Jesus Cristo Yekare Mateus Nîmenukaꞌpî 27:1-66
27 Pata erenmapî pe, tamîꞌnawîronkon teepîremasanon esanon, moropai Judeuyamîꞌ panamanenan emurukuntîꞌpî. Îꞌ kaiꞌma Jesus kupî tîuyaꞌnîkon pîꞌ eseurîmai iwîkonpa.
2 Moropai inkamoroya surarayamîꞌ yaipontîꞌpî Jesus yaironpîtîtoꞌpe toꞌya. Moropai mîîkîrî rumakaꞌpî toꞌya pata esaꞌ Pilatos pia.
Iteyatonon Pia Jesus Rumakatîpon Judas Saꞌmanta
3 Mîrîrî warantî Jesus wîî toꞌya epuꞌtî tîuya pe, Judas, Jesus rumakatîpon esewankonoꞌmaꞌpî mararî pra. Moropai mîrîrî wenai Jesus rumakaꞌpî tîuya iteyatonon pia yepeꞌpî tîniru 30 prata enaꞌpî tînapisîꞌpî manaꞌpoꞌpî teepîremasanon esanon pia moropai Judeuyamîꞌ panamanenan pia.
4 Taꞌpîiya: —Kureꞌne imakuiꞌpî kuꞌsauꞌya sîrîrî. Maasa pra îꞌ konekatîpon pepîn warayoꞌ tîrumakai aasaꞌmantatoꞌpe —taꞌpî Judasya toꞌ pîꞌ.
Imaimu yuukuꞌpî toꞌya: —Îꞌ waniꞌ kin nai, îꞌ ton pra man anna yarakkîrî. Tîîse amîrî yarakkîrî neken.
5 Mîrîrî taa toꞌya yeꞌnen, Judasya tîniru papoꞌpî epîremantoꞌ yewîꞌ ta, moropai eepaꞌkaꞌpî. Moropai attîꞌpî, mîîkîrî eꞌmutunukuꞌpî moropai aasaꞌmantaꞌpî.
6 Mîrîrî tîniru yapisîꞌpî teepîremasanon esanonya moropai mîrîrî pîꞌ taꞌpî toꞌya: —Sîrîrî tîniru wanî pepîn morî pe, uurîꞌnîkonya itîrî ya epîremantoꞌ yewîꞌ pratarî koreꞌta. Maasa pra sîrîrî wanî tîîsaꞌmantasen yepeꞌpî pe itîîsaꞌ —taꞌpî toꞌya.
7 Tamîꞌnawîrî mîrîrî pîꞌ teeseurîmakon tîpo mîrîrî tîniru ke tiwin pata yennaꞌpî toꞌya, kamote kaꞌnen pataꞌseꞌ. Mîrîrî pata yaꞌ kaꞌranyamîꞌ saꞌmantasaꞌ yuꞌnaꞌtîtoꞌ ton yennaꞌpî toꞌya.
8 Mîrîrî yeꞌnen mîrîrî pata toꞌ nennaꞌpî esatî toꞌya sîrîrî tîpose mîn pataꞌseꞌ kaiꞌma. Maasa pra anîꞌ saꞌmantatoꞌ wenai yennaꞌpî toꞌya.
9 Sîrîrî warantî penaroꞌ Paapa maimu ekaremeꞌnen profeta Jeremias nurîꞌtîya taasaꞌ yawîrî aweꞌkupîꞌpî.Inkamoroya tîniru yapisîꞌpî 30 prata enaꞌpî kaisarî. Mîrîrî warapo ayeꞌma annaya taꞌpî Judeuyamîꞌya yawîrî.
10 Moropai mîrîrî ke pata yennaꞌpî toꞌya, kamote kaꞌnen pataꞌseꞌ. Îꞌ kaiꞌma taꞌpî Uyepotorîya yawîrî ikuꞌtoꞌpeuya
taꞌpî profeta Jeremias nurîꞌtîya.
