Jesus Cristo Yekare Mateus Nîmenukaꞌpî 28:1-20
28 Judeuyamîꞌ erîꞌkaꞌtoꞌ weiyu esuwaꞌkasaꞌ tanne, eꞌmaiꞌnon wei yai, domingo yai, maasa pata erenmapî pra tîîse, Maria Madalena moropai tiaron Maria pokonpe toꞌ wîtîꞌpî uuruwai pona eraꞌmai.
2 Mîrîrî yai kaꞌneꞌ pe kureꞌne pata eꞌtînkaꞌpî. Uyepotorîkon narimaꞌpî inserî erepamîꞌpî kaꞌ poi. Mîîkîrîya uuruwai yettaputoꞌ tîꞌ moꞌkaꞌpî moropai mîrîrî pona eereutaꞌpî.
3 Mîîkîrî wanîꞌpî waraꞌnapiya sisiu taatoꞌ warantî. Moropai ipon wanîꞌpî aimutun pe, imu warantî.
4 Mîrîrî pîꞌ mîrîrî uuruwai eraꞌmanenan surarayamîꞌ enaꞌpî eranneꞌ pe. Mararî pra tîtîtî pe toꞌ esiꞌnîꞌsaꞌ wanîꞌpî. Inkamoro esenumîꞌpî non pona, isaꞌmantaꞌsan warantî.
5 Mîrîrî yeꞌnen inserîya taꞌpî inkamoro wîriꞌsanyamîꞌ pîꞌ: —Eranneꞌ pe pra eꞌtî. Jesus yuwayaꞌnîkon epuꞌtî pîꞌ wai seruꞌ pepîn, manniꞌ pakîꞌnan pona toꞌ nîpokapîtîꞌpî.
6 Tîîse tarî anîꞌ ton pra man. Mîîkîrî eꞌmîꞌsaꞌkan pîꞌ man, taꞌpî tîuya neꞌtîkini yawîrî. Maasa ipataꞌpî eraꞌmataneꞌtî oꞌnon pata itîrîꞌpî toꞌya pataꞌpî.
7 Tarîpai kaꞌneꞌ pe atîtî ekaremeꞌse inenupaꞌsan pîꞌ. “Mîîkîrî eꞌmîꞌsaꞌkan pîꞌ man”, kaꞌtantî. Moropai “Mîîkîrî wîtî pe man arawîrîꞌnîkon Galiléia pona. Miarî eraꞌmayaꞌnîkon kupî sîrîrî”, kaꞌtantî toꞌ pîꞌ. Mîrîrî yekare ekaremekî pîꞌ wai apîꞌnîkon —taꞌpîiya.
8 Inkamoro wîtîꞌpî kaꞌneꞌ pe teekaꞌtunse uuruwai poi. Maasa pra mararî pra toꞌ esiꞌnîꞌsaꞌ wanîꞌpî. Tîîse toꞌ atausinpasaꞌ wanîꞌpî nîrî mararî pra. Mîrîrî yeꞌnen Jesus nenupaꞌsan pîꞌ ekaremeꞌse toꞌ wîtîꞌpî.
9 Toꞌ wîtî tanne, kaꞌneꞌ pe Jesusya toꞌ eporîꞌpî. Moropai taꞌpîiya: —Tîwamîn wanî aapiaꞌnîkon!
Mîrîrî taiya pe toꞌ erepamîꞌpî aminke pra iipia. Inkamoro eꞌsekunkaꞌpî irawîrî. Inkamoroya Jesus puu pîꞌ tapiꞌse yapurîꞌpî.
10 Moropai Jesusya taꞌpî: —Eranneꞌ pe pra eꞌtî, tîîse atîtî uyonpayamîꞌ pîꞌ ekaremeꞌse toꞌ wîtîtoꞌpe Galiléia pona. Miarî uyeraꞌmatoꞌpe toꞌya —taꞌpî Jesusya.
