌ taꞌpî ikaraiwarîya: “Amîrî wanî mîrîrî imakuiꞌpî pe, moropai enyaꞌne pe awanî mîrîrî. Anenyakaꞌma pe itîîsaꞌ yenyakaꞌmasaꞌya pra awanî. Epuꞌnen amîrî uyeseru, mararî esenyakaꞌma tanne, tuꞌke îꞌ eponen pe uurî wanî. Moropai îꞌ tîpînse pra îꞌ moꞌkanen pe uurî wanî mararî pra”, taꞌpîiya.
27 “Tîîse îꞌ waniꞌ awanî yeꞌnen mîrîrî utînirurî pîrata enaꞌpî tîrîya pra awanîꞌpî itewîꞌ ta itaponseꞌ pona? Sîrîrî itîîsaꞌya ya ennaꞌposaꞌ yai, inîꞌ panpîꞌ eepansaꞌ tanne eporîuya eꞌpainon” taꞌpî ikaraiwarîya.
Mîrîrî taa tîpo tiaronkon tîpoitîrîtonon winîkîi eeraꞌtîꞌpî moropai taꞌpîiya:
28 “Mîîkîrî pia manniꞌ pîrata enaꞌpî moꞌkatî. Mîrîrî tîîtî manniꞌ miaꞌ tamîꞌnawîron pîrata enaꞌpî yarakkîron pia”, taꞌpîiya.
29 Tîîse taꞌpî toꞌya: “Îꞌ ton pe see mîîkîrî miaꞌ tamîꞌnawîronya inîꞌ panpîꞌ yapisî?” taꞌpî toꞌya. Moropai toꞌ maimu yuukuꞌpîiya: “Inna, tauya sîrîrî apîꞌnîkon. Manniꞌ tuꞌke panpîꞌ yapisîtîponya yapisî eꞌpai awanî sîrîrî tuꞌke panpîꞌ. Tîîse anîꞌ wanî ya mararon yarakkîrî, mîrîrî konekasaiꞌya pra awanî yeꞌnen iipiapai imoꞌka eꞌpai awanî, îꞌ ton pra aweꞌtoꞌpe”, taꞌpîiya.
30 Moropai taꞌpîiya: “Tarîpai mîîkîrî enyaꞌne imakuiꞌpî pe tîweꞌsen yenumî eꞌpai awanî ewaron ta aweꞌtarumaꞌtîtoꞌpe. Mîîkîrî karau mararî pra miarî teekon tîpaꞌtîi”, taꞌpîiya toꞌ pîꞌ —taꞌpî Jesusya.
Tiwinanoꞌpî Wei Yainon
31 Jesusya teeseurîmatoꞌ yaretîꞌkaꞌpî see warantî: —Îꞌ pensa uurî kaꞌ poinon iipîꞌpî erepamî ya inîꞌrî, ipîkku pe, rei pe, tamîꞌnawîronkon upoitîrîtonon inserîyamîꞌ pokonpe uuipî. Uyaponseꞌ pona teereutai uuipî pe man pemonkonyamîꞌ esaꞌ pe.
32 Mîrîrî yai tamîꞌnawîronkon pemonkonyamîꞌ pata ponkon emurukuntî kupî sîrîrî urawîrî. Uurîya pemonkonyamîꞌ menka pe man, manniꞌ carneiroyamîꞌ eraꞌmanenya bodeyamîꞌ menka carneiroyamîꞌ koreꞌtapai teken toꞌ eꞌtoꞌpe warantî.
33 Toꞌ menkauya yai carneiroyamîꞌ tîrîuya umeruntîri winî. Moropai bodeyamîꞌ tîrîuya kamaiꞌ winî toꞌ eꞌtoꞌpe.
34 Tarîpai mîrîrî yai, uurî, ipîkku ayepurukonya taa kupî sîrîrî inkamoro meruntî winonkon pîꞌ: “Asiꞌtî uupia amîrîꞌnîkon Paapa nîpîikaꞌtîꞌsan asiꞌtî. Aapiaꞌnîkon tîntîrî pe Paapa nîkonekaꞌpî yapiꞌtaneꞌtî. Pena sîrîrî konekaꞌpî Paapaya maasa pata koneka tîuya rawîrî, apataꞌseꞌkon ton konekaꞌpîiya, aapiaꞌnîkon itîrîpa kaiꞌma.
35 Maasa pra emiꞌne wanî tanne uyaꞌreꞌ ton tîrîꞌpîyaꞌnîkon. Moropai tuna aninnîpai wanî tanne uwoꞌpaꞌpîyaꞌnîkon. Moropai ayewîꞌkon ta erepamîꞌpî, anepuꞌtîkon pe pra siꞌma tîîse uyapisîꞌpîyaꞌnîkon ayewîꞌkon ta.