Jesus Wanî Pilatos Rawîrî
11 Mîrîrî tanne, pata esaꞌ Pilatos rawîrî Jesus wanî yai, Pilatosya ekaranmapoꞌpî. Taꞌpîiya: —Amîrî, mîîkîrî Judeuyamîꞌ esaꞌ pe tîweꞌsen? —taꞌpîiya. —Inna, amîrîya taa mîrîrî —taꞌpî Jesusya.
12 Tîîse inkamoro teepîremasanon esanon, moropai Judeuyamîꞌ panamanenan maimu yuuku Jesusya pra awanîꞌpî.
13 Moropai Pilatosya taꞌpî: —Toꞌ maimu yuukuya pepîn. “Mararon pepîn imakuiꞌpî kuꞌsaiꞌya”, taa pîꞌ toꞌ man apîꞌ. Mîrîrî etaya pra nan?
14 Tîîse Jesus eseurîma pra awanîꞌpî. Moropai mîrîrî pîꞌ pata esaꞌ Pilatos wanîꞌpî mararî pra teesenumenkai ipîꞌ.
Jesus Rumaka Toꞌya Îꞌ Kuꞌtoꞌpe Toꞌya
15 Pilatosya festa, iteseꞌ Páscoa kaisarî, tînarakkamoꞌpî rumaka eꞌpîtîꞌpî atarakkannîtoꞌ tapai. Manniꞌ pemonkonyamîꞌ nesatîꞌpî teseru yaꞌ, mîîkîrî rumakaiya.
16 Mîrîrî yai atarakkannîtoꞌ ta, tiwin warayoꞌ wanîꞌpî tamîꞌnawîronkon nepuꞌtî Barrabás.
17 Mîrîrî yai arinîkon pemonkonyamîꞌ emurukuntîꞌsan ekaranmapoꞌpî mîîkîrî pata esaꞌ Pilatosya. —Anîꞌ rumakauya yuꞌse naatî, Jesus Paapa nîmenkaꞌpî, Barrabás kaꞌrî? —taꞌpîiya.
18 Ipîꞌ tîkinmukon yeꞌnen, Jesus eneꞌsaꞌ toꞌya epuꞌtîꞌpî Pilatosya.
19 Moropai ipîkku pe tîweꞌtoꞌ yaponseꞌ pona Pilatos ereutasaꞌ tanne, inoꞌpîya tîmaimu yarimaꞌpî taatoꞌ see warantî: —Mîîkîrî warayoꞌ winîkîi îꞌ kîꞌkupîi, maasa pra morî puꞌkuru mîîkîrî, îꞌ kupîtîpon pepîn. Maasa pra sîrîrîpe uweꞌneꞌ eꞌtarumaꞌtî pîꞌ wai mararî pra, mîîkîrî wenai —taasaiꞌya wanîꞌpî.
20 Tîîse teepîremasanon esanonya taꞌpî moropai Judeuyamîꞌ panamanenanya tamîꞌnawîronkon pîꞌ: —Barrabás rumakaya yuꞌse anna man kaꞌtî ipîꞌ —taꞌpî toꞌya. —Moropai Jesus wîî meꞌpotoꞌpeiya —taꞌpî toꞌya.
21 Inîꞌrî pata esaꞌya tamîꞌnawîronkon pemonkonyamîꞌ ekaranmapoꞌpî: —Oꞌnon yeꞌka rumakauya yuꞌse naatî? Yuukuꞌpî toꞌya: —Barrabás rumakakî —kaiꞌma imaimu yuukuꞌpî toꞌya.
22 Inîꞌrî Pilatosya taꞌpî toꞌ pîꞌ: —Moriya îꞌ kin kupîuya eꞌpainon mîserî Jesus manniꞌ Cristo tesaꞌsen yarakkîrî? —Pakîꞌnan pona ipokapîtî meꞌpokî —taꞌpî tamîꞌnawîronkonya Pilatos pîꞌ.