Seruꞌyeꞌ Pe Surarayamîꞌ Wanî
11 Inkamoro wîriꞌsanyamîꞌ tîîse eꞌma ta, tiaronkon, uuruwai eraꞌmanenan surarayamîꞌ ennaꞌpoꞌpî cidade pona. Moropai inkamoroya teepîremasanon esanon pîꞌ tamîꞌnawîrî îꞌ kaiꞌma aweꞌkuꞌsaꞌ ekaremekîꞌpî.
12 Inkamoro emurukuntîꞌpî teserukon pîꞌ teeseurîmakonpa Judeuyamîꞌ panamanenan pokonpe siꞌma. Inkamoroya ikonekaꞌpî. Mîrîrî yeꞌnen surarayamîꞌ pia tîniru tîrîꞌpî toꞌya mararî pra.
13 Moropai toꞌ yaipontîꞌpî toꞌya: —Kaꞌtantî “Inenupaꞌsan iipîꞌpî man, mîrîrî pe ewaron yaꞌ anna wetun tanne. Inkamoroya Jesus esaꞌrîꞌpî yamaꞌrunpaꞌpî man”, makatîi.
14 Mîrîrî etasaꞌ pata esaꞌya ya, “Inna toꞌ seruku pepîn mîrîrî”, taa annaya ipîꞌ. Mîrîrî warantî awanîꞌpî man, seruꞌ pîn taatoꞌpe annaya. Mîrîrî yeꞌnen îꞌ eꞌkupî pepîn amîrîꞌnîkon yarakkîrî.
15 Inkamoro surarayamîꞌya tîniru yapisîꞌpî. Moropai îꞌ kaiꞌma teepîremasanon esanonya taꞌpî yawîrî ikupîꞌpî toꞌya. Mîrîrî seruꞌ pe toꞌ eꞌtoꞌ esetaꞌpî Judeuyamîꞌ koreꞌta pîꞌ mîrîrî yai. Sîrîrî pe rî seruꞌ pe toꞌ eꞌtoꞌ koꞌmamî sîrîrî tîpose.
Jesus Esenpo Tînenupaꞌsan Pia
16 Inkamoro Jesus nenupaꞌsan tiwin puꞌ pona tîîmoꞌtaiꞌnîkon wîtîꞌpî Galiléia pona. Inkamoro erepamîꞌpî wîꞌ Jesus nekaremekîꞌpî pia.
17 Miarî teerepansaꞌkon pe, Jesus eraꞌmaꞌpî toꞌya. Moropai yapurîꞌpî toꞌya. Tîîse tiaronkonya innape ikupî pra awanîꞌpî.
18 Mîrîrî yeꞌnen Jesus erepamîꞌpî toꞌ pia aminke pra. Moropai taꞌpîiya:
—Tamîꞌnawîron meruntî yapisîꞌpîuya kaꞌ po moropai non po.
19 Mîrîrî yeꞌnen ayaipontîuyaꞌnîkon sîrîrî. Atîtî tamîꞌnawîronkon pemonkonyamîꞌ koreꞌta. Moropai inkamoro mîmatîi upemonkono pe tamîꞌnawîrî. Innape ukupî toꞌya wenai toꞌ menpatakonatîi uyun, Paapa eseꞌ pîꞌ, moropai uurî, inmu eseꞌ pîꞌ, moropai Morî Yekaton Wannî eseꞌ pîꞌ.
20 Moropai inkamoro menupatîi tamîꞌnawîrî îꞌ taꞌpîuya yawîrî toꞌ komantoꞌpe, umaimu yawîrî. Moropai enpenatatî aapiaꞌnîkon uurî koꞌmamî pe wai wei kaisarî. Amîrîꞌnîkon rumakauya pepîn. Sîrîrî pata ataretîꞌka pîkîrî aapiaꞌnîkon uukoꞌmamî —taꞌpî Jesusya.