36 Moropai ipon pra uurî wanîꞌpî tîîse upon ton tîrîꞌpîyaꞌnîkon. Moropai priꞌya pra wanî tanne upîꞌ eesenyakaꞌmaꞌpîkon. Moropai amaꞌyeꞌkon atarakkantoꞌ ta wanî tanne, uyeraꞌmapîꞌse attîꞌpîkon”.
37 Mîrîrî taiya manniꞌ ekaranmapo inkamoro morîkonya. Taa toꞌya: “Anna yepotorî, îꞌ pensa see emiꞌne awanî tanne, ayaꞌreꞌ ton tîrîꞌpî annaya? Moropai tuna aninnîpai awanî tanne awoꞌpaꞌpî annaya?
38 Anna yepotorî, îꞌ pensa see kaꞌran pe awanî tanne, anna nepuꞌtî pe pra awanî tanne, ayapisîꞌpî annaya anna yewîꞌ ta? Moropai îꞌ pensa ipon pra awanî eraꞌmaꞌpî annaya apon ton tîrîꞌpî annaya?” taa toꞌya.
39 “Moropai îꞌ pensa see amîrî eraꞌmaꞌpî annaya priꞌya pra apîꞌ anna esenyakaꞌmatoꞌpe? Moropai îꞌ pensa amaꞌyeꞌkon atarakkantoꞌ yewîꞌ ta awanî tanne ayeraꞌmapîꞌse anna wîtîꞌpî?”
40 Mîrîrî yai ayepurukonya yuuku: “Tauya sîrîrî apîꞌnîkon, mîrîrî kupîꞌpîyaꞌnîkon manniꞌkan uyaꞌmiꞌsan pîꞌ moropai uyonpayamîꞌ pîꞌ. Tîîse inkamoro pîꞌ pra ikupîꞌpîyaꞌnîkon tîîse upîꞌ” taiya.
41 Mîrîrî yai taa ayepurukonya kupî sîrîrî, manniꞌkan kamaiꞌ winonkon pîꞌ: “Uupiapai atarimatî amîrîꞌnîkon Paapa nîtîrî anapiꞌpaiꞌnîkon pepîn, atîtî ituꞌse awanîꞌpîkon apoꞌ yaꞌ. Mîrîrî apoꞌ Paapa nîkupîꞌpî makui moropai ipemonkonoyamîꞌ itansuriyamîꞌ pataꞌseꞌ pe. Mîrîrî yaꞌ atîtî”, tauya.
42 “Maasa pra emiꞌne wanî tanne, uyaꞌreꞌ ton tîîsaꞌyaꞌnîkon pra naatîi. Moropai tuna aninnîpai wanî tanne uwoꞌpasaꞌyaꞌnîkon pra naatîi.
43 Moropai uyapiꞌsaꞌyaꞌnîkon pra naatîi ayewîꞌkon ta kaꞌran pe wanî yeꞌnen. Moropai ipon pra eꞌtarumaꞌtî tanne, upon ton tîîsaꞌyaꞌnîkon pra naatîi. Moropai priꞌya pra wanî tanne, moropai amaꞌyeꞌkon atarakkantoꞌ ta wanî tanne, uyeraꞌmapîꞌse attîsaꞌkon pra naatîi”.
44 Mîrîrî pîꞌ ekaranmapo toꞌya kupî sîrîrî: “Anna Yepotorî, îꞌ pensa see emiꞌne awanî eraꞌmaꞌpî annaya? Moropai tuna aninnîpai awanî eraꞌmaꞌpî annaya? Moropai îꞌ pensa anna yewîꞌ ta eerepamîꞌpî anna nepuꞌtî pe pra siꞌma? Moropai îꞌ pensa ipon pra awanî eraꞌmaꞌpî annaya? Moropai îꞌ pensa priꞌya pra awanîꞌpî, îꞌ pensa amaꞌyeꞌkon atarakkantoꞌ ta awanî tanne, ayeraꞌmapîtî annaya pra awanîꞌpî?” taa toꞌya.
45 Ayepurukonya yuuku pe man: “Yairî tauya sîrîrî amîrîꞌnîkon pîꞌ. Tuꞌke iteꞌka insanan pemonkonyamîꞌ ipîikaꞌtîpainokon pîikaꞌtîsaꞌyaꞌnîkon pra naatîi, nem tiwinan ipîkku pepîn pîikaꞌtîsaꞌyaꞌnîkon pra naatîi. Inkamoro pepîn neken tîîse uurî pîikaꞌtîsaꞌyaꞌnîkon pepîn mîrîrî”.
46 Sîrîrî warantî Jesusya teeseurîmatoꞌ yaretîꞌkaꞌpî. —Mîrîrî yeꞌnen insamoro wîtî pe man uupiapai, ipatîkarî toꞌ eꞌtarumaꞌtîtoꞌpe. Tîîse morîkon wîtî pe man uupia ipatîkarî enen toꞌ koꞌmannîtoꞌpe —taꞌpî Jesusya.