23 Pilatosya taꞌpî inîꞌrî toꞌ pîꞌ: —Îꞌ kin imakuiꞌpî inkupîꞌpî moro nai mîîtoꞌpe? —taiya yeꞌnen, tamîꞌnawîronkon entaimepîtîꞌpî —Pakîꞌnan pona ipokapîtî meꞌpokî —taꞌpî toꞌya ipîꞌ.
24 Mîrîrî warantî îꞌ koneka tîuya eserîke pra tîwanî Jesus yarakkîrî epuꞌtîꞌpî Pilatosya. Moropai Pilatosya tîpîꞌ pemonkonyamîꞌ ekoreꞌma epuꞌtîꞌpî. Mîrîrî yeꞌnen tuna enepî meꞌpoꞌpîiya. Moropai mîrîrî ke tenya ronaꞌpîiya, îꞌ ton pra tîwanî ekaremekîpa mîîkîrî yarakkîrî, arinîkon pemonkonyamîꞌ rawîrî siꞌma. Moropai taꞌpîiya: —Uurî wanî pepîn mîserî warayoꞌ saꞌmantantoꞌ esaꞌ pe. Tîîse amîrîꞌnîkonya ikupî sîrîrî —taꞌpîiya.
25 Moropai tamîꞌnawîronkonya yuukuꞌpî: —Mîîkîrî saꞌmantatoꞌ wenai, tîwî anna pona eꞌtarumaꞌtîntoꞌ nenai, moropai anna munkîyamîꞌ pona eena —taꞌpî toꞌya.
26 Mîrîrî taasaꞌ toꞌya pe, Pilatosya Barrabás rumakaꞌpî atarakkannîtoꞌ tapai. Tîîse Jesus poꞌpîꞌtoꞌpe toꞌya taꞌpî Pilatosya pemonkon poꞌpîꞌtoꞌ ke, moropai irumakaꞌpîiya pakîꞌnan pona ipokapîꞌtoꞌpe toꞌya.
Surarayamîꞌ Woꞌmaꞌta Jesus Pîꞌ
27 Moropai surarayamîꞌya Jesus yarîꞌpî pata esaꞌ Pilatos yewîꞌ ta. Moropai tamîꞌnawîronkon surarayamîꞌ emurukuntîꞌpî iwoi.
28 Inkamoroya Jesus pon moꞌkaꞌpî ipokon moropai ipataꞌpî yaꞌ tiaron taꞌsankon suuyu yekaꞌmaꞌpî toꞌya, ipon ton.
29 Moropai Jesus yarakko ton konekaꞌpî toꞌya mîꞌnî yeꞌ ke rei yarakko, coroa warantî. Ipîꞌ tîwoꞌmaꞌtakon yeꞌnen, rei pe ikupîꞌpî toꞌya. Moropai rei meꞌsipu yeꞌka tîrîꞌpî toꞌya itenyaꞌ meruntî winî. Mîrîrîkon tîrî tîpo, toꞌ eꞌsekunkaꞌpî irawîrî. Moropai inkamoro woꞌmaꞌta piaꞌtîꞌpî ipîꞌ. Taꞌpî toꞌya: —Anna yepuru pe awanî, Jesus. Amîrî wanî Judeuyamîꞌ esaꞌ pe puꞌkuru awanî rei pe —taꞌpî toꞌya.
30 Mîrîrî taa yeꞌka pe, ipona tetakukon yenumîꞌpî toꞌya. Moropai manniꞌ meꞌsipu moꞌkaꞌpî toꞌya, moropai mîrîrî ke ipaꞌtîpîtîꞌpî toꞌya ipuꞌpai pona.
31 Ipîꞌ tîwoꞌmaꞌtakon tîpo, ipon tînekaꞌmaꞌpîkon suuyu moꞌkaꞌpî toꞌya. Moropai ipon puꞌkuru tîmoꞌkaꞌpîkon yekaꞌmaꞌpî toꞌya inîꞌrî. Mîrîrî tîpo Jesus yarîꞌpî toꞌya pakîꞌnan pona ipokapîꞌse.
Jesus Pokapîtî Toꞌya Pakîꞌnan Pona
32 Miarî pai teepaꞌkakon pe, warayoꞌ eporîꞌpî toꞌya Simão iteseꞌ, Cirene cidaderî pon. Moropai mîîkîrî pîꞌ taꞌpî toꞌya pakîꞌnan yaatoꞌpeiya mîrîrî Jesus narî.
33 Moropai toꞌ erepamîꞌpî pataꞌseꞌ iteseꞌ Gólgota. Mîrîrî Gólgota, pemonkon puꞌpai rîꞌpî yepin, taatoꞌ mîrîrî.
34 Miarî Jesus wuku ton tîrîꞌpî toꞌya, vinho yaiꞌmesaꞌ maiꞌ ke enîꞌtoꞌpeiya kaiꞌma. Tîîse yonpasaꞌ tîuya pe, ituꞌse pra Jesus wanîꞌpî.
35 Miarî ipokapîtîꞌpî toꞌya. Moropai Jesus pon pantakapîtîkonpa kaiꞌma tîꞌ moreꞌsan pîꞌ toꞌ suꞌminaꞌpî. Anîꞌ pia tîꞌ ena epuꞌtîꞌnîkonpa.
36 Mîrîrî tîpo toꞌ ereutaꞌpî, moropai inkamoroya Jesus konekaꞌpî miarîpai anîꞌya imoꞌka namai.
37 Inkamoroya Jesus puꞌpai yepoi imenukaꞌpî îꞌ waniꞌ awanî yeꞌnen ipokapîtî tîuyaꞌnîkon kaiꞌma. Taatoꞌ see warantî:MÎSERÎ JUDEUYAMÎꞌ ESAꞌ REI
kaiꞌma imenukaꞌpî toꞌya.
38 Moropai Jesus pokonpe asakîꞌne amaꞌyeꞌkon pokapîtîꞌpî toꞌya iratai winî, tiwin meruntî winî moropai tiwin kamaiꞌ winî.
39 Eꞌma taawîrî tuutîsanon woꞌmaꞌtaꞌpî ipîꞌ tuutîkon kaisarî.
40 —Taapîtîꞌpîya: “Epîremantoꞌ yewîꞌ yarankauya tamîꞌnawîrî. Moropai mîrîrî pîmîꞌsaꞌkauya seurîwîꞌne wei tîîse”, taꞌpîya. Innape see Paapa munmu pe awanî ya, maasa kin see autîkî pakîꞌnan poi. Aawarîrî eꞌpîikaꞌtîkî —taꞌpî toꞌya.
41 Teepîremasanon esanon moropai Moisés nurîꞌtîya yenupatoꞌ pîꞌ yenupatonkon moropai Judeuyamîꞌ panamanenan pokonpe siꞌma toꞌ woꞌmaꞌtaꞌpî Jesus pîꞌ.
42 Taꞌpî toꞌya: —Tiaronkon pîikaꞌtîpîtîꞌpîya tîîse îꞌ waniꞌ awanî yeꞌnen aawarîrî aweꞌpîikaꞌtî pepîn! Moriya Judeuyamîꞌ esaꞌ pe awanî pepîn mîrîrî. Seruꞌyeꞌ pe awanî. Maasa see autîkî mîrîrî pakîꞌnan poi, innape awautîsaꞌ eraꞌma annaya ya, innape akupî annaya —taꞌpî toꞌya ipîꞌ.
43 —Pena “Paapa narimaꞌpî uurî”, taapîtîꞌpîiya, innape Paapaya ipîikaꞌtî tîkuꞌse. Moropai “Paapa munmu uurî”, taꞌpîiya. Maasa kin see, Paapa munmu pe awanî ya, tîwî Paapaya ipîikaꞌtî sîrîrîpe, eraꞌmatoꞌpe annaya —taꞌpî toꞌya.
44 Moropai mîrîrî warantî inkamoro amaꞌyeꞌkon Jesus ratai winî ipokapîꞌsaꞌkon woꞌmaꞌtaꞌpî nîrî Jesus pîꞌ.
Jesus Saꞌmanta
45 Mîrîrî tîpo inekaꞌta pairî wei tîîse, pata ewaronpamîꞌpî. Tamîꞌnawîrî pata wanîꞌpî ewaron pe, 3 horas kaisarî aakoꞌmamîꞌpî ewaron pe.
46 Moropai koꞌmamîiya 3 horas tîîse, Jesus entaimeꞌpî meruntî ke:
—Eloi, Eloi lamá sabactâni? —taꞌpîiya tîmaimu ta. Paapa, uyun, îꞌ waniꞌ awanî yeꞌnen urumaka pîꞌ nan? taatoꞌ mîrîrî umaimukon ta.
47 Mîrîrî taa Jesusya etaꞌpî tiaronkon pemonkonyamîꞌya. Moropai taꞌpî toꞌya: —Aꞌkî, Elias, taiya —kaiꞌma toꞌ esenumenkaꞌpî tîîse yairî pra etasaꞌ toꞌya wanîꞌpî.
48 Kaꞌneꞌ pe tiwin yonpa ekaꞌtumîꞌpî tuna yuꞌnanen esponja eraꞌmai. Mîrîrî yeuronkaꞌpîiya uva yekku ka. Moropai mîrîrî tîrîꞌpîiya, yei poꞌtî pîꞌ tasiꞌtîi inta pona, Jesusya yuꞌnatoꞌpe kaiꞌma.
49 Tîîse tiaronkonya taꞌpî ipîꞌ: —Kaane, tîwî mîîkîrî nîsi. Maasa Elias iipî eraꞌmapaiꞌnîkon pakîꞌnan poi imoꞌkai, ipîikaꞌtîpa —taꞌpî toꞌya.
50 Moropai Jesus entaimeꞌpî meruntî ke tiwin kanoꞌpî pe moropai tekaton eeturumakaꞌpî, aasaꞌmantaꞌpî.
51 Mîrîrî yai epîremantoꞌ yewîꞌ, Paapa pataꞌseꞌ yuwaꞌtoꞌ kamisa eꞌkarakaꞌpî arakkita pairî, kakîsiya pai mai winîkîi non ekaya. Moropai non eserentîkîꞌmaꞌpî, moropai saꞌman pe tîweꞌsen tîꞌkon eꞌrataikaꞌpî.
52 Mîrîrî yai tuꞌkankon Paapa pemonkonoyamîꞌ eꞌtîꞌkaꞌsan uuruwasikon atarakkanmokaꞌpî. Moropai inkamoro isaꞌmantaꞌsan eꞌmîꞌsaꞌkaꞌpî.
53 Moropai inkamoro epaꞌkaꞌpî uuruwai yapai. Moropai tîîsaꞌmanta tîpo Jesus eꞌmîꞌsaꞌkasaꞌ yai inkamoro ewomîꞌpî Jerusalém cidaderî pona, oꞌnon pata tuꞌkankonya toꞌ eraꞌmaꞌpî.
54 Surarayamîꞌ yepotorî Romanoya, moropai mîîkîrî yarakkîrî tîweꞌsanonya, Jesus eraꞌma pîꞌ tîweꞌsanon anîꞌya imoꞌka namai, inkamoroya pata eserentîkîꞌma eraꞌmaꞌpî tamîꞌnawîrî mîrîrî tîweꞌkuꞌsen. Mîrîrî yeꞌnen eranneꞌ pe toꞌ enaꞌpî mararî pra. Moropai taꞌpî toꞌya: —Aꞌkî, innape Paapa munmu pe aweꞌsaꞌ man —taꞌpî toꞌya.
55 Miarî wîriꞌsanyamîꞌ wanîꞌpî aminke siꞌma, Jesus eraꞌma pîꞌ tîweꞌsanon. Inkamoro wîriꞌsanyamîꞌ wanîꞌpî Jesus wenairî itîꞌsan Galiléia poi ipîikaꞌtîi ituꞌse aweꞌtoꞌ pîkîrî.
56 Inkamoro wanîꞌpî Maria Madalena, moropai Maria, Tiago moropai itakon José yankon, moropai Zebedeu munkîyamîꞌ yankon wanîꞌpî.
Jesus Yuꞌnaꞌtî Toꞌya
57 Pata ewaronpamî kupî tanne, ipîkku warayoꞌ, José iteseꞌ, Arimatéia cidaderî pon erepamîꞌpî. Mîîkîrî wanîꞌpî innape Jesus kuꞌnen pe.
58 Mîîkîrî José wîtîꞌpî Pilatos pia Jesus esaꞌrîꞌpî esaꞌse yuꞌnaꞌtîpa, moropai Pilatosya itîîtoꞌpe toꞌya taꞌpî.
59 Mîrîrî yeꞌnen Jesus esaꞌrîꞌpî yapisîꞌpîiya. Moropai iwontîꞌpîiya amenan itaꞌsan morî puꞌkuru kamisa linho ke.
60 Moropai mîîkîrî yaraꞌtîꞌpîiya ituruwasi pe ikonekasaꞌ, saꞌman tîꞌ yai, amenrî toꞌ nîkonekaꞌpî yaꞌ. Moropai mîrîrî uuruwai yettapuru pe ikonekasaꞌ kureꞌnan tîꞌ ke yettapurîꞌpîiya. Moropai mîrîrî tîpo attîꞌpî miarî pai.
61 Mîrîrî kupîiya eraꞌmaꞌpî Maria Madalenaya moropai tiaron Maria nîrî wanîꞌpî miarî. Mîrîrî uuruwai pia toꞌ ereutasaꞌ wanîꞌpî.
Surarayamîꞌya Uuruwai Eraꞌma Iipia Siꞌma
62 Tiaron wei yai, sexta feira esuwaꞌkasaꞌ tanne, teepîremasanon esanon moropai fariseuyamîꞌ emurukuntîꞌpî pata esaꞌ Pilatos pia.
63 Moropai inkamoroya taꞌpî pata esaꞌ governador pîꞌ: —Anna yepotorî, anna enpenatan pîꞌ man manniꞌ seruꞌyeꞌya taꞌpî pîꞌ. Pena enen tîwanî yai, taꞌpîiya: “Eseurîwîꞌne wei tîpo eꞌmîꞌsaꞌka kupî sîrîrî”, taꞌpîiya —taꞌpî toꞌya.
64 —Mîrîrî yeꞌnen uuruwai eraꞌmanenan tonkon surarayamîꞌ yarimakî, morî pe eraꞌmatoꞌpe toꞌya iteseurîno wei pîkîrî neken. Maasa pra inenupaꞌsanya itesaꞌrîꞌpî yamaꞌrunpa namai. Moropai yamaꞌrunpa tîpo taa toꞌya: “Mîîkîrî eꞌmîꞌsaꞌkan pîꞌ man”, taa toꞌya seruꞌyeꞌ pe. Eꞌmaiꞌ pe seruꞌ pe Jesus wanîꞌpî yentai, seruꞌ pe toꞌ wanî —taꞌpî toꞌya.
65 Mîrîrî pîꞌ taꞌpî Pilatosya: —Insamoro surarayamîꞌ yaatî, uuruwai erasiꞌtîi. Atîtî uuruwai eraꞌmai. Morî pe meraꞌmatîi, eraꞌmayaꞌnîkon pîkîrî —taꞌpîiya.
66 Moropai inkamoro wîtîꞌpî. Inkamoroya uuruwai yettapuru konekaꞌpî moronpî ke, selo pe tîkuꞌse aatarakkanmoka namai. Moropai eraꞌmanenan tonkon nîmîꞌpî toꞌya, morî pe uuruwai eraꞌmatoꞌpe toꞌya.
